(ပါးစပ်ပိတ်လာသူများ)
လွှတ်တော်ထဲက စစ်ဗိုလ်တွေက မျက်လုံးနဲ့နားပါ ပိတ်လာဖို့ကောင်းတယ်။ ဒါမှ စစ်စစ်မှန်မှန်လူထုဒီမိုကရေစီတွေ သူတို့ပြောတဲ့စည်းကမ်းပြည့်ဝသောဒီမိုကရေစီတွေ မပြောနဲ့ တပ်တွင်းဒီမိုကရေစီနဲ့တောင် မထိုက်တန်တဲ့စစ်တပ်မှန်း လူပိုသိသထက်သိအောင် ဒင်းတို့ဘာသာဒင်းတို့ လုပ်ပြ ပြုမူပြနေကြတာဖြစ်တယ်။ ကဲ့ရဲ့သူ ကဲ့ရဲ့မှာပဲ။ လှောင်သူ ပြစ်တင်ရှုတ်ချသူ လှောင်မှာ ပြစ်တင်မှာပဲ။ အဲ့ဒါသွား အပြစ်ပြောလို့မဖြစ်ဘူးထင်တယ်။
လူထုက အောက်ခြေအဆင့် တပ်မှူးတပ်သားတွေနဲ့ စစ်တပ်ကိုဂုတ်ခွစီး ခါးပိုက်ဆောင်ထဲထည့်ထားပြီးကိုယ်ကျိုးရှာနေတဲ့ စစ်အုပ်စုထိပ်သီးတွေကို ခွဲမြင်ပြီး တပ်ကို လူထုတပ် တိုင်းပြည်ကိုစောင့်ရှောက်ကာကွယ်မယ့် တပ်အဖြစ် ပြောင်းလဲလာရေးမျှော်လင့်နေတာပါ။ တချိန်တည်းမှာ အဲ့သလိုဖြစ်လာရေးအတွက် တပ်ပြုပြင်ရေး Army Reform ကို ဇောင်းပေးနေတယ်။
ဒီနေရာမှာပြောတဲ့ အာမီရီဖောမ်းဆိုတာက စစ်တပ်ထိပ်သီးတွေ တယောက်နဲ့တယောက် တအုပ်နဲ့တအုပ် အာဏာမန်တက်ရင်း ကိုယ်ကျိုးစီးပွားစားမန်ခုတ်ရင်း ဖြုတ်ကြပြုတ်ကြ ဆော်ကြနှက်ကြတာမျိုးကိုပြောတာ မဟုတ်ပါ။ ကာချုပ်ကနေ ရာထူးအဆင့်ဆင့်သော တပ်မှူးတပ်သားတွေဟာ စစ်သားအလုပ်စစ်သားလုပ်ဖို့ တိုင်းပြည်လူထုကဆန္ဒမဲနဲ့ တင်မြှောက်ထားတဲ့အစိုးရကို နာခံဖို့ပဲ။ အစိုးရပေးတဲ့တာဝန်ထမ်းဆောင်ဖို့ပဲ။
အစိုးရဆိုတာ လူထုကရွေးချယ်တင်မြှောက်လိုက်ပေမယ့် အခါခပ်သိမ်းမှန်ကန်နေတာတော့လည်း မဟုတ်ဘူး။ အစိုးရမှားတာတွေ အများကြီးရှိခဲ့တယ်။ ရှိနေတယ်။ ရှိလိမ့်ဦးမယ်။ အဲ့ဒါက တကိစ္စ။ အစိုးရနဲ့လူထုကြားက ကိစ္စ။
လူထုလည်း မှားတတ်တာပဲ။ ခုကာလဆို ပိုတောင် မှားဖို့လွယ်သေးတယ်။ ကြိုက်လုံးပစ်နိုင်ငံရေးတွေ (ပေါ်ပြူလာဝါဒတွေ) တခေတ်ပြန်ဆန်းနေချိန်ကြီး မဟုတ်လား။ ဒီတော့ လူထုလည်း မှားတတ်တယ်။ အစိုးရမှားနေရင် လူထုကပြင်ပေးဖို့ဖြစ်ပြီး လူထုကမှားနေရင် အစိုးရကပြန်ပြင်ပေးဖို့ပဲ။
လူထုနဲ့အစိုးရတွဲမှားတဲ့အမှားမျိုး(ဖက်ဆစ်တွေအာဏာရလာတာ ဖက်ဆစ်တွေကိုရွေးချယ်တင်မြှောက်ခဲ့တာမျိုး)ကမ္ဘာနဲ့ချီမှားတဲ့အမှားမျိုး ဖြစ်ခဲ့ရင်တော့ ယဉ်ကျေးသောလူ့အဖွဲ့အစည်းကြီးက ဆုံးမမှာပဲ။ ဒဏ်ခတ်မှာပဲ။ တပြည်လုံး ကျောကော့အောင်ခံရမှာပဲ။
ဆိုတော့ ပြည်တွင်းအဆင့်မှာသာ မှားတဲ့အမှားမျိုးဆိုရင်တော့ လူထုနဲ့အစိုးရအပြန်အလှန်ထိန်းကျောင်းတည့်မတ်ပြီးသွားလို့ရတယ်။ စစ်တပ်ဝင်ပါစရာမလိုဘူး။ စစ်တပ်က တပ်တွင်းဒီမိုကရေစီ (ဒီအကြောင်း သတ်သတ်ရေးဖူးပါတယ်)ကို မှန်မှန်ကန်ကန်ကျင့်သုံးပြီး မိမိဘာသာ ပရော်ဖက်ရှင်နယ်လ်တပ်အဖြစ်နေရုံပဲ။
ဒီနေရာမှာ Professional လို့ပြောလိုက်လို့ "ကြေးစား"ဆိုပြီး တန်းဆိုင်းဘုတ်မတပ်မိဖို့ လိုပါတယ်။ စစ်တပ်အလုပ် စစ်တပ်လုပ်တာကိုပြောတာပါ။ စစ်တပ်တတပ်ဟာ စစ်တပ်အလုပ် မလုပ်တော့ဘူးဆိုရင် စစ်တပ်နဲ့မဆိုင်တဲ့ကိစ္စတွေမှာဝင်ပါနေတယ်ဆိုရင် အဲ့ဒီစစ်တပ်ရဲ့အသရေယုတ်တာပဲ။ စစ်ဂုဏ်ရည်ရဲ့ စစ်တပ်ပီသမှုပျောက်ဆုံးသွားတာပဲ။ တပ်မှူးတပ်သားတွေလည်း လူသူအလေးစားလျော့တာပဲ အရိုသေတန်တာပဲ။ စစ်သူကြီးတွေကို လူတွေမခန့်မငြားလုပ်တာပဲ။
ခု ဗမာပြည်စစ်အုပ်စုဖြစ်နေတာ အဲ့ဒါတွေပဲ။ စစ်တပ်ဟာ လူသူလေးစားတန်ဖိုးထားတဲ့တပ် ဖြစ်ရမယ့်အစား လူတကာ့ အော်ကြောလန် လူ့ချဉ်ဖတ်တပ်ဖြစ်နေတာအားလုံးအမြင်ပဲ။ ဒါကို ဒီအခြေအနေကို လူထုက မဖြစစေ့ချင်ဘူး။ မလိုလားဘူး။ ဂုဏ်သိက္ခာရှိတည်ကြည်ပြီး လူသူလေးစားခန့်ငြားတဲ့တပ် ပြန်ဖြစ်စေ့ချင်တယ်။ အဲ့ဒါ အပေါ်မှာပြောခဲ့တဲ့ အာမီရီဖောမ်းပဲ။ လူထုက ဒါလိုချင်နေတယ် ဒီလိုဖြစ်စေချင်တယ်။
ခု လွှတ်တော်ထဲရောက်နေတဲ့စစ်ဗိုလ်တစုက စစ်အုပ်စုကိုကိုယ်စားပြုပြီး မဖွယ်မရာပြုမူလာတယ်။ ကိုရိုနာကြောက်လို့ "နှာခေါင်းစည်း"လာတာ မဟုတ်ဘူး။ လူထုဆန့်ကျင်ရေးလုပ်ပြဖို့ "ပါးစပ်ပိတ်ပြ"လာတာ။
ပြန်ချုပ်ရရင် စစ်အာဏာရှင်စနစ်ဆိုတာ အောက်ခြေထု တပ်မှူးတပ်သားတွေမပါပဲတည်ဆောက်လို့မရမှန်း လူထုကသိပါတယ်။ ဒါပေမယ့် စစ်အာဏာရှင်စနစ်ရဲ့အမြတ်အစွန်းတွေကို ဘာမှသာမခံစားရတာ လက်တွေ့မှာအသေခံနေရ လူအမုန်းခံနေရတဲ့ အောက်ခြေထုတပ်မှူးတပ်သားတွေကိုတော့ ကိုယ့်ဘက် လာရပ်စေ့ချင်တယ်။ ဒါကိုမျှော်လင့်ရင်း အနုနည်းတွေနဲ့ ဖြည်းဖြည်းချင်းလုပ်နေတယ်။ ပြည်တွင်းနဲ့ နိုင်ငံတကာအခြေအနေကလည်း အဲ့သလိုသွားဖို့ ခွင်ပြုနေတယ်။ ဒါကို ဒီအခြေအနေကို အောက်ခြေထုတပ်မှူးတပ်သားတွေ နားလည်သိမြင်ဖို့လိုပါတယ်။ အဲ့သလိုမဟုတ်ပဲ "ကိုယ်ဘာသာ ပါးစပ်ပိတ်"လာရင် မျက်လုံးရော နားပါ စစ်အုပ်စုက ပိတ်ထားတာခံနေရဦးမှာပဲ။
မျိုးမြင့်ချို
၄။ မတ်။ ၂၀၂၀
0 comments:
Post a Comment