(ကာကွယ်ချင်ရင် ထွက်ကြပါ)

(ကာကွယ်ချင်ရင် ထွက်ကြပါ)
စစ်ခေါင်းဆောင်တွေနဲ့ အစိုးရခေါင်းဆောင်တွေကို သူတို့ကျူးလွန်ခဲ့တဲ့ ပူးပေါင်းကြံစည်ခဲ့တာတွေအတွက် တရားစွဲတဲ့ကိစ္စမှာ နိုင်ငံ/လူမျိုးက ဘာကိစ္စ သိက္ခာကျရပါသလဲ။ ဒီလူတွေဟာ တိုင်းပြည်ခေါင်းဆောင်တွေ လူထုခေါင်းဆောင်တွေမို့ဆိုရင်တော့ တမျိုးပေါ့။ တကယ့်လူထုခေါင်းဆောင် တိုင်းပြည်ခေါင်းဆောင်တွေဆိုရင်တော့လည်း ဒီလိုရာဇဝတ်မှူကြီးတွေ ကျူးလွန်ဖို့ဆိုတာ စိတ်တောင် မကူးကြဘူးမှတ်တာပါပဲ။

ဒေါ်အောင်ဆန်းစုကြည်ဟာ တချိန်က လူထုခေါင်းဆောင်ဖြစ်ခဲ့ဖူးတာမှန်ပေမယ့် လက်ရှိမှာ နိုင်ငံရေးသမား၊ ပါတီခေါင်းဆောင်နဲ့ အစိုးရအဖွဲ့ဝင်ဖြစ်တယ်။ ဒီ့ထက် ဘာမှမပိုဘူး။ မင်းအောင်လှိူင်အပါအဝင် ဘယ်စစ်ဗိုလ်ကများရော နိုင်ငံ့ခေါင်းဆောင်ဖြစ်ဖူးပါသလဲ။ နေဝင်း၊ စောမောင်၊ သန်းရွှေကနေ မင်းအောင်လှိူင်အထိဟာ စစ်ခေါင်းဆောင်တွေဖြစ်ရုံတင်မက စစ်အာဏာရှင်တွေပါဖြစ်တယ်။ နေဝင်းက သူ့ကိုယ်သူဥက္ကဌကြီးဘယ်လိုတပ်တပ် သန်းရွှေက သူ့ကိုယ်သူ နိုင်ငံတော်အကြီးအကဲ ဘယ်လိုပြောပြော စစ်ခါင်းဆောင်/စစ်အာဏာရှင်တွေမျှသာပဲ။

ဒီ စစ်ခေါင်းဆောင်တွေ အစိုးရခေါင်းဆောင်တွေကို သူတို့ရဲ့ လူမဆန်တဲ့ရာဇဝတ်မှူတွေအတွက် ကမ္ဘာ့မိသားစုကြီးက တရားပဲစီရင်စီရင်၊ ပြစ်ဒဏ်ပဲပဲပေးပေး ကျနော်တို့ပြည်သူတွေအနေနဲ့ ကျေနပ်ဝမ်းသာရှိရမှာပါ။ သူတို့ရာဇဝတ်မှူတွေကို ကျနော်တို့ကမှ မစီရင်နိုင်တာပဲ။ ခုလည်း တရားစွဲဆိုမှူတွေက ဘယ်အတိုင်းအထာထိရှိမယ်မရှိဘူး၊ သက်ရောက်မယ်မရောက်ဘူးသာ မပြောတတ်ပေမယ့် ပြည်သူတွေရင်ထဲ ကျောသားရင်သားမခွဲခြားပဲ တခုခုအရေးယူမယ်ဆို နှစ်ထောင်းအားရှိကြမှာပဲ။

တကယ်လို့ အရေးယူလာခဲ့ရင်လည်း ဒါဟာ ဗမာပြည်ကိုအရေးယူတာမဟုတ်၊ တိုင်းပြည်နဲ့လူထုကို ပြစ်ဒဏ်ခတ်တာမဟုတ်လို့ တိုင်းပြည်နဲ့လူထုအတွက် ဘာမှ သိက္ခာကျစရာ အရှက်ရစရာမရှိပါ။ စီးပွားရေးအရ ပစ်မှတ်ထား ဒဏ်ခတ်ပိတ်ဆို့တာ၊ ကုန်သွယ်ရေး အထူးအခွန်ကင်းလွတ်ခွင့်တွေ ပြန်ရုပ်သိမ်းတာတွေ လုပ်ခဲ့တယ်ဆိုရင်တောင် ဒါဟာ အဲ့ဒီအစိုးရခေါင်းဆောင် စစ်ခေါင်းတွေအတွက် အထိနာစေဖို့ပါ။ ဖမ်းဝရမ်းထုတ်တာတို့ဘာတို့ လုပ်လာခဲ့လို့ ဒီလူတွေ ပြည်ပမထွက်ရဲပဲ ပြည်တွင်းမှာ တိမ်းရှောင်ပုန်းအောင်းနေရင်တောင် ကျနော်တို့ ပြည်သူတွေက ဝိုင်းဝန်းပြီး လက်ရဖမ်းပေးရမှာပါ။ ဖမ်းမိဖို့ ကိုယ်ထိလက်ရောက် ကူညီရမှာပါ။ ဒါတွေက ဖြစ်လာလိမ့်မယ်လို့ မယူဆသော်လည်း ဆယ်ရေးတရေး ကိုးရေးတရာဆိုပြီး အတွေးဆန့်ကြည့်တာပါ။

ပြည်သူတွေအနေနဲ့ တိုင်းပြည်ခေါင်းဆောင် လူထုခေါင်းဆောင်ဆိုတာနဲ့ အစိုးရခေါင်းဆောင် စစ်ခေါင်းဆောင်ဆိုတာကို ကွဲကွဲပြားပြားရှိဖို့လိုပါလိမ့်မယ့်။ အချင်းချင်းလည်း ဆွေးနွေးပြောဆိုရမယ်ထင်ပါတယ်။ ဒီလူတွေ ရိုဟင်ဂျာလူမျိုးတွေနဲ့ (တိုင်းရင်းသား)လူမျိုးစုတွေအပေါ် ဆယ်စုနှစ်ပေါင်းများစွာ အနိုင်ကျင့် ညှဉ်းဆဲသတ်ဖြတ် လူမဆန်တဲ့ရာဇဝတ်မှူတွေကျူးလွန်ခဲ့တာအတွက် ဒီနေ့ဒီအချိန်ကျမှ နိုင်ငံတကာတရားရုံးတင် တရားစွဲခံရတာပါ။

ဒါမှ တိုင်းပြည်နဲ့လူမျိုးသိက္ခာကျတယ်တို့ ရှက်လှချည်ရဲ့တိုဆို အတိအလင်း ထွက်ပြောပါ။ ဒီ့ထက်ပိုရင် ဒီလူတွေအတွက် ရှေ့ကနေ မားမားမတ်မတ် ရပ်တည်ကာကွယ်ပါ။ ဒီလူတွေအတွက် အသက်ပါပေးချင် ပေးလို့ရပါတယ်။ ဒါပေမယ့် တိုင်းပြည်နဲ့လူမျိုးအတွက် ခံပြင်းတယ်တို့ နာကျည်းတယ်တို့ ခံရခက်တယ်တို့ဆိုပြီး ကြောင်သူတော်ဆန်ဆန် စကားလုံးတွေနဲ့ ကိုယ့်ကိုယ်ကိုယ် ကာကွယ်လို့ရဦးတောင် အခြားသူတွေကိတော့ လှည့်ဖျားလို့မရနိုင်ပါ။

နိုင်ငံရေးအာဏာတို့ ကျော်စောကိတ္တမရှိမှူတို့ အောင်မြင်မှူတို့ဆိုတာ ယာယီကိစ္စတွေပါ။ မမြဲပါ။ လူသေရင် ပြီးသွားပါတယ်။ လူသားတယောက်ရဲ့သီလ သမာဓိ တည်ကြည်မှူ လူသားဆန်မှူ လူ့ဂုဏ်သိက္ခာ လူကျင့်တရား နိုင်ငံရေးစာရိတ္တ နိုင်ငံရေးစရဏ နိုင်ငံရေးကိုယ်ကျင့်တရား စတာတွေကတော့ လူသေပေမယ့် ပြီးမသွားပါ။ သမိုင်းမှာ တွင်ကျန် တင်ကျန်ခဲ့ပါတယ်။ နှောင်းလူတွေ နောက်မျိုးဆက်တွေအတွက် စံပြုစရာ နမူနာထားစရာ အတုယူဖွယ်ရာတွေအဖြစ် ကျန်ခဲ့ပါတယ်။
မျိုးမြင့်ချို
နိုဝင္ဘာ ၁၅၊ ၂ဝ၁၉