(ျမက္ဋီကာ)

(ျမက္ဋီကာ)
လွန်ခဲ့တဲ့ ၂ ပတ်ကျော်က အပျင်းတက်တာရော အလုပ်များတာရော အိမ်ခေါင်မိုး မိုးတဲ့ကုမ္ပဏီက လာမိုးနေတာတွေကြောင့်ရော အားလုံးပေါင်းပြီး အိမ်ရှေ့အိမ်နောက် ဘယ်နေရာမှ မြက်မရိပ်လိုက်ဘူး။ ဒီကြားထဲ ဟိုးတမြန်နေ့တွေဆီက နှင်းဦးက တမနက်ခင်းထဲ ၄ လက်မလောက်ကျပစ်လိုက်တော့ ရေတွေခဲ မြက်တွေနှင်းပိပြီး ဘာမှလုပ်မရတော့ပြန်ဘူး။ မနေ့ကတော့ အေးပေမယ့် နှင်းမကျဘူး။ ကျထားတဲ့နှင်းတွေလည်း ပျော်လို့ကုန်ပြီ။ နည်းနည်းလေးလည်း အအေးပေါ့တယ် မြက်တွေလည်း ပြန်ပေါ်လာတယ်။ မြက်တွေပေါ်တော့ ကြက်တွေပျော်ပြီး အစာစိမ်း ဝဝလင်လင်စားကြရတယ်။ မြေကြီးကို ဂျိုင်းထောက်နဲ့ ထိုးစမ်းကြည့်တော့လည်း မြေက ပျော့မနေဘူး။ အောက်ကနေ တင်းခံနေတယ်။ လမ်းလျှောက်တော့လည်း ဂျိုင်းထောက်မကျွံဘူး။ သဘောက မြက်ရိပ်မယ်ဆို ရိပ်လို့ရပြီ။ မြက်ရိပ်စက် ဘီးတွေ ယက်ကန်ယက်ကန်ဖြစ်စရာမရှိဘူး။

အိမ်ရှေ့ဘက်ကြည့်လိုက်တော့ နှင်းအပျော်မှာ ကျန်ရစ်တဲ့မြက်တွေက ထိုးထိုးထောင်ထောင်နဲ့ ၄လေးငါးလက်မလောက်ဖြစ်နေပြီ။ ဒီကြားထဲ ဟိုဘက်ဘေးအိမ်ရှေ့ သစ်ပင်ကြီးတွေက ခြွေချလို့ကျလာတဲ့ သစ်ရွက်ခြောက်တွေကလည်း မြက်တွေနဲ့ရောပြီး မြင်မကောင်းဘူး။ အတော်လေး အကျည်းတန်နေတယ်။ ကျနော်တို့က မြိ့ုပြင်မှာနေတာဆိုတော့ တော်ရံတန်ရုံမြက်ရှည်နေလို့လည်း ဘယ်စည်ပင်ကမှ မြက်ရှည်နေပြီ ရိပ်ပါတော့လို့ စာလာမကပ်ပါဘူး။ ကိုယ့်ဘာသာ အမြင်မတော်မှ ကိုယ့်ခြံဝင်းလေး သပ်ရပ်နေစေချင်လို့မှ ထထက်ရိပ်ကြတာမျိုးပါ။ စာမကပ်ပေမယ်လို့ ရပါတယ်ကွာဆိုပြီး ဘယ်သူကမှတော့ အရှည်မခံပါဘူး။ Standard သဘောသတ်မှတ်ထားတဲ့ ၃ လက်မလောက်ဖြစ်နေအောင်တော့ ကိုယ့်အသိနဲ့ကိုယ်ရိပ်ကြတာပါ။ ကျနော်တို့ဆို နွေအခါမယ် အိမ်ရှေ့မြက်ကို ၉ ရက်ဆို တခါရိပ်တာပါတယ်။ ရိပ်ပြီးတာနဲ့ မြက်အားတိုးဆေးဖြန်းပြီး ၃ နာရီလောက် ရေပန်းတွေလွှတ်ပေးထားလိုက်တာပါ။ ဒါဆို ပြန်တက်လာတဲ့မြက်က အရောင်စိမ်းစိုရုံမက မြက်သားပါထူပြီး မြေကြီးပိတ်နေတာပါ။ မြေပေါ်နေရင် ကွက်ပြီး ကြည့်မလှသလို ဖုန်လည်း ထတတ်တယ်မဟုတ်လား။ ပိုဆိုးတာက ကြက်တွေ။ နောက်ဘက်ပိုင်းမှာနေကြပေမယ့် တခါတလေ ခြေရှည်တဲ့ကြက်တချို့က အိမ်ရှေ့ဘက်ထွက်လာပြီး မြက်ကြားက ပိုးကောင်မွှားကောင်လေးတွေ ရှာရှက်စားရင်း မြေပေါ်နေတာလေးများတွေ့လို့ကတော့ ပွဲတော်ပဲ။ အငမ်းမရ ယက်တော့တာပဲ။ အောက်ကများ တီကောင်လေးဘာလေး ထွက်လာလို့ကတော့ အချိုရှာ သကာတွေ့ပေါ့။ ဘာပြောကောင်းမလဲ။ ဒါ့ကြောင့် မြေမေပါ်အောင် မြက်သားထူပြီးပိတ်နေအောင် လုပ်ရပါတယ်။

မြိ့ုတွင်းအိမ်တွေတော့ မြက်က ၄ လက်မကျော်လောက်ရှိသွားတယ်ဆိုရင်ပဲ စည်ပင်က မျက်စောင်းထိုးပြီး၊ ရပ်ကွက်စုက ကွက်ကြည့်ကွက်ကြည့်လုပ်ပြီ။ ၆ လက်မလောက် ဖြစ်ပြီဆိုလို့ကတော့ စာလာကပ်ပြီ၊ ရိပ်တော့ဆိုပြီး။ ၂ ရက်လောက်စောင့်ကြည့်ပြီးမှ အိမ်ရှင်က မရိပ်ရင် သူတို့ဘာသာ စက်တွေ မချလာပြီး တထိုင်တည်း အပြီးရိပ်သွားပေးတယ်။ ပြီးရင် စာလေးပါ ချသွားတယ်။ ရိပ်ခဘယ်လောက်ဆိုပြီး။ အနည်းဆုံးတော့ ဒေါ်လာ သုံးဆယ်လောက်တော့ ကိစ္စချောတာပဲ။

ဒါနဲ့ ရာသီဥတုသတင်းကြည့်တော့ ဒီနေ့ မနက်ဖြန်နေ့တွေမှာ အပူချိန်က ၄၅ ဒီဂရီဖါရင်ဟိုက်လောက်ရှိမတဲ့။ အေးတော့ အေးပေမယ့် မြက်ရိပ်မယ်ဆို ရိပ်လို့ကောင်းတဲ့အနေအထားပဲ။ ဒါနဲ့ ဂိုဒေါင်ထဲသွားပြီး မြက်ရိပ်စက်က ဓာတ်ဆီအခြေအနေကြည့်တော့ တခြံလုံးရိပ်မလောက်ဘူး။ ဆီနည်းနေတယ်။ ကယ်ရင်ရေ နင်အလုပ်မသွားခင် ဓာတ်ဆီ ၂ ဂါလန်လောက်ဝယ်ပေးခဲ့လေ၊ ငါ ဒီနေ့ အားတဲ့အချိန် ခြံထဲဆင်းမြက်ရိပ်လိုက်မယ်ဆိုတော့ မျက်လုံးတချက်လှန်ကြည့်ပြီး အပြင်ကိုလည်း တချက်ဝေ့ဝိုက်ပြီးကြည်တယ်။ အေးတော့အေးနေတုန်းပဲ၊ မြေကတော့ မာနေပါပြီ၊ မြက်လည်း ရှည်တော့နေပြီ၊ နင်ရိပ်ချင်လည်း ရိပ်လေ၊ နွေးနွေးထွေးထွေး ဝတ်ထားပေါ့ပြောပြီး ဓာတ်ဆီသွားဝယ်တယ်။ သူ အပြင်ထွက်တုန်း ကျနော်က ပေါင်းအိုးထဲ ဆန်ထည့်ပြီး ထမင်းတအိုးချက်တယ်။ ဟင်းကတော့ ညီမပေးထားတဲ့ ပဲပြုပ်နဲ့အမဲကြော်ရှိတယ်။ ဟိုတလောက ဗမာပြည်လူကြုံတွေ လက်ဆောင်ပေးခဲ့တဲ့ ပုဇွန်ငါးပိထောင်းရှိတယ်။ ဟိုနေ့က ကညွှတ်ကြော် လက်ကျန်လည်း ရှိတယ်။ မိန်းမလက်ရာ ပြင်သစ်အာလူးစွပ်ပြုပ် Potato Soup လည်းရှိတယ်။ ဘာမှ ပူနေစရာမလိုဘူး။ အကုန် စားကောင်းတဲ့ဟာချည်းပဲ။ စားလို့ရတဲ့ဟာချည်းပဲ။

ထမင်းမကျက်ခင်ပဲ ဇနီးပြန်ရောက်တယ်။ ဓာတ်ဆီအပြင် ခွေးလေးတွေအတွက် နှလုံးမှာသန်ကောင်မတွယ်အောင် ၆ လတကြိမ်ကျွေးရတဲ့ ပဋိဇီဝ ကာကွယ်ဆေးလည်း ထုတ်လာခဲ့တယ်။ ပြက္ခဒိန်ကြည့်တော့မှ ဟုတ်သားပဲ မနေ့က ၆ လပြည့်တာ ငါမေ့တောင်နေတယ်ဟဆိုတော့ သူက နင် နေ့လည်လောက်ကျရင် Peanut Butter လေးအုံပြီး တကောင်တလုံးစီကျွေးလိုက်နော်တဲ့။ ပြောပြီး ထမင်းဗူးပြင်တယ်။ ကျနော်လည်း ရှိတာတွေချပေးတော့ နင့်အမေလုပ်တဲ့သရက်သီးသနပ်နဲ့ နင်ညီမပေးတဲ့ အမဲသားကြော်ထည့်ယူသွားမယ်ပြောပြီး ထည့်ယူသွားလေရဲ့။
ကဲ ကျနော်လည်း စက်ထဲ ဓာတ်ဆီဖြည့်လိုက်ဦးမယ်။
မျိုးမြင့်ချို
နိုဝင္ဘာ ၁၉၊ ၂ဝ၁၉