နိုင်ငံရေးမှူးရဲဘော်စိုးသိမ်းနဲ့အတူ ဖြတ်သန်းခဲ့ရတဲ့
တော်လှန်ရေးဘဝများ
ရဲဘော်ခင်မောင်ဝင်း
၁၉၇ဝ ခု ရန်ကုန်တက္ကသိုလ်
ရွှေရတုအထိမ်းအမှတ်လှုပ်ရှားမှုကြောင်း ကျွန်တော် ပုဒ်မ ၅ နဲ့ အဖမ်းခံရပြီး ၁၉၇၃ ဧပြီ
(၁၃) အထွေထွေ လွတ်ငြိမ်းချမ်းသာခွင့်နဲ့ အင်းစိန်ထောင်က လွတ်လာတယ်။ ထောင်ကလွတ်ပြီး
၆ လကျော်လောက်ရှိတော့ လာရှိုးကားလမ်းကနေ ဗမာပြည်ကွန်မြူနစ်ပါတီ လွတ်မြောက်ရေးအခြေခံဒေသ
ကိုးကန့်ခရိုင်သို့ ပြည်သူဒီမိုကရေစီတော်လှန်ရေးမှာပါဝင်ဖို့ တောခိုခဲ့တယ်။
ကိုးကန့်ခရိုင် ရှေ့တန်းတပ်မှူး ရဲဘော်ညွန့်မောင်ကူညီမှုနဲ့ ကိုးကန့်ခရိုင်ရုံးကို
ရောက်ခဲ့တယ်။ ခရိုင်မှူး ရဲဘော်ရဲဒင် (ရဲဘော်ထွန်းလွင်၊ နောင် ၇၅ ဗဟိုကော်မတီ၊ ၈၅
တတိယအကြိမ်ကွန်ဂရက် ဗဟိုကော်မတီ)ရဲ့လုံခြုံရေးဌာနမှာ ခေတ္တနေပြီး ခရိုင်
လက်ဖက်ခြောက်စက်ရုံနဲ့၊ အရက်ချက်စက်ရုံမှာ ရဲဘော်မောင်ကြည်ဆိုတဲ့
မြင်းခြံသားတယောက်နဲ့အတူနေထိုင်ရင်း ရဲဘော်များနဲ့အတူ ထင်းခွေရေခပ်
နေ့စဉ်လုပ်ငန်းများ လုပ်ကိုင်နေခဲ့ပါတယ်။ အဲဒီလိုနဲ့ ကိုးကန်းခရိုင်ပါတီရဲ့ဆက်သွယ်ပေးမှုနဲ့
ပါတီဗဟိုနဲ့ အဆက်အသွယ်ရလာပြီးနောက် ဗမာပြည်ကွန်မြူနစ်ပါတီ အရှေ့မြောက်စစ်ဒေသ၊
ကွတ်ခိုင်ခရိုင်၊ ရှေ့တန်းလျှို့ဝှက်စခန်း (ဖိုင်ကောင်စခန်း) မှာ
ရဲဘော်မြအောင်နဲ့အတူ လျှို့ဝှက်ဝါဒဖြန့်ချိရေး ရန်သူဒေသလှုပ်ရှားရေးလုပ်ငန်းများ
ဆောင်ရွက်နေခဲ့ပါတယ်။ ၁၉၇၄ ဇန်နဝါရီလ မှာတော့ အရှေ့မြောက်စစ်ဒေသ (သံလွင်
အနောက်ခြမ်း) ဒုနိုင်ငံရေးမှူး ရဲဘော်စိုးသိမ်းရဲ့ မုံဂူ နိုင်ငံရေး၏ဌာနစခန်းကို
ရောက်ပါတယ်။ ဒါ ရဲဘော်စိုးသိမ်းနဲ့ စတင်တွေ့ခဲ့ခြင်းပါပဲ။
ရဲဘော်စိုးသိမ်းက နွေးထွေးခင်မင်စွာပဲ
သူတို့စခန်းမှာ တာဝန်ယူသွားဖို့ ပြောပါတယ်။ ဗဟို အလုပ်အဖွဲ့စခန်းကိုတော့
မသွားပါနဲ့ဦး။ ကျွန်တော်တို့မှာ ကေဒါ မလုံလောက်ဘူး။ ဒီမှာပဲလုပ်ပါလို့ဆွေးနွေးပြီး
ဗဟိုရဲ့သဘောတူညီမှုအရ သူ့ရဲ့အတွင်းရေးမှူးတာဝန်ကို ပေးလို့ ဒီတာဝန်ကိုပဲ ပထမဆုံး
ယူခဲ့ရပါတယ်။
ရဲဘော်စိုးသိမ်းရဲ့
နေထိုင်စားသောက်မှုဟာ ရိုးစင်းပါတယ်။ မျက်မှန်ထူထူနဲ့ ဟန်ပန်ကင်းပြီး
လယ်သမားကေဒါကြီးတယောက်နဲ့ တူပါတယ်။ အဲဒီအချိန်က အရှေ့မြောက်စစ်ဒေသဟာ လူအင်အား၊
လက်နက်အင်အား အပြည့်အဝနဲ့ ရန်သူ့ရှေ့တန်းစခန်းတွေကို ချေမှုန်းရေးတိုက်ပွဲများ
ဖော်နေတဲ့ကာလပါ။ တချိန်တည်းမှာ ကြူကုတ်၊ ပန်ဆိုင်း၊ ဝနယ်တောင်မြောက်တို့ကို ရန်သူ့ထံမှသိမ်းပိုက်ပြီး
လွတ်မြောက်ရေးအခြေခံဒေသ ထူထောင်တာ သိပ်မကြာသေးတော့ ဒေသလုပ်ငန်းတွေ အပူတပြင်း
တိုးချဲ့လုပ်ကိုင်နေရတယ်။ မုန်းဝေ၊ မိုးကုတ်ပြောက်ကျားဒေသ တိုးချဲ့ရေး၊ ၂ဝ၂
စစ်ဒေသနဲ့ ပူးပေါင်းလှုပ်ရှားရေးစတဲ့ စစ်ရေး၊ နိုင်ငံရေးလှုပ်ရှားမှုတွေ အဆက်မပြတ်လုပ်နေပါတယ်။
ရဲဘော်စိုးသိမ်းဟာ နေ့မအိပ်ညမအိပ် အလုပ် လုပ်တတ်ပါတယ်။ မုံဂူနိုင်ငံရေးဌာနမှာ
တပတ်အတွင်း စစ်ရေး၊ နိုင်ငံရေး အခြေအနေပညာပေး အစည်းအဝေးများကို ရဲဘော်စိုးသိမ်း
အစဉ်အမြဲလုပ်လေ့ရှိပါတယ်။ တခါတရံ ရှေ့တန်းကို တပ်စုတစုလောက်နဲ့ တောင်ပေါ်ခရီးကြမ်း
ထွက်ရပါတယ်။ ကျွန်တော်လည်း ရဲဘော်စိုးသိမ်းနဲ့အတူ၊ အခြေခံဒေသ တည်ဆောက်ရေးလုပ်ငန်းတွေ၊
အစည်းဝေးမှတ်တမ်းတွေ ပြုစုရပါတယ်။ စစ်ရေးလိုအပ်ရင်လည်း ရဲဘော်စိုးသိမ်း ကိုယ်ရံတပ်ဖွဲ့နဲ့အတူ
လှုပ်ရှားရပါ တယ်။
ရဲဘော်စိုးသိမ်းရဲ့ ငယ်နာမည်ဟာ
ချစ်သိန်းဖြစ်တယ်။ သူ့ဖခင်ကဦးပါ။ စစ်ကိုင်းမြို့နယ်၊ ညောင်ကုန်းရွာမှာနေပြီး လက်မှုလုပ်ငန်း၊
ဆင်ရုပ်၊ ကျွဲရုပ်စတဲ့ ကလေးကစားစရာတွေ၊ လက်ပန်သားနဲ့ ပန်းပုရုပ်တု ထု၊ ခုံဖိနပ်ခုတ်ပြီး
အသက်မွေးဝမ်းကျောင်းတယ်လို့ သိရတယ်။ ငယ်စဉ်ကဘဲ ပါတီခေါင်းဆောင်တဲ့
ဖက်ဆစ်ဂျပန်တော်လှန်ရေးထဲပါဝင်ခဲ့သူ၊ ဗမာပြည်ကွန်မြူနစ်ပါတီရဲ့ ဖက်ဆစ်ဂျပန်တော်လှန်ရေး
စစ်သားဖြစ်တယ်။ ဂျပန်တော်လှန်ရေးပြီးတဲ့နောက် ပါတီကထုတ်ဝေတဲ့ ပြည်သူ့အာဏာနဲ့ကွန်မြူနစ်နေ့စဉ်သတင်းစာကို
ပါတီရန်ပုံငွေ အတွက် လမ်းတကာလှည့်လည် ရောင်းချခဲ့သူဖြစ်တယ်။
၁၉၄၈ ခုနှစ် မတ်လ ပြည်သူ့ဒီမိုကရေစီတော်လှန်ရေးအစပိုင်းမှာ
ဗိုလ်ရန်အောင်ရဲ့တာဝန်ပေးချက်အရ ဗဟိုဆက်သားအဖြစ် ကျောက်ဆည် သခင်တင်ရွှေကို
ရှာဖွေဆက်သွယ်ရန်ရောက်ရှိပြီးနောက် ကျောက်ဆည်တဝိုက်အခြေခံပြီး လက်နက်ကိုင်တော်လှန်ရေး
ဆင်နွှဲခဲ့ရတယ်။ ၁၉၅၁ ခုနှစ်မှာတော့ ပါတီဗဟိုရဲ့တာဝန်ပေးချက်အရ တရုတ်ပြည်သို့
ပညာတော်သင်အဖြစ် ရောက်ရှိသွားခဲ့ရပြီး မာ့က်စ်လီနင်ဝါဒတက္ကသိုလ် မှာ ၅ နှစ်တင်းတင်း
ပညာသင်ယူခဲ့ရသူ ဖြစ်တယ်။ နိုင်ငံရေးမှူးရဲဘော်စိုးသိမ်းဟာ မူလက မူလတန်းအဆင့်လောက်သာ
ပညာသင်ယူခွင ရရှိခဲ့သူဖြစ်ခဲ့ရာက ပါတီရဲ့မွေးမြူမှုအောက်မှာ နိုင်ငံခြားဘာသာတရုတ်စာတတ်
မာ့က်စ်လီနင်ဝါဒတက္ကသိုလ်ဆင်း ပညာတတ်တယောက် ဖြစ်လာသူဖြစ်ပါတယ်လို့ နားလည်သိရှိခွင့်ရရှိပါတယ်။
၁၉၆၄ ခုနှစ်မှာ
တရုတ်ပြည်ကွန်မြူနစ်ပါတီက တရုတ်ပြည်၊ ကွေ့ကျိုးပြည်နယ်မှာ ရောက်ရှိနေတဲ့
“ရဲဘော်နော်ဆိုင်း” ခေါင်းဆောင်တဲ့ ကချင်တပ်ဖွဲ့တွေကို ဗမာပြည်ကွန်မြူနစ်ပါတီထံ
လွှဲပြောင်းပေးအပ်ပါတယ်။ အဲဒအခါ ပါတီက အဲဒီတပ်ဖွဲ့ကို မာ့က်စ်လီနင်ဝါဒ ပညာပေးရေး
အတွက် ရဲဘော်စိုးသိမ်းကိုတာဝန်ပေးအပ်ခဲ့လို့ ကွေ့ကျိုးပြည်နယ်သွားရောက်နေထိုင်ကာ
အဲဒီတပ်ဖွဲ့ရော အဲဒီတပ်ဖွဲ့ဝင်မိသားစု သားသမီးများပညာပေးရေးပါ ထမ်းဆောင်ခဲ့ရပါတယ်။
ကျွန်တော်တို့ နယ်စပ်ရောက်ရှိ တော်လှန်ရေးတာဝန်ယူရတဲ့ ကာလတွေမှာ ဒါကြောင့်
နိုင်ငံရေးမှူးရဲဘော်စိုးသိမ်းနဲ့ ကွေ့ကျိုးရဲဘော်များနဲ့မိသားစုဝင်တွေအကြား
အထူးရင်းနှီးကျွမ်းဝင်မှုတွေကို တွေ့မြင်ခဲ့ရတာလို့ ဆိုနိုင်မယ် ထင်ပါတယ်။
၁၉၆၇ ခုနှစ်ရောက်တော့ နိုင်ငံတကာအခြေအနေ
အပြောင်းအလဲတရပ်ပေါ်ပေါက်ခဲ့ပြီး ဗမာပြည်နဲ့တိုက်ရိုက်ပတ်သက်တာကတော့ ဗိုလ်နေဝင်းက
တရုတ်-ဗမာအရေးအခင်းကို အနောက်အုပ်စုအားကိုးနဲ့ ဖန်တီးလိုက်ခြင်းပါပဲ။ ဒီအချိန်မှာ
တရုတ်ပြည်ကွန်မြူနစ်ပါတီ ပစ္စည်းမဲ့လူတန်းစား နိုင်ငံတကာစိတ်ဓာတ်အရ တော်လှန်ရေးများကိုအကူအညီ
အထောက်အပံ့တွေပေးနေတဲ့အချိန် ဖြစ်ပါတယ်။ ဒါကြောင့် အဲဒီတုန်းက
ဒုဥက္ကဋ္ဌသခင်ဗသိန်းတင်ခေါင်းဆောင်တဲ့ တရုတ်ပြည်ရောက်ရဲဘော်များ ဗမာပြည်တော်လှန်ရေး
ပြန်လည်ဝင်ရောက် လုပ်ကိုင်ရေး အခွင့်အလမ်းတခုပေါ်ပေါက်လာပါတယ်။ အဲဒီအခြေအနေအောက်မှာ
အဝေးရောက်ခေါင်းဆောင်များအဖွဲ့က ရဲဘော်သန်းရွှေ (တပ်မှူး) ရဲဘော်စိုးသိမ်း(နိုင်ငံရေးမှူး)
ရဲဘော်နော်ဆိုင်း(ဒု-တပ်မှူး)နဲ့ ဦးဇော်မိုင်း(နိုင်ငံရေး ဌာနမှူး)တို့
ခေါင်းဆောင်ပြီး ၃ဝ၃ တပ်ဖွဲ့ကို လူအင်အား ၂ဝဝ ကျော်နဲ့ စတင်ဖွဲ့စည်းလိုက်တယ်လို့
လေ့လာသိရှိမှတ်သားခဲ့ရဖူးပါတယ်။ ဒီတပ်ဖွဲ့ဟာ ၁၉၆၈ ဇန်နဝါရီတရက်မှာ မုန်ဂူ၊ မုန်လုံ၊
ကောင်းလုံ၊ ဝေါချုံရွာများကိုအခြေပြုပြီး ပြောက်ကျားစစ် စတင်လှုပ်ရှားခဲ့ကြပြီး
ဒီတပ်ဖွဲ့တွေက မုန်ဂူ၊ မုန်လုံ၊ ဖောင်းဆိုင်စတဲ့ ရွာတွေကို စတင်တိုက်ခိုက်သိမ်းပိုက်ကာ
နယ်စပ်အခြေခံဒေသကိုဖွင့်လှစ်ခဲ့တဲ့ ဗွေဆော်ဦးလုပ်ငန်းတွေကို ပါဝင်လုပ်ဆောင်ခဲ့တဲ့
ခေါင်းဆောင်တဦးအဖြစ်လည်း လေ့လာမှတ်သားထား ဖူးပါတယ်။
ကျွန်တော်ဟာ ၇၃ ခုနှစ်နှောင်းပိုင်းမှာ
နယ်စပ်အခြေခံဒေသကိုရောက်လာသူဖြစ်တော့ အဲဒီအချိန်မှာ နယ်စပ်အခြေခံဒေသဟာ ခိုင်မာတဲ့
အခြေခံဒေသကြီးဖြစ်နေပြီ၊ လူအင်အားလက်နက်အင်အား အင်မတန်တောင့်တင်းတဲ့ကာလဖြစ်တယ်လို့
ဆိုရမယ့်အနေအထားပါ။ ဒိုင်နယ်၊ မြို့နယ်၊ ခရိုင်စသဖြင့် ဖွဲ့စည်းထားပြီး အရှေ့မြောက်စစ်ဒေသ(သံလွင်မြစ်အနောက်ခြမ်း)
တာဝန်ခံ၊ အရှေ့မြောက်စစ်ဒေသ နိုင်ငံရေးမှူးအဖြစ် ရဲဘော်စိုးသိမ်းက တာဝန်တွေကို
နေ့မအား၊ ညမနားလုပ်ဆောင်နေတဲ့အချိန်ဖြစ်ပါတယ်။
၁၉၇၅ ခုနှစ်၊ ဗမာပြည်ကွန်မြူနစ်ပါတီ
ဗဟိုကော်မတီတိုးချဲ့အစည်းအဝေးမှာ နိုင်ငံရေးမှူးရဲဘော်စိုးသိမ်းဟာ အရန်ဗဟိုကော်မတီဝင်
ဖြစ်လာပါတယ်။ ကျွန်တော်ဟာ ၇၄ မှ ၇၈ အထိ နိုင်ငံရေးမှူးနဲ့အတူနေထိုင်ပြီး မိမိကျရာ
တော်လှန်ရေးတာဝန်များကို လုပ်ကိုင်ခဲ့ပါတယ်။ နိုင်ငံရေးမှူးဟာ စစ်ရေး၊ နိုင်ငံရေး၊
ဒေသလုပ်ငန်း ဘက်စုံလုပ်ကိုင်နိုင်သူဖြစ်တာကို သူနဲ့အတူဖြတ်သန်းရင်းမှ သိရှိနားလည်ခွင့်ရပြီး
ကျွန်တော့်အတွက် တော်လှန်ရေးလုပ်ငန်းအတွေ့အကြုံ သင်ခန်းစာကောင်းများကို
ရရှိစေခဲ့ပါတယ်။ ရဲဘော်စိုးသိမ်းဟာ ဒေသလုပ်ငန်းဖြစ်တဲ့
လူထုစည်းရုံးရေးလုပ်ငန်းကိုလည်း အခါအခွင့်ရတိုင်း ပညာပေးလှုံ့ဆော်စည်းရုံးခဲ့တယ်။
ဒေသခံ ကချင်၊ ရှမ်း၊ တိုင်းရင်းသား ကိုးကန့် တရုတ်များကိုလည်း အမြဲမပြတဆက်သွယ်လှုပ်ရှားခဲ့တယ်။
ဒေသခံတွေရဲ့ စိုက်ပျိုးထုတ်လုပ်ရေးဘဝ၊ နေထိုင်စားသောက်ရေး ဘဝမြှင့်တင်ရေးအတွက်
သင်တန်းများပို့ချပေးတယ်။ တချိန်တည်းမှာလည်း လှေကားထစ်လယ်များ
ဖော်ထုတ်စိုက်ပျိုးစေတယ်။ လူထုအဖွဲ့အစည်းများဖြစ်တဲ့ လယ်သမားသမဂ္ဂများ၊ ပြည်သူ့စစ်အဖွဲ့များကို
ကျေးရွာ၊ ဒိုင်နယ်အလိုက် ကွင်းဆင်းစည်းရုံးဖွဲ့စည်းပါတယ်။ သီးစားခလျှော့ပေါ့ရေး၊
အတိုးနှုန်းလျှော့ပေါ့ရေး၊ လုပ်ခတိုးမြှင့်ရေးစတဲ့ တောင်တန်းဒေသနဲ့ကိုက်ညီတဲ့
မြေယာပေါ်လစီများကို ချမှတ်ဆောင်ရွက်ခဲ့တယ်။
၁၉၆၈ မတိုင်မီက မုန်းဂူကွင်း၊
မုန်းယားကွင်းစတဲ့ဒေသများဟာ ကချင်ဒူးဝါးဆိုးတွေနဲ့ နယ်ခံဗိုလ်ကျ ကူမင်တန်ဗိုလ်တွေ၊
ဗိုလ်နေဝင်း စစ်သားတွေရဲ့ မတရားသွေးစုပ်ဖိနှိပ်တာတွေကို ကြိတ်မှိတ်ခံခဲ့ရတဲ့ဒေသတွေ
ဖြစ်ပါတယ်။ ဗမာပြည်ကွန်မြူနစ်ပါတီခေါင်းဆောင်တဲ့ ပြည်သူ့တပ်မတော်က
ဝင်ရောက်လှုပ်ရှားပြီး ဖိနှိပ်မှု၊ သွေးစုပ်မှုနဲ့စနစ်ဆိုးများကိုတိုက်ဖျက်
ပြည်သူလူထုကို လွတ်မြောက်စေလိုက်တော့မှ လူထုဟာ ပြည်သူ့တပ်မတော်ကို ပိုမိုထောက်ခံကာ
ပြည်သူ့တပ်မတော်ထဲပိုပါဝင်လာပြီး တပ်သားရေသောက်မြစ်လည်း ပိုမိုခိုင်မာလာခဲ့တယ်။
စစ်ရေးလုပ်ငန်းတွေလည်း ပိုမိုကျယ်ပြန့်စွာလုပ်ဆောင်နိုင်ခဲ့တယ်။ ၁၉၇၆
ခုနှစ်မှာတော့ ဒေသခံ ကချင်အမျိုးသမီးငယတွေဖြစ်တဲ့ ပြည်သူ့တပ်မတော်သား ၃ ဦးကို မူဆယ်မြို့တွင်း
ဝင်ရောက်ထိုးဖောက်ထောက်လှမ်းကာ ရန်သူ့အခြေအနေကိုသိရှိဖို့ ကင်းထောက် လွှတ်ခဲ့တယ်။
အဲဒီနောက်မှာတော့ မူဆယ်မြို့ရဲစခန်းကိုဝိုင်းထားပြီး ရန်သူ့တပ်မှ ပြည်သူ့တပ်မတော်သို့ကူးပြောင်းလာသူ
ကူးပြောင်း စစ်သားများကို ရန်သူ့တပ် ဒုဗိုလ်၊ ဗိုလ်ကြီးအဆင့် ယူနီဖောင်းများဆင်မြန်းပေးပြီး
မူဆယ်ရန်သူ့ကင်းစခန်းကို ဝင်ရောက် လျှပ်တပြက် တိုက်ခိုက်ခဲ့တယ်။ ရန်သူ့စခန်းကိုတိုက်ခိုက်ချေမှုန်း
ဖျက်ဆီးပစ်လိုက်နိုင်ပြီး၊ ရန်သူ့ရဲတပ်သား အမြောက်အမြား ကျဆုံးစေခဲ့တယ်။ ဒါဟာ
ရဲဘော်စိုးသိမ်းနဲ့ ရဲဘော်ထွန်းတင်တို့ရဲ့ အမြန်တိုက်၊ အမြန်အဆုံးသတ်
ချေမှုန်းရေးစစ်ပွဲ တပွဲဖြစ်တယ်။ ဒီစစ်ပွဲဟာ ရန်သူကို တုန်လှုပ် ခြောက်ခြားသွားစေခဲ့တယ်။
မိမိတပ်တွေဟာ မုန်းဂူ နယ်စပ်အခြေခံဒေသကနေ နေ့ညမအိပ်ဘဲခရီးပြင်းချီတက်ပြီး
မူဆယ်မြို့ကို ဝိုင်း၊ ရွှေလီမြစ်ကိုညအချိန်ဖြတ်ပြီး မုန်းဂူတပ်က
ထိုးဖောက်တိုက်ခိုက်ခဲ့တာ ဖြစ်တယ်။
အဲဒီကာလတွေမှာ နိုင်ငံရေးမှူးရဲဘော်
စိုးသိမ်းဟာ မြို့ပေါ်ကလာတဲ့ကျောင်းသားများကို ဗော်လံတီယာတပ်အဖြစ် စုစည်းလေ့ကျင့် ပေးထားတဲ့
တပ်ဖွဲ့တဖွဲ့လည်း ရှိပါတယ်။ ဒီတပ်ဖွဲ့ကို ၁၉၇၆ ဇူလိုင်အစောပိုင်းမှာ
တောင်ကုန်းတခုမှာ တင်လိုက်တယ်။ မုန်းပေါ်၊ ရွှေကျင်ဝမ်းမှာ တပ်မဟာ ၂ နဲ့ မုန်းပေါ်ခရိုင်တပ်က
တောင်ထိပ်မှာစခန်းထိုင်ပြီး ၁ဝ၅ မိုင်ကားလမ်းကို ထိန်းသိမ်းထားပါ တယ်။ ရဲဘော်
(ဗိုလ်)သန်းရွှေ၊ ရဲဘော်ထွန်းတင်နဲ့ နိုင်ငံရေးမှူးရဲဘော်စိုးသိမ်းစတဲ့
ညွှန်ကြားရေးအဖွဲ့ဟာ ရန်သူနဲ့အနီးဆုံးစခန်းမှာ တက်နေရာယူပြီး ရန်သူကားလမ်းစောင့်တပ်ခွဲစခန်းကို
ချေမှုန်းရေးလုပ်ဖို့ ပြင်ဆင်ကြပါတယ်။ ရှေ့တန်းကင်းတပ်နဲ့ ထောက်လှမ်းရေးတပ်ဖွဲ့
ကင်းထောက် ပြန်လာတဲ့ ရဲဘော်တွေက ရဲဘော်သန်းရွှေနဲ့ ရဲဘော်စိုးသိမ်းတို့ထံ
အစီရင်ခံကြပါတယ်။ မနက်လင်းအားကြီးမှာ မုန်တိုင်းတပ်ဖွဲ့ဟာ ရန်သူ့ကားလမ်းစောင့်စခန်းကို
ထိုးစစ်ဆင်ပါတော့တယ်။ ရန်သူတပ်သားများရဲ့ အော်သံဟစ်သံများ ကြားနေရပါတယ်။
လက်နက်ကြီးတပ်ဖွဲ့ ကလည်း ရန်သူ့စခန်းနဲ့ကားလမ်းကို ပစ်ခတ်ထိန်းချုပ်ထားတယ်။
ဒီတိုက်ပွဲမှာ ရန်သူအများအပြားဒဏ်ရာရပြီး မူဆယ်ဆေးရုံမှာ လူနာများနဲ့
ပြည့်လျှံသွားတယ်လို့ ပြန်လည် သတင်းရရှိပါတယ်။
ရဲဘော်စိုးသိမ်းဦးဆောင်ပြီး ၇၅၁ဝ
စီမံကိန်း မိုးမိတ်-မိုးကုတ် ဒေသတိုးချဲ့ရေး၊ ကေ-အိုင်-အေနဲ့ တပ်ပေါင်းစုတိုးချဲ့ရေးတို့ကို
လုပ်ဆောင် နိုင်ခဲ့တယ်။ ၇၆၊ ၇၇၊ ၇၈ ခုနှစ်များကတော့ စစ်ရေးတိုက်ပွဲတွေ
ခြိမ့်ခြိမ့်သဲအောင်ပွဲခံနေတဲ့ကာလ ဖြစ်တယ်။ ရဲဘော်စိုးသိမ်းက ပြောက်ကျား
ဒေသတိုးချဲ့ရေးစီမံကိန်းနဲ့ အခြေခံဒေသတည်ငြိမ်ရေး၊ လူထုဘဝမြှင့်တင်ရေးတို့ကိုလည်း
ဂရုတစိုက် ကြီးကြပ်နိုင်ခဲ့တယ်။ တချိန်တည်းမှာ ရဲဘော်စိုးသိမ်းဟာ ဒေသဖြူလုပ်ငန်းကိုလည်း
လက်မလွှတ်ပါ။ ၁၉၇၄ မေ-ဇွန်အလုပ်သမားအရေးအခင်း၊ ဦးသန့်အရေးအခင်းနဲ့ မှိုင်းရာပြည့်
အရေးအခင်းနဲ့ပတ်သက်တဲ့ ဝါဒဖြန့်စာရွက်စာတမ်းများကို မြို့တွင်းဖြန့်ဝေရင်း အထူးတပ်ရင်းရဲ့
ကားလမ်းဖြတ်တိုက်ပွဲကို ပေါင်းစပ်ပေးခဲ့တယ်။
နောက်မြို့ပေါ်က တောခိုလာတဲကျောင်းသားများနဲ့ဖွဲ့စည်းထားတဲ့
အထူးတပ်ကို စစ်ရေးလေ့ကျင့်တာ၊ ရှေ့တန်းစစ်မြေပြင် လက်တွေ့ ဖြတ်သန်းစေတာတွေလည်း
လုပ်ခဲ့တယ်။ ၇ ရက်ဇူလိုင်အထိမ်းအမှတ် ဟိုဖျက်-မန်ပင်းစခန်းသိမ်းတိုက်ပွဲကိုလည်း
အောင်မြင်စွာစည်းရုံး အကောင်အထည်ဖော်ဆောင်နိုင်ခဲ့တယ်။ ရဲဘော်သစ်တွေ အထူးသဖြင့်
မြို့ပေါ်ကတောခိုလာသူ ရဲဘော်တွေအပေါ် မှာ အထူးဂရုစိုက် အကူအညီပေးတတ်ပါတယ်။
ကျွန်တော်အပါအဝင် ရဲဘော်တွေကို စာအုပ်ထဲက မာ့က်စ်ဝါဒလေ့လာတာနဲ့
လက်တွေ့ကွန်မြူနစ်ပါတီထဲ ဖြတ်သန်းရတာမတူညီကြောင်း ပဲခူရိုးမပြောက်ကျားဒေသနဲ့
နယ်စပ်ဒေသရဲဘော်တွေရဲ့ နေထိုင်စားသောက်မှုဘဝ မတူနိုင်မှု လက်တွေ့ အခြေအနေကိုပညာပေးရင်း
မိမိကိုယ်ကိုယ် ပစ္စည်းမဲ့တပ်သားကောင်းဖြစ်အောင်တည်ဆောက်ရေးမှာ
အလွန်အကျွံတောင်းဆိုမှုတွေကို ပညာပေးလေ့ရှိပါတယ်။
ရဲဘော်စိုးသိမ်းရဲ့အားကောင်းချက်ကတော့
လေ့လာရေးလုပ်ဟန် ဖြစ်တယ်။ ဘယ်လောက်အလုပ်များများ အလုပ်ပြီးတာနဲ့ ခဏနားပြီးရင်
မှတ်စုစာအုပ်ထုတ်ပြီး ရေးမှတ်ပါတယ်။ ဒီလုပ်ဟန်ဟာ နယ်စပ်ဒေသအရေးအခင်းဖြစ်ပေါ်ပြီးနောက်
ကျွန်တော်တို့နဲ့အတူ နောက်ဆုံး တရုတ်ပြည်ထဲက ဂျင်းဖောရွာလေးတရွာမှာနေတော့လည်း တွေ့နေရပြီး
နောက်ဆုံးကျွန်တော်တို့နဲ့ခွဲသွားပြီး အနားယူရတဲ့အထိတိုင် သူဖတ်မိသမျှ တရုတ်စာနယ်ဇင်းတွေထဲကအချက်အလက်တွေ
မှတ်စုထုတ်ပေးတာ၊ ဆောင်းပါးတွေရေးပေးသွားတာ နောက်ဆုံးအထိလိုပဲ ဆိုနိုင်ပါတယ်။
နယ်စပ်ဒေသ သံလွင်မြစ်အနောက်ဘက် နိုင်ငံရေးဌာနကိုတာဝန်ခံစဉ်ကလည်း တပတ် ၂
ဧကြိမ်လောက် လေ့လာဆွေးနွေးပွဲ လုပ်နိုင်ရေးကို စခန်းမှူးကို
မှန်မှန်ဆော်ဩလေ့ရှိပါတယ်။ ရှေ့တန်းတပ်မှူးတွေ ရောက်လာရင်လည်း
စစ်ရေးဆွေးနွေးပွဲတွေမှာ ပြောက်ကျားစစ်၊ ချေမှုန်းစစ်စတဲ့ စစ်ရေးလှုပ်ရှားမှုများကို
ပညာပေးဆွေးနွေးတယ်။ အထူးသဖြင့် နေရာယူစစ်မျိုးမတိုက်မိဖို့ ပညာပေးတယ်။
ပြောက်ကျားစစ်နဲ့လှုပ်ရှားစစ်လုပ်ပြီး ရန်သူသက်ရှိအင်အားကိုချေမှုန်းရေးစစ်ကိုတိုက်ကြဖို့
ဟောပြောတယ်။ နောက်ခရိုင်၊ မြို့နယ်၊ ဒိုင်နယ် ဒေသလုပ်ငန်းကေဒါတွေ ရောက်လာရင်လည်း
လူထုအခြေအနေ၊ လူထုလုပ်ငန်း၊ ထုတ်လုပ်ရေးဘဝ၊ နေထိုင်စားသောက်ရေး ဘဝအခြေအနေအစီရင်ခံချက်တွေကို
နားထောင်၊ သူတို့ထံမှ လေ့လာမှတ်သားပြီး ဒေသလုပ်ငန်းများဖြစ်တဲ့ ရှေ့တန်းကူညီရေးလုပ်ငန်း၊
တပ်မတော်သားအိမ်ထောင်များ ကူညီရေးလုပ်ငန်း၊ အာဇာနည်အိမ်ထောင်များမေးမြန်းရေး
လုပ်ငန်းဆောင်ရွက်မှု အခိုင်အမာ အခြေအနေများကို မေးမြန်းသုံးသပ်ဝေဖန်ပါတယ်။
စခန်းအသီးသီးရှိရဲဘော်များကိုလည်း
ပြည်သူလူထုရဲ့ ထုတ်လုပ်ရေးလုပ်ငန်းများကို ဝင်ရောက်ကူညီရေးကို လှုံ့ဆော်ပါတယ်။
လုပ်အားခက်ခဲတဲ့အိမ်ထောင်များကို ကျွန်တော်တို့ရဲဘော်တွေဟာ တက်တက်ကြွကြွကူညီကြတယ်။
တောင်ယာခင်းပေါင်းနုတ်၊ ပျိုးနုတ်၊ လယ်စိုက်၊ စပါးရိတ်၊ စပါးပုံ၊ အိမ်ဆောက်စသဖြင့်
လူထုလုပ်ငန်းများကို ရာသီအလိုက်ကူညီလုပ်ဆောင်ပေးခဲ့ကြတယ်။ ဒါကြောင့် ၇၄-၇၅-၇၆
ကာလတွေမှာ ဒေသခံပြည်သူများနဲ့အတူ ရဲဘော်များဟာ လွတ်မြောက်ဒေသတခွင် နေရာအနှံ့ တက်တက်ကြွကြွလှုပ်ရှား
အခြေခံဒေသ တည်ဆောက်ရေး၊ ခိုင်မာရေး၊ တိုးချဲ့ရေးအတွက် စစ်ရေး၊ နိုင်ငံရေး၊
ဒေသလုပ်ငန်း ဘက်စုံလုပ်ဆောင်နေတာကို တွေ့မြင်နိုင်ပါတယ်။ တနည်းအားဖြင့် နယ်စပ်ဒေသရဲ့တော်လှန်ရေးလုပ်ငန်းတွေ
အညွန့်တလူလူ သက်ဝင်လှုပ်ရှားနေတဲ့ကာလလို့ ဆိုနိုင်ပါတယ်။
နိုင်ငံရေးမှူးနဲ့ပတ်သက်ရင် ကျွန်တော်တို့ရဲဘော်အားလုံး
အသိအမှတ်ပြုလေ့လာထ်ိုက်တာတခုကတော့ သူ့ရဲ့ စိတ်ရှည်စွာ ပညာပေး ဖျောင်းဖျတတ်မှုပါပဲ။
ဒါနဲ့ပတ်သက်လို့ အမှတ်ရစရာအဖြစ်အပျက်တခုကို နမူနာတင်ပြပါရစေ။ အချိန်ကာလ နေ့ရက်အတိအကျတော့
မမှတ်မိတော့ပါဘူး။ ၇၅ ခုနှစ် နှောင်းပိုင်းလောက်လို့ ထင်ပါတယ်။
မုန်းဂူ စစ်ဒေသခွဲ၊
နိုင်ငံရေးဌာနခွဲရုံးခန်းကို ၄၈ -၄၉ ကေဒါကြီးတဦးဖြစ်တဲ့ လုံခြုံရေးဌာနတာဝန်ခံ
ရဲဘော်(ဦး)ဖိုးချို ရောက်လာတယ်။ သူက နိုင်ငံရေးမှူးကို ကိုစိမ်းမောင်ကြီး
မုန်ဂူဈေးထဲက အိမ်တအိမ်မှာရောက်နေတယ်လို့ သတင်းပို့ပါတယ်။ ဒါနဲ့ နိုင်ငံရေးမှူးဟာ
ရဲဘော်ဖိုးချိုနဲ့အတူ ကိုယ်ရံရဲဘော်လေး ၂ ယောက်ခေါ်ပြီး မုန်ဂူဈေးဘက်ကိုထွက်သွားပါတယ်။
ဈေးထဲက ကိုစိမ်းမောင်ကြိုက်တတ်တဲ့ ပေါင်မုန့်၊ မုန့်ကြွပ်စတဲ့ မုန့်ပဲသရေစာများဝယ်သွားပြီး
ဒိုင်နယ်ရုံးကအိမ်တအိမ်မှာ စီစဉ်ဧည့်ခံပါတယ်။ ကိုစိမ်းမောင်ကလည်း အထက်အဖွဲ့အစည်းကိုတင်ပြဖို့
စာရွက်စာတမ်းတွေကို ရဲဘော်စိုးသိမ်းထံအပ်ပါတယ်။ အရှေ့မြောက်စစ်ဒေသရဲ့ ဟာကွက်ပျော့ကွက်တွေကို
နိုင်ငံရေးမှူးရဲဘော်စိုးသိမ်းကို အားမနာတမ်းပြောပါတယ်။ တခါတရံ စိတ်လိုက်မာန်ပါပြောတာမို့
အသံတွေဆူညံကျယ်လောင်လွန်းလှပါတယ်။ နိုင်ငံရေးမှူးက ဘာမှ ပြန်မပြောပါ။
စိတ်ရှည်ရှည်နား ထောင်ပါတယ်။ ကိုစိမ်းမောင်ရဲ့အမြင်သဘောထားတွေ၊
လူမျိုးစုနွယ်တွေနဲ့ပတ်သက်တဲ့ ထင်မြက်ချက်တွေကို ဗဟိုကို တင်ပြပေးဖို့သာတာဝန်ရှိကြောင်း၊
နေရေးထိုင်ရေး၊ လုံခြုံရေးတို့ကိုတာဝန်ယူကြောင်း၊ ဒါပဲပြောနိုင်ပါတယ်လို့
ခပ်တိုတိုပဲပြောပြီး စကားဝိုင်းကို နိုင်ငံရေးမှူးကအဆုံးသတ်လိုက်ပါတယ်။
ရဲဘော်စိမ်းမောင်လည်း သူ့ကိုထားတဲ့ သူ့စခန်းရှိရာကို ညနေဘက်မှာ ပြန်သွားပါတယ်။
ကိုစိမ်းမောင်ဆိုတာ မင်းလတ်ရဲခေါင်ပါ။
သူ့ကို မုန်ဂူကွင်းမှ တနာရီခွဲ ၂ နာရီခရီးလောက် တောင်ပေါ်တနေရာမှာ ကချင်ပုံစံ
သပ်သပ်ရပ်ရပ် အိမ်ကလေးတလုံး ဆောက်ပေးထားပါတယ်။ သူနေတဲ့အိမ်ကလေးကနေကြည့်လိုက်ရင်
မုန်ဂူကွင်းက လယ်ကွင်းစိမ်းစိမ်းတွေနဲ့ တရုတ်ဗမာ နယ်စပ် ဖြတ်ဆင်းသွားတဲ့
မုန်ဂူချောင်းကိုလည်းမြင်ရတယ်။ ရှုခင်းက လွမ်းမောစရာပါ။ သူနဲ့မလှမ်းမကမ်းမှာ
ဂျင်းဖောရွာလေးတရွာ ရှိပါတယ်။ ရွာသားကချင်တွေနဲ့လည်း မိတ်ဆွေဖြစ်နေပြီး
ရွာသားတွေကလည်း မကြာမကြာ သူ့ထံလာလည်တတ်ပါတယ်။ သူက ဘာသာဗေဒစိတ်ဝင်စားသူမို့လားတော့
မပြောတတ်ပါ။ အဲဒီသူနေတဲ့စခန်းလေးရောက်ပြီး လတချို့ကြာတော့ သူက ကချင်စကား ပြောတတ် နေပါပြီ။
အဲဒီအိမ်ကလေးမှာနေရင်း စာတမ်းတွေပြုစုပြီး နိုင်ငံရေးမှူးကတဆင့်တင်ပြလိုက်တာတော့
ကြားသိရဖူးပါတယ်။ လျှို့ဝှက်ကိစ္စများဖြစ်လို့ ဘာမှ စူးစမ်းလေ့လာခွင့်မရှိလို့
ဘာမှတော့ သိခွင့်မကြုံဘူးလို့ဆိုရမှာပါ။
နောက် လတချို့ကြာတဲ့အခါ ရဲဘော်ဖိုးချို
တခေါက်ပြန်လာပါတယ်။ ဒီတခါတော့ သူက မုန်ဂူကွင်းမှာ ရဲဘော်စိမ်းမောင်
“ပိုစတာတိုက်ပွဲ ဆင်နေကြောင်းပြောပြလို့ နိုင်ငံရေးမှူးက ဗဟိုကိုအစီရင်ခံ
အကြောင်းကြားပါတယ်။ “ပိုစတာ စာလုံးကြီး တိုက်ပွဲဆင်တာမလုပ်ဖို့ ဥက္ကဋ္ဌ
သခင်ဗသိန်းတင်က အကြောင်းကြားတာဖြစ်တယ်။ ဒါကိုဆန့်ကျင်ပြီးမလုပ်ဖို့ စစ်ဒေသကတားမြစ်ပေမယ့်
သူက နားမထောင်တော့ပါ။ စစ်ဒေသအမိန့်နဲ့ နိုင်ငံရေးမှူးက ပိုစတာတွေကိုခွာချပစ်စေပြီး
မင်းလတ်ရဲခေါင် ခေါ် ကိုစိမ်းမောင်နဲ့ အချိန်အတော်ကြာ ဆွေးနွေးပါတယ်။
ရဲဘော်စိုးသိမ်းက သူပြောသမျှနားထောင် စိတ်ရှည်ရှည်နဲ့သည်းခံနားထောင်ပါတယ်။
တချိန်တည်းမှာ ပါတီရဲ့ညွှန်ကြားချက်များကို ခပ်ပြတ်ပြတ်ပြောဆိုပြီး သူ့နေထိုင်ရေးကိစ္စများ၊
လိုအပ်ချက်များကို ကောင်းကောင်းမွန်မွန်စီစဉ်ပေးပါတယ်။
ပိုစတာတ်ိုက်ပွဲဆင်ပြီး
တပတ်လောက်ကြာတော့ ဗဟိုလည်း ပန်ဆန်း၊ ဝနယ်ကိုပြောင်းတော့မယ်။ ကိုစိမ်းမောင်လည်း ဝနယ်ကို
ပြောင်းရမယ်လို့ ညွှန်ကြားချက်ရောက်လာတယ်။ ဒါကြောင့် နိုင်ငံရေးမှူးဟာ ကိုစိန်းမောင်နဲ့
အချီအချပြောဆိုရပြန်ပါတယ်။ နောက်ဆုံး ညွှန်ကြားချက်အရ ပြောင်းရွှေ့ရေးကိုစီစဉ်ရပါတယ်။
လုံခြုံရးတပ်စုတစုနဲ့ လုံခြုံရေးမှူးရဲဘော်ဖိုးချိုတာဝန်ယူပြီး ဝနယ်
မြောက်ပိုင်းကို ပြောင်းရွှေ့နေရာချထားလိုက်ပါတယ်။ လမ်းခရီးမှာ ကိုစိမ်းမောင်ရဲ့လုံခြုံရေးကို
မှဲ့တပေါက်မှမစွန်းစေရအောင် လုံခြုံရေးဌာနက တာဝန်ယူရမယ်လို့ လုံခြုံရေးဌာနကိုတာဝန်ပေး
သေချာအပ်နှံ စီစဉ်ပေးခဲ့တယ်။
လမ်းခရီးအတွက် မြင်း၂ ကောင်နဲ့
ရိက္ခာအပြည့်အစုံ၊ လမ်းတလျှောက်အတွက် ထမ်းစင်ပါ ပြင်ဆင်ပေးလိုက်ပါတယ်။ သူက ပထမ
မြင်းမစီးဘဲလမ်းလျှောက်တယ်။ ခရီးကလည်းဝေး၊ တောင်ဆင်းတောင်တက်နဲ့ ခရီးကလည်းကြမ်းတော့
ရက်တချို့ရှိတဲ့အခါ လမ်းမလျှောက်နိုင်တော့ပါ။ မြင်းစီးရန်ပြောပေမယ့် မြင်းမစီးပါ။ သူ့ကို
ဒီလိုပို့တာမကျေနပ်လို့ ခရီးဆက်မသွားရေးနဲ့ နောက်ကြောင်း ပြန်ရေးကို လမ်းမှာ
အစာမစားဘဲဆန္ဒပြပါတယ်။ လုံခြုံရေးဌာနကလည်း ညွှန်ကြားချက်အရ ဝနယ်မြောက်ပိုင်းရောက်အောင်
မဖြစ် ဖြစ်အောင် ပို့ရမှာပါ။ ဆန္ဒမပြရန်ဖြောင်းဖြပေမယ့် မရပါ။ အိပ်လှဲဆန္ဒပြတယ်။
ခေတ္တခရီးတထောက်နားတော့ ရှေ့ဆက်မသွားလိုကြောင်း ဆန္ဒပြတယ်။ နောက်ဆုံးတော့
ထမ်းစင်စီစဉ်ပြီး တပတ်အတွင်း ဝမြောက်ခရိုင်ရုံးအရောက် ချီတက်ခဲ့ကြတယ်။
ရဲဘော်စိုးသိမ်းက သူကိုယ်တိုင်လည်း
စိတ်ရှည်သည်းခံပြီး ပါတီဗဟိုရဲ့ညွှန်ကြားချက်ကို အကောင်အထည်ဖော်ခဲ့သလို ကျန်
ရဲဘော်များကိုလည်း ဒီရဲဘော်ကြီးဟာ ပညာတတ်ဝါရင့်ရဲဘော်ကြီးတယောက်ဖြစ်တယ်လို့ သေချာရှင်းပြမိတ်ဆက်ပေးပြီး
ဝမြောက် ခရိုင်ပို့ပေးရေးကို တာဝန်အပ်နှင်းခဲ့တယ်။ နိုင်ငံရေးမှူးရဲဘော်စိုးသိမ်းရဲ့
အခိုင်အမာစီစဉ်ပေးမှုနဲ့ လုံခြုံရေးတာဝန်ခံရဲဘော်ဖိုးချို တာဝန်ခံကာ
မင်းလတ်ရဲခေါင်(ခေါ်)ကိုစိမ်းမောင်ကို မြစ်အနောက်ဘက်ကနေ ဝမြောက်ခရိုင်ပို့ပေးခဲ့တာကို
ပြန်လည်သတိရနေမိတယ်။
ဒီဖြစ်စဉ်နဲ့အတူ
နိုင်ငံရေးမှူးရဲဘော်စိုးသိမ်းဟာ မြစ်အနောက်ဘက်မှာ တာဝန်ယူနေရာကနေ
ဗဟိုစခန်းပြောင်းရွှေ့ရေးအတွက် စီစဉ်ဆောင်ရွက်ဖို့၊
ဗမာပြည်ကွန်မြူနစ်ပါတီခေါင်းဆောင်တဲ့ ပြည်သူ့ဒီမိုကရေစီတော်လှန်ရေး အနှစ် ၃ဝ
မြောက်အခမ်းအနားနဲ့ နယ်စပ်အခြေခံဒေသ ၁ဝ နှစ်မြောက်အခမ်းအနားကြီး
ဝှဲချီးကျင်းပရေးအတွက် ဝတောင်ခရိုင် ပန်ဆန်းကို ၁၉၇၈ ခုနှစ်ထဲမှာ ပြောင်းရွှေ့ သွားရတယ်။
ကျွန်တော်လည်း ပန်ဆန်းကိုပြောင်းရွှေ့ခဲ့ရတယ်။ လုပ်ငန်းတာဝန်အရလည်း
အပြောင်းအလဲဖြစ်သွားပြီး နိုင်ငံရေးမှူးနဲ့ ယာယီကွဲသွားပါတယ်။
ပန်ဆန်းမှာ ၁၉၇၅ ဗဟိုကော်မတီရဲ့ ၇၉
ဗဟိုကော်မတီစုံညီအစည်းအဝေး ကျင်းပပြီး ၇၉ လမ်းစဉ်ထွက်လာတဲ့အခါ ဗဟိုကော်မတီအတွင်း
တာဝန်အပြောင်းအလဲတွေ ပေါ်ပေါက်လာပါတယ်။ နိုင်ငံရေးမှူးရဲဘော်စိုးသိမ်းဟာ အရှေ့မြောက်စစ်ဒေသ
ဒုနိုင်ငံရေးမှူး (မြစ်အနောက်ဘက် တာဝန်ခံကနေ) တပ်မ ၄၈ ရဲ့ နိုင်ငံရေးမှူးအဖြစ် အပြောင်းအလဲဖြစ်သွားပါတယ်။
ကျွန်တော်လည်း လုပ်ငန်းလိုအပ်ချက်အရ ရှမ်းပြည် အလယ်ပိုင်း ၁ဝ၈ စစ်ဒေသသို့ ၁ဝ၈
စစ်ဒေသ နိုင်ငံရေးမှူးရဲဘော်ခင်ညိုနဲ့အတူဆင်းသွားခဲ့ရလို့ ပန်ဆန်းနဲ့
ယာယီခွဲရပြန်ပါတယ်။ နိုင်ငံရေးမှူး ရဲဘော်စိုးသိမ်းဟာ တပ်မ ၄၈ ရဲ့ အင်အားတချို့နဲ့အတူ
မြစ်အနောက်ဘက် ပြန်ရွှေ့သွားရပြန်ပါတယ်။ ဒီလိုနဲ့ စပယ်တောမှာ နှစ်တချို့ နေထိုင်ရင်း
၁ဝ၈ စစ်ဒေသကို ဆင်းလိုက်တက်လိုက် လုပ်ကိုင်ခဲ့ရပြန်ပါတယ်။ ၁၉၈၅ ခုနှစ်
ဗမာပြည်ကွန်မြူနစ်ပါတီရဲ့ တတိယအကြိမ် ပြည်လုံးကျွတ်ကွန်ဂရက် ကျင်းပပါတယ်။
ကွန်ဂရက်ပြင်ဆင်ရေးလုပ်ငန်းဖြစ်တဲ့ တည်ဆောက်ရေးဆပ်ကော်မတီမှာ ပါဝင်လုပ်ကိုင်ခွင့် ရပါတယ်။
အဲဒီ ၈၅ တတိယကွန်ဂရက်မှာ
နိုင်ငံရေးမှူးရဲဘော်စိုးသိမ်းဟာ ဗဟိုကော်မတီအဖြစ် ပြန်လည်ရွေးကောက်ခံရပြန်ပါတယ်။
ဒီအခါ ရဲဘော်စိုးသိမ်းဟာ အရှေ့မြောက်စစ်ဒေသရဲ့ ပါတီကော်မတီအတွင်းရေးမှူးနဲ့နိုင်ငံရေးမှူး
ဖြစ်လာပါတယ်။ ကျွန်တော်လည်း မိမိသက်ဆိုင်ရာ အထက်အဖွဲ့အစည်းကို တင်ပြတောင်းဆိုမှုအရ
လုပ်ငန်းတာဝန်အပြောင်းအလဲဖြစ်ပြီး အရှေ့မြောက်စစ်ဒေသဌာနချုပ်ကို ရောက်ရှိ လာပါတယ်။
သိပ်မကြာလိုက်ပါ။ နိုင်ငံရေးမှူးက ကျွန်တော့်ကို ဝမြောက်ခရိုင်ကော်မတီဝင်တယောက်အဖြစ်
ဝမြောက်ခရိုင်ကို လွှဲပြောင်းပေးပြီး တာဝန်ပေးခဲ့ပါတယ်။ ဒီလိုနဲ့ နိုင်ငံရေးမှူးရဲ့
အရှေ့မြောက်စစ်ဒေသထဲမှ ဝမြောက်ခရိုင် နိုင်ငံရေးဌာနတာဝန်ခံ တယောက်အဖြစ် ဝမြောက်ခရိုင်ရုံးစိုက်ရာ
ရှင်တိဖန်းမှာ အချိန်တချို့နေထိုင်လုပ်ကိုင်ခဲ့ပါတယ်။
ဒီလိုနဲ့ ဒေသဆိုင်ရာလုပ်ငန်းတွေလုပ်ကိုင်နေရင်း
ဝမြောက်ခရိုင် ပြန်လည်ဖွဲ့စည်းရေးအတွက် စစ်ဒေသကော်မတီရဲ့ တိုက်ရိုက်ကြီးကြပ်မှုဖြင့်
ခရိုင်ကွန်ဂရက် ကျင်းပပါတယ်။ စစ်ဒေသအလုပ်အဖွဲ့အဖြစ် ရဲဘော်စိုးသိမ်းတာဝန်ခံကာ
ရဲဘော်အောင်လွင်၊ မနီထွေး ပါဝင်ဖွဲ့စည်းပြီး ခရိုင် ကွန်ဂရက်ကို
ဦးစီးကျင်းပပေးပါတယ်။ ကွန်ဂရက်မှာ ခရိုင်ကော်မတီအဖြစ် ကျွန်တော် ပြန်လည်အရွေးခံရပြီး
ခရိုင်နိုင်ငံရေးဌာန လုပ်ငန်း တာဝန်များကို ဆက်လက်လုပ်ကိုင်နေပါတယ်။
ဒီအတောအတွင်းမှာပဲ ဗမာပြည်ရဲ့အခြေအနေဟာ
ဆိုးဝါးဆုတ်ယုတ်သထက်ဆုတ်ယုတ်လာလို့ လူထုကြီးဟာ စစ်အာဏာရှင် စိုးမိုးအုပ်ချုပ်
ဖိနှိပ်မှုကိုဆန့်ကျင်တွန်းလှန်တဲ့ “၈ လေးလုံးလူထု အုံကြွမှုကြီး”ဟာ
တပြည်လုံးနေရာအနှံ့ တောရောမြို့ပါမကျန် အရှိန်အဟုန်ပြင်းပြင်းနဲ့ ပေါ်ပေါက်ခဲ့တယ်။
၈၈ စက်တင်ဘာမှာ စစ်တပ်ကအာဏာသိမ်းလိုက်ပြန်ပါတယ်။ ဒါကြောင့် လက်နက်ကိုင်တော်လှန်လိုတဲ့
လူငယ်အင်အား တချို့ ပါတီအခြေခံဒေသ ပန်ဆန်းနဲ့မြောက်ပိုင်းဗျူရိုဌာနချုပ်တို့မှာ
ရောက်ရှိလက်ခံခဲ့ကြရပေမယ့် လူထုအုံကြွမှုဒီရေကိုစီးပြီး၊ တော်လှန်ရေးကို
တွန်းမတင်နိုင်ခဲ့ပါဘူး။ ဆန့်ကျင်ဘက်အားဖြင့် အခြေခံဒေသအတွင်းရှိ
ကိုးကန့်အမျိုးသားများ စတင်ပုန်ကန်တယ်။ ဒီအခါ ဗဟိုကော်မတီ အစည်းအဝေးစိတ်ဓာတ်နဲ့
ဗဟိုရဲ့အခိုင်အမာလုပ်ငန်းများချပြရေးနဲ့ ပြင်ဆင်ရေးကို စစ်ဒေသနိုင်ငံရေးမှူး
ရဲဘော်စိုးသိမ်းအပေါ် တာဝန်ကျလာ ပါတော့တယ်။ ဒါကြောင့် နိုင်ငံရေးမှူးဟာ ဝမြောက်ခရိုင်နဲ့
စစ်ဒေသဌာနချုပ်ပန်ဆန်း ကူးချီသန်းချီ လွန်းထိုးဆောင်ရွက်နေပါတယ်။
ဝအမျိုးသား
အရန်ဗဟိုကော်မတီများဖြစ်တဲ့ ကျောက်ညီလိုင်နဲ့ ပေါက်ယိုချမ်းတို့ရဲ့ “ဝ
အမျိုးသားများအနေနဲ့ ပါတီအပေါ် မကျေနပ်စရာ ဘာမှမရှိပါဘူး၊ ပါတီနဲ့အတူရပ်တည်သွားမယ်”
ဆိုတဲ့ ပါတီဗဟိုအပေါ်တင်ပြချက်ကို လုံးဝယုံကြည်ထားမှုအောက်မှာ ဝ အမျိုးသားများ
ပုန်ကန်မှုပေါ်ပေါက်ပြီး ဝမြောက်ခရိုင်သို့ လုပ်ငန်းတာဝန်အရအလာခရီးလမ်းမှာ
ဖမ်းဆီးချုပ်နှောင်ခံရပါတယ်။ ကျွန်တော်လည်း ခရိုင်ရုံးစိုက်ရာ ရှင်တိဖန်းမှာ အဖမ်းခံလိုက်ရပါတယ်။
ပန်ဆန်းဗဟိုဌာနချုပ်လည်း ဝအမျိုးသားများက ပုန်ကန်သိမ်းပိုက်လိုက်လို့ စစ်ဒေသ အဖွဲ့အစည်းတွေ၊
ဗဟိုအဖွဲ့အစည်းတွေလည်းပျက်သုဉ်းသွားကာ ပါတီဗဟိုနဲ့ဗဟိုကိုထောက်ခံသူအင်အားစုတချို့ ဗဟိုနဲ့အတူ
တဖက်နိုင်ငံသို့ ရောက်ရှိသွားတော့တယ်။ အခြေအနေတွေနဲ့လည်း ကျွန်တော် လုံးဝ
အဆက်ပြတ်သွားရပါတော့တယ်။
နောင်မှာ ဇနီးရဲ့ဇာတိ၊ ဂျင်းဖောရွားလေးကို
မောင်းထုတ်တာခံလိုက်ရပြီး အချိန်တချို့ ဇနီးရွာမှာ တောင်ယာခုတ်လုပ်ကိုင်စားရင်း
နေထိုင်ခဲ့ရ ပါတယ်။ တဖက်ကလည်း ရေဒီယိုနားထောင်၊ ပါတီသတင်းတွေကိုလေ့လာနေခဲ့ရာ
ဗဟိုဟာ ၁ဝ၁ ဒေသမှာ အခြေစိုက်နေတယ်ဆိုတဲ့ သတင်းရရှိလိုက်ပါတယ်။ ဇနီးသည်နဲ့အတူ
လအနည်းငယ်သာရှိသေးတဲ့သမီးငယ်ကို ရင်ခွင်ပိုက်ပြီး ဗဟိုရှိရာကို လိုက်လာခဲ့ပါတယ်။
ဒီလိုနဲ့ ထိန်ချုံးအရောက်မှာ မမျှော်လင့်ဘဲ လမ်းကြားတခုမှာ ရဲဘော်စိုးချစ်၊
ရဲဘော်နိုင်ဦး၊ ရဲဘော်ချို၊ ရဲဘော်အောင်လွင်တို့ ၄ ယောက်နဲ့ ရုတ်တရက်ဆုံမိလိုက်ပြီး
တယောက်နဲ့တယောက် ဝမ်းသာအားရဖက်ရမ်းနှုတ်ဆက်နိုင်ကြပြီး ပါတီဗဟိုနဲ့ ပြန်အဆက်အသွယ်ရပါတယ်။
တဆက်တည်း နိုင်ငံရေးမှူးရဲဘော်စိုးသိမ်းနဲ့လည်း အဆက်အသွယ်ရရှိလာပါတယ်။ သူက
ပါတီတွင်းအခြေအနေ မိတ်ဆက်ပြ၊ ပညာပေး ပါတယ်၊ ပါတီဘက် ဆက်လက်ရပ်တည်သွားဖို့အားပေးပါတယ်။
ဒီနောက် ကျွန်တော် ပါတီရဲ့နေရာချထားမှုအရ ပန်ဝါမှာ အချိန်တချို့
နေထိုင်ခဲ့ရပြန်ပါတယ်။
အချိန်တချို့ ပန်ဝါမှာနေထိုင်ရင်း
ဆက်လက်နေထိုင်ရန်မသင့်တော့ဘူးလို့ထင်တာနဲ့ တရုတ်ပြည်ထဲကို ဇနီးသည်၊ သမီး ၂
ယောက်တို့နဲ့အတူ ပြန်လည်ဝင်ရောက်လာခဲ့ရာမှ နောက်ဆုံးမှာ နိုင်ငံရေးမှူးရဲဘော်စိုးသိမ်း
စီစဉ်နေရာချထားပေးတဲ့ ကချင်ရွာလေးတရွာမှာ ရဲဘော်မိသားစုများနဲ့အတူ
နေထိုင်ခဲ့ပါတယ်။ ဒီကာလမှာတော့ နိုင်ငံရေးမှူးနဲ့အတူ ပြန်လည်နေထိုင်ရပြန်ပါတယ်။
သိပ်မကြာလိုက်ပါ။ နိုင်ငံရေးမှူးရဲဘော်စိုးသိမ်းနဲ့ ဗဟိုခေါင်းဆောင်များဟာ
လုပ်ငန်းတာဝန်မှအနားယူရန် မိမိမိသားစုရှိရာ စစ်ချွမ်းပြည်နယ် ချင်တူးသို့
ပြန်သွားကြပါတယ်။
ကျွန်တော်တို့ကတော့ နယ်စပ်မှာပဲ
မိသားစုအတွက်လုံးပန်းရင်း ပါတီဗဟိုရဲ့အမိန့်သံစောင့်ကာ မိမိယုံကြည်ချက်ပန်းတိုင်အတွက်
မျှော်လင့်ချက်အပြည့်နဲ့ လုံးပန်းတိုက်ခိုက်နေဆဲ ဖြစ်ပါတယ်။ နိုင်ငံရေးမှူးကတော့
ကျွန်တော်တို့နဲ့ဝေးရာမှာ ရောက်ရှိသွားပေမယ့် ဘာမထီစိတ်ဓာတ်နဲ့ အဝေးကနေ
ကျွန်တော်တို့အတွက် သဘောတရားရေးလိုအပ်ချက်တွေ၊ အားသစ်တွေကို သူရဲ့နောက်ဆုံး ထွက်သက်အထိ
ဖြည့်ဆည်းပေးသွားခဲ့ပါပြီ။
နိုင်ငံရေးမှူးရဲဘော်စိုးသိမ်းအပါအဝင်
ပထမမျိုးဆက် တော်လှန်ရေးခေါင်းဆောင်များရဲ့ ရာသက်ပန်တော်လှန်ရေးစိတ်ဓာတ်
ဥဒါန်းတွင်ပါစေသတည်း။
နိုင်ငံရေးမှူးရဲဘော်စိုးသိမ်းကို
အလေးနီပြုလိုက်ပါတယ်။
၂၇ စက်တင်ဘာလ ၂၆။
