(ကျဉ်တုပ်ခံဝံ့မခံဝံ့)
မင်းမှာလုပ်ချင်၏ တင်းကုပ်မှာ အချုပ်ခံဝံ့မခံဝံ့၊ ပဲဟင်းကိုရှုတ်ချင်၏ နှုတ်ခမ်းမွှေးကို အနှုတ်ခံဝံ့မခံဝံ့၊ မှိုနှင့်မျှစ်ကိုနှုတ်ချင်၏ ကျဉ်တုပ်ခံဝံ့ မခံဝံ့ ဆိုတဲ့ ကျည်းကန်ရှင်ကြီးရဲ့ နန္ဒဓဇမေတ္တာစာလာ လင်္ကာတပုဒ်ကို လူတိုင်းလိုလိုကြားဖူးပြီးသားနေမှာပါ။ ဆရာမောင်သာရက ကျဉ်တုတ်ခံဝံ့မခံဝံ့ အမည်နဲ့ လုံးချင်းဝတ္ထုတပုဒ်ရေးဖူးပါတယ်။ ကျောင်းသားနိုင်ငံရေးနောက်ခံ ဇာတ်လမ်းပါ။
တချို့က ကျဉ်တုပ်ခံရတာကို ထောင်သွင်းအကျဉ်းချခံရတာ၊ အနှောင်အဖွဲ့ခံရတာ၊ အနှိပ်အစက် အညှဉ်းအပန်းခံရတာတွေကို ညွှန်းပြီးသုံးလေ့ရှိကြပါတယ်။
တကယ်က ကျဉ်တုပ်တယ်ဆိုတာ ကျဉ်နီကောင်(ကျွန်တော်တို့ငယ်ငယ်က မပီမသနဲ့ ကရင်နီကောင်လို့ ခေါ်ပါတယ်) တုပ်တာကိုပြောတာပါ။ ကျဉ်နီကောင်မှာမှ ကျဉ်နက်ကောင်ဆိုတာလည်း ရှိပါတယ်။ ကျဉ်နီကျဉ်နက် ၂ မျိုးစလုံးကိုရောပြီး ကျဉ်ကောင်လို့ခေါ်ပါတယ်။ အဲ့ဒီ ကျဉ်ကောင်လေးတွေအတုပ်ကို ခံဝံ့ မခံဝံ့လို့ပြောတာပါ။
ပုရွက်ဆိတ်သဏ္ဏန်ရှိပြီး ပုရွက်ဆိတ်ထက် အဆပိုကြီးတဲ့အကောင်လေးတွေပါ။ အဲဒီကျဉ်ကောင်လေးတွေဟာ အလွန်အဆိပ်ပြင်းပါတယ်။ သူ့ အတုပ်ခံလိုက်ရရင် အဖုအပိန့်ကြီးတွေထပြီး အောင့်လည်းအောင့် နာလည်းနာပါတယ်။ အဲ့ဒီအကောင်လေးတွေဟာ မှိုကျင်းတို့ ဝါးရုံတောတို့ကြားမှာ အလွန်ပေါပါတယ်။ မှိုပေါက်ချိန်ဆို မှိုကျင်းတွေမှာ၊ မျှစ်အစို့တွေ ထွက်ချိန်ဆို မျှစ်တောတွေမှာ သူတို့ချည်းပါပဲ။ သူတို့ကိုယ်တိုင်ပဲ မှိုတွေမျှစ်တွေကိုစားတာလား ဒါမှမဟုတ် မှိုတွေမျှစ်တွေကိုလာစားတဲ့ အခြား ပိုးကောင်မွှားကောင်လေးတွေကိုပဲ သူတို့က ဖမ်းစားတာလားတော့ ကျွန်တော်လည်း မသိပါဘူး။
ကျွန်တော်ငယ်ငယ်က လှော်ကားတောထဲမှာ မှိုတိုးဖူးပါတယ်။ ကျဉ်အတုပ်လည်း အကြိမ်ကြိမ်ခံရဖူးပါတယ်။ တခါများဆို မျက်ခွံကို တုပ်ထဲ့လိုက်တာ မျက်လုံးပါ ဖွင့်မရဖြစ်ခဲ့ပါတယ်။ ဒါပေမဲ့ ကျွန်တော် နောက်နှစ် မှိုပေါ်ချိန်ဆို မျီုတိုးပြန်တာပါပဲ။ သဘောကတော့ ကျွန်တော် ကျဉ်တုပ်ခံဝံ့လို့ မှိုတိုးပြီး မှိုနှုတ်တာပါ။ ကျဉ်အတုပ်မှ မခံဝံ့ရင် မှိုနဲ့မျှစ်ကိုလည်း နှုတ်လို့မရပါ။
ဆိုတော့ လူတချို့ ပြောကြသလို အချုပ်အနှောင်ခံရတာ၊ ထောင်သွင်းအကျဉ်းချခံရတာ၊ နှိပ်စက်ညှဉ်းပန်းခံရတာဆိုတဲ့တိုက်ရိုက်အနက်ကောက်သဘော မဟုတ်ပါ။ ဒါပေမဲ့ သွယ်ဝိုက်အဓိပ္ပါယ်အရ တခုခုကိုလိုချင်၊ ရချင်၊ လုပ်ချင်တယ်ဆို အဲ့ဒီလုပ်ရပ်ကြောင့်ရလာမယ့် ဆိုးမျိုးကိုလည်း ခံဝံ့ရမယ် ခံရဲရမယ်ဆိုတဲ့သဘောပါ။
ကျွန်တော်တို့ ဒီမိုကရေစီလိုချင်ကြပါတယ်။ ဒါ့ကြောင့် ထောင်ကျခံပြီး နိုင်ငံရေးလုပ်ကြပါတယ်။ ကျွန်တော်တို့ မျှစ်နဲ့မှိုကို နှုတ်ခဲ့ကြပါတယ်။ ကျွန်တော်တို့ ကျဉ်တုပ်ခံခဲ့ကြပါတယ်။
မျိုးမြင့်ချို။
ဇန်နဝါရီ ၁၃။ ၂၀၂၃
0 comments:
Post a Comment