အာဏာဟာ သေနတ်ပြောင်းဝမှထွက်တယ်

အာဏာဟာ သေနတ်ပြောင်းဝမှထွက်တယ်

ပြည်သူ့အာဏာဂျာနယ် အမှတ် ၃၄

“ အာဏာဟာ သေနတ်ပြောင်းကထွက်တယ် ”

မာ့က်စ်ဝါဒကို ထိုးနှက်တိုက်ခိုက်သောအခါ ဆန့်ကျင်တိုက်ခိုက်သူတို့ အသုံးအများဆုံးနည်းမှာ စကားလုံးတို့ကို အဓိပ္ပာယ် တလွဲဖွင့်ဆိုပြီး သိက္ခာချသောနည်း ဖြစ်သည်။ မာ့က်စ်ဝါဒီတို့ မပြောသောစကား၊ မပြောသောအဓိပ္ပာယ်ကို ပြောသယောင်လုပ်ပြီး၊ ထိုသို့ပြောသည်မှာ မကောင်းဟု မတော်မတရား စွပ်စွဲပြောဆိုသောနည်း ဖြစ်သည်။ ထိုသို့သောသာဓက အမြောက်အများ ရှိသည်။ ယင်းတို့အနက် တခုကို ယခုပြောချင်ပါတည်။

အာဏာဟာ သေနတ်ပြောင်းကထွက်တယ် ဆိုသောစကားကို လူတော်တော်များများ မကြိုက်ကြ။ ဆိုလိုရင်းအမှန်ကို နားမလည်ဘဲ တလွဲအဓိပ္ပာယ်ကောက်ပြီး မကြိုက်ကြခြင်းဖြစ်သည်။ တလွဲအဓိပ္ပာယ် ကောက်ကြခြင်းမှာလည်း တလွဲအဓိပ္ပာယ်ဖွင့်ပြီး မဟုတ်မတရား သိက္ခာချသူတွေ ရှိခဲ့သောကြောင့် ဖြစ်သည်။

အာဏာဟာ သေနတ်ပြောင်းကထွက်တယ်ဆိုသော စကားကို မော်စီတုန်းက အာဏာရှင်မို့ ပြောသည်ဟု စွပ်စွဲကြသည်။ ပြည်သူတွေကို သေနတ်နှင့် အုပ်ချုပ်ရမည်၊ သေနတ်နှင့် ဖိနှိပ်ရမည်ဟု မော်စီတုန်းက ပြောသလိုလို ထင်ကြသည်။ ထိုစကား မမှန်ပါ။ ပြောင်းပြန် ဖြစ်သည်။ သမိုင်းတလျှောက်တွင် ပြည်သူကို တန်ဖိုးထားခြင်း၊ ပြည်သူကို ဦးထိပ်တင်ခြင်း၊ ပြည်သူ့အာဏာ ထူထောင်ရန် ကြိုးပမ်းခြင်း အလုပ်တို့ကို ပါတီမူဝါဒအဖြစ်နှင့် ယုံယုံကြည်ကြည် စွဲစွဲမြဲမြဲလိုက်နာပြီး လက်တွေ့အကောင်အထည် ဖော်ကြသူများတွင် သက်တမ်းအရှည်ကြာဆုံး ပါတီများမှာ ကွန်မြူနစ်ပါတီများသာဖြစ်သည်။ ကမ္ဘာ့သမိုင်းတလျှောက်တွင် ကွန်မြူနစ်များလောက် ဘယ်သူတွေမှ ပြည်သူလူထုအတွက် အနစ်နာ မခံကြဖူးပါ။

စင်စစ် အာဏာဟာ သေနတ်ပြောင်းက ထွက်တယ်ဟု ဥက္ကဋ္ဌမော်စီတုန်း ပြောခဲ့ခြင်းမှာ သူဖြစ်ချင်သောအရာကို ပြောခဲ့ခြင်း မဟုတ်ပါ။ အာဏာ သေနတ်ပြောင်းက ထွက်ခြင်းသည် ကောင်းသည်၊ မှန်သည်၊ ဖြစ်ထိုက်သည်ဟု ထိုအဆိုဘက်ကနေ ရှေ့နေလိုက် ထောက်ခံပြီး ပြောဆိုခဲ့ခြင်းလည်း မဟုတ်ပါ။ သူပြောသည်မှာ ဖြစ်နေသောအရာကို ပြောခြင်းသာဖြစ်သည်။ အရှိတရား၊ ပကတိတရားကိုသာ ပြောနေခြင်း ဖြစ်သည်။ လူမှာ ခြေနှစ်ချောင်းရှိတယ်၊ နွားမှာ ခြေလေးချောင်းရှိတယ်၊ ရေမှာ အောက်ဆီဂျင်နဲ့ ဟိုက်ဒရိုဂျင်ဓာတ် ပါတယ်၊ အနုမြူဗုံးပေါက်ကွဲရင် လူပေါင်းများစွာ သေကြေစေနိုင်တယ် ဆိုသည့် စကားတို့နှင့် အလားသဏ္ဌာန်တူသော အမှန်တရားတခုကို ပြောလိုက်ခြင်းသာ ဖြစ်ပါသည်။ ထိုကဲ့သို့သော အမှန်တရားမျိုးသည် ခင်ဗျားတို့ ကျွန်တော်တို့ ကြိုက်သည်ဖြစ်စေ၊ မကြိုက်သည်ဖြစ်စေ သူ့ဘာသာ မှန်နေသော အမှန်တရားမျိုး ဖြစ်သည်။ လူတို့၏ ကြိုက်ခြင်း၊ မကြိုက်ခြင်း၊ လိုခြင်း၊ မလိုခြင်းဟူသော ဆန္ဒစွဲတို့နှင့် ကင်းလွတ်ပြီး သူ့ဘာသာ သီးခြားမှန်ကန်နေသော အမှန်တရားဖြစ်သည်။ Objective Truth ဖြစ်သည်။ အနုမြူဗုံးပေါက်ကွဲရင် လူပေါင်းများစွာ သေနိုင်တယ်ဟု ပြောသောသူကို အနုမြူဗုံးအသုံးပြုပြီး လူသတ်ချင်စိတ် ပေါက်နေသောသူဟု စွပ်စွဲလျှင် မမှန်သလို၊ အာဏာဟာ သေနတ်ပြောင်းကထွက်တယ်ဟု ပြောသောကိုမော်စီတုန်းဟာ အာဏာရှင်မို့ ပြည်သူကို သေနတ်နဲ့ ဖိနှိပ်ချင်လို့ ပြောတာပဲဟု ကောက်ချက်ချခြင်းမှာလည်း မမှန်ကန်နိုင်ပါ။

တကယ်တော့ အာဏာဟာ သေနတ်ပြောင်းက ထွက်တယ်ဆိုသော စကားသည် အာဏာရှင်တို့၏ စကားဟု ထင်မှတ်ကောက်ယူနေကြသူများသည် မော်စီတုန်း၏ စာပေများကို မဖတ်ဖူးဘဲ ပြောနေကြခြင်းဖြစ်ကြောင်း အလွန်ပင် ထင်ရှားပါသည်။ မော်စီတုန်း၏ စာပေများကို ဖတ်ရှုဖူးလျှင် မော်စီတုန်းသည် ပြည်သူလူထုကို ဘယ်လောက်ထား ယုံကြည်ကြောင်း ထင်ရှားစွာ သိမြင်နိုင်ပါသည်။ ပြည်သူလူထုကို စည်းရုံးပြီး တော်လှန်ရေး ဆင်နွှဲရန် ခရီးရှည်ချီတက်ပွဲကြီးကို ဘယ်လိုစီစဉ် အကောင်အထည် ဖော်ခဲ့ကြောင်း သိနိုင်ပါသည်။ မော်စီတုန်း၏ ပြောက်ကျားစစ် သဘောတရားများကို ဖတ်ဖူးလျှင် မော်စီတုန်းသည် ပြောက်ကျားစစ် သေနင်္ဂဗျူဟာများကို ပြည်သူကို အခြေခံရေးသားခဲ့ကြောင်း သိရှိနိုင်ပါသည်။ မော်စီတုန်း၏ ပြောက်ကျားစစ် သေနင်္ဂဗျူဟာများသည် ကွန်မြူနစ် ဟုတ်ဟုတ်မဟုတ်ဟုတ် စစ်နှင့်ပတ်သက်သူတိုင်း မဖြစ်မနေ လေ့လာကြရသော စစ်ရေးသိပ္ပံကျမ်းတွေဖြစ်သည်ကို စစ်ပညာ လေ့လာသူတိုင်း၊ နိုင်ငံရေးလေ့လာသူတိုင်း သိရှိကြပါသည်။ ထိုစစ်ရေးသိပ္ပံကျမ်းတို့သည် စစ်တိုက်မည့်သူများအတွက်သာ အသုံးဝင်သည်မဟုတ်ဘဲ သေနင်္ဂဗျူဟာ ချမှတ်ဆောင်ရွက်ရသော ကိစ္စတိုင်းအတွက် အသုံးဝင်သောကျမ်းများ ဖြစ်သည်။ အထူးသဖြင့် ပြိုင်ဘက်နှင့်၊ ရန်သူနှင့် သူနိုင်ကိုယ်နိုင် အပြိုင်ကြဲရမည့် ကိစ္စများတွင် သေနင်္ဂဗျူဟာပိုင်းကို လေ့လာလိုသူတိုင်းအတွက် မဖြစ်မနေ လေ့လာအပ်သော ဘာသာရပ်များပင် ဖြစ်သည်။

သမိုင်းကို မလေ့လာလျှင် အ တတ်ပါသည်။ နိုင်ငံရေး သဘောတရားများကို မလေ့လာလျှင်၊ စာမဖတ်လျှင်လည်း တုံးတတ်ပါသည်။ နိုင်ငံရေးအကြောင်း ပြောလိုလျှင်၊ နိုင်ငံရေးမှာ ဝင်ရောက် ပတ်သက်လိုလျှင် နိုင်ငံရေးသဘောတရား စာပေများကို ဖတ်ရှုလေ့လာဖို့ လိုအပ်ပါသည်။ အာဏာဟာ သေနတ်ပြောင်းက ထွက်တယ်ဆိုသောစကားကို ဝေဖန်လိုလျှင် သင်သည် အနိမ့်ဆုံးအဆင့် အနေဖြင့် မော်စီတုန်းရေးသားသော စစ်နှင့်သေနင်္ဂဗျူဟာပြဿနာ စာတမ်းကို ဖတ်ဖူးရပါလိမ့်မည်။

အဘယ်ကြောင့်ဆိုသော် အာဏာဟာ သေနတ်ပြောင်းက ထွက်တယ်ဆိုသောစကားကို မော်စီတုန်းက ထိုစာတမ်းတွင် ထည့်သွင်းရေးသားခဲ့သောကြောင့် ဖြစ်ပါသည်။

ထိုစာတမ်းတွင် မော်စီတုန်းရေးခဲ့သည်မှာ “ နိုင်ငံရေးအာဏာဟာ သေနတ်ပြောင်းထဲက ထွက်လာတာဖြစ်တယ်ဆိုတဲ့ အမှန်တရားကို ကွန်မြူနစ်ပါတီဝင်တိုင်း နားလည်ထားရမယ် ” ဟု ရေးခဲ့ခြင်းဖြစ်သည်။ ပါတီဝင်တွေကို ဦးဆောင်ညွှန်ပြ သင်ကြားပေးခြင်းဖြစ်သည်။ သို့သော် ထိုဆောင်းပါးထဲမှာပင် “ ကွန်မြူနစ်ပါတီဝင်များဟာ ပုဂ္ဂလိက(အကျိုး) အတွက် စစ်အာဏာ မလုရ။ ဘယ်နည်းနဲ့မှ မလုရ။ ကျန်းကိုထောင်ကို ဘယ်တော့မှ အတုမယူရ။ ဒါပေမဲ့ ပါတီအတွက်နဲ့ ပြည်သူတို့ အတွက် စစ်အာဏာလုရမယ် ” ဟု အတိအလင်း ရေးသားခဲ့ပါသည်။ အင်္ဂလိပ်ဘာသာပြန်မှာ They must fight for military power for the people ဟု အတိအလင်း ရေးထားပါသည်။

ထိုစာသားကိုကြည့်လျှင် ဥက္ကဋ္ဌမော်သည် အာဏာသည် သေနတ်ပြောင်းက ထွက်သည်ဆိုသည့် အရှိတရားကို ထောက်ပြခဲ့ပြီး ပြည်သူတွေအတွက် သေနတ်ပြောင်းကို လုယူရန်လိုကြောင်း၊ ညွှန်ကြားခဲ့သည်ကို ရှင်းရှင်းလင်းလင်း မြင်နိုင်ပါသည်။

အာဏာဟာ သေနတ်ပြောင်းက ထွက်တယ်ဟု သူပြောခြင်းသည် အာဏာကို တကယ်ပိုင်ဆိုင်ထိန်းချုပ်သူမှာ သေနတ်ကိုင်ထားသူသာ ဖြစ်သင့်သည်ဟူသော အဓိပ္ပာယ် မဟုတ်ပါ။ မဟုတ်ရုံသာမက အာဏာကို ပြည်သူက ပိုင်ဆိုင်ထိန်းချုပ်နိုင်ရန် အလုပ်သမား၊ လယ်သမားလူတန်းစားက ပိုင်ဆိုင် ထိန်းချုပ်နိုင်ရန် ဥက္ကဋ္ဌမော်သည် သူ့ဘဝတလျှောက်လုံး မြှုပ်နှံအလုပ်လုပ်သွားသူ ဖြစ်သည်။

သူ့လက်ရွေးစင်ကျမ်းများကို ဖတ်ကြည့်လျှင် ပြည်သူ့အာဏာအတွက် အလေးအနက်ထားပြီး တောက်လျှောက်စူးစိုက် ရေးသားခဲ့ကြောင်း တွေ့နိုင်ပါသည်။ သူ၏ နာမည်ကျော် ဒီမိုကရေစီသစ်ကျမ်းကို ဖတ်ကြည့်လျှင်လည်း သူ့သဘောကို နားလည်နိုင်ပါသည်။

အာဏာဟာ သေနတ်ပြောင်းက ထွက်တယ်ဆိုသည်မှာ အာဏာကို သေနတ်ပြောင်းထဲမှ ထုတ်လုပ်သည် (produce လုပ်သည်) ဟုသာ ဆိုချင်တာ ဖြစ်ပါသည်။ အင်္ဂလိပ်လိုဘာသာပြန်မှုမှာ ( Political power grows out of the barrel of a gun.) ဟု ရေးထားသည်။

အာဏာဟာ သေနတ်ပြောင်းက ထွက်တယ်ဆိုသော စကားကို မကြိုက်နှစ်သက်သူတွေကို မေးချင်ပါသည်။ အာဏာသည် သေနတ်ပြောင်းက မထွက်လျှင် ဘယ်ကများ ထွက်ပါသနည်း။ ဤဆောင်းပါးကို ခဏရပ်ပြီး သင်ကိုယ်တိုင် စဉ်းစားကြည့်ပါ။

ယနေ့ ကမ္ဘာပေါ်တွင် တည်ရှိနေသော နိုင်ငံရေးအာဏာတို့တွင် နောက်မှ သေနတ်နှင့်စစ်တပ်တို့ ကျောထောက်နောက်ခံ

ပြုပေးမထားသောအာဏာ ဘယ်မှာရှိပါသနည်း။ ဂျပန်တွင် အမြဲတမ်းစစ်တပ်မရှိဘဲ အကြာကြီးရပ်တည်ခဲ့သည်ဟု သင်က ဆိုချင်ဆိုပေလိမ့်မည်။ ဂျပန်တွင် နိုင်ငံရေးအာဏာကို ပြည်သူတို့အပေါ် ကျင့်သုံးနိုင်ရန် လက်နက်ကိုင်ရဲတပ်ဖွဲ့ရှိသည်။ ဂျပန်၏ နိုင်ငံရေးအာဏာ တည်မြဲအောင် ကျောထောက်နောက်ခံ ပြုပေးထားသော တကယ့် သေနတ်ပြောင်းမှာ အမေရိကန် သေနတ်ပြောင်းဖြစ်သည်။ အမေရိကန် စစ်တပ်က ဂျပန်ကို နှစ်ပေါင်းများစွာ ချုပ်ချယ်ထားသလို၊ တခြားပြိုင်ဘက် နိုင်ငံရေးအာဏာတို့၏ အန္တရာယ်မှလည်း ကာကွယ်ထားသည်။ ယနေ့ကမ္ဘာပေါ်တွင်လည်းကောင်း၊ ပြီးခဲ့သော အတိတ်ကာလ ကမ္ဘာတွင်လည်းကောင်း စစ်တပ်ဖြင့်၊ သေနတ်ဖြင့် ကျောထောက်နောက်ခံ ပြုမထားသော အာဏာဟူ၍ကား တခါမှ မရှိချေ။ စကားကတ်သတ်ပြောလိုပါမူ အာဏာသည် သေနတ်ပြောင်းက ထွက်လာသည် မဟုတ်ဘဲ ဓားက စီးလာသော အချိန်မျိုး ရှိခဲ့ဖူးပါသည်ဟု ဆိုလျှင်မူကား မှန်သည်ဟု ဆိုရပါမည်။ အနော်ရထာတို့၊ ကူဗလိုင်ခန်၊ ဂျင်ဂစ်ခန်တို့၏ အာဏာသည် ဓားနှင့် မြှားတို့ကနေ စီးထွက်လာခြင်းဖြစ်သည်။ သို့သော် သဘောတရားမှာ အတူတူသာဖြစ်သည်။ စစ်တပ်နှင့် လက်နက်နှင့် ကျောထောက်နောက်ခံ ပြုမထားသော အာဏာဟူ၍ကား မပေါ်ဖူးသေးပါချေ။

၎င်းအပြင် နိုင်ငံရေးအာဏာမရှိဘဲ၊ သို့မဟုတ် နိုင်ငံရေးအာဏာ၏ ထောက်ခံချက်မရဘဲ ကျွန်တော်တို့ ဘာမှထိထိရောက်ရောက် လွတ်လွတ်လပ်လပ် လုပ်၍မရနိုင်ပါ။ ကုန်ကုန်ပြောရလျှင် နိုင်ငံရေးအာဏာက သဘောမတူပါက ကျွန်တော်တို့သည် အခမဲ့ ပရဟိတ ဆေးခန်းတခန်းကို လွတ်လွတ်လပ်လပ် တည်ထောင်၍ မရကြောင်းကို ဗမာပြည်၏ လက်တွေ့အခြေအနေများက သင်ခန်းစာပေး သင်ပြခဲ့ပြီး ဖြစ်ပါသည်။ နိုင်ငံရေးအာဏာရှိလျှင် ပညာရေးကိုလည်း ဆောင်ရွက်နိုင်သည်။ ကျန်းမာရေးကိုလည်း ဆောင်ရွက်နိုင်သည်။ ယဉ်ကျေးမှုကိုလည်း တည်ဆောက်နိုင်သည်။ စီးပွားရေးကိုလည်း တည်ဆောက်နိုင်ပါသည်။ ထို့အပြင် နိုင်ငံရေးအာဏာကို အလွဲသုံးစားပြုပြီး သားစဉ်မြေးဆက် ချမ်းသာကြွယ်ဝရေးကိုပင် စစ်အာဏာရှင်တို့ လုပ်နေကြသည်ကို ကျွန်တော်တို့ မျက်ဝါးထင်ထင် တွေ့မြင်နေရပါသည်။ နိုင်ငံရေးအာဏာကို အလွဲသုံးစားပြုပြီး စစ်အာဏာရှင်တို့ကို အထောက်အကူပြုမည့် သေဖော်သေဖက် စီးပွားရေးအခွင့်ထူးခံများ မွေးထုတ်ပေးပြီး အုပ်စုဂိုဏ်းဂဏ ဖွဲ့နေသည်ကိုလည်း တွေ့မြင်ရပါသေးသည်။

ဥက္ကဋ္ဌမော်က သူ့စာတမ်းထဲတွင် “ ကျွန်တော်တို့ရဲ့မူဟာ ပါတီက သေနတ်ကို ဦးစီးဖို့ ဖြစ်တယ်။ သေနတ်က ပါတီကို ဦးစီးတာမျိုးကိုတော့ ဘယ်တော့မှ ခွင့်မပြုနိုင်ဘူး။ ” ဟု ရေးသားခဲ့ပါသည်။ “ ဒါပေမဲ့ သေနတ်ရှိရင် ကေဒါတွေ၊ ကျောင်းတွေ၊ ယဉ်ကျေးမှုတွေ၊ လူထုလှုပ်ရှားမှုတွေကို ဖန်တီးနိုင်သေးတယ်။ ” ဟုလည်း သူတို့၏ ယင်အန်းအတွေ့အကြုံကို ထောက်ပြပြောဆိုခဲ့ပါသည်။ “ မာ့က်စ်ဝါဒ နိုင်ငံတော်သဘောတရား အမြင်နဲ့ ကြည့်မယ်ဆိုရင် စစ်တပ်ဟာ နိုင်ငံတော်အာဏာထဲက အဓိကအစိတ်အပိုင်း ဖြစ်တယ်။ ” ဟုလည်း ရေးသားခဲ့ပါသည်။

စစ်ဘုရင်တွေဟာ စစ်တပ်ရှိမှ အာဏာရှိမယ်ဆိုတဲ့မူကို ကောင်းကောင်း နားလည်ထားကြတယ်ဟုလည်း ထောက်ပြပါသည်။ ကျွန်တော်တို့နိုင်ငံတွင် တပ်မတော်အင်အားရှိမှ တိုင်းပြည်အင်အားရှိမည်ဟု စစ်အာဏာရှင်တို့က ကြွေးကြော်လှုံ့ဆော်နေခြင်းသည်လည်း အာဏာ၏သဘောကို စစ်အာဏာရှင်တို့က ကောင်းကောင်းနားလည်ထားသောကြောင့် ဖြစ်သည်။ စင်စစ် သူတို့အာဏာတည်မြဲဖို့ ဖြစ်သည်။ တကယ့်အတွင်းသဘောအနှစ်သာရမှာ တပ်မတော် အင်အားရှိမှ စစ်အာဏာရှင်တွေ အင်အားရှိမည်ဟု ဆိုလိုခြင်းသာ ဖြစ်သည်။ ကျွန်တော်တို့ ဒီမိုကရေစီသမား အများစုမှာမူ အာဏာ၏ သဘောသဘာဝကို နားမလည်ကြ။ အာဏာဟူသည် သေနတ်ပြောင်းက ထွက်သည်ဟူသော အခြေခံ သိပ္ပံနည်းကျ အတွေးအခေါ်ကို သဘောမပေါက်ကြ။ သဘောမပေါက်ရုံသာမက ရွံစရာ၊ မုန်းစရာ၊ ကြောက်စရာစကားဟုပင် ထင်သူက ထင်ကြသည်။ တချို့ ဒီမိုကရေစီသမားတို့က အာဏာရှင်တို့ကို စည်းရုံးသိမ်းသွင်းပြောဆိုလျှင် နားလည်လာလိမ့်မည်ဟု စိတ်ကူးယဉ်ကြသည်။ အာဏာရှင်တို့လည်း တိုင်းပြည်ကို ချစ်ကြသည်။ သူတို့ နားမလည်သဘောမပေါက်လို့သာ မိုက်နေကြသည်ဟု ထင်နေကြသည်။ မိမိတို့ အသိဉာဏ်နုံ့နဲ့သည်ကို မိမိဘာသာ မရိပ်စားမိဘဲ အာဏာရှင်တွေကို ပညာပေးမှဖြစ်မည်ဟု စိတ်ကြီးဝင်သူက ဝင်ကြသည်။ ကျောင်းသားတပ်မတော်ကို ဖျက်ပြီး စစ်ဗိုလ်ကြီးများကို ယဉ်ပါးလာအောင် လိမ္မာလာအောင် တရားရေအေး တိုက်ကျွေးဖို့ ကြိုးစားကြရန် တိုက်တွန်းသူက တိုက်တွန်းခဲ့ကြသည်။ ဤသို့သော အတွေးအခေါ်အမှားများ၊ အာဏာ၏ သဘောတရားကို နားမလည်သော အတွေ့အကြုံ နုနယ်မှုများကြောင့် ဒီမိုကရေစီ အရေးတော်ပုံကြီးမှာ ကြာသင့်သည်ထက် ကြာခဲ့ရပါသည်။

တကယ်တော့ ကျွန်တော်တို့အနေနှင့် ပြည်သူ့အာဏာခေတ်ကို တည်ထောင်နိုင်ဖို့ဆိုလျှင် ပြည်သူ့အာဏာကို ကျောထောက်နောက်ခံ ပြုပေးမည့် သေနတ်ရှိဖို့ မဖြစ်မနေ လိုအပ်ပါသည်။ အာဏာဟူသည် ရှေးခေတ်ကရော ယခုခေတ်တွင်ပါ သေနတ်ပြောင်းကသာ ထွက်ပါသည်။ တခြား ဘယ်ကမှ မထွက်ပါ။ ထိုအချက်ကို နားမလည်သေးသမျှ လွတ်မြောက်ရေးနှင့် ဝေးနေဦးမည်သာ ဖြစ်ပါသည်။