“သေနတ်ကျည်ဆန်တွေက ဈေးပိုကြီးနေပြီလား”

“သေနတ်ကျည်ဆန်တွေက ဈေးပိုကြီးနေပြီလား”
မနေ့က ရှေ့နောက် နှစ်ယောက်နင်းစက်ဘီး Tandem တစီးဝယ်ရန် ကျနော်တို့လင်မယား မြို့ပတ်ခဲ့ကြပါသည်။ အိမ်မှာရှိသည့်တစင်းက 7 Speed ဖြစ်ပြီး ကုန်းအတက် ဂီယာချိန်းလိုက်လျှင် ဂျိဂျိ ဂျိဂျိ မြည်ကာ ကောင်းကောင်း အလုပ်မလုပ်ချင်တော့။ ဘီးကလည်း အိုပြီ။ ဒီတခါဝယ်ဖြစ်လျှင် Multi Speed မဟုတ်သည့် ဂီယာမချိန်းရသည့် ရိုးရိုးဘီးပဲဝယ်မည်ဟု နှစ်ယောက်သားတွေးထား၏။ ထို့ကြောင့် ဖို့တ်ဝိန်းရှိ Summit City Bicycle ဆိုင်ကို တမြန်နေ့ သွားကြည့်ခဲ့ကြ၏။ ဆိုင်တွင်ရှိသည် Tandem ကို ဒီဇိုင်း မကြိုက်သဖြင့် ဈေးပင်မမေးမိခဲ့ကြ။ ကျနော်တို့ လိုချင်သည့်ဒီဇိုင်းကိုပြောပြသည့်အခါ ဆိုင်အရောင်းသမားတဦးက တခြားမြို့များတွင်ရှိသည့် သူတို့ဆိုင်ခွဲများတွင်ရှိမရှိ အွန်လိုင်းမှတက်ကြည့်ပေး၏။ ဖလော်ရီဒါကဆိုင်ခွဲတွင် တစီးရှိတာကိုတွေ့၏။ ဈေးက ၉ ရာနီးပါး။ လိုချင်လျှင် မှာပေးမည် သယ်ယူခကို ကျနော်တို့ဘက်မှကျခံရမည်ဆို၏။ ဒါနှင့် တေ့တေ့ဆိုင်ဆိုင်လိုချင်လျှင်ပြန်လာပါမည်ဟု ပြောကာ အိမ်ပြန်ခဲ့ကြ၏။ စက်ဘီးဈေးကြောင့်မဟုတ် သယ်ယူခကျခံရမည်ကို ဘဝင်မကျသော့ကြောင့်ပင်။

အိမ်ပြန်ရောက်တော့ ဇနီးက အိုင်ပက်ဒ်တလုံးနှင့် အွန်လိုင်းတွင်မွှေနှောက်ရှာဖွေ၏။ သူတွေ့သည့်ဘီးများ လာလာပြ၏။ နင့်စိတ်ကြိုက်တွေ့ရင်ပြောလေဟုပြောပြီး ကျနော်က စာတအုပ်နှင့် ငြိမ့်နေ၏။ ခနနေတော့ စာအုပ်ချကာ ဖေ့စ်ဘွတ်ခ် တက်ရင်း ဟိုဟိုသည်သည်များလိုက်ဖတ်နေခိုက် နှစ်ယောက်နင်းစက်ဘီး ကြော်ငြာများ ကျနော့်စာမျက်နှာတွင် တက်တက်လာ၏။ Marketplace ကနေလည်း ဖို့တ်ဝိန်းနှင့်အနီးတဝိုက်မှ Tandem ဘီး ကြော်ငြာတွေပို့ပို့လာ၏။ အံ့ဩစရာတော့မရှိ။ ဇနီးသည်သုံးသည့် အိုင်ပက်ဒ်တွင် ဖေ့စ်ဘွတ်ခ် app ကို Install လုပ်ထားရုံမက ကျနော် ရံဖန်ရံခါ ထိုအိုင်ပက်ဒ်နှင့် ဖေ့စ်ဘွတ်ခ်သုံးတတ်သည်မဟုတ်ပါလား။ သည်တော့ မှတ်ဉာဏ်တုနည်းပညာကမှတ်မိနေပြီး ကြော်ငြာတွေ ကျနော့်ဆီ ပို့နေခြင်းပင်။ ဒါနှင့် ကျနော်လည်း Marketplace ထဲဝင်ကာ Tandem ဘီး ရောင်းမည့်သူများနှင့် မက်ဆင်ဂျာမှ ဆက်သွယ်ကြည့်၏။ ရောင်းမည့်သူတွေကများသော်လည်း ကျနော်တို့စိတ်ကြိုက် ဘီးပုံစံက စုစုပေါင်းမှ သုံးနေရာသာရှိ၏။

ရောင့်သည့်သူများအား လာကြည့်လို့ရမလား။ ဘယ်အချိန်လောက်လာလျှင် အဆင်ပြေမလဲ။ အစမ်း စီးကြည့်လို့ ရမလား။ ဈေးကရော အလျှော့အတင်းရှိနိုင်လား စတာတွေမေးမြန်းကြည့်ပြီးမှ နှစ်ယောက်သား မြို့ပတ်ခဲ့ကြ၏။

ပထမဆုံး စုံစမ်းခဲ့သည့်သူက ဖို့တ်ဝိန်းမို့လည်ကောင်နားတွင်နေ၏။ ၉ နာရီအတိတွင်ချိန်းပြီး သူ့အိမ်ရောက်ခဲ့၏။ အိမ်က ၁၉၃၀ ကာလများဆီကဆောက်သည့် စတိုင်လ်နှင့်အိမ်။ ၃ ထပ်။ စုလစ်မွန်းချွန်ဆန်ဆန် ရဲတိုက် အငယ်စားလေးနှင့်ပင် တူနေသေး၏။ အိမ်ရှေ့မျက်နှာစာ ဟိုးအမြင့်က နဖူးစည်းတွင် နံရံကပ်နာရီအကြီးစားကြီးတလုံး ကပ်ထား၏။ နာရီက အိုမင်းလှပြီ။ လက်တံများက အလုပ်မလုပ်တော့။ ၁၂ နာရီတိတိတွင်ရပ်နေ၏။ အိမ်ရှေ့ လူ့မျက်နှာနှင့်အညီ မှန်ပြူတင်းဘောင်တွင် အတွင်းမှနေ၍ ကော်ငြာစာရွက်အလတ်စားအရွယ်တရွက် ကပ်ထားတာ တွေ့ရ၏။ သေနတ်ပြောင်းရှည်တလက်ပုံနှင့် ကျည်ဆန်ပုံများအပြင် စာတွေလည်းရေးထား၏။ အိမ်မှာ ခွေးရှိကြောင်းလို အိမ်မှာသေနတ်ရှိကြောင်း သတိပေးစာတခုခုရေးထားတာနေမှာပါဟုထင်ပြီး စာတွေကို သေချာမဖတ်ဖြစ်ခဲ့။

ကျနော်တို့ အိမ်ရှေ့တံခါးမကြီးတည့်တည့်ရပ်မိသည်နှင့် တံခါးပွင့်လာက ဟဲလိုဟူသည့် နှုတ်ဆက်သံနှင့်အတူ ထောင်ထောင်မောင်းမောင်း တောင့်တောင့်တင်းတင်း အသက် ၇ ဆယ်ခန့် ဘောင်းဘီတိုနှင့် လူဖြူအဖိုးအိုတဦး ထွက်လာ၏။ အသက်နှင့်စာလျှင် အရွယ်က အတော်တင်ပြီး ဖြတ်ဖြတ်လတ်လတ်လည်းရှိ၏။ စက်ဘီးကြည့်မည့်သူတွေမှတ်တယ်ဟုဆိုကာ စက်ဘီးလိုက်ပြ၏။ ကျနော်တို့ မြက်ခင်းပေါ် စမ်းစီးကြည့်တော့ ထိုင်ခုံတွေမြင့်နေသည်မှတပါး အားလုံးအဆင်ပြေ၏။ ဈေးကလည်း မဆိုး။ သို့သော် လာကြည့်ပါမည်ဟု ချိန်းထားပြီးသား အခြားနှစ်ဦးဆီကလည်းသွားရဦးမည်။ ဟိုနှစ်စီးက ခုအစီးထက်ပို အဆင်ပြေမည်ဆိုလျှင် အတွေးကလည်းရှိသေး၏။ သို့ဖြင့် ကျနော်တို့ ချိန်းထားတဲ့ တခြားနှစ်စီးလည်းရှိသေးတယ်၊ လိုက်ကြည့်လိုက်ပါဦးမယ်၊ ကြည့်လို့ ဒီတစီးက ပိုအဆင်ပြေတယ်ဆိုလည်း ဒါကိုပဲလာပြန်ယူပါ့မယ်၊ ဒီတော့မှ ဈေးစကား ပြောကြတာပေါ့ဆိုတော့ သူက ကောင်းပြီလေ မက်ဆင်ဂျာကနေပဲဆက်သွယ်ပါဟု ပြုံးပြုံးရွှင်ရွှင်နှင့်ဆို၏။ နောက် နှစ်စီးလိုက်ကြည့်တော့ အဆင်မပြေ။

ဒါနှင့် မက်ဆင်ဂျာကနေ သူ့ဆီ ပြန်ဆက်သွယ်ပြီး ငါတို့ တခေါက်ပြန်လာမယ်။ ထိုင်ခုံတွေလည်း အနိမ့်ဆုံး နှိမ့်ထားပေးပါ၊ လမ်းပေါ်မှာ တခေါက်လောက် ကြာကြာလေးစမ်းနင်းကြည့်ချင်တယ်ဟုဆိုတော့ အိုကေဟုဆိုပြီး မင်းက စစ်ပြန်လားဟု မေး၏။ ကျနော်က စစ်ပြန်တော့ စစ်ပြန်ပဲ ဒါပေမဲ့အမေရိကန်စစ်ပြန်မဟုတ်ဘူး ဗမာစစ်ပြန်ဟုဆိုတော့ ကောင်းပါလေ့ကွာ ဒါဆို ၄၅ ဒေါ်လာလျှော့ပေးမယ်။ ထိုင်ခုံတွေလည်း နှိမ့်ထားပေးမယ် ပြန်လာခဲ့ကြပါဟုဆို၏။ သို့ဖြင့် သူ့အိမ်တခေါ ထပ်ရောက်ရပြန်၏။

ဒီတခေါက်တော့ အိမ်ရှေ့ရောက်ရောက်ခြင်းတံခါးက ပွင့်မလာခဲ့။ ဇနီးက တံခါးမကြီးဆီသွားပြီး လူခေါ်ဘဲလ် တီးနေခိုက် ကျနော်က မျက်နှာနှင့်တူရှူရာမှာရှိနေသည့် တံခါးပြူတင်းမှန်တွင်ကပ်ထားသည့်စာရွက်ပေါ်က စာတွေကိုဖတ်နေမိ၏။ ရေးထားသည့်က Due to prices of guns and ammo, don’t expect warning shoot. သဘောက သေနတ်ဈေး ကျည်ဆန်ဈေးတွေကြောင့် သတိပေးပစ်ခတ်တာမျိုးတော့ မမျှော်လင့်ပါနဲ့ဟု ဆိုခြင်းပင်။

ကျနော်ဖတ်ရင်း ကြက်သီးထသွား၏။ ကျောရိုးထဲလည်း စိမ့်သွား၏။

ကိုဗစ်နိုင်တင်န်း အမေရိကကိုကူးလာတော့ လူတွေ သေနတ်ဝယ်နှုန်း တမဟုတ်ခြင်းမြင့်တက်လာ၏။ ကပ်ဘေးကြောင့် ဆင်းရဲကြပ်တည်းလာလျှင် ပစ်ခတ်လုယက်တာတွေဖြစ်လာနိုင်သည်ဟုတွေးကာ ကိုယ့်ကိုယ်ကို ကာကွယ်ရန်ဟုအကြောင်းပြချက်နှင့် လူတွေ သေနတ်ဝယ်ကြခြင်းပင်။ တချို့လည်း လုဖို့ သေနတ်ဝယ်တာဖြစ်ချင် ဖြစ်လိမ့်မည်ထင်၏။ ဘယ်လိုပဲဖြစ်ဖြစ် သေနတ်ဝယ်လိုအားတွေ ထောင်တက်နေသည်မှာ ကိုဗစ်အစကတည်းကနေ ခုချိန်ထိ အရှိန်မသေသေးတာတော့ သေချာ၏။ ဝယ်လိုအားရှိတော့ ရောင်းလိုအားဘက်က ဈေးတွေတက်လာ၏။ သေနတ်ဈေး ကျည်ဆန်ဈေးတွေ အတော်ကြီးတက်နေသည်ဟု အသိတယောက်ပြောသံလည်း ကြားမိ၏။ သေနတ် လက်ဝယ်ရှိသူများ အရင်ကလောက် အပျော်ပစ်အစမ်းပစ် လျှောက်ပစ်တာတွေ သိတ်မလုပ်ကြ။ ကျည်ချွေတာ နေကြသည်ဟုဆို၏။ ယခု သတိပေးစာသည် ထိုကိစ္စနှင့်အဆက်အစပ်ဖြစ်နေမှန်းသိသာ၏။

NRA ခေါ် အမျိုးသားရိုင်ဖယ်လ်အသင်းကြီးအကြောင်းနှင့် အမေရိကန်တွင် လူတိုင်း လက်နက်ကိုင်ဆောင်ခွင့်ရှိမှန်း အများသိပြီးသားမို့ ဤနေရာတွင် ဘာမှမပြောလိုတော့။ အမေရိကန်တချို့သည့် လူ့အသက်ထက် လက်နက် ကိုင်ဆောင်ခွင့်ကို ပို၍တန်ဖိုးထားတတ်ကြသလားမပြောတတ်။ တနှစ်တနှစ် သေနတ်ကြောင့် လူ့အသက်တွေ မနည်းမနော သေကြေနေကြသည်မှာလည်း ကြားသည့်အတိုင်းပင်။ ဖြစ်၏။ ပစ်ခတ်သံတွေဆူပြီးတိုင်း Gun Control စကားသံတွေ ညံစမြဲ။ သို့သော် ပွဲပြီးမီးသေတွေနှင့် ပြီးပြီးသွား၏။ သေနတ်ကိုင်ဆောင်ခွင့်ထိန်းချုပ်ရေးဟု ဆိုလိုက်တိုင်း ဖွဲ့စည်းအုပ်ချုပ်ပုံအခြေခံဥပဒေပါ အခွင့်အရေးဆိုသည်နှင့် ကိုင်ပေါက်ပြီး အနိုင်ပိုင်းသွားကြသည်ချည်း ဖြစ်၏။ သေနတ်ကိုင်ဆောင်ခြင်း မကိုင်ဆောင်ခြင်းသည် ပုဂ္ဂလိကလွတ်လပ်ခွင့်ဖြစ်၏။ လူ့အသက်ထက် တကိုယ်ရည်လွတ်လပ်ခွင့်သည်လည်းကောင်း ဥပဒေပါအခွင့်အရေးသည်လည်းကောင်း ပို၍ အရေးပါနေသည့်သ‌ဘော ဖြစ်နေခြင်းပင်။

ကျနော်က ကျောချမ်းချမ်းနှင့် ကပ်ထားသည့် သတိပေးစာကိုဖတ်နေမိ၏။ ကျည်ဆန်တွေဈေးကြီးလာသဖြင့်သူ့ အိမ်နား မသင်္ကာဖွယ်ရာ လူကပ်လာလျှင် သတိပေးပစ်ခတ်ပြီး ခြောက်လှန့်ထုတ်မနေနိုင်အားတော့ ပစ်မည့်အချက်တိုင်းတည့်တည့်ပစ်မည် မှန်အောင်ပစ်မည်ဟု ခြိမ်းခြောက်ထားခြင်းပင်။ သေနတ်နှင့်ကျည်ဆန်တွေက လူ့အသက်ထက် ဈေးကြီး လာပြီလားဟု တွေးနေမိ၏။
မျိုးမြင့်ချို
၃၀ ဩဂုတ် ၂၀၂၀