People Liberative Army (PLA) ပြည်သူ့လွတ်မြောက်ရေးတပ်မတော်သားများရဲ့ အိတ်ဆောင်လက်စွဲစာအုပ်ငယ်မှ
ပြည်သူ့လွတ်မြောက်ရေးတပ်မတော်သားများအတွက် လျှို့ဝှက်ရေးဆိုင်ရာသတ်မှတ်ချက်ကို ကောက်နှုတ်တင်ပြတာ ဖြစ်ပါတယ်။
အရာရာကို နိုင်ငံရေးအမြင်နဲ့ခွဲခြမ်းစိတ်ဖြာကြည့်မြင်ရမယ်။ ပါတီအကျိုး၊ တော်လှန်ရေးအကျိုးနဲ့ပြည်သူ့အကျိုး ရှိမရှိဆန်းစစ်ကြည့်ရမယ်။ လျှို့ဝှက်ရေးဆိုင်ရာကိစ္စများထိန်းသိမ်းခြင်းဟာ ပါတီနဲ့တပ်ရဲ့လုံခြုံရေးနဲ့သာ သက်ဆိုင်နေရုံမက ပြည်သူ့ပြောက်ကျားစစ်ပွဲအတွင်း ရန်သူကိုအနိုင်တိုက်နိုင်ရေးအတွက် အရေးကြီးတဲ့ အချက်ဖြစ်တယ်။ ရဲဘော်အားလုံးဟာ အောက်ပါ လျှို့ဝှက်ရေးဆိုင်ရာသတ်မှတ်ချက်များကို လိုက်နာရပါမယ်။
၁။ မပြောသင့်တဲ့လျှို့ဝှက်ရေးကိစ္စကို လုံးဝ မပြောရ။
၂။ မမေးသင့်တဲ့လျှို့ဝှက်ရေးကို မမေးရ။
၃။ မကြည့်သင့်တဲ့လျှို့ဝှက်ရေးကို မကြည့်ရ။
၄။ လျှို့ဝှက်ရေး စာစောင်စာတမ်းများကို တပ်ရဲ့ပြင်ပသို့မရောက်စေရ။ မပျောက်ပျက်စေရ။ ခေါင်းဆောင်များရဲ့ မှတ်စုများကို မကြည့်ရ။
၅။ သတင်းဆက်သွယ်ရေးနဲ့ သတင်းကြားဖြတ်လုပ်ငန်းဆိုင်ရာအလုပ်ခန်းထဲသို့ သက်ဆိုင်သူမှအပ မဝင်ရ။
၆။ တပ်နံပတ်နဲ့ခေါင်းဆောင်တာဝန်တို့ကို မပေါက်ကြားစေရ။
၇။ ခွင့်သွားသည့်အခါ။ အိမ်ပြန်သည့်အခါ၊ ဆေးရုံတက်သည့်အခါ စသည်တို့မှာ လျှို့ဝှက်စာစောင်စာတမ်းများကို လုံးဝယူဆောင်မသွားရ။
၈။ တဦးချင်း စာပေးစာယူလုပ်တဲ့အခါမှာ ပါတီနဲ့တပ်ရဲ့ စစ်ရေးလျှို့ဝှက်ချက်များကို ထည့်မရေးရ။
၉။ မလုံခြုံတဲ့နေရာမှာ လျှို့ဝှက်ရေးကိစ္စများကို မပြောရ။
၁၀။ တပ်ထဲမှာ ရန်သူ့ဒလျှိုနဲ့ မသင်္ကာဖွယ်ကိစ္စများရှိနေတယ်လို့ထင်ရရင် အမြဲတစေ ဂရုစိုက်အကဲခတ် စောင့်ကြည့်သုံးသပ်ရမယ်။
People Liberative Army (PLA) ပြည်သူ့လွတ်မြောက်ရေးတပ်မတော်သားများရဲ့ အိတ်ဆောင်လက်စွဲစာအုပ်ငယ်မှ
ပြည်သူ့လွတ်မြောက်ရေးတပ်မတော်ရဲ့ ဒီမိုကရေစီ(၃)ရပ်။
၁။ နိုင်ငံရေးဒီမိုကရေစီ။
- တပ်မှူးတပ်သားတိုင်းဟာ နိုင်ငံရေးအရတန်းတူဖြစ်တယ်။ ဗမာပြည်ကွန်မြူနစ်ပါတီကခေါင်းဆောင်တဲ့ ပြည်သူ့လွတ်မြောက်ရေးတပ်မတော်ရဲ့ ရဲဘော်များဖြစ်တယ်။
- တပ်သားများဟာ တပ်မှူးကို ဝေဖန်နိုင်တယ်။ ထင်မြင်ချက်ရှိရင် တင်ပြနိုင်တယ်။
- လုပ်ငန်းများအပေါ် အကြံပေးနိုင်တယ်။
- တပ်မှူးများဟာ တပ်သားရဲဘော်များရဲ့ ဒီမိုကရေစီအခွင့်အရေးကို လေးစားရုံမက ကာကွယ် ထိန်းသိမ်းပေးရမယ်။
- တပ်မှူးများက လက်စားချေတာမျိုး၊ ဝေဖန်ရေးကို တားမြစ်ပိတ်ပင်တာမျိုးမလုပ်ရ။
၂။ စီးပွားရေးဒီမိုကရေစီ
- အခြေခံယူနစ်(ဥပမာ-တပ်ခွဲ)မှာ ရဲဘော်အားလုံး ရွေးကောက်တင်မြှောက်ထားတဲ့ စီးပွားရေးကော်မတီရှိရမယ်။
- ၎င်းကော်မတီက ရိက္ခာဆိုင်ရာစီမံအုပ်ချုပ်ရေးမှာ တပ်မှူးကိုအထောက်အကူပြုရမယ်။
ငွေကြေးသုံးစွဲမှုကို ကြပ်မတ်ရမယ်။ စာရင်းဇယားများကို အပတ်စဉ်စစ်ဆေးကြေညာရမယ်။
ဖြုန်းတီးမှု၊ ခေါင်းပုံဖြတ်မှုနဲ့ ပေါ်လစီဆန့်ကျင်တဲ့လုပ်ရပ်များကို တားဆီးတိုက်ပွဲဆင်ရမယ်။
၃။ စစ်ရေးဒီမိုကရေစီ
- စစ်လေ့ကျင့်ရေးမှာ တပ်မှူးတပ်သား အပြန်အလှန်သင်ကြားပို့ချ၊ တပ်သားအချင်းချင်း အပြန်အလှန် သင်ကြားပို့ချတဲ့စနစ်ကိုသုံးရမယ်။ တိုက်ပွဲမပြုလုပ်ခင်မှာ တိုက်ပွဲကို ဘယ်လိုအောင်မြင်အောင် တိုက်မယ်ဆိုတာ တပ်သားထုအတွင်း လှုံ့ဆော်တာ၊ ဆွေးနွေးတာ၊ သဘောထားနဲ့အကြံဉာဏ် ရယူတာတွေလုပ်ရမယ်။ တိုက်ပွဲပြီးရင် နိဂုံးချုပ်ဆွေးနွေးပွဲတွေလုပ်ရမယ်။ ဒါတွေအားလုံးမှာ ပြည်သူ့လွတ်မြောက်ရေးတပ်မတော်သားတိုင်းပါဝင်ပြီး အမြင်တင်ပြခွင့်ရှိတယ်။
0 comments:
Post a Comment