(မျက်တောင်မွှေးနှုတ်တဲ့ လက်ဝဲသမားများ)

(မျက်တောင်မွှေးနှုတ်တဲ့ လက်ဝဲသမားများ)
တရတ်ပြည်မှာ ကိုရိုနာစဖြစ်တော့ ဗမာပြည်ကလက်ဝဲသမားတချို့ဟာ လက်ယာသမားတွေထက်တောင် ပိုလက်ယာကျပြပြီး တရုတ်ပြည်အပေါ် ကျိန်စာတိုက်ခဲ့ကြတယ်လို့ တချို့ကပြောပါတယ်။ ဟုတ်သလောက် ဟုတ်ပါတယ်။ ကျနော့်အမှုတွဲတွေထဲက ရဲရဲတောက်တချို့တောင် တက်ထောင်မောင်းနင်းတွေပြောကြတာ ကိုယ်တိုင်တွေ့ရဖတ်ရပါတယ်။ ဒီလူတွေဟာ ကျနော် လေးစားခဲ့ဖူး အားကျခဲ့ဖူးသူတွေလည်း ဖြစ်ခဲ့ဖူးပါတယ်။ ကျနော့်ကို ပြောင်းလဲအောင် လုပ်ပေးခဲ့သူတွေလည်းဖြစ်ခဲ့ပါတယ်။ ခုနှစ်ပေါင်း သုံးဆယ်လောက်ရှိတဲ့အခါ ကျနော်က ပြောင်းလဲမသွားပဲ သူတို့ကပြောင်းလဲကုန်ကြတာ အံ့အားသင့်စဖွယ်တွေ့ရပါတယ်။ ပြည်တွင်းအ‌ခြေအနေအရ ကြည့်နေကြည့်စားမို့ အဲ့သလို လူမျိုးရေးမုန်းတီးမှု လူမျိုးရေးဆန့်ကျင်မှုတွေလုပ်ရတာပါဆိုလည်း ဒါဟာ မမှန်တဲ့ တရားမရှိတဲ့ နိုင်ငံရေးသီလမစင်ကြယ်တဲ့ လူ့စရဏတရားကျိုးပျက်တဲ့အကြောင်းပြချက်လို့မြင်ပါတယ်။ လက်ယာသမားတိုင်း လက်ယာစွန်းတွေမဟုတ်ကြသလို၊ လက်ယာသမားတိုင်း ဘာသာရေးလူမျိုရေး အမုန်းတရားမဖြန့်ကြပေမယ့် ဘာသာရေးလူမျိုးရေးအစွန်းရောက်သမားတိုင်း အမုန်းတရားဖြန့်ချိသူတိုင်းဟာတော့ လက်ယာစွန်းသမားတွေချည်းပါပဲ။ ဒါ ဒီနေ့ ဗမာတပြည်တည်းပြဿနာမဟုတ်ပဲ ကမ္ဘာနဲ့ချီဖြစ်နေတာပါ။

တရုတ်လူမျိုးမုန်းတီးရေး တရုတ်ပြည်ဆန့်ကျင်ရေး တရုတ်အစိုးရဆန့်ကျင်ရေးအခံတွေကနေ လက်ယာသမားတွေနဲ့ လက်ယာစွန်းသမား‌တွေ သူတို့အလုပ် သူတို့လုပ်တာ မဆန်းလှပေမယ့် လက်ဝဲသမားကဝင်လုပ်တာကျ တော်တော့်ကို မသတီစရာပါ။ အော့နှလုံးနာစရာပါ။ လုပ်တဲ့လူတွေကြည့်တော့ လက်ဝဲအမည်ခံထားပေမယ့် လက်ဝဲဝါဒကြီးကျဆုံးနေပြီလို့ ကိုယ်ဘာသာတွေးပြီး သိမ်ငယ်စိတ်ဝင်နေသူတွေဖြစ်နေတာတွေ့တော့ ဪတလုံးရွတ်မိတာပါပဲ။ ဒီလူတွေဟာ ဘာနဲ့တူသလဲဆိုတော့ အစ္စလာမ်ဘာသာဝင်နဲ့အိမ်ထောင်ကျပြီး ဘာသာပြောင်းလာတဲ့လူက ဝက်မြင်ရင် မျက်တောင်မွှေးနှုတ်ပြသလိုမျိုးနဲ့ ဆင်ပါတယ်။ ဟိုမွေးရာပါမွတ်စလင်မ်ကမှ ဝက်သားကို ဘာသိဘာသာနေချင်နေဦးမယ် သူက ပိုကဲပြတဲ့သဘောပါ။ ဒါကလည်း သူအသစ်ဝင်ရောက်လာတဲ့ အသိုင်းအဝိုင်းက သူ့ကို ပိုလက်ခံလိုဇောနဲ့ အဖြစ်သည်းပြတာပါ။
လက်ယာသမားတွေကို မျက်နှာလိုမျက်နှာရအလုပ်များပြီး "ကိုရိုနာဗိုင်းရပ်စ်ဟာ ဘယ်သူ့မှ ဘာလူမျိုးမှ ဘယ်လူတန်းစားကိုမှ ချမ်းသာမပေးနိုင်ဘူး တချိန်ချိန်က အနှံ့အပြန့်ကူးစက်ကုန်ပြီး ကမ္ဘာနာကြီး ဖြစ်သွားလောက်တယ်"လို့မတွေးတောနိုင်တော့လောက်အောင် ဉာဏ်ကန်းကုန်သူတွေပါ။ အသိရေချိန် နိမ့်ပါးကုန်သူတွေပါ။
ခု ကူးစက်နေပါပြီ။ ခု ကမ္ဘာနာဖြစ်လာပါပြီ။ ဗမာပြည်လည်း စက်ကွင်းမလွတ်ပါ။ မျက်နှာရရေးအခံနဲ့ ပေါက်ပန်းလေးဆယ် ပြောနေရေးနေတာတွေလည်း ပါးပါးလိုက်လာပါပြီ။ ကောင်းပါတယ်။ ဒါပေမယ့် ဒီ့မတိုင်မီကတည်းက အတွေးအခေါ်ရေချိန်ရှိရှိ သိစိတ်မှန်မှန်ကောင်းကောင်းရှိရှိ ဉာဏ်ရှိရှိ ပြောခဲ့ကြရေးခဲ့ကြ ရပ်တည်ခဲ့ကြ ပိုမကောင်းဘူးလားဗျာ။
မျိုးမြင့်ချို
၅။ မတ်။ ၂၀၂၀