(စနေဈေးပတ်ခြင်း)

(စနေဈေးပတ်ခြင်း)
မနက်က လယ်သမားစျေးသွားခဲ့၏။ ဟိုဟိုဒီဒီလျှောက်ကြည့်ရင်း အိမ်ချက် ကိုယ်တိုက်ဆပ်ပြာတတုံး ဝယ်၏။ ၅ ဒေါ်လာ။ ပြီးတော့ အရွက်သုပ် Salad အတွက် Cherry Tomato လေးတွေ နည်းနည်းဝယ်၏။ ၄ ဒေါ်လာ။ ပြီးတော့ အဆာသွပ်မုန့်အချို တဗန်းဝယ်၏။ ၁၄ ဒေါ်လာ။ ရွှေဝါကန်စွန်းဥ ၅ လုံးပါ တခြင်း(တခြင်းလုံးမှ အစိတ်သားလောက်ရှိ) ကို ၈ ဒေါ်လာဆိုတော့ စျေးနည်းနည်းများသည်ထင်ပြီး မဝယ်ခဲ့။ ကိုယ့်ရှေ့တင်လှော်ပြီး အမှူန့်ကြိတ်ဖျော်ပေးသည့် ဘရာဇေးလ်ကော်ဖီက တခွက် ၂ ဒေါ်လာနှင့် ၂ ယောက်ဆိုတော့ ၂ ခွက်။ ခွက်က ၃ ငုံစာလောက်ပဲရှိသော်လည်း တန်သည်ဟုစိတ်တွင်ထင်၏။ အမေတို့ဘက် သွားရကောင်းမယ်တွေးပြီး အမေကြိုက်သည့် ခရမ်းသီးအဝိုင်းသီးကြီးတွေ ရှာ၏။ မတွေ့။ ပန်းဂေါ်ဇီ ရှာ၏။ မတွေ့။ မုန်လာဥအဖြူ ရှာ၏။ မတွေ့။ ရုံးပတီသီးတွေတော့ တွေ့၏။ အမေရိကန်ရုံးပတီ အသေးစားလေးတွေ။ လက်ညှိုးသာသာလေးတွေ။ အမေက ဗမာရုံးပတီ ဆင်စွယ်ဆိုသည့်အတောင့်ကြီးတွေ ပိုကြိုက်မှန်းသိတော့ မဝယ်ဖြစ်တော့။

ဆောင်းဝင်ပြီဆိုတော့ အသီးအနှံ တပိုင်တနိုင်စိုက်သည့် လယ်သမားတွေ သိတ်အလုပ်ဖြစ်တော့ပုံ မပေါ်တော့။ အသီးအနှံသည်တွေက နည်းပြီး လက်မှူပစ္စည်းသည်တွေ၊ Lotion တို့ Lip Balm တို့ အသားလှဆီတို့ရောင်းသူတွေ မနည်းလှ။ ကိုးရီးယားကင်မ်ချီရောင်းနေသည့် ငယ်ငယ်ရွယ်ရွယ်စုံတွဲတွင် ကောင်လေးကအဖြူ၊ မျက်လုံးပြာ ဆံပင်ရွှေရောင်။ ကောင်မလေးက ရုပ်ရှင်တွေထဲတွင် တွေ့ရလေ့သည့် ကိုးရီးယားမင်းသမီးရုပ်ကလေး။ နှစ်ယောက်လုံး ချောမောလှပသည့်အပြင် ငယ်ဂုဏ်လေးတွေနှင့် အပြုံးကိုယ်စီနှင့်။ ဖြစ်ချင်တော့ သူတို့နှင့်ကပ်လျက်မှာ စားပွဲခင်းရောင်းနေတာက Pie မုန့်သည်။ ကင်မ်ချီသည်ဆီက ချဉ်ဖတ်နံ့စူးစူးကို အတော် စိတ်အချဉ်ပေါက်နေဟန်ပေါ်သည့် Pie သည် အဖြူမက ကျနော်တို့ကို မုန့်အမြည်းလေးတွေ ဖဲ့ပေးရင်း ဟိုဘက်က အနံ့အတွက် ဆောရီးနော်ဟု ပြော၏။ သူ့အသံက ဟိုကင်မ်ချီ စုံတွဲကြားလောက်၏။ သို့သော် သူတို့ကလည်း မှူပုံမရ။ သူတို့စားပွဲရှေ့မလည်း ကင်မ်ချီဝယ်နေသူ လေးငါးဦးရှိ၏။

ပန်းသီးတွေ တောင်းလိုက် အပြည့်အမောက်ထည့်ကာ ရောင်းနေသည့်စုံတွဲက သူတို့ပန်းသီးတွေကို သူတို့ပြန် အလုံးလိုက် တဂွပ်ဂွပ်ကိုက်စားနေ၏။ ကြည့်ရသည့်မျာ အားရပါးရရှိလှ၏။ ကျနော့်တွေတော့ Hi ဆိုပြီး ပန်းသီးတတောင်းကို လက်ညှိုးထိုးပြရင်း ပလုပ်ပလောင်းနှင့် ဒီအသီးမျိုးက ယိုထိုးစားလည်းကောင်းတယ် ဒီအတိုင်းစားလည်းကောင်းတယ် Caramel and Chocolate အုပ်ပြီးစားလည်း ကောင်းတယ်ဟု စျေးခေါ်၏။ ကျေးဇူးတင်ပါတယ်ဟု အလိုက်သင့်ပြန်ပြောရင်း သူ့ဘေးက ခေါက်မုန့်သည်ဘက် မျက်စေ့ရောက်၏။

အမေရိကန်ခေါက်မုန့်ဟုဆိုရမည်ထင်၏။ ဂျုံနှစ်ရည်အပျစ်တွေကို ယောက်ချိုအသေးစားလေးနှင့် ခပ်ယူပြီး အောက်ကနေမီးအပူပေးထားသည့် သံကျွပ်ပြားအထူပေါ် ဖြန့်လောင်းချပြီး ယောက်ချိုဖင်ဖြင့် ဖြန့်၏။ ခေါက်မုန့်ဆန်နှစ်ရည် ဖြန့်နည်းကားအတိုင်း ယောက်ချိုလေးကို မွှေ့ကာမွှေ့ကာနှင့်။ ပြီးတော့ Parmesan Cheese အမှူန့်ကြမ်းတွေဖြူး၏။ ပျားရည်ထပ်ဆမ်း၏။ အနံ့အတွက် အမှူန့်လေးတွေဖြူး၏။ နောက်တော့ ဂေါ်ပြားလေးဖြင့် ခေါက်မုန့်ခေါက်သလို ကော်ကာ ထပ်ကနဲ ခေါက်လိုက်၏။ ဟိုဘက် ဒီဘက် ၂ ချက် သုံးချက် ဖတ်ကနဲဖတ်ကနဲလှည့်၏။ ပြီးတော့ ပန်းကန်လုံးပက်လက်ကြီးထဲက ထောပတ်ဆီတွေထဲနှစ်ထားသည့် ဆေးသုတ် Brush ကြီးကို ဇတ်ကနဲဆွဲယူကာ ပူနွေးနေသည့် ခေါက်မုန့်ပေါ် ရွှပ်ကနဲရွှပ်ကနဲ ဘယ်ပြန်ညာပြန် သုံးလေးချက်သုတ်ချလိုက်၏။ ထောပတ်နံ့ ထောင်းကနဲထလာ၏။ ပျားရည်နံ့ သင်းလာ၏။ ချီးစ်လေးတွေက ခေါက်မုန့်အပြင်ကို ပေါက်စီးယိုလာ၏။ တချပ်ဘယ်လောက်လဲဆိုတော့ ၅ ဒေါ်လာ။ ဇနီးက စားချင်ဝယ်လေဆိုသည့်အထာနှင့် ပိုက်ဆံအိပ်ထုတ်၏။ ဒါနှင့် တချပ်ဝယ်၏။ မတ်တပ်ပဲဆိုင်ရှေ့မှာ ရပ်စားမည်ဆိုတော့ တငုံစာ ကော်ဖီကြမ်းခွက်ကလေး ၂ ခွက်ပေး၏။ ကော်ဖီလေးကျိုက်လိုက် ခေါက်မုန့်လေး ဖဲ့ကာရွဲ့ကာ စားလိုက်နှင့် အရသာတော်တော်လေးလည်း တွေ့၏။

စျေးပေါက်ကထွက်တော့ ခွက်အကြီးကြီးတခွက်ကို လက်မှာပိုက်ထားသည့် စန်တာကလော့စ်ဝတ်စုံနှင့် အဖိုးအိုတယောက်ကိုတွေ့၏။ သူ့ရှေ့ထောင်ထားသည့် ဆိုင်းဘုတ်မှာက ကင်န်ဆာဝေဒနာသည် လးငယ်များအတွက် ရန်ပုံငွေဟုရေးထား၏။ သူ့ပါးစပ်ကလည်း သူတို့ပရဟိလုပ်ငန်းအကြောင်း တတွတ်တွတ်ရှင်းပြ လက်ကမ်းစာစောင်လေးလည်းဝေ လိပ်စာကဒ်ပြားလေးလည်းပေး၏။ ဒါနှင့် ၅ ဒေါ်လာ ဒါနပြုခဲ့ပြီးအပြင်လှမ်းအထွက် ထောင့်ချိုးကွေ့လေးမှာ ကောင်းကောင်းမွန်မွန် ဝတ်စားထားသည့် ရုပ်ရည်သန့်သန့်ပြန့် အမျိုးသီးကြီးတဦး၊ မိန်းမငယ် ၃ ယောက်။ လူရွယ် ၂ ယောက် ရပ်နေ၏။ လက်ထဲတွင်လည်း စာရွက်များ ဖိုင်များနှင့်အတူ Clip Board လေးတွေ ကိုယ်စီနှင့်။ သူတို့နောက်မှာက ပွဲတက်ဝတ်စုံပြည့်ဝတ်ထားသည့် လူချောလူလှတယောက်၏ Life Size ရုပ်ပုံကားတချပ် ထောင်ထား၏။ ကြည့်လိုက်တာနှင့် ဒါဘယ်သူမှန်း ကျနော်ရောဇနီးပါ တန်းသိ၏။

လက်ရှိ South Bend မြိ့ုတော်ဝန် Pete ။ သူက ၂ဝ၂ဝ သမတရွေးကောက်ပွဲတွင် ဒီမိုကရက်ပါတီမှ သမတလောင်းအဖြစ် ဝင်ပြိုင်မည့်သူ။ စစ်သားလူထွက်။ ဘွဲ့ရပညာတတ်။ Gay လိင်တူစုံမက်သူ။ အမျိုးသားချင်း တရားဝင်လက်ထပ်ထားသူ။ South Bend က ဖို့ဝိန်းလောက် Cultural Diversity မဖြစ်။ အိုင်းရစ်ရှ်လူမျိုး ရိုမင်ကက်သလစ်တွေများ၏။ Notre Dame တက္ကသိုလ်ပင်ရှိ၏။ ကက်သလစ်ဘာသာဝင်တို့ ထုံးစံအတိုင်း လိင်တူဆက်ဆံခြင်း ကိုယ်ဝန်ဖျက်ချခြင်း တားဆေးစားခြင်း စသည်တို့ကို တင်းတင်းကျပ်ကျပ်တားမြစ်၏။ ဘာသာရေးကို ဖိဖိစီးစီးလုပ်၏။

ဒီလိုမြိ့ု ဒိလိုလူတွေ အနေများသည့်မြိ့ုမှာ သူက မြိ့ုတော်ဝန်ဆိုတော့ အလွန်ထူးဆန်း၏။ ပို၍ထူးဆန်းသည်မှာ သူ့မြိ့ုသူမြိ့ုသားများက သူတို့ စုံတွဲကို ချစ်ကြခင်ကြ၏။ လိင်တူချင်းလက်ထပ်ထားသူမို့ဆိုပြီး အပြစ်ပြောသံမကြားရ။ မကြားရသည့်အပြင် ခုသူတို့မြိ့ုက သမတလောင်းထွက်သည်ဆိုပြီး မြိ့ုသားတွေက ဂုဏ်ယူနေကြ၏။ ခု ဒီလူစုလေးက သူ့အတွက် မဲလာဆွယ်နေကြခြင်းပင်။

ကျနော်တို့ရှေ့ကဖြတ်တော့ ဒီမိုကရက်ထောက်ခံသူတွေပါလားရှင်ဟု မွန်မွန်ရည်ရည်မေး၏။ ဇနီးက ငါတို့ စိတ်ဝင်စားပါတယ်ဟု ပြန်ဖြေ၏။ ရွေးကောက်ပွဲမှာ မဲပေးဖို့ ရီဂျစ္စတာလုပ်ထားပါသလားခင်ဗျားဟု လူရွယ်ကမေး၏။ ကျနော်က လုပ်ထားပြီးပါပြီဆိုတော့ ဟိုအမျိုးသမီးကြီးက Pete ပုံကိုလက်ညှိုးထိုးပြကာ ကျမတို့ရဲ့ ကိုလူချောကို သိပါသလားဟုဆို၏။ သိပါတယ်ဆိုတော့ ကောင်းပါလေ့ရှင်။ ဒါဆို ကျမတို့ ဒီနေ့ ဒီနေရာမှာ လာပြီး မဲဆန္ဒရှင်တွေကို မဲပေးဖို့မှတ်ပုံတင်နိုင်ရေးအတွက် လာအသိပေးလှူံ့ဆော်သွားကြောင်းလေး အသိအမှတ်ပြုပေးပါလားရှင် ဆိုကာ Clip Board လေးထိုးေ၏။ ဒါနှင့် ယူပြီး ဖြည့်ရမည့်နေရာလေးတွေဖြည့် လက်မှတ်ထိုးကာ ပြန်ပေးလိုက်၏။

မဲကတော့ ကြိုက်တဲ့လူပေးပါရှင့် ကျမတို့ ကိုလူချော သမတဖြစ်ခဲ့ရင်တော့ ပေးတဲ့ဂတိတွေ တည်မယ်ဆိုတာတော့ ယုံကြည်ပါရှင့်ဆိုပြီး ကျေးဇူးတင်စကားများ ရွှမ်းရွှမ်းဝေအောင်ပြော၏။ 

ကျေးဇူးတင်ကြောင်းပြန်ပြောရင်း စိတ်ထဲမေးချင်တာတခုပေါ်လာ၏။ တခုမေးချင်လို့ပါ။ မမေးကောင်းဘူးဆိုတာတော့ သိပါတယ်။ ဒါပေမယ့် သိချင်လို့ပါ။ မဖြေချင်လည်း မဖြေပါနဲ့ဟုစကားခံတော့ ရပါတယ်မေးပါဟုပြော၏။ ခင်ဗျားတို့က ကက်သလစ်ဘာသာဝင်တွေလားခင်ဗျဆိုတော့ ဟုတ်ပါတယ်ရှင် အားလုံက ကက်သလစ်ဘာသာဝင် အိုင်းရစ်ရှ်နွယ်တွေပါဟုပြန်ဖြေ၏။ ဇနီးက ငါလည်း အိုင်းရစ်ရှ်၊ ကက်သလစ်ပဲ ဟုပြန်ပြောရင်း ပြုံးပြ၏။ နောက်တော့ ကျနော်တို့လည်း နှူတ်ဆက်ရင်း ဆောင်းအအေးကြီးထဲဖြတ်ကာ ကားဆီပြန်ရောက်၏။ ဇနီးက နင်က ဘာလို့သွားမေးရတာလဲဟု မြည်တွန်သယောင်ပြု၏။ သိချင်လို့ပါဟာ ဘာမှမဟုတ်ဘူးဟု ခတ်ပေါ့ပေါ့ ပြန်ဖြေတော့ မျက်စောင်းခဲ၏။

အမေရိကန်တွင် လူတယောက်အား ဘာ ဘာသာကိုးကွယ်လဲဟု သွားမေးမိ၍ ထိုအမေးခံရသူမှ မကျေနပ်ပါက ရဲခေါ်တိုင်ပြီး အမှူရှာလို့ရသည်မဟုတ်လား။
မျိုးမြင့်ချို
နိုဝင္ဘာ ၁၆၊ ၂ဝ၁၉