Thursday, August 6, 2020

(တဘက်လှည့်နဲ့သွင်းလာတဲ့ နိုင်ငံတော်ဝါဒလား)

0 comments
(တဘက်လှည့်နဲ့သွင်းလာတဲ့ နိုင်ငံတော်ဝါဒလား)
ယုန်လေး MV နဲ့ တောင်းပန်ခန်း ၂ ခုစလုံးကို မိတ်ဆွေတွေကျေးဇူးနဲ့ ဒေါင်းလုဒ်လုပ်ပြီး သိမ်းထားလိုက်ပါတယ်။ မှတ်တမ်းမှတ်ရာသဘော တချိန်ချိန်မှာ ပြန်သုံးစရာ ပေါ်ကောင်းပေါ်လာလိမ့်မှယ် ယူဆလို့ပါ။

ယုန်လေး ဒါကိုလုပ်တာဟာ မသိနိုးနား မအူမလည်နဲ့ မျက်ကန်းတစ္ဆေမကြောက်လုပ်တာမျိုး မဟုတ်ပါ။ ခိုင်းသူရှိပါတယ်။ သူလည်း လျှင်ပါတယ်။ နိုင်ငံရေးနားလည်လို့မှ နိုင်ငံရေးလုပ်တာပါ။ ရွေးကောက်ပွဲနီးလာချိန် ကိုဗစ်ကိစ္စနဲ့တားမြစ်ထားတဲ့ကြားက အချိန်ကိုက်ထွက်လာတာကိုက ရည်ရွယ်ချက်ပါပါ ခြေလှမ်းရှိရှိ လုပ်တာပါ။ လုပ်တာမှ တွန်းတွန်းထိုးထိုးကို လုပ်တာပါ။ အခြေအနေမဟန်တော့မှ ပြန်တောင်းပန်ပြီး ခြေတလှမ်းဆုတ်ထားတာပါ။ ဒါတောင် ဒေါ်စုနှစ်သက်လိမ့်မယ်လို့ သူယူဆပြီး လုပ်တာလို့ အတိအလင်းပြောသွားပါတယ်။ ဒေါ်စု နှစ်သက်မသက်ကတော့ ကာယကံရှင်ပဲ သိပါလိမ့်မယ်။ ဒီ MV က တကယ်ပေးချင်တဲ့ နိုင်ငံရေးအနှစ်သာရက အမျိုးသားစည်းလုံးမှုဆိုတဲ့ခေါင်းစဉ်အောက်က "နိုင်ငံတော်ဝါဒထူထောင်ကြ"ဖြစ်တယ်လို့ ကျနော်မြင်ပါတယ်။

၂၀၂၀ ရွေးကောက်ပွဲအပြီး ဒါမှမဟုတ် ဒေါ်စု နိုင်ငံရေးထဲရှိနေတုန်း တချိန်ချိန်မှာ ဒီ MV က ခင်းပြသွားတဲ့လမ်းက ပေါက်လာမယ် မလာဘူးတော့ ယတိပြတ်မပြောနိုင်သေးသလို ခု အင်န်အယ်လ်ဒီသွားနေတဲ့အခင်းအကျင်းက အဲ့ဒီဆီ ဦးတည်နေတယ်လို့လည်း ပုဒ်မချပြီးမပြောနိုင်သေးပါ။ ရောက်ရင်လည်း ရောက်သွားနိုင်ပါတယ်။ မသေချာတာက စစ်အုပ်စုကိုယ်၌က အဲ့ဒီလို(ကြံ့ဖွံ အင်န်အယ်လ်ဒီ စစ်တပ်) သုံးဦးစပ်အာဏာကို လိုချင်မချင် လိုအပ်မအပ်ပါ။ ကျနော့်အမြင်မှာတော့ လက်ရှိအနေအထားဟာ စစ်အုပ်စုအတွက် အကောင်းဆုံးအနေအထားပါ။ သုံးဦးစပ်ပါဝါဆိုရင်မှာ စကားပြောနေရတာ ဆွေးနွေးနေရတာ သဘောထားယူရတာ အပေးအယူအလျှော့အတင်းလုပ်ရတာတွေ ပိုလာနိုင်တာမို့ သူတို့ လုပ်ချင်မယ်မထင်ပါ။ သဘောက နိုင်ငံရေးကို နိုင်ငံရေးလိုလုပ်ရမယ့်သဘောပါ။ ဒါကို သူတို့ လုပ်နိုင်မယ်မထင်ပါ။

နိုင်ငံရေးပါတီတရပ်အနေနဲ့ ဒေါ်စုအလွန် အင်န်အယ်လ်ဒီ့အနေနဲ့လည်း ဘယ်ပုံရှိလေမလဲက ခုချိန်မှာ ကံသေကံမပြောဖို့ လွယ်ကူတဲ့အနေအထားတော့ မဟုတ်ပါ။ ခုက ဒေါ်စုတယောက်တည်းဩဇာနဲ့ အင်န်အယ်လ်ဒီဟာ အုပ်အုပ်စည်းစည်းရှိနေတာတော့ ငြင်းမရပါ။ ဒေါ်စုမရှိတော့ရင် ပါတီတွင်းမှာ သူတလူငါတမင်း မဖြစ်ကြဘူးဆိုရင်တောင် ခုလောက်အအုပ်အစည်းမရှိနိုင်တော့မှာကတော့ သေချာပေါက်ပြောလို့ရပါတယ်။ ဒေါ်စုလွန်သွားမှ ခု MV က ချတဲ့လမ်းကို လျှောက်ကြမယ်ဆိုလည်း လျှောက်သွားနိုင်ပါတယ်။

အခု သတိကြီးကြီးထားရမှာက ဗမာ့လူ့အဖွဲ့အစည်းမှာ ကပ်ငြိပြီးသား ပြင်းထန်တဲ့မျိုးချစ်ဝါဒ၊ ဗမာလူမျိုးကြီးဝါဒတွေနဲ့အတူ အလံရောထောင်လာတဲ့/ထူထောင်လာမယ့် "နိုင်ငံတော်ဝါဒ"ဖြစ်ပါလိမ့်မယ်။ နိုင်ငံတော်ဝါဒအောက်မှာ ဒီမိုကရေစီအခွင့်အရေးတွေ၊ လူ့အခွင့်အရေးတွေ၊ လူနည်းစုအခွင့်အရေးတွေ၊ လူ့ပုဂ္ဂလိကလွတ်လပ်ခွင့်တွေအတွက် နေရာမရှိပါ။ နိုင်ငံတော်ဝါဒမှာ နိုင်ငံတော်သာ အဓိက။ နိုင်ငံတော်ထက်အရေးပါတာ ဘာမှမရှိဆိုပြီး အစိုးရကို နိုင်ငံတော်အဖြစ်ပုံဖော်ကာ တိုင်းသူပြည်သားက ဦးညွှတ်ရရိုကျိုးရတဲ့ဘဝမျိုးထိရောက်အောင် သိမ်းသွင်းယူပါတယ်။ နိုင်ငံတော်ဝါဒထူထောင်မယ်ဆိုရင် အမျိုးသားရေးအလံထောင်ပြီး အမျိုးသားရေးဝါဒနဲ့ တိုင်းပြည်ကို အဓမ္မစုစည်းယူရတာပါ။

အမျိုးသားရေးဝါဒဟာ အသွားနှစ်ဘက်ပါတဲ့ဓါးနဲ့တူပါတယ်။ နိုင်ငံတွေ လူတွေကို စုစည်းရာမှာလည်းအသုံးတည့်သလို နိုင်ငံတွေ လူတွေကို သင်ိးခွဲရာမှာလည်း အသုံးတည့်ပါတယ်။ အမျိုးသားရေးဝါဒကြောင့်ပဲ စည်းလုံးမိသွားတဲ့နိုင်ငံတွေရှိသလို တစစီပြိုကွဲသွားတဲ့ လူ့အဖွဲ့အစည်းတွေလည်း မနည်းပါ။ အမျိုးသားရေးဝါဒဟာ အစွန်းရောက်ဖို့လည်း အလွန့်ကိုလွယ်ကူပါတယ်။ အမျိုးသားရေးအစွန်းရောက်သွားရင် ဖက်ဆစ်လက္ခဏာဆောင်ပါတယ်။ အမျိုးသားရေးဝါဒီတိုင်း ဖက်ဆစ်တွေမဟုတ်ကြပေမယ့် ဖက်ဆစ်တိုင်းကတော့ အစွန်းရောက်အမျိုးသားရေးဝါဒီတွေဖြစ်ကြတာ ကမ္ဘာမှာ အထင်အရှားရှိခဲ့ပါတယ်။

နိုင်ငံတနိုင်ငံအနေနဲ့ နယ်မြေတည်တန့်ခိုင်မြဲမှုရှိတာ နိုင်ငံတွင်းနေထိုင်ကြတဲ့အမျိုးသားချင်းတွေ တန်းတူရည်တူသွေးစည်းညီညွတ်မှုရှိကြတာတွေဟာ ကောင်းတဲ့ လိုလားအပ်တဲ့အရာတွေပါ။ ဒါပေမယ့် "စည်းလုံးမှု"ဆိုတဲ့ ခေါင်းစဉ်အောက်ကနေ အမျိုးသားရေးအလံနဲ့ နိုင်ငံတော်ဝါဒထိုးတင်ပြီး တိုင်းပြည်ကို ဖက်ဆစ်ဆန်ဆန်လူ့အစည်းအလုံးဖြစ်အောင်ကြံတဲ့ အကြံအစည် အတွေးအခေါ် လုပ်ရပ်မှန်သမှကိုတော့ ဆန့်ကျင်ရပါလိမ့်မယ်။ အန္တရာယ် သိတ်ကြီးပါတယ်။

ဒါ့ကြောင့် ဒီ MV ကို ပေါ့ပေါ့တန်တန် သဘောမထားပါ။ ဒေါင်းလုပ်လုပ်ပြီး သိမ်းထားဖြစ်ပါတယ်။

မျိုးမြင့်ချို
ဩဂုတ် ၆။ ၂၀၂၀

0 comments:

Post a Comment