ပြည်သူများနဲ့အတူ ခေါင်းမော့ ရင်ကော့ကျော်လွှားနိုင်ပါစေ
(တူမောင်ညို)
(၂၀၁၄ ခုနှစ်၊ နိုဝင်ဘာ ၆ )
(ဗိုလ်) ဦးရွှေမန်းရဲ့လွှတ်တော်ထဲမှာ “၂၀၀၈ အခြေခံဥပဒေ”ကို
ပြင်ဆင်နိုင်မယ်လို့ ပြောဆိုနေတာဟာ သိပ်ကို စိတ်ကူးယဉ်လွန်းတဲ့ ပြောဆိုမှုသာဖြစ်ပါတယ်။
တစ်ယောက်ထဲစိတ်ကူးယဉ်ပြီးပြောဆိုနေရင်တော့ ဘာမှပြောစရာအကြောင်းမရှိပေမယ့် ဒီလိုပြင်ဆင်နိုင်မယ်လို့
အများပြည်သူလက်ခံအောင် ပြောဆိုနေတာဆိုရင်တော့ ဒီလိုပြောဆိုမှုဟာ အများပြည်သူကို မျှော်လင့်ချက်အမှားတွေပေးနေတာပဲ
ဖြစ်ပါတယ်။
“၂၀၀၈ အခြေခံဥပဒေ” ကို လွှတ်တော်ထဲမှာပြင်ဆင်လို့ (လုံးဝ)မရဘူးလား။ ရပါတယ်။ ဒီလိုပြင်ဆင်ရေးက
ဗိုလ်သိန်းစိန်၊ ဗိုလ်ရွှေမန်း၊ ဗိုလ်မင်းအောင်လှိုင်တို့ စိတ်ကြိုက်ရလဒ်သာ အမြဲထွက်နေစေမယ့်
ပြင်ဆင်ရေးပဲဖြစ်ပါလိမ့်မယ်။
လွှတ်တော်ကဖွဲ့စည်းပေးခဲ့တဲ့ အခြေခံဥပဒေပြင်ဆင်ရေးနဲ့သက်ဆိုင်တဲ့
“၁၀၉ဦး ကော်မတီ”၊ “၃၁ ဦး ကော်မတီ”တို့ရဲ့ ပြင်ဆင်ရေးခြေလှမ်းတွေမှာ ဒီချုပ်အမတ်တွေ
ဘာတွေလုပ်နိုင်ခဲ့လို့လဲ။ ကြံ့ဖွံ့အမတ်တွေ စိတ်ကြိုက်ပဲဆုံးဖြတ်ခဲ့တာမဟုတ်ပါလား။ ဒီချုပ်က
တင်ပြထားတဲ့ ပြင်ဆင်လိုတဲ့ပုဒ်မပေါင်း (၁၆၈)ခု အနက် ပုဒ်မဘယ်လောက် ပြင်ဆင်နိုင်ရေးထဲပါဝင်ခဲ့သလဲ။
ဒီချုပ်ပါတီက ပြင်ဆင်ဖို့ အဓိကရည်ရွယ်ချက်ထားတဲ့ပုဒ်မတွေ ပြင်ဆင်နိုင်မယ့် စာရင်းထဲပါဝင်ရဲ့လား။
ပုဒ်မ ၄၃၆(က)နဲ့(ခ)ကို မထိနဲ့လို့ ကာချုပ်က သူစေလွှတ်ထားတဲ့
“စစ်သားအမတ်”တွေကတဆင့် လွှတ်တော်ထဲမှာမကြာခင်ကပဲ ဗြောင်ပြောပြီး မဟုတ်လား။
“၂၀၀၈အခြေခံဥပဒေ”ပြင်ဆင်ရေးအတွက် ဒီချုပ်ပါတီကဦးစီးပြီး
ဆန္ဒသဘောထားရယူခဲ့တဲ့ ပြည်နယ်နှင့်တိုင်းဒေသကြီးများ၊ ခရိုင်ပေါင်း (၆၀)၊ မြို့နယ်ပေါင်း
(၂၆၇) မြိ့နယ်တို့မှာရယူခဲ့တဲ့ ပျမ်းမျှ (၉၇%) ပြင်ဆင်ပြောင်းလဲလိုကြောင်း ဆန္ဒပြုချက်တွေဟာ
အခုတော့ ဘယ်ရောက်သွားပြီလဲ။
ပုဒ်မ ၄၃၆ ပြင်ဆင်ရေးအတွက် ပြည်သူ ၅သန်းနီးပါး (၄၉၄၁၉၉၈)
ရဲ့ဆန္ဒကို လွှတ်တော်ဥက္ကဋ္ဌဆိုသူက သြဇာသက်ရောက်မှု မရှိဘူးလို့ ဆိုပြီးလျစ်လျူပြုခဲ့ပြီးပြီ
မဟုတ်ပါလား။
ဒါ့အပြင် လွှတ်တော်ထဲမှာရှိတဲ့ “ ဒီချုပ်အမတ် ၄၆ ယောက်”
နဲ့ လွှတ်တော်ဆုံးဖြတ်ချက်တွေကို ဘာမှလုပ်နိုင်မှာမဟုတ်ဘူးဆိုတာကလည်း လူတိုင်းသိရှိ၊
နားလည်သဘောပေါက်နေတဲ့ အချက်ဖြစ်ပါတယ်။
ဒီတော့ လွှတ်တော်ထဲမှာ “၂၀၀၈ အခြေခံဥပဒေ” ပြင်ဆင်ရေးဆိုတာ
ကြံ့ဖွံ့ပါတီအမတ်အများစုနဲ့ ကာချုပ်အပေါ်မှာ လုံးလုံးလျားလျား တည်နေပါတယ်။ ဒီလိုပြင်ဆင်နိုင်ရေး
ရှေ့ဦးလိုအပ်ချက်အဖြစ် “ ၄ပွင့်ဆိုင်တွေ့ဆုံရေး”
တောင်းဆိုခဲ့တယ်။ “၁၄ ဦး ၁၀ မိနစ်စီ စကားပြောပွဲ” နဲ့ ကြံ့ဖွံ့အစိုးရက တုန့်ပြန်ခဲ့ပြီမဟုတ်ပါလား။
၂၀၁၅ ရွေးကောက်ပွဲပြီးတဲ့အခါ ပြင်ဆင်နိုင်မလား။ ၂၀၁၅
ရွေးကောက်ပွဲမှာ ဒီချုပ်ပါတီဟာ ဘယ်လိုပဲ အပြတ်အသတ် အနိုင်ရရှိသည် ဖြစ်ပါစေ “၂၀၀၈အခြေခံဥပဒေ”ကို
မပြင်ဆင်နိုင်ပါဘူး။ ၂၀၁၅ ရွေးကောက်ပွဲမှာ ဒီချုပ်ပါတီ (၁၉၉၀ရွေးကောက်ပွဲ)တုန်းကလို
အပြတ်အသတ်အနိုင်ရဖို့ဆိုတာလည်း မဖြစ်နိုင်ပါဘူး။ စောသန်းမြင့်တို့ (NBF) ၂၂ပါတီအုပ်စုက
ဆန့်ကျင်ပြနေပြီမဟုတ်ပါလား။ ရွေးကောက်ပွဲကော်မရှင်က လုပ်ကြံဖန်တီးလာဦးမယ့် ညစ်နည်းအဖုံဖုံကို
ထည့်မပြောသေးပါဘူး။ (PR) ဆိုတာကို လွှတ်တော်ထဲမှာ အသည်းအသန် ဆန့်ကျင်ကန့်ကွက်နေရပြီ
မဟုတ်ပါလား။
ဘောထားကြီးနေရုံ၊ တည်ဆောက်ရေးစိတ်ထားမွေးမြူရုံ၊အရေးကြီးဆုံး
အမျိုးသားရင်ကြားစေ့ရေးမူကိုရင်ဝယ်ပိုက်ထားရုံနဲ့ “၂၀၀၈ အခြေခံဥပဒေ”ကို ပြည်သူတွေလိုလားတဲ့ ဒီမိုကရေစီစံနှုန်း၊ ဖက်ဒရယ်ပြည်ထောင်စုစံနှုန်းတွေပြည့်ဝတဲ့ အခြေခံဥပဒေတစ်ရပ် ဖြစ်လာအောင် သမ္မတ(ဗိုလ်)ဦးသိန်းစိန်၊
လွှတ်တော်ဥက္ကဋ္ဌ(ဗိုလ်)ဦးရွှေမန်း၊ ကာချုပ်ဗိုလ်မင်းအောင်လှိုင်တို့က ပြင်ဆင်ပေးပါ့မလား။
“NLD က အတားအဆီးတွေကျော်လွှားတဲ့နေရာမှာ အင်မတန်ကျွမ်းကျင်ပါတယ်” တဲ့။
ဟုတ်ကဲ့။ ဒီချုပ်ပါတီဟာ မီးကွင်းစတဲ့ အတားအဆီးအခက်အခဲတွေကို ကြာပွတ်ကိုင်သူရဲ့အမိန့်ပေးမှုနဲ့အတူ
စည်းကမ်းသေဝပ်စွာ၊ ကျွမ်းကျင် လိမ်မာစွာ ကျော်လွှားသွားတတ်တဲ့ ဆပ်ကပ်ရုံကြီးထဲက ခြင်္သေ့ကြီးလိုတော့လည်း
မဖြစ်စေလိုပါ။
ဒါ့အပြင်၊ လွှတ်တော်ဥက္ကဋ္ဌကြီးရှေ့မှောက်မှာ တန်းစီးခေါင်းငုံ့ကာ “လေးစားလိုက်နာပါ့မယ်”လို့
ကျမ်းကျိန်ပြီးတော့လည်း မကျော်လွှားစေချင်ပါဘူးခင်ဗျာ။
ပြည်သူများနဲ့အတူ ခေါင်းမော့ရင်ကော့ပြီး ကျော်လွှားစေချင်တာပါ။ အခုတော့ ကိုပါကြီးတို့၊
ဆွမ်လွတ် ရွယ်ဂျာတို့တော့ “၂၀၀၈ အခြေခံ ဥပဒေဘောင်”ထဲမှာ စစ်တပ်ရဲ့အကြမ်းဖက်ဖမ်းဆီး၊
ဖိနှိပ်သတ်ဖြတ်ခြင်းကို ရက်ရက်စက်စက်ခံခဲ့ကြရပါပြီ။ လယ်ယာမြေမတရားသိမ်းပိုက်ခြင်းခံရတဲ့အပြင်၊
လယ်သမားတွေလည်း အဓမ္မဖမ်းဆီးထောင်ချခံနေကြရပါပြီ။
0 comments:
Post a Comment