ဝင်ဒါမီယာ နန်းတွင်းလုပ်ကြံမှုကြီး၊ ဆင်သေကို ဘယ်သရေဖြင့် ဖုံးကြဦးမည်နည်း။

ဝင်ဒါမီယာ နန်းတွင်းလုပ်ကြံမှုကြီး၊ ဆင်သေကို ဘယ်သရေဖြင့် ဖုံးကြဦးမည်နည်း။
၂၆၊ ၉၊ ၁၉၅၈ နေ့လုပ်ကြံမှု။
၂၆၊ ၉၊ ၅၈ နေ့ ဝန်ကြီးချုပ်ဦးနုသည် ဗမာ့တပ်မတော်စစ်ဦးချုပ်နေဝင်းအား၂၈၊ ၁ဝ၊ ၅၈ နေ့တွင် အာဏာလွှဲပြောင်း၍ပေးတော့မည်ဟု တိုင်းပြည်သို့ ရုတ်တရက် ထုတ်ပြန်ကြေငြာလိုက်၏။ စစ်ဦးစီးချုပ်နေဝင်းကလည်း အာဏာကိုလက်ခံမည်ဖြစ်ကြောင်း ပြန်လှန်ကြေငြာခဲ့၏။
သတင်းအမျိုးမျိုး။
ဤ ဝင်ဒါမီယာနန်းတွင်းလုပ်ကြံမှုကြီးနှင့် အပြောင်းအလွဲမကြေငြာမီ တနင်္ဂနွေတပတ်ခန့်လောက်ပင် တိုင်းပြည်တွင် ချောက်ချောက်ချားချား ဖြစ်လောက်သော သတင်းအမျိုးမျိုးဖြစ်နေ၏။ အချို့သတင်းများသည် ကောလာဟလသတင်းများဖြစ်၍ အချို့သတင်းများကား တီးတိုးဝါဒဖြန့် သတင်းများဖြစ်၏။ ထို ချောက်ချားလောက်သော သတင်းအမျိုးမျိုးထဲတွင် မှန်ကန်သောသတင်းများလည်းပါဝင်၏။

ဥပမာအားဖြင့် အစိုးရအဖွဲ့က လုံးဝမသိလိုက်ရဘဲနှင့် စစ်တပ်များ ဟိုပြောင်းဒီရွှေ့လုပ်သည်ဆိုသောသတင်းများ၊ ခရမ်း၊ သုံးခွ၊ အင်းစိန်နှင့် မန္တလေးစသောမြိ့ုများကို အချို့စစ်တပ်များက ဝင်ရောက်သိမ်းပိုက် အုပ်ချုပ်ကုန်ကြပြီဆိုသောသတင်း၊ မိတ္ထီလာ၊ ပျဉ်းမနားနှင့် သာယာဝတီ နယ်များတွင် ဆွေငြိမ်းခေါင်းဆောင်များက လက်နက်စုဆောင်းကုန်ကြပြီဆိုသောသတင်းများ၊ အချို့စစ်တပ်များက လက်နက်ခဲယမ်း မီးကျောက် အများအပြားထုတ်ယူပြီးနောက် မိမိတို့လိုရာသို့ ပို့ဆောင်၍ ဝှက်ထားကြသည်ဆိုသောသတင်းများနှင့် နောက်ဆုံး မြောက်ပိုင်း စစ်ဌာချုပ်မှ ကာကွယ်ရေးဝန်ကြီးကိုယ်တိုင် မသိရှိလိုက်ရဘဲ ဘရင်းဂန်း ၄ဝဝ-ရိုင်ဖယ်(လ်) ၅ဝဝဝ နှင့် ကျည်ဆန် တသန်းခွဲကျော်ထုတ်ယူ သွားပြီဆိုသောသတင်းများသည် တတိုင်းပြည်လုံးအား ပူပန်လှုပ်ရှားသွားစေသောသတင်းများဖြစ်သည်။

ဤကဲ့သို့သောသတင်းအမျိုးမျိုးအပြင် ဆွေငြိမ်းသြဇာနှင့်မကင်းဟုအဆိုရှိသောတပ်မှူးများ နယ်များတွင် နိုင်ငံရေးသမားများအသုံးမကျ၍ စစ်တပ်က အာဏာသိမ်းပိုက်ကာ တိုင်းပြည်အားအုပ်ချုပ်ရမည် စသည်ဖြင့် လူသိရှင်ကြားပြောဆိုသောသတင်းများကိုလည်း နားမဆန့်အောင် ကြားနားခဲ့ကြရ၏။

အခြားတဘက်မှ တပ်မတော်အနေနှင့် အာဏာသိမ်းဖို့မလွယ်၊ လေတပ်နှင့်ရေတပ်တို့မှ လုံးဝသဘောမတူဆိုသောသတင်းများ၊ ကုန်းတပ် အတွင်းနှိုက်ပင် လူမျိုးစုလက်နက်ကိုင်တပ်များနှင့် အခြားတပ်ရင်းအများအပြားက လက်မခံဆိုသောသတင်းများလည်း ကြွက်စီကြွက်စီ ထွက်လာ၏။

ဤကဲ့သို့ သတင်းအမျိုးမျိုးပြန့်နေချိန်တွင် နယ်များမှ သန့်ရှင်းဖဆပလခေါင်းဆောင်များနှင့် ပမညတခေါင်းဆောင်များ ရန်ကုန်သို့ ထွက်ပြေး လာကြပြီဆိုသောသတင်း၊ အချို့ခေါင်းဆောင်များကို စစ်တပ်မှဖမ်းလိုက်ပြီဆိုသောသတင်းများနှင့်ဆက်စပ်လျှက် ရန်ကုန်မြိ့ုတော်နှိုက် လမ်းဆုံလမ်းခွများတွင် စစ်ဘက်နှင့်ရဲ့ဘက်ပူးပေါင်းရှာဖွေခြင်းပြုကြသော အဖြစ်အပျက်များသည် တိုင်းပြည်ကြီး တခုလုံးအား ချောက်ချား လှုပ်ရှားသွားစေခဲ့ပေသည်။

ဟော---လာပါပြီ။
တိုင်းပြည်ကြီးပျက်တော့မည်လော။ မနက်ဖြန် ဘာဖြစ်မည်နည်းစသည်ဖြင့် တတိုင်းတပြည်လုံး ကြိမ်မီးအုံးသကဲ့သို့ တအုံနွေးနွေး ဖြစ်နေချိန်ဝယ် ဝင်ဒါမီယာနန်းတွင်းလုပ်ကြံမှုနှင့်အပြောင်းအလွဲသည် ရုတ်တရက်ဖြစ်ပွားလိုက်ခြင်းဖြစ်၏။ ဤကဲ့သို့အပြောင်းအလွဲ ဖြစ်ကြောင်း ဝန်ကြီးချုပ်နှင့်စစ်ဦးစီးချုပ်က စာတိုလေးနှစ်စောင်ဖြင့် တိုင်းပြည်အားထုတ်ပြန်ကြေငြာလိုက်ကြပြီးနောက်၊ နောက်တနေ့ ထုတ်ဝေကြသောသတင်းစာတချို့တွင် ထိုဝင်ဒါမီယာနန်းတွင်းလုပ်ကြံမှုဖြစ်ပွားသောနေ့က တပ်မတော်စစ်ဦးစီးမှ ထိပ်တန်းခေါင်းဆောင်ကြီး များဖြစ်ကြသော ဗိုလ်မှူးကြီးမောင်မောင်နှင့် အောင်ကြီး၊ ဗိုလ်မှူးချုပ်တင်ဖေတို့သည် ဝင်ဒါမီယာနန်းတွင်းသို့ မော်တော်ကားလေးတစီးဖြင့် လာရောက်၍ ဝန်ကြီးချုပ်ဦးနုနှင့် တွေ့ဆုံဆွေးနွေးသွားကြသည်ဆိုသောသတင်းတရပ်ကိုလည်း ဓာတ်ပုံဘလောက်များနှင့် တခန်းတနား ဖော်ပြကြ၏။

ဦးနု၏ဆင်ခြေ။
ဝန်ကြီးချုပ်ဦးနုက သန့်ရှင်း၍ တရားမျှတသောရွေးကောက်ပွဲတရပ်ကို မိမိအနေနှင့် တာဝန်ယူကျင်းပပေးရန်အရည်အချင်းမရှိတော့၍ ယခုကဲ့သို့ စစ်ဦးစီးချုပ်နေဝင်းအား တပ်မတော်အနေနှင့်မဟုတ်ဘဲ ပုဂ္ဂိုလ်အနေဖြင့်သာ အာဏာလွှဲပြောင်းပေးရခြင်းဖြစ်ပါသည်ဟု ဝင်ဒါမီယာ နန်းတွင်းရေးအပြောင်းအလွဲနှင့်ပတ်သက်၍ အကြောင်းပြ၏။ ထိုကိစ္စအတွက် လာလတံ့သော ဗိုလ်ချုပ်နေဝင်းအစိုးရအား တိုင်းပြည်ကပင် ဝိုင်းဝန်း၍ထောက်ခံပေးကြပါဦးဟူ၍များပင် နိုင်ငံရေးအဆစ်တောင်းသွားလိုက်ချေသေးတော့၏။

တိုင်းပြည်ကရွေးကောက်တင်မြှောက်လျှက် တရားဝင်ဖွဲ့စည်းတည်ထောင်ထားသောအစိုးရတရပ်က ရွေးကောက်ပွဲတရပ်ကို ဖြောင့်ဖြောင့် တန်းတန်း မကျင်းပပေးနိုင်သဖြင့် တပ်မတော်၏စစ်ဦးစီးချုပ်အား(ပုဂ္ဂိုလ်အရ)အာဏာလွှဲပြောင်းပေးရပါသည်ဟုဆိုသော ဦးနု၏ဆင်ခြေနှင့် အကြောင်းပြချက်သည် ထမင်းစား၍ လူဖြစ်ကြီးပြင်းလာကြရသူများအတွက် နားရှိ၍သာကြားလိုက်ရသောဆင်ခြေနှင့် အကြောင်းပြချက်မျိုး ဖြစ်နေ၏။ ခတ်ပြောင်ပြောင်ရေးရချေလျှင် တိုင်းပြည်အားစော်ကားလိုက်ခြင်းသာဖြစ်သည်ဟု ဆိုရလိမ့်မည်ဖြစ်၏။ ဤကဲ့သို့သော ကလေးကလားနိုင်လျှက် တာဝန်မဲ့လှသောအကြောင်းပြချက်မျိုးကို တိုင်းပြည်ကမဆိုထားပါနှင့် ဦးနု၏ဇနီးနှင့် အဖွဲ့ဝင်နောက်လိုက်များက ပင်လျှင် ယုံကြည်လက်ခံနိုင်ရန် ခဲယဉ်းလှပေလိမ့်မည်။

ဦးနုက တိုင်းပြည်သို့ ထုတ်ပြန်လိုက်သောအကြောင်းပြချက်နှင့်ဆင်ခြေအတိုင်း တိုင်းပြည်က မိမိအားပေးအပ်ထားသောတာဝန်ကို ရိုးရိုးသားသား မထမ်းဆောင်နိုင်ခဲ့ဟုဆိုလျှင်၊ ဦးနုသည် မိမိတာဝန်ခံယူထားရသော ပြည်သူ့လွှတ်တော်နှင့်နိုင်ငံတော်သမ္မတကြီးတို့အား မိမိ၏အခက်အခဲကို ဖော်ထုတ်တင်ပြလျှက် တာဝန်ကိုပြန်အပ်နိုင်၏။ သို့မဟုတ် နည်းလမ်းရှာဖွေနိုင်၏။ ယခုမူ ဝန်ကြီးချုပ်ဦးနုသည် တိုင်းပြည်က ယုံကြည်၍အပ်နှင်းထားသောတာဝန်ကို တိုင်းပြည်အား ထုတ်ဖော်တိုင်ကြားခြင်းနှင့် တိုင်ပင်ခြင်းပြုရန် လုံးဝမစဉ်းစားပဲ တိုင်းပြည်က ယုံကြည်၍အပ်ထားသောအာဏာကို မိမိ၏မိဘများထံမှ အမွေရရှိထားသောပစ္စည်းကဲ့သို့ တပ်မတော်ဦးစီးချုပ်အား ဆိုင်းမပါဗုံမပါ လွှဲအပ်ပေးသည့်အကြောင်း ရုတ်တရက်ကြေငြာလိုက်ပုံမှာ အဘယ်မျှတာဝန်မဲ့ရာကျနေပြီနည်း။

လာပြန်ပြီတမျိုး။
စစ်ဦးစီးချုပ်နေဝင်းအား အာဏာလွှဲပြောင်းပေးမည်ဆိုရာနှိုက် စစ်ဦးစီးချုပ်အနေ၊ တပ်မတော်အနေနှင့်မဟုတ်ဘဲ ပုဂ္ဂိုလ်တဦးတယောက် အနေနှင့်သာ လွှဲပြောင်းပေးမည်သာဖြစ်ပါသည်ဟု ဝန်ကြီးချုပ်ဦးနုက တဆင့်တက်လိုက်ပြန်သေး၏။ ဤသို့တဆင့်တက်လာသော ဦးနု၏ နိုင်ငံရေးအဘိဓမ္မာသည် ဤမျှခေါင်းပါးမွဲကျန်ရသလောဟူ၍ တိုင်းပြည်က ငြီးတွားရတော့မည်ကဲ့သို့ဖြစ်နေ၏။

စစ်ဦးစီးချုပ်နေဝင်းသည် မိုးကောင်းကင်ဘုံမှကျလာသော မိုးကျရွှေကိုယ်ကားမဟုတ်ပေ။ အခြေခံအုပ်ချုပ်ပုံစည်းမျဉ်းဥပဒေအတွင်းနှိုက် နေထိုင်ရသော ပြည်ထောင်စုသားတဦးမျှသာဖြစ်သည်။ စစ်ဦးစီးချုပ်တာဝန်နှင့်ရာထူးများသာ မရှိနေခဲ့လျှင် ဗိုလ်ချုပ်နေဝင်းသည် ယခုအခါတွင် တပ်မတော်အပြင်ဘက်သို့ လွင့်ပါးရောက်ရှိနေကြပြီဖြစ်သော ယခင်ဗိုလ်ချုပ်ဟောင်းများဖြစ်ခဲ့ကြသည့် စမစ်ဒွန်း၊ ကြာဒိုး၊ လက်ျာနှင့် ကျော်ဇောတို့ကဲ့သို့သာ ရှိနေလိမ့်မည်ဖြစ်၏။ ထို့ကြောင့် စစ်ဦးစီးချုပ်နေဝင်းအား ဝန်ကြီးချုပ်ဦးနုက နန်းမွေဆက်ခံခွင့် ပေးလိုက်ရခြင်းသည် သာမန်ပြည်ထောင်စုသားပုဂ္ဂိုလ်တဦးအနေနှင့်မဟုတ်နိုင်ဘဲ၊ ဗမာ့တပ်မတော်စစ်ဦးစီးချုပ်အနေနှင့်သာလျှင် တပ်မတော်ကို ကျောထောက်နောက်ခံထား၍ လွှဲပြောင်းပေးလိုက်ရခြင်းဖြစ်သည်ဆိုသည်မှာ လယ်ပြင်နှိုက်ဆင်သွားသကဲ့သို့ ထင်ရှားလျှက်ရှိ၏။ တိုင်းပြည်ကရွေးကောက်တင်မြှောက်၍ တရားဝင်ဖွဲ့စည်းတည်ထောင်ခြင်းပြုထားသော ပြည်ထောင်စုအစိုးရသည် သံဆူးကြိုးများကာရံလျှက် လက်နက်ကိုင်များ ဝိုင်းဝန်းစောင့်ကြပ်နေသော ဝင်ဒါမီယာနန်းတော်ကြီးအတွင်းနှိုက် အတင်းအဓမ္မ လုပ်ကြံဖြုတ်ချခြင်းခံလိုက်ရသည်ကို အထင်းသားအရှင်းသား မြင်နေရ၏။

ထိုကဲ့သို့ပင် အတင်းအဓမ္မလုပ်ကြံဖြုတ်ချကြခြင်းကိုလည်း ဝန်ကြီးချုပ်ဦးနုအနေနှင့် သဘောကျငြိမ်ခံ၍နေလိုက်ခြင်းဖြစ်သည်မှာ ပေါ်လွင်လျှက်ရှိ၏။

ဆင်သေအားဖုံးဖိကြပုံ။
ဤ ဝင်ဒါမီယာ နန်းတွင်းလုပ်ကြံမှုကြီးနှင့်ပတ်သက်၍ တစုံတယောက်ကဖြစ်စေ၊ မည်သည့်ပါတီအဖွဲ့အစည်းကဖြစ်စေ မဟုတ်မဟတ် ပြောဆိုရေးသားမှုပြုလုပ်ပါလျှင် မိမိအနေနှင့် သီးငြီးခံနိုင်တော့မည်မဟုတ်ဘဲ တရားဥပဒေအရ အရေးယူရလိမ့်မည်ဖြစ်ကြောင်းဖြင့် လုပ်ကြံမှုကြီးပြီး၍ များမကြာမီအတွင်း စစ်ဦးစီးချုပ်နေဝင်း ထိုးမြဲလက်မှတ်ဖြင့် တပ်မတော်သတင်းနှင့်ပြန်ကြားရေးဌာနမှ ကြေငြာချက်တရပ် ထုတ်ပြန်လိုက်၏။ စောင်ရေများပြား၍ သြဇာလည်းကြီးသောသတင်းစာတိုက်ကြီး ၄-၅ တိုက်မှ တာဝန်ခံများကို ဒဂုန်ရိပ်သာသို့ ထမင်း ခေါ်ဘိတ်ကြွေးမွေးလျှက် စစ်ဦးစီးဗိုလ်မှူးကြီးများကိုယ်တိုင် ဧည့်ဝတ်ပြုကြခြင်းကိုလည်းကြားရ၏။

ဤထုတ်ပြန်ကြေငြာချက်နှင့် ဧည့်ခံပွဲများသည် လုပ်ကြံမှုကြီးအား ဖုံးကွယ်ရန်ကြိုးပမ်းသော ခြေလှမ်းများသာဖြစ်သည်။ တချိန်တည်းမှာပင် ဝန်ကြီးချုပ်ဦးနုက၎င်း၊ အတိုက်အခံဦးကျော်ငြိမ်းက၎င်း၊ နောက်တက်လာမည့် ဗိုလ်ချုပ်နေဝင်းအစိုးရအား သူ့ထက်ငါ အပြိုင်အဆိုင် ကြိုဆိုပွဲများ ထောက်ခံပွဲများလုပ်လာကြ၏။ နိုင်ငံရေးကျားသေကြီးများ အသက်ပြန်ဝင်လာကာ ဦးနုနှင့်ဦးကျော်ငြိမ်းတို့နည်းတူ ကြိုဆို ထောက်ခံကြသော သတင်းစာရှင်းလင်းပွဲနှင့်ထုတ်ပြန်ချက်များကိုကား အထူးရေးသားနေဘွယ်ရာ မလိုတော့ဟုထင်၏။

မိမိပြုတ်ကျသွားခဲ့ရသောနေရာကို တက်လာမည့်အစိုးရအား ဝန်ကြီးချေုပ်ဦးနုက အဘယ့်ကြောင့် ကြိုဆိုထောက်ခံရသနည်း။ အဖြေကား ရှင်း၏။ ဝန်ကြီးချုပ်ဦးနုသည် မိမိအားဖြုတ်ချခြင်းကိစ္စကိုကာကွယ်၍ နောက်တက်လာမည့်အစိုးရသည် မိမိကိုယ်သာလျှင် လိုလားသော အစိုးရအနေနှင့် တိုင်းပြည်ကထင်မြင်လာအောင်၊ အထင်ကြီးလာအောင် ဟန်ရေးပြခြင်းမျှသာဖြစ်၏။ အတိုက်အခံဦးကျော်ငြိမ်းကရော အဘယ့်ကြောင့် ကြိုဆိုထောက်ခံရသနည်း။ ဤမေးခွန်းအတွက်အဖြေသည်လည်း ဖြေပြီးသားပင်ဖြစ်နေ၏။ အဘယ့်ကြောင့်ဆိုသော် ၎င်းဖြုတ်ချလိုသော ဝန်ကြီးချုပ်ဦးနုအစိုးရသည် ပြုတ်သွားခဲ့ရပြီးဖြစ်သောကြောင့်ဖြစ်၏။ ၎င်းအပြင် နောက်တက်လာမည့်အစိုးရအဖွဲ့နှိုက် မိမိ၏လူများပါဝင်ကာ တန်ခိုးအာဏာကြီးမားလာစရာ အလားအလာများရှိနေသောကြောင့်လည်ဖြစ်၏။

ဝန်ကြီးချုပ်ဦးနုနှင့် အတိုက်အခံဦးကျော်ငြိမ်းတို့သည် ထိုလုပ်ကြံမှုကြီးအား ကြိုဆိုထောက်ခံပွဲများ ကျင်းပပြုလုပ်ရုံနှင့်အားမရကြသေးဘဲ၊ ယခင် ဖဆပလအဖွဲ့ကြီးမကွဲမီက တဦးနှင့်တဦးနားလည်မှုရှိစွာ လုပ်ခြင်တိုင်းလုပ်လာခဲ့ကြသော တဦး၏အပပြစ်အနာအဆာများကို တစ်တစ်ခွခွ ထုတ်ဖော်ဆဲရေးလာကြပြန်၏။ ရစရာမရှိအောင် ပုတ်ခတ်စွပ်စွဲလာကြပြန်၏။ နှစ်ဦးစလုံးကပင် ခုံရုံးဖွဲ့၍စစ်ဆေးပါဟု အော်ကြီး ဟစ်ကျယ် စိန်ခေါ်လျှက်ရှိကြ၏။

ဤကား ဘာအဓိပ္ပါယ်နည်း။
အဓိပ္ပါယ်ကားရှင်းနေ၏။ လုပ်ကြံဖြုတ်ချခြင်းခံလိုက်ရသောဝန်ကြီးချုပ် ဦးနုရော၊ လုပ်ကြံမှုတွင်ကြိုးကိုင်သောဦးကျော်ငြိမ်းပါ ဝင်ဒါမီယာ နန်းတွင်းလုပ်ကြံမှုကြီးအား တိုင်းပြည်က မျက်ခြေပြတ်သွားအောင် အာရုံလွှဲပြောင်းနေကြခြင်းသာဖြစ်၏။ ဤကဲ့သို့ အာရုံလွှဲပြောင်းပေးကြရင်း တချက်ခုတ် ၂ ချက်ပြတ်ဆိုသကဲ့သို့ မိမိတို့အချင်းချင်းလည်း တဦးကိုတဦးသြဇာချရန် လိမ်လိမ်မာမာ နိုင်ငံရေးကျားကွက် ဆင်နေကြခြင်း ဖြစ်သတည်း။

ထူးခြားသော ပဟေဠိ။
ဤကား စက်တင်ဘာ ၂၆ ရက်နေ့က ဝင်ဒါမီယာနန်းတွင်းလုပ်ကြံမှုကြီးနှင့်ပတ်သက်၍ ထိုလုပ်ကြံမှုကြီးတွင် အသီးသီးပါဝင်ခဲ့ကြသော ကာယကံရှင်များက အူယားဖားယားဖုံးဖိနေကြသော အကြောင်းရင်းနှင့်အခြေခံများဖြစ်၏။ သို့ရာတွင် ဤ လုပ်ကြံမှုကြီးနှင့်ပတ်သက်၍ အစွန်းထွက်နေသေးသောပြဿနာတခုကား ရှိနေသည်။ ထိုပြဿနာမှာ အခြားတော့မဟုတ်၊ ဖွဲ့စည်းအုပ်ချုပ်ပုံအခြေခံဥပဒေနှင့် လက်နက်ကိုင်ခြိမ်းခြောက်မှုတို့ကို အသက်ပေးကာကွယ်ဝန့်ပါသည်၊ ကာကွယ်ခြင်းလည်းပြုပါမည်ဟု မကြာခန မောင်းတင်ကြိမ်းမောင်း ခြင်းလည်းပြုလေ့ရှိသော ဝန်ကြီးချုပ်ဦးနုသည် စက်တင်ဘာလ ၂၆ ရက်နေ့လုပ်ကြံမှုကြီးကိုခုခံကာကွယ်ရန် မည်သို့မျှကြံစည်အားထုတ်ခြင်း မပြုဘဲ၊ ထိုလုပ်ကြံမှုကြီး၏တရားခံများနှင့်အတူ ပူးပေါင်းပါဝင်သွားလိုက်သောပြဿနာပင်ဖြစ်သည်။

များမကြာမီက ပြည်ထောင်စုလူငယ်များညီလာခံနှိုက် မိမိကိုယ်ကို ကွန်မြူနစ်များနှင့် ဆယ်နှစ်လုံးလုံး ဘယ်သောအခါမှမစေ့စပ်ဘဲ အပြုတ် တိုက်လာခဲ့သော သူရဲကောင်းကြီးအဖြစ်ဖြင့်၎င်း၊ ပြည်ထောင်စုကြီးတခုလုံး ချောက်ထဲကျရန်လက်နှစ်လုံးမျှသာလိုခဲ့သော အချိန်နှိုက်လည်း ကြောက်မွှေးရှိသမျှကိုဇာဂနာနှင့်နှုတ်ကာ တယောက်တည်းအလံမလှဲဘဲ တွန်းလှန်တိုက်ခိုက်လာခဲ့သော ဒီမိုကရေစီသူရဲကောင်းကြီး အဖြစ်ဖြင့်၎င်း ကိုယ်ရည်သွေးခဲ့သော ဝန်ကြီးချုပ်ဦးနုသည် စက်တင်ဘာ ၂၆ ရက်နေ့လုပ်ကြံမှုကို ငြိမ်ငြိမ်သက်သက်ကလေးခံလိုက်ပုံအား လေးလေးနက်နက်စဉ်းစားစရာရှိလာ၏။

ဦးနုဦးဆောင်သောအစိုးရသည် တရားဝင်တည်ထောင်ထားသောအစိုးရဖြစ်၏။ ပြည်သူတို့က ရွေးကောက်ထားသောအစိုးရဖြစ်၏။ ပြည်သူ့လွှတ်တော်ညီလာခံက တင်မြှောက်လိုက်သောအစိုးရဖြစ်၏။ ယခုအခါတွင် မိမိ၏တရားဝင်အစိုးရအား လက်နက်ကိုင်ခြိမ်းခြောက်ကာ လုပ်ကြံခဲ့ကြသောလူတစုနှင့် ဝန်ကြီးချုပ်ဦးနုသည် အလိုတူအလိုပါပူးပေါင်းသွားခဲ့လေပြီ။ ထိုသို့ပူးပေါင်းခြင်းနှိုက် အခြားအကြောင်းမရှိနိုင်ပေ။ ပြည်ထောင်စု မြန်မာနိုင်ငံတော်သူ နိုင်ငံသားများအား လက်နက်ကိုင်ဖိနှိပ်လိုကြသေလူတစုနှင့် လက်တွေ့အားဖြင့်ပူးပေါင်းလိုက်သော ဦးနုသည် မိမိကိုယ်တိုင်က ပြည်သူလူထုအား လက်နက်ကိုင်၍ဖိနှိပ်ရန်သဘောတူမျှသောကြောင့်သာ ဖြစ်နိုင်ပေသတည်း။
ထွန်းလင်း
(အက္ခရာရိုက်မရလို့ နှိုက်လိုက်ရပါတယ်။ မူရင်းအတိုင်းသတ်ပုံသတ်ညွှန်းမပြင်ပါ။ ထွန်းလင်းဆိုသည်မှာ ဆရာဗန်းမော်တင်အောင့် ကလောင်ခွဲတခုဖြစ်ပါတယ်။ အစိုးရအပေါ်အကြဘည်အညိုပျက်စေမှုနဲ့ တရားစွဲခံရတဲ့ဆောင်းပါးပါ။ လင်းယုန်ဂျာနယ် နိုဝင်ဘာ ၁၉၅၈ ခုထုတ်မှာဖော်ပြခဲ့တာဖြစ်ပါတယ်။ ဓာတ်ပုံကို Aungmyint Oo ဆီကယူပါတယ်။ စာက ကျနော်ရိုက်ပါတယ်။ မျိုးမြင့်ချို)