ငြိမ်းချမ်းရေးပဲ့တင်သံ အပိုင်း ၄၂။ (မျိုးမြင့်ချို)

ဖေဖော်ဝါရီ ၂၁ ရက် ၂ဝ၁၃ နေ့က အာရ်အက်ဖ်အေမှ ထုတ်လွှင့်ပြီးဖြစ်ပါတယ်။

သောတရှင်များခင်ဗျား…

နဝတစစ်အစိုးရနဲ့ကေအိုင်အိုတို့ရဲ့ အပစ်ရပ်စာချုပ်ပါ အပိုဒ်ကြီး(၄) အပိုဒ်ငယ် (က)မှာ ကေအိုင်အိုရဲ့ တပ်တည်တပ်စွဲနေရာနေတွေကို အရင်အပတ်က တင်ပြပေးခဲ့ပါတယ်။ အခုတပတ်တော့ အပိုဒ်ငယ် (ခ)မှာပြောထားတာတွေကို ဖော်ပြပေးပါမယ်။ အပိုဒ်ငယ်(ခ)မှာ နှစ်ဦးနှစ်ဖက်ကိစ္စအဝဝကို ညှိနှိုင်းဆောင်ရွက်ရန် အောက်ပါနေရာများကို ဆက်ဆံရေးစခန်းနေရာများအဖြစ်သတ်မှတ်ရန်လို့ ဆိုထားပါတယ်။ ဒေသတခုချင်းအလိုက် နှစ်ဘက်အကြားကိစ္စကြီးငယ်ရှိတိုင်း တွေ့ကြဖို့ဟာ အဲ့ဒီနေရာတွေပဲဖြစ်တယ်လို့ ဆိုလိုတာပါပဲ။

နေရာတွေအနေနဲ့ပြောရမယ်ဆိုရင်….

(၁) ဗဟိုဋ္ဌာနချုပ်၊ ရင်း(၁/၂၅၁/၂၅၃/၂၅၄/၂၅၅) လဂျားယန်။

(၂) တပ်ရင်း(၃)။ ဂါရားယန်။

(၃) တပ်မဟာ(၃)၊ ရင်း(၁၅)၊ ရင်း(၁၆)၊ (၂၃)မိုင်စခန်း၊ လွယ်ဂျယ်။

(၄) တပ်ရင်း(၁၂)၊ ကိုက်ထိပ်။

(၅) တပ်မဟာ(၁)၊ ရင်း(၄/၇/၁ဝ)၊ ဆွမ်ပရာဘွမ်၊ တီယန်ဇွတ်။

(၆) တပ်မဟာ(၂)၊ ရင်း(၁၄)၊ ရင်း(၂၅၂)၊ တိန်ကောက်။

(၇) တပ်ရင်း(၁၁)၊ စီတီးယန်၊ ဒွန်မဘန်။

(၈) တပ်ရင်း(၆)၊ လုံးခင်း၊ လုံးတုံ။

(၉) တပ်ရင်း(၅) ဆင်ဘို၊ တိန်လုံ။

(၁ဝ) တပ်ရင်း(၈)၊ နမ့်ဟိုင်း၊ တာမုံးညဲ၊ ကွတ်ခိုင်။

(၁၁) တပ်မဟာ(၄)၊ တပ်ရင်း(၂)၊ တပ်ရင်း(၉)၊ နမ့်ဟိုင်း၊ တာမုံးညဲ၊ ကွတ်ခိုင်ဆိုပြီး ဆက်ဆံရေးစခန်းနေရာအများအပြားကို ဖော်ပြထားတာတွေ့ရပါတယ်။

သောတရှင်များခင်ဗျား…ဖော်ပြပါနေရာတွေထဲက တာမုံးညဲကွတ်ခိုင်နဲ့ နမ့်ဟိုင်းဒေသတွေကိုတော့ ကျနော်စစ်သားဘဝတုန်းက ရောက်ခဲ့ဖူးပါတယ်။ စစ်တိုင်းအရ အရှေ့မြောက်ဒေသမှာရှိပြီး တိုင်းပြည်မြေပုံအရဆိုရင်တော့ ရှမ်းပြည်မြောက်ပိုင်းမှာဖြစ်ပါတယ်။ အဲဒီတုန်းက ကွတ်ခိုင်မှာတပ်မ(၉၉) ရှေ့တန်းဋ္ဌာနချုပ်ထိုင်တာဖြစ်ပြီး တာမုံးညဲမှာတော့ တပ်ခွဲတခွဲစာလောက်အင်အားနဲ့ နမ့်ဟိုင်းမှာတော့ တပ်စု ၂ စု လောက် ထိုင်တယ်လို့မှတ်မိနေပါတယ်။ ကွတ်ခိုင်ရဲ့လူနေရာခိုင်နှုန်းမှာ ကချင်အမျိုးသားတွေကအများစုလို့ထင်ပါတယ်။ ရပ်ကွက်(၁)ဆိုရင် တကွက်လုံးလိုလို ကချင်အမျိုးသားတွေချည်းပါပဲ။ လားရှိူးနဲ့ဘာမှမဝေးဘူးဆိုပေမယ့် အဲ့ဒီတုန်းကကွတ်ခိုင်ဟာ လုံခြုံရေး အလွန်တင်းကြပ်ထားပါတယ်။ အုပ်ချုပ်ရေးကိစ္စတွေကို ကောင်စီအဆင့်ဆင့်ကကိုင်တယ်ဆိုပေမယ့် ဒေသခံပြည်သူ့စစ်တွေက အခရာကျသလို ဖြစ်နေခဲ့တာပါ။ ပြည်သူ့စစ်တွေက ကိုးကန့်နဲ့ကချင်အမျိုးသားတွေ ဖြစ်ပါတယ်။ ပြည်သူ့စစ်တွေကို လခပေးထားတာမှန်ပေမယ့် ဈေးရက်မှာဈေးကောက်ကောက်တာအပြင် လောင်းကစားဝိုင်း၊ ဘိန်းခန်းနဲ့ အရက်ဆိုင်တွေကရတဲ့အခွန်တွေပါ တရားမဝင်သဘော ကောက်ခံသုံးစွဲနေတာလည်း သတိထားခဲ့မိပါတယ်။ စစ်တပ်နဲ့တွဲနေတာကလည်းတကြောင်း၊ အညိုရောင်နယ်မြေဖြစ်နေတာကလည်းတကြောင်း၊ လက်ထဲမှသေနတ်ရှိနေတာကလည်းတကြောင်းမို့လို့ အဲ့ဒီခေတ်က အဲ့ဒီဘက်မှာ စစ်တပ်ပြီးရင် တန်ခိုးအထွားဆုံးလို့ ဆိုရမယ်ထင်ပါတယ်။

ကွတ်ခိုင်နဲ့တာမုံးညဲမှာ ပုံမှန်ဈေးရှိပေမယ့် (၅)ရက်တဈေးကတော့ လူအလွန်စည်ပါတယ်။ ဗမာပြည်က (၁၂)ပွဲဈေးသည်တွေလို ရှမ်းပြည်မှာလည်း ဈေးပတ် လည်ရောင်းကြတဲ့ (၅)ရက်တဈေး ဈေးသည်တွေရှိပါတယ်။ ဝန်တင်လားတွေပေါ် ပစ္စည်းတွေတင်ပြီး ဈေးပတ်အလိုက် လိုက်ရောင်းကြတာမျိုးပါ။ ရက်စဉ်အတိုင်းထွက်သွားလိုက်တာ ၅ ရက်တပတ်ပြန်လည်ရင် ကိုယ့်ရွာကိုယ်ပြန်ရောက်၊ နောက်နေ့ပြန်ထွက် နောက်တခါ တပတ်ပြန်လည်။ အဲ့သလိုနည်းနဲ့ ဈေးပတ် လည်ရောင်းကြတာဖြစ်ပါတယ်။ ဈေးရှိတဲ့ရွာဆိုတာ ရွာကြီးလို့ပြောရမှာပါ။ ဈေးနေ့များဆို အဲ့ဒီရွားမျိုးတွေ လူအလွန်စည်ပါတယ်။ ရွာနီး/မြို့နီးချုပ်စပ်တွေကလာပြီး ဝယ်ကြခြမ်းကြနဲ့မို့ ပျော်စရာလည်းကောင်းပါတယ်။ ဒါပေမယ့် ပျော်စရာနဲ့အတူ အန္တရာယ်တွေလည်း ကပ်ပါနေတတ်ပါတယ်။ အန္တရာယ်ဆိုတဲ့အထဲမှာ တဘက်အင်အားစုတွေဟာ ဈေးနေ့တွေမှာ ရွာဝင်/ရွာထွက်ကနေစောင့်ပြီး ဈေးလာဝယ်တဲ့စစ်တပ်ကို ချုံခိုတိုက်တာမျိုးလည်း ပါပါတယ်။ နောက်တခုက သေနတ်ကိုဖွက်ယူလာပြီး ဈေးထဲကျမှ အနီးကပ်ပစ်သတ် သေနတ်ပါယူပြီး ထွက်ပြေးသွားတာမျိုးပါ။ အဲ့ဒါမျိုးတွေက အဲ့ဒီအချိန်တုန်းက ချောင်ကြိုချောင်ကြားကရွာကြီးတွေမှာတင်မှ မဟုတ်ပါဘူး ကွတ်ခိုင်လိုမြို့တွေမှာပါ ဖြစ်နေတာပါ။

ဈေးနေ့ရဲ့ နောက်ထပ်အရေးပါတဲ့ကိစ္စတခုကတော့ သတင်းပေးတွေနဲ့အချိတ်အဆက်လုပ်တာပဲဖြစ်ပါတယ်။ ဈေးနေ့တိုင်းမှာ စစ်တပ်ကမွေးထားတဲ့ ပတ်လည်ရွာတွေကသတင်းပေးတွေကလည်း ဈေးနေ့ဆိုလာကြပါတယ်။ အဲ့ဒီသတင်းပေးတွေကို တပ်အခေါ်တော့အထောက်တော်လို့ခေါ်ပြီး ရိက္ခာနဲ့ငွေကြေး နည်းနည်းပါးပါးပေးထားပါတယ်။ တချို့လည်း နီးရာဓါးကြောက်လို့ လုပ်နေကြရတာမျိုးဖြစ်မှာပါ။ ရွာတွေက သတင်းပေးတွေလာရင် ရွာခံပြည်သူ့စစ်တွေကတဆင့် သတင်းပေးတာယူတာ လုပ်ကြရပါတယ်။ သိတ်အရေးပါတဲ့သတင်း သိတ်အရေးကြီးတဲ့လူဆိုမှ စစ်တပ်ကအရာရှိအဆင့်မျိုးနဲ့ တိုက်ရိုက်တွေ့ လျှို့ဝှက်တွေ့တာမျိုးလုပ်ပါတယ်။ ဘာပဲဖြစ်ဖြစ် အဲ့ဒီသတင်းပေးတွေဆီကရတဲ့ရန်သူ့သတင်းတချို့ဟာ တန်ဖိုးကြီးတယ်လို့ စစ်ထောက်လှမ်းရေးတယောက်ပြောတာ ကြားဖူးပါတယ်။ သတင်းတန်ဖိုးကြီးတာမကြီးတာထက် အဲ့ဒီ သတင်းပေးတွေနဲ့ မတည့်တဲ့ရွာသားတွေတချို့ သူပုန့်လူဆိုပြီး လက်ထောက်အချခံရလို့ စစ်တပ်ကဖမ်း နှိပ်စက်တဲ့ဒဏ် ခံရတဲ့သူတွေလည်းရှိပါတယ်။

ခုတော့ အဲ့ဒီအနေအထားတွေက ဘယ်လိုဖြစ်နေမယ် ရှိနေမယ်ဆိုတာသာ မဆိုတတ်ပေမယ့် ကေအိုင်အိုနဲ့နဝတစစ်အစိုးရတို့ အပစ်ရပ်စဉ်အချိန်က နှစ်ဘက်ဆက်ဆံရေးစခန်းတွေဖွင့်မယ်လို့ သတ်မှတ်ခဲ့တဲ့နေရာတွေဟာ အဲ့ဒီနေရာတွေပါပဲ။ အတိတ်တချိန်တုန်းက  နှစ်ဘက် မီးကုန်ယမ်းကုန်တိုက်ခိုက်ခဲ့ကြတဲ့နေရာတွေဟာလည်း အဲ့ဒီနေရာတွေပါပဲ။ မကြာသေးခင်ကမှ စစ်တပ်ကလုပ်ခဲ့တဲ့ ထိုးစစ်ကြီးတွေမှာလည်း ပစ်မှတ်ထားတိုက်ခိုက်ချေမှုန်းခံရပြီး ကေအိုင်အေဘက်ကလက်လွတ်ဆုံးခဲ့တဲ့ နယ်မြေတွေထဲကတချို့မှာ အဲ့ဒီ နေရာတွေပဲပြန်ပါနေတာကိုလည်း သတိထားမိပါတယ်။  နောက်တပတ်ဆက်ပါဦးမယ်။

ကျနော်မျိုးမြင့်ပါခင်ဗျား။