ယန်ရွယ်တုန်းနဲ့ ဝမ်လျဲ့ တို့ရဲ့ဆွေးနွေးခန်း “မျက်မှောက်ကမ္ဘာနဲ့ဆိုရှယ်လစ်ဝါဒဂျာနယ်” ၁၉၉၈ ခုနှစ် အမှတ်(၃) ဇူလိုင်လထုတ် တရုတ်ဘာသာကနေ ဗမာလိုပြန်ထားတဲ့ “တကမ္ဘာလုံးလက္ခဏာဆောင်မှုနဲ့ တရုတ်ပြည်” လေ့လာဆွေးနွေးချက်များဆိုတဲ့စာတမ်းမှ “တကမ္ဘာလုံးလက္ခဏာဆောင်မှုနဲ့တရုတ်ပြည်” ကို ကောက်နှုတ် ဖော်ပြထားတာဖြစ်ပါတယ်။
ယန်ရွယ်တုန်း။ ဒီပြဿနာတွေနဲ့ပတ်သက်လို့ သုတေသနစာတမ်းအတော်များများမှာလည်း ဖော်ပြထားခဲ့ပြီးပါပြီ။ ပြဿနာကိုဖြေရှင်းဖို့နည်းလမ်းတွေလည်း တင်ပြထားခဲ့ပြီးပါပြီ။ အစိုးရဌာနတွေအနေနံ့လည်း ဒီကိစ္စမှာ အတော်လေးလုံးပမ်းနေကြတယ်။ ဥပဟာ- ဒီနှစ်ဦးပိုင်းမှာလုပ်ခဲ့တဲ့ တပြည်လုံးဆိုင်ရာ အစည်းအဝေးမျိုးပေါ့။ ဒီအစည်းအဝေးက နိုင်ငံခြားအရင်းအနှီးတွေနဲ့ပတ်သက်လို့ ဆွေးနွေးငြင်းခုန်တဲ့ပွဲပါ။
ဝမ်လျဲ့။ တရုတ်ပြည်ဟာ အဆိုပါအကိုင်အတွယ်ရခက်လှတဲ့ပြဿနာတွေကို ဖြေရှင်းမယ်ဆိုရင် ဦးစွာထားရမယ့် အချက်နှစ်ချက်ကို လုပ်နိုင်ရမယ်။
(၁) တရုတ်ပြည်ဟာ တကမ္ဘာလုံးလက္ခဏာဆောင်မှုဖြစ်စဉ်အတွင်းက မိမိရဲ့အဆင့်နေရာ၊ မိမိရဲ့ကဏ္ဍကို ရှင်းရှင်းလင်းလင်း သတ်မှတ်ရမယ်။ ဒီအချက်ဟာ မိမိရဲ့ ကမ္ဘာလုံးဆိုင်ရာဗျူဟာကိုချမှတ်ဖို့အတွက် ရှေးဦးလိုအပ်ချက်ဖြစ်တယ်။
(၂) အတွေးအခေါ်ကိုလွတ်မြောက်ခြင်း၊ စနစ်တွေကိုပြောင်းလဲခြင်းနဲ့ စနစ်အသစ်များကိုလည်း ဖန်တီးဖော်ဆောင်ခြင်းများ မပြတ်လုပ်ပြီးတော့ ပြည်တွင်းက အကြောင်းအချက်အသီးသီး (အင်အားအသီးသီး)ရဲ့ တက်ကြွမှုနဲ့ တီထွင်ဖန်တီးမှုတွေကိုဖွံ့ဖြိုးစေကာ အချိန်တိုအတွင်းမှာ ကိုယ့်တိုင်းပြည်အင်အားကိုဘ ကြီးထွားလာအောင် တတ်နိုင်သမျှလုပ်ရမယ်။
(တစ်တချက်ဖြစ်တဲ့) တကမ္ဘာလုံးလက္ခဏာဆောင်မှုဖြစ်စဉ်အတွင်း တရုတ်ပြည်ရဲ့ အဆင့်နေရာ သတ်မှတ်ရေးနဲ့ပတ်သက်လို့ပြောရရင်
(က)တရုတ်ပြည်ဟာ ဒီဖြစ်စဉ်ကြီးထဲ “နောက်မှရောက်လာသူ”ပါ။ အဲဒါကြောင့်ပဲ တရုတ်ပြည်ဟာ နိုင်ငံတကာစည်းကမ်းဥပဒေတွေကို လေ့လာဖို့၊ ဒါတွေနဲ့ လိုက်လျောညီထွေလုပ်နိုင်ဖို့ လုပ်နေရတာပါ။ ဒါ့အပြင် တရုတ်ပြည်ဟာ အမြင်ကျယ်ကျယ်ထားရမယ်။ ‘တကမ္ဘာလုံးစိတ်ဓာတ်’ကို ထူထောင်ရမယ်။ တကမ္ဘာလုံးစိတ်ဓာတ် ဆိုတာ ပြဿနာတွေကို တကမ္ဘာလုံးအကျိုးစီးပွားရှုထောင့်ကစဉ်းစားတာကို ပြောတာပါ။
(ခ) တရုတ်ပြည်ဟာ ဖွံ့ဖြိုးဆဲနိုင်ငံတွေထဲက တိုင်းပြည်ကြီးတခုပါ။ အဲဒါကြောင့် တရုတ်ပြည်ဟာ မိမိအင်အားကို မိုးမွှန်အောင်ပြောတာမျိုး၊ ကြွားဝါတာမျိုးလုပ်ဖို့ အခြေအနေမျိုး မဟုတ်သေးပါဘူး။
(ဂ)တရုတ်ပြည်ဟာ အဆက်မပြတ်ပြုပြင်ပြောင်းလဲရေးတွေလုပ်နေတဲ့ ‘အလားအလာအင်အား’တွေ ကြီးမားတဲ့နိုင်ငံ ဖြစ်တယ်။ အဲဒါကြောင့် တရုတ်ပြည်ဟာ ကိုယ့်ကိုယ်ကိုယ် အရမ်းအားငယ်နေလို့မဖြစ်ပါဘူး။ ကိုယ့်ကိုယ်ကိုယ် ယုံကြည်နေဖို့လိုတယ်။
(၂)အချက်နဲ့ပတ်သက်လို့ပြောရရင် ဦးစွာအားဖြင့် အတွေးအခေါ်လွတ်မြောက်ရေးကို အလေးထားရမှာပါ။ မာတောင့်နေတဲ့ အတွေးအခေါ်ဘောင်တချို့ကို ထိုးဖောက်ပစ်ရမှာပါ။ အခြေအနေသစ်တွေအောက်မှာ ကျနော်တို့ဦးထိပ်ပန်တဲ့တန်ဖိုးထားချက်နဲ့ အဲဒီတန်ဖိုးထားချက်တွေကိုအကောင်အထည်ဖော်မယ့်စည်းစနစ် ပြုပြင်ပြောင်းလဲရေး၊ စည်းစနစ်တီထွင်ရေးတွေကို လုပ်ရမှာပါ။
ကျနော်တို့ဟာ အတွေးအခေါ်လွတ်မြောက်ရေး၊ စည်းစနစ်ပြောင်းလဲရေး၊ စည်းစနစ်ဖန်တီးတည်ထွင်ရေးတွေကိုသာ မလုပ်ခဲ့ဘူးဆိုရင် တကမ္ဘာလုံးလက္ခဏာဆောင်မှုဖြစ်စဉ်အတွင်း အခုရထားတဲ့အဆင့်မျိုးလည်း ရခဲ့မယ်မဟုတ်ဘူး ဆိုတာ ရှင်းရှင်းလင်းလင်း နားလည်ထားဖို့လိုတယ်။ ဒီလိုမျိုးပြုပြင်ပြောင်းလဲတာတွေကို ဆက်ပြီး လုပ်မသွားဘူးဆိုရင် တရုတ်ပြည်ရဲ့အနာဂတ်ဟာလည်း မဲမှောင်နေမှာဖြစ်ပါတယ်။ (ဆက်လက်ဖော်ပြပါမယ်)
0 comments:
Post a Comment