(ဘဏ်တိုးတွေချ)

(ဘဏ်တိုးတွေချ)
အမေရိကန်ဗဟိုဘဏ် ဘုတ်အော့ဖ်ဒါရိုက်တာအစည်းဝေးက မတ်လ ၁၇-၁၈ မှာရှိပါတယ်။ ပုံမှန်ဆိုရင် အဲ့ဒီအစည်းဝေးကနေ ဘဏ်တိုးနှုန်း အတင်အချတွေ လုပ်ဖို့ဆုံးဖြတ်ပါတယ်။ အခု ကိုဗစ် ၁၉ ကြောင့် အမေရိကန်စီးပွားရေး(အထူးသဖြင့် ငွေကြေးနဲ့ ဘဏ္ဏာရေးဈေးကွက်တွေ) မှာ အထိနာလာတဲ့လက္ခဏာပြလာပါတယ်။
ဒါ့ကြောင့် ၁၇-၁၈ မှာလုပ်မယ့် ဗဟိုဘဏ်အစည်းအဝေးကနေ ဘဏ်တိုးနှုန်းတွေချလိမ့်မယ် ငွေကြေးဈေးကွက်နဲ့ ဘဏ္ဏာရေး အခြေအနေတွေကို ပြန်ထိန်းညှိလိမ့်မယ်လို့ ခန့်မှန်းချက်တွေ ခုတလော ခတ်စိတ်စိတ်ထွက်နေပါတယ်။

ခုတော့ ဗဟိုဘဏ်အစည်းအဝေးထိတောင် စောင့်မနေတော့ပဲ အရေးပေါ်အစည်းအဝေးထိုင်ပြီး ဘဏ်တိုးနှုန်းတွေချလိုက်ပါပြီ။ အဲ့သလိုချတာကို Emergency Rate Cut လုပ်တယ်လို့ သုံးနှုန်းပါတယ်။ ချလိုက်တဲ့နှုန်းအရဆိုရင် 1.25% ပဲရှိပါတော့တယ်။
ဘဏ်တိုးတွေချလိုက်တဲ့အတွက် ဘဏ္ဏာရေးဈေးကွက် ပြန်တည့်မတ်သွားမလား စတော့ရှယ်ယာတွေဈေးတွေ ပြန် ထောင်တက်လာမလား မတက်လာဘူးလားကတော့ မရေရာသေးပါ။ ဒါပေမယ့် ကမ္ဘာတဝှမ်းမှာ ကျနေတဲ့ဒေါ်လာငွေတန်ဖိုးအပေါ်တော့ သက်ရောက်မှာပါ။
ခု တောင် တဒေါ်လာကို ဗမာငွေ ၁၄၀၀ ဝန်းကျင်အထိပြန်ကျနေတာပါ။ ငွေကြေးပေါ်လစီပေါ် အများကြီးသက်ရောက်တော့မှာပါ။ မလေးရှားတို့ ဩစတေလျတို့အပါအဝင် ကမ္ဘာတဝှမ်းက နိုင်ငံကြီးတွေက ဘဏ်ကြီးတွေလည်း အတိုးနှုန်းတွေ သူ့ထက်ငါ အလုအယက် ချနေကြတာပါ။ တချို့ကတော့ ကိုဗစ် ၁၉ ကြောင့် စီးပွားရေး၊ ဘဏ္ဏာရေးနဲ့ ငွေကြေးဈေးကွက်ကို မထိခိုက်အောင်ကာကွယ်တဲ့အနေနဲ့ ဒါလုပ်တာလို့ ဖေးဖေးမမ ပြောကြတာရှိပါတယ်။ မလုံလောက်သေးဘူး သိတ်မကြာခင်မှာ ထပ် ချကိုချမှရမယ်ဆိုပြီးခန့်မှန်းနေသူတွေလည်း ရှိပါတယ်။
မျိုးမြင့်ချို
၄၊ မတ်၊ ၂၀၂၀