တော်လှန်ရေး နယ်မြေအနှံ့အပြား
လှုပ်ရှားခဲ့တဲ့ ခေါင်းဆောင်ရဲဘော်အောင်
(ဗတိုးရှိန်- မုံရွာ)
အရေးတော်ပုံ အတွဲ(၂) အမှတ်(၅)
ဗမာပြည်ကွန်မြူနစ်ပါတီ ဝဘ်ဆိုက်မှ။
ကျွန်တော်တို့ တော်လှန်ရေးထဲ မရောက်မီကပင် ရဲဘော်အောင် (ခေါ် ) ဗိုလ်မျိုးမြင့်ကို ကြားဖူး သိဖူးနေတယ်၊ အကြောင်းက ထောင်ထွက် တော်လှန်ရေးသမားဟောင်းများနဲ့ ခင်မင်သိကျွမ်းစဉ် ပြောပြကြလို့ ဖြစ်တယ်။ အသားမဲ မျိုးမြင့် ဆိုတဲ့ ဝိသေသနဲ့လည်း လူသိများတယ်။
ရဲဘော်အောင်ဟာ ပြည်သူ့ ဒီမိုကရေစီလက်နက်ကိုင်တော်လှန်ရေး စတင်ခဲ့တဲ့ ၁၉၄၈ မှာ ကတည်းက ဗမာပြည်ကွန်မြူနစ်ပါတီရဲ့ ဗဟိုက်ေမတီဝင် ဝါရင့်ခေါင်းဆောင်တဦးပါ၊ သူ့အသက်နဲ့တွက်ကြည့်ရင် အသက် ၂၀ ကျော်အရွယ်မှာ ပါတီဗဟိုကော်မတီဝင် ဖြစ်ခဲ့တယ်။ ၁၉၇၅ ခုနှစ်မှာ ပါတီဗဟိုကော်မတီ နိုင်ငံရေးဦးဆောင်အဖွဲ့ဝင် ဖြစ်တယ်။ သူ့မှတ်စုမှတ်တမ်းမှာ သူဟာ ၁၉၄၃ ခုနှစ်မှာ ကွန်မြူနစ်ပါတီဝင်ဖြစ်ခဲ့တယ်လို့ မှတ်သားထားတာ တွေ့ရပါတယ်။ မင်္ဂလာဒုံ ဗိုလ်သင်တန်း ဒုတိယပတ်ကျောင်းဆင်းဖြစ်တယ်၊ စံပြတပ်မှာ ဖက်ဆစ်တော်လှန်ရေးအတွက် တနယ်ထည်းသား ရဲဘော်သုံးကျိပ်ဝင် ဗိုလ်မှူးဘုန်းမြင့် အပါအဝင်၊ ဗိုလ်ဘိုကြည်၊ ဗိုလ်ကျော်ဇောလေး(ရခိုင်)နဲ့ ရဲဘော်အောင်တို့ လေးဦး ကွန်မြူနစ်ပါတီရဲ့ ကလာပ်စည်းတခု လျှို့ဝှက်ဖွဲ့စည်း အလုပ်လုပ်တယ်လို့ ရေးထားတာ တွေ့ရတယ်။ စက်ကြီးတပ်ဖွဲ့မှာ တာဝန်ယူရတယ်၊ မုံရွာက ဗိုလ်ဖြိုးလည်း စက်ကြီးတပ်မှာ ရောက်လာတယ်။ စစ်ရုံးချုပ်မှ ဗိုလ်ချုပ်အောင်ဆန်းအစီအစဉ်အရ သခင်စံဝေနဲ့အတူ မော်လမြိုင်ခရိုင်နဲ့ သထုံခရိုင်ကို စစ်သားစုဆောင်းရေး သွားရတယ်။ သထုံခရိုင် ခရိုင်အရေးပိုင် သခင်လင်းနဲ့တွေ့၊ သခင်လင်းဟာ ခိုင်မာတဲ့ ဖက်ဆစ်တော်လှန်ရေး သဘောထားရှိ။ စစ်သားစုဆောင်းရေးမှာ သခင်သင်းလှိုင်၊ သခင်ချန်ထွန်း(မော်လမြိုင်) တို့က အတူလိုက် ဆောင်ရွက်ပေးကြတယ်။ ကျိုက္ခမီ၊ မုဒုံ၊ ချောင်းဆုံ မြို့တွေမှာ တရားပွဲလုပ်၊ တပ်ထဲဝင်ဖို့ တရားဟောရတာ အဓိကပါတဲ့။ တော်လှန်ရေး အစလောက်မှာ သခင်လင်းကို ဖက်ဆစ်ဂျပန်တို့ ဖမ်းဆီး သတ်ဖြတ်တဲ့သတင်းကြားရလို့ စိတ်ထိခိုက်ရပုံလည်း ရေးထားတယ်။
ကျွန်တော်တို့ ၀နယ် ပန်ဆန်း ရောက်စအချိန်က တရက်မှာ ဌာနတွင်းရှိ ရဲဘော်တချို့ ဖက်ဆစ်တော်လှန်ရေး အထူးထုတ်စာစောင်မှာ ရွှေတိဂုံပစ္စယံ ဗိုလ်ချုပ်အောင်ဆန်း မိန့်ခွန်းပြောနေတဲ့ပုံနဲ့ ဘေးနားကရုပ်ပုံများ ဝိုင်းကြည့်နေကြတယ်။ ဘာများထူးဆန်းနေသလဲလို့ ကျွန်တော်မေးကြည့်တော့ ဒီပုံတွေထဲ ရဲဘော်အောင်ပုံ ပါလို့ ဝိုင်းကြည့်နေကြတာတဲ့၊ ဟုတ်လား ဆိုပြီး ကျွန်တော်ပါ ဝင်ကြည့်မိတယ်၊ ရုပ်ပုံပါတဲ့ကိစ္စ ထားပါတော့၊ ထိုစဉ်က ရဲဘော်အောင်က တပ်မတော်ထဲရှိ ပါတီဝင်ဆိုတော့ ဗိုလ်ချုပ်အောင်ဆန်းနဲ့ နီနီးကပ်ကပ် နေခဲ့ရပုံရတယ်လို့ ကျွန်တော် ဂရုပြုလိုက်မိတယ်။ ရဲဘော်အောင် မှတ်တမ်းတွေက သမိုင်းဝင်၊ ဗမာပြည် ဖက်ဆစ်ဂျပန်တော်လှန်ရေး အခိုင်အမာအချက်အလက်တွေ ဖြစ်တယ်။ နောက်မျိုးဆက်တွေ လေ့လာနိုင်အောင် အချက်အလက် အနည်းငယ် ထုတ်နုတ် တင်ပြပါမယ်။
“ ရဲဘော်အောင် မှတ်တမ်းမှာ ဝင်ဆာလေ့ကျင့်ရေးစခန်းမှာ ပြန်ဆုံကြတာ ဗိုလ်သိန်းတန်၊ ဗိုလ်ဘိုကြည်၊ ဗိုလ်သန်းရွှေ၊ ဗိုလ်ကျော်ဇံနဲ့ ဗိုလ်မျိုးမြင့်ခေါ် ရဲဘော်အောင်တို့ ငါးဦး ကလာပ်စည်းသဘော အချို့ညတွေမှာ လျှို့ဝှက်ဆွေးနွေး၊ ဗိုလ်ချုပ်အောင်ဆန်း ခွင့်ပြုချက်နဲ့ လေ့ကျင့်ရေးတပ်မှာ ဆွေးနွေးပညာပေးရေးများ လုပ်တယ် ” တဲ့။ တပ်က ဗိုလ်ချုပ်က ကိုင်ထားတဲ့တပ်ဆိုတော့ ဗိုလ်ချုပ် သဘောတူ ခွင့်ပြုချက်က အရေးကြီးပါတယ်။ လေ့ကျင့်ရေးမှာ ရဲဘော်အောင်က ခွဲ(၃) တာဝန်ယူ၊ ခွဲ(၄)ကို ဗိုလ်အေး တာဝန်ယူတယ်။ ဗိုလ်အေး (လက်ပံတန်း) လည်း ပါတီဝင်တဲ့။ တပ်ထဲမှာ ဗိုလ်အေးက နာမည်ကြီး။ လူမှာ ဗိုလ်အေး၊ မြင်းမှာ မဲလေး လို့ နာမည်ရတယ်၊ နောက်ပိုင်း တိုင်း(၄) က ဖက်ဆစ်ဂျပန်တော်လှန်ရေးမှာ ဗိုလ်အေး ကျဆုံးသွားတယ်ဆိုတာ မှတ်ထားတယ်။
ပါတီရဲ့ ကြိုးပမ်းမှု၊ ကရင်တပ်ရင်း တရင်း ဝင်ဆာလမ်းထဲ ရောက်လာပုံ၊ ဗိုလ်ချုပ်လည်းသဘောတူ၊ ကရင်တပ် ရင်းမှူးဟာ ဗိုလ်စောထွန်းစိန်၊ နောက် ဗိုလ်မန်းအောင်မြိုင်၊ ဗိုလ်စက်ကရီးတို့သာ မှတ်မိတော့တယ်တဲ့။ ဗိုလ်ကျော်ဇံနဲ့ ရဲဘော်အောင်ကို တပ်ရင်း အကြံပေးအဖြစ် စစ်ရုံးချုပ်က တာဝန်ပေးထား၊ ဒီတပ် ကရင်တပ်မှူးများဟာ ပညာတတ်များတယ်။ ဆွေးနွေး ညှိနိုင်းရတာကောင်း၊ ရင်းနှီးမှုလည်းရ၊ သင်တန်းကို ကြိုးစားကြတယ်။ တပ်မှူးများ နိုင်ငံရေးပညာပေးတာ ခံယူမှု ကောင်းကြ။ ဒီတပ်က တော်လှန်ရေးဖြစ်ချိန် မြစ်၀ကျွန်းပေါ်မှာ ဖက်ဆစ်ဂျပန်တိုက်ကြတယ်- တဲ့။ ဒီ အချက်က ဖက်ဆစ်တော်လှန်ရေးမှာ တိုင်းရင်းသား တော်လှန်ရေး အင်အားစုတွေ အတူလက်တွဲတိုက်ခဲ့တယ်ဆိုတဲ့ သမိုင်းတခုလို့ မှတ်ယူနိုင်တယ်။ နောက် ဝင်ဆာလမ်းကနေ ကျိုက္ကလို့ စခန်းရောက်၊ လေ့ကျင့်ရေးတပ်ရင်းဖြစ်လာ၊ တပ်ရင်းမှူး ဗိုလ်မှူးလွန်းတင် (ဒီချုပ် အမှုဆောင်ဟောင်း-ကွယ်လွန်) ရဲဘော်အောင်က သင်တန်း ဆရာဖြစ်လာ၊ တပ်ကို စစ်ရေးအရသာ မဟုတ်၊ နိုင်ငံရေးအရ တည်ဆောက်ကြရတယ်လို့ ရဲဘော်အောင်မှတ်တမ်းက ဆိုတယ်။ နောက် သာယာ၀တီရောက်ချိန် အင်စပက်တော် သခင်ဖေအောင်ထံသွား၊ သူနဲ့ သူ့ဇနီးတို့ ဖက်ဆစ်တော်လှန်ရေး ပြင်ဆင်မှုများ လုပ်နေကြ၊ သခင်ဖေအောင်ဆိုတာ ရန်ကုန်ရှိ သခင်သန်းထွန်းတို့နဲ့ ဆက်သွယ်၊ ဖက်ဆစ်တော်လှန်ရေးအတွက် လုပ်နေတယ်၊ သခင်ခင်အောင်ရဲ့ ညီလည်းဖြစ်တယ်တဲ့။ မင်းလှစည်သူ တိုင်း(၁) ရဲ့ တပ်မှူးကြီးအဖြစ် ဗိုလ်ချုပ် တာဝန်ယူတယ်၊ နိုင်ငံရေးမှူးအဖြစ် သခင်ဗဟိန်းက နာမည်ခံတယ်။ မင်းလှစည်သူတိုင်းရဲ့ လက်တွေ့လုပ်ငန်းများ ဗိုလ်မှူးလွန်းတင်နဲ့ တွဲဘက်အဖြစ် ဗိုလ်သန်းရွှေက တာဝန်ယူတယ်။ ဗိုလ်ချစ်မြိုင်နဲ့ တပ်က ဇီးကုန်းဘက်မှာ၊ ဗိုလ်မောင်မောင်က ပြည်ဘက်မှာ။ တိုင်း(၁) တိုင်းမှူး ဗိုလ်မောင်မောင် မဟုတ်ပါ။
မင်းလှစည်သူ တပ်ရင်းအောက်မှာ ဗိုလ်ထွန်းလှဦးစီးတဲ့ ဗိုလ်လောင်းတပ်ခွဲ၊ ရဲဘော်အောင်တို့ တပ်ခွဲနဲ့ ရုံးအဖွဲ့ရှိ တယ်။ ဗိုလ်ဗဟိန်း၊ ဗိုလ်ညွှန့်မောင်၊ ဗိုလ်လှရွှေလေးတို့ ဦးစီးတဲ့တပ်ခွဲ သာယာ၀တီကိုရောက်လာလို့ ရွာတွေဘက် နေရာချထားလိုက်တယ်။ မတ်လ ၂၇တော်လှန်ရေး သတ်မှတ်ရက်ရောက်ချိန် ဖားရွှေကျော် ရန်သူစခန်းကို တပ်အများစုနဲ့တိုက်၊ မြို့တွင်း တချို့နေရာတွေ ညအချိန် ချဉ်းကပ်တိုက်ရေး စီစဉ်တိုက်ကြတယ်တဲ့။ သခင်ဖေအောင်တို့ မြို့တွင်းနေရာ တချို့တိုက်၊ သခင်ခင်အောင်က တော်လှန်ရေးမစမီ သုံးရက်လောက်အလို ပဲခူးရိုးမဘက် တာဝန်နဲ့ ထွက်သွားတယ်။ ကားလမ်း အရှေ့ရွာရှိ ခေါင်းဆောင်ပိုင်းနဲ့တွေ့၊ ကန်လေးရွာ လာခဲ့ရန်မှာ၊ အားကိုးရတဲ့ ဗိုလ်လှရွှေလေး ကျဆုံး၊ ပါတီဝင် သူရဲကောင်းတဦးဖြစ်တယ်တဲ့။ တော်လှန်ရေး သမိုင်းဝင်အချက်များ ရဲဘော်အောင် မှတ်တမ်းမှာ တွေ့ရတယ်။ ရဲဘော်အောင်တို့ ဖက်ဆစ်တော်လှန်ရေးလှုပ်ရှားခဲ့တာ သာယာ၀တီခရိုင်ဆိုတော့ တောင်သူလယ်သမား သူပုန်ထခဲ့တဲ့ အစဉ်အလာရှိတဲ့ဒေသလို့ မှတ်ယူနိုင်တယ်။ ရဲဘော်အောင် သူကိုယ်တိုင် ပြောဖူးတာ သူက သာယာ၀တီနယ်သား၊ သူတို့ သာယာ၀တီက တော်လှန်ရေးအစဉ်အလာရှိတယ်။ သခင်မြတို့ သခင်ခင်အောင်တို့အပြင် ဗမာပြည် ကွန်မြူနစ်ပါတီရဲ့ ပြည်သူ့ဒီမိုကရေစီတော်လှန်ရေးမှာ ပါတီဗဟိုကော်မတီဝင် ၃ ဦး ရှိတယ်။ ရဲဘော် သုံးကျိပ်ဝင် ဗိုလ်မှူးချုပ်ဟောင်း ကျော်ဇော၊ သူလည်း သာယာ၀တီသား။ နောက် ရဲဘော်သန်းလွင်ထွန်း၊ ပါတီ ဗဟိုကော်မတီဟောင်း (ကွယ်လွန်) သူလည်း သာယာ၀တီသား။ (ရဲဘော် သန်းလွင်ထွန်းငယ်စဉ်က ဆရာစံလယ်သမားသူပုန်အဖွဲ့မှာ ပါဝင်ခဲ့ဖူးကြောင်း ရဲဘော် သန်းလွင်ထွန်း ကိုယ်တိုင်ပြောဘူးတာ ကျွန်တော်ကြားဖူးတယ်။ စာရေးသူ) ရဲဘော်အောင်နဲ့ပါ ၃ ယောက်လို့ ပြောဖူး တယ်။ တောင်ငူခရိုင်မှာ အဓိကခေါင်းဆောင် သခင်သန်းဖေ၊ ပါတီနဲ့ တပ်ကိုပါ ခေါင်းဆောင်သူ (ဒုတိယကွန်ဂရက် ကွန်မြူနစ်ပါတီ ဗဟိုကော်မတီ နိုင်ငံရေးဦးဆောင်အဖွဲ့ဝင်) သူနဲ့အတူ ဦးမြင့်ဆွေ၊ ကိုမောင်မောင်စိန် (၇၅ ခုနှစ် ပါတီဗဟို ကော်မတီဝင်) ဗိုလ်သက်ထွန်း၊ ကိုမြ စသူတို့လည်း ပါဝင် တာဝန်ယူကြတယ်တဲ့။ တပ်မတော်က ဗိုလ်အကြပ်၊ တပ်သား ၃၀ လောက် ပို့ပေးတယ်။ မြေပြန့်ရော တောင်ပေါ်မှာပါ တိုက်ကြ၊ တောင်ပေါ်မှာ ပါတီခေါင်းဆောင်မှုနဲ့ ကရင်တွေ စု၊ တပ်ဖွဲ့ပြီး တိုက်ကြတယ်။ ဂျပန်တပ်များ ပဲခူးရိုးမပေါ် ကစဉ့်ကလျား ဆုတ်ခွာ၊ တပ်တွေက ဖြတ်တိုက်၊ မြို့တွေသိမ်း၊ ကျွန်တော်တို့ တပ်ရော လေထီးအဖွဲ့ပါ စက်ကွင်းမြို့ကို ဝင်ရောက်ကြ၊ တောင်ဘက်မှာ မှော်ဘီလေသာဉ်ကွင်းက ဂျပန် လေယာဉ် ၃ စင်းကို တော်လှန်ရေးတပ်က ဝင်ရောက်မီးရှို့ပစ်တယ်လို့ ရဲဘော်အောင် မှတ်တမ်းမှာ တွေ့ရတယ်။ အသေးစိတ် မှတ်တမ်းရေးထားတာ များတယ်၊ နှစ်ဖက် အထိအခိုက်အကျအဆုံး စာရင်းတွေက တပြည်လုံး အတိုင်းအတာနဲ့ ရောနေမှာစိုးလို့ ချန်ထားတယ်။ စာရှည်မှာစိုးလို့ ဒါလောက်ပဲ ထုတ်နုတ်ပြလိုက်ပါတယ်။ ပြည်သူ့ ဒီမိုကရေစီ တော်လှန်ရေးကာလအတွင်း ရဲဘော်အောင် အလေးထားချီကျူးထားတဲ့ တပ်မှူးကောင်း ၃ ဦး၊ ဗိုလ်မှူးကြီးအာဠာ၀က၊ ဗိုလ်ဘုန်းက်ျာနဲ့ ဗိုလ်သက်ထွန်း တို့ ဖြစ်တယ်လို့ ရေးမှတ်ထားတယ်။
ရဲဘော်အောင်ဟာ ပြည်သူ့ဒီမိုကရေစီ တော်လှန်ရေးကာလအတွင်း မြစ်ဖျားဒေသတိုင်း (တိုင်း ၁) မှာ တာဝန်ခံ ခေါင်းဆောင်ဖြစ်ကြောင်း ကျွန်တော်တို့ မြို့မှာနေစဉ် အဲဒီတိုင်းမှာလုပ်ခဲ့ဖူးတဲ့ တော်လှန်ရေးသမားဟောင်း ထောင်ထွက်တွေက ပြောဖူးတယ်။ ၇၅ ခုနှစ် ဗမာပြည် ကွန်မြူနစ်ပါတီ ဗဟိုကော်မတီအသစ် ပြန်လည်ဖွဲ့စည်းကြောင်း ဥက္ကဋ္ဌ သခင်ဗသိန်းတင်ရဲ့ ရေဒီယိုမိန့်ခွန်း နားထောင်နေစဉ် အဲဒီ ရဲဘော်ဟောင်းတယောက်လည်း နားထောင်နေတယ်။ ဥက္ကဋ္ဌမိန့်ခွန်းထဲမှာ ဝါရင့်ဗဟိုကော်မတီဝင် ရဲဘော်မျိုးမြင့်ဆိုတာလည်း ကြေညာတယ်။ နောက် သခင်ဗသိန်းတင်က ကွန်မြူနစ်တွေဟာ ကြိုးစဉ်ပေါ်မှာဖြစ်စေ၊ တရားရုံးမှာဖြစ်စေ၊ ဘယ်လိုအခြေအနေ ဖြစ်ပါစေ၊ ရန်သူကို ဒူးထောက်အရှုံးပေးတာ မလုပ်ရဘူး၊ တော်လှန်ရေးကို ရဲရဲရင့်ရင့် ဆက်လက်ဆင်နွှဲရမယ်ဆိုတဲ့ သဘောမျိုး မိန့်ခွန်းမှာ ထည့်သွင်းပြောသွားတယ်။ ဒီ အခါ ရဲဘော်အောင်တို့တိုင်းမှာလုပ်ခဲ့ဖူးတဲ့ ရဲဘော်ဟောင်းက ဗိုလ်မှူးမျိုးမြင့်လည်း ဒီအတိုင်းပဲ၊ သူတို့ခေါင်းဆောင်တွေဟာ ပြောရင်အားပါတယ်၊ ကြားရသူ အားတက်စေတယ်တဲ့။ သူပြောတာ ကျွန်တော် မှတ်ထားလိုက်မိတယ်။
ရဲဘော်အောင်ဟာ မြို့တွေပေါ် ဖြတ်သွားဖြတ်လာ လုပ်သွားကြောင်းလည်း သတင်းအဖြစ်ကြားရတာလည်း ရှိတယ်။ ယူဂျီနည်းသုံး ပဲခူးရိုးမ ပါတီဗဟိုနဲ့ ဆက်သွယ်သွားလာလှုပ်ရှားခဲ့ရတာ ဖြစ်မှာပါ။ ဒါတွေက ရဲဘော်အောင်ကို မတွေ့ဖူးခင် ကျွန်တော် ကြားဘူး-သိဖူး ရင်းနှီးနေတာတွေပါ။ သို့ပေမယ့် တော်လှန်ရေးထဲရောက်ပြီး ကျွန်တော်တို့ ရဲဘော်အောင်နဲ့ တွေ့ရဖို့ အကြောင်းတိုက်ဆိုင်မှု သိပ်မရှိလို့ နှစ်တချို့ ကြာမှတွေ့ဖူးမြင်ဖူးတယ်။ ၀နယ် ပန်ဆန်း ၁၉၇၉ ခုနှစ် ဗဟိုကော်မတီအစည်းအဝေးကာလ စစ်ဒေသဌာနချုပ်မှာ စမြင်ဖူးတယ်။ သင်္ကြန်တွင်း ဒိုးပတ်ဝိုင်းနဲ့အတူ ရဲဘော်တွေ၊ ပါတီဥက္ကဋ္ဌအပါအဝင် ခေါင်းဆောင်အဘိုးကြီးတွေ ပျော်ပျော်ရွှင်ရွှင် ရေပက်ကစားကြစဉ် ဒိုးပတ်ဝိုင်းထဲ ပုဆိုးကွက်ထောက်နဲ့ အဘိုးကြီးတယောက် တက်တက်ကြွကြွနဲ့ဝင်လာ ဝါးလက်ခုပ်လိုက်တီး နေတယ်။ ဘယ်က အဘိုးကြီးလည်း စပ်စုကြည့်မှ အဲဒါ ရဲဘော်အောင်ဆိုတာ ကျွန်တော် စမြင်ဖူးတော့တယ်။ ၇၉ ခုနှစ် ပါတီ ဗဟိုကော်မတီအစည်းအဝေးအပြီး မြောက်ပိုင်းဗျူရို (ဗဟိုဌာနခွဲ)နဲ့ အလယ်ပိုင်းဗျူရို (ဗဟိုဌာနခွဲ)ဖွဲ့စည်းတဲ့ အခါ ရဲဘော်အောင်က မြောက်ပိုင်းဗျူရိုတာဝန်ခံဖြစ်သွားတယ်။ ပထမ အလယ်ပိုင်းဗျူရိုမှာ တပ်ပေါင်းစုတွေနဲ့အတူ ရဲဘော်အောင် ခေါင်းဆောင်သွားရ လိမ့်မယ်ဆိုပြီး ပြင်ဆင်မှုတွေလုပ်သေးတယ်တဲ့။ နောက်ပိုင်းမှ ဗဟိုက အစီအစဉ်ပြောင်း၊ ရဲဘော်အောင် မြောက်ပိုင်း ရောက်သွားတယ် ပြောကြတယ်။
ရဲဘော်အောင် တာဝန်ယူတဲ့ဌာနများမှာ ကျွန်တော်တို့ အလုပ် ဆက်စပ်မှု မရှိလို့ ထိတွေ့ရတာ နည်းတယ်၊ အနီးကပ်မနေခဲ့ရဘူး။ သို့ပေမယ့် ပါတီထဲမှာ ခေါင်းဆောင်ပိုင်းတွေအကြောင်းဆိုတာ အောက်ခြေမှာ အမြင်အမျိုးမျိုးနဲ့ ရောင်ပြန်ဟပ်ကြတာ ရှိတယ်။ ဒါကြောင့် သိရကြားရတာတွေ မြောက်ပိုင်းဗျူရိုမှာတော့ ရဲဘော်အောင်ဟာ ပြောစရာ ထင်မြင်ချက်များကြတဲ့သဘော ကြားရတယ်။ ရဲဘော်တချို့ ပြောသလို ရဲဘော်အောင်က ရဲဘော်အများ မျှော်လင့်သလိုမဖြစ်လာဘူးဆိုတာမျိုး ကြားရတာရှိတယ်။ နောက်အိမ်ထောင်နဲ့ အဆင်မပြေတာတွေလည်း ပါမယ်ထင်တယ်။ အခိုင်အမာလုပ်ငန်းတွေမှာ ပြောက်ကျားအခြေခံဒေသ အတွေ့အကြုံနဲ့ နယ်စပ်အတွေ့အကြုံ မတူတာတွေလည်းရှိတယ်။ ရဲဘော်အောင်ကိုယ်တိုင် ပန်းဆန်းရောက်နေချိန် မြောက်ပိုင်းဗျူရို အကြောင်း မိတ်ဆက်ဟောပြောပွဲတခုမှာ အတွေ့အကြုံမတူလို့ လုပ်ကိုင်ရတဲ့ အခက်အခဲတချို့ ထည့်မိတ်ဆက်တာ ကျွန်တော် သတိထားလိုက်မိတယ်။ ကျွန်တော်တို့ အလယ်ပိုင်းရောက်စဉ်က အလယ်ပိုင်းက ရဲဘော်တွေ ရဲဘော်အောင် အကြောင်းပြောကြတာ ခံစားချက်ကောင်းကြတယ်။ ပြောက်ကျားဒေသတိုက်ပွဲတခုမှာ ရဲဘော်အောင်က အနီးကပ် ကွပ်ကဲတယ်။ ခဲယမ်း ကျည်ဆန် အခြေအနေအရ တိုက်ပွဲက ဆက်တိုက်မရ၊ ဆုတ်ရတဲ့ အခြေအနေ။ ရဲဘော်အောင်က ပြန်မဆုတ်ချင်၊ ရန်သူကို ဆက်ချချင်နေတယ်။ သူက တက်ကြွတော့ ရဲဘော်တွေလည်း အားရှိတယ်တဲ့။ ရဲဘော်အောင်က ပဲခူးရိုးမကနေ ရှမ်းပြည်တောင်ပိုင်း ရောက်တယ်၊ တပ်ပေါင်းစုတွေနဲ့ဆက်ဆံရေး ကောင်းတယ်၊၊
ဒီနေရာမှာ တပ်ပေါင်းစုများနဲ့ ရင်းနှီးတဲ့အကြောင်းတခု ဗိုလ်စောမောင်(ခေါ် ) ကရင်နီ အမျိုးသားတိုးတက်ရေးပါတီရဲ့ နံပါတ် (၁) ခေါင်းဆောင် “စောမော်ရယ်” ဆိုတာ အရင် ရဲဘော်အောင်တို့နဲ့ ဗိုလ်သင်တန်း အပတ်စဉ်တခုတည်း တက်ခဲ့တဲ့သူဖြစ်နေတယ်။ ပုဂ္ဂိုလ်ရေးအရလည်း ရင်းနှီး၊ စောမော်ရယ်က လိုအပ်တဲ့အကူအညီလည်းပေးကြောင်း သူ့မှတ်တမ်းမှာတွေ့ရတယ်။ ရဲဘော်အောင်ဟာ ပါတီတွင်းတိုက်ပွဲမှာ ပဲခူးရိုးမက တော်လှန်တဲ့လူငယ်တွေ ခေါင်းဆောင်မှုအောက် လှုပ်ရှားရုန်းကန်ခဲ့ရတဲ့ အခြေအနေထိ ဝေဖန် ဆန်းစစ်ခံရတာ၊ ဖြစ်အောင်လိုက်နာ လုပ်ဆောင်တယ်ဆိုတာအထိ ကြားသိခဲ့ဖူးတယ်။ ၈၅ ခုနှစ် ပါတီကွန်ဂရက်အပြီး ဗျူရိုတွေမှာ ခေါင်းဆောင်အပြောင်းအလဲဖြစ်တော့ ရဲဘော်အောင် ပန်ဆန်းဘက် ပြောင်းလာတယ်။ ကျွန်တော်ကို စကားခေါ်ပြောတာရှိတယ်။ တပ်ထဲနေတာသိလို့ တပ်အခြေအနေခေါ်မေးတာ လုပ်ဖူးတယ်။
၁၉၈၉ ခု ပါတီတွင်း ပုန်ကုန်မှုဖြစ်ပြီးနောက် ရဲဘော်အောင်နဲ့ ထိတွေ့ရမှုတွေ ရှိတယ်၊ တရုတ်ပြည် ထင်ချုန်း မြို့မှာလည်း မကြာခဏ တွေ့ဖြစ်တယ်။ စကားစပ်မိလို့ပြောဖြစ်တာ ပဲခူးရိုးမ ပါတီတွင်းတိုက်ပွဲမှာ သူ့ကို ဝေဖန်ဆန်းစစ်အရေးယူခံရတာ အနည်းအပါး ထည့်ပြောတယ်။ တော်လှန်ရေးအစကာလက တပ်မကြီးတွေ စ ဖွဲ့တော့ ရဲဘော်အောင်က တပ်မကြီး ၁ ထင်တယ်၊ နိုင်ငံရေးမှူး တာဝန်ယူရတာရှိတယ်။ ဝေဖန်ဆန်းစစ်ခံရချိန် အဲဒီ တပ်မပျက်သွားတာတာဝန်ရှိတယ်ဆိုပြီး စွဲချက်တင်တိုက်ခိုက် ဝေဖန်ဆန်းစစ် ရတယ်တဲ့။ နောက် ပြင်ဆင်ခွင့်ပေးတယ်ဆိုပြီး တိုက်ပွဲနဲ့စမ်းသပ်တာ ရှေ့တန်းတက် ရန်သူကို အနီးကပ်ချေမှုန်းတိုက်ခိုက်ပြရတယ်တဲ့။ ပါတီတွင်းတိုက်ပွဲမှာ လူကြီးတွေကို စွဲချက်တင်တိုက်ခိုက်ကြတာ တချို့က ပါတီဝင်တောင် မဟုတ်သူတွေ။ နောက်ပိုင်း အဲဒီလူတွေ လက်နက်ချတာရှိတယ်တဲ့။ စိတ်ထိခိုက်တဲ့သဘောပြောပြတာ နားလည်လိုက်မိတယ်။ နောက်ပိုင်း ရဲဘော်အောင်တို့ ခေါင်းဆောင်ပိုင်း အများစု ယူနန်ပြည်နယ် ခွင်းမင်မှာ အနားယူသွားရတယ်။ ကျွန်တော် ခွင်းမင် ပထမ ရောက်စဉ် ရဲဘော်ခင်မောင်ကြီးတို့နဲ့ ခွင်းမင် ကျောက်တော သွားလည်တော့ ရဲဘော်အောင်က ပြောတယ်၊ ဒီတရုတ်ပြည်ကလူတွေ အထူးအဆန်းလုပ်နေကြတာ၊ ဒီကျောက်တော မျိုးတွေကြား ကျွန်တော်တို့ တောတောင်တွေထဲ ပြောက်ကျားဒေသမှာ နေလာအိပ်လာတာ ဘာမှမဆန်းဘူး၊ မဟုတ်လားလို့ ကျွန်တော့်ကို လာစနေသေးတယ်။ ရင်းရင်းနှီးနှီးရှိတယ်။ ရဲဘော်တွေအခြေအနေ ဂရုတစိုက်မေးမြန်းတာ နိုင်ငံရေးအခြေအနေ အဆက်မပြတ်တာ တွေ့ရတယ်။
နောက်ဆုံး ကျွန်တော် ၂၀၁၄ ခု အောက်တိုဘာလထဲ ခွင်းမင် ဆေးရုံသွားရင်း ရဲဘော်အောင်ဆီ ရောက်သေးတယ်။ ရဲဘော်အောင်က တယောက်တည်း အခန်းထဲမှာ စောင်ခြုံပြီး ပြည်သူ့အာဏာ ဖတ်နေတယ်။ နောက်စာရွက်နဲ့ မှတ်စုထုတ်ရေးထားတာတွေ သူ့ရှေ့က စားပွဲမှာတွေ့တယ်။ ကျွန်တော် အံ့ဩနေတယ်။ အသက် ၉၀ ကျော်နေပြီ၊ သတိကောင်း မှတ်ဥာဏ်တွေကောင်းနေတယ်။ အခု ထိန်ချုန်းက လာတာလားလို့ ကျွန်တော့်ကို မေးနေသေးတယ်၊ မဟုတ်ဘူး၊ အခု တနေရာ ပြောင်းနေတယ် ပြန်ပြောလိုက်ရတယ်။ ကျွန်တော်က ရဲဘော်အောင် ဘာတွေရေးမှတ်တာလဲမေးတော့ အခု မေးထားကြလို့ ရဲဘော်ဘတင် (ဂိုရှယ်) အကြောင်း ပြန်ရေးနေတာ၊ သူက ဒီလို တော်လှန်ရေးအစမှာ ရဲဘော်ဘတင် (ဂိုရှယ်) က လက်နက်ကိုင်ပြန်တိုက်ရေး သဘောမတူဘူး၊ သပိတ်စုံ သူပုန်ထ လုပ်ရေးပဲ၊ သခင်သန်းထွန်းတို့နဲ့ အယူအဆ မတူဘူး။ အဲဒါ အခု ဂိုရှယ်စစ်တမ်းဆိုပြီး လက်နက်ကိုင်တိုက်ရေးလှုံ့ဆော်တယ်ဆိုတော့ လွဲနေတယ်။ ဒါ ကျွန်တော်သိတယ်၊ အဲဒီအကြောင်းလေး ရေးပေးနေတာတဲ့။ ဒါလောက်သတိကောင်းနေသေးတာ အတူသွားတွေ့ကြတဲ့ ဒေါက်တာ လှကျော်ဇောရော ကျွန်တော်ပါ အံ့အားသင့်နေတယ်။ တော်လှန်ရေးသမားတွေရဲ့ စိတ်ဓာတ်နဲ့ဇွဲ သေကာမှရပ်သွားတယ်ဆိုတာ တကယ်ပါပဲ။ အဲဒါ ကျွန်တော် ရဲဘော်အောင်ကို နောက်ဆုံးတွေ့လိုက်ရတဲ့ အချိန်လေးပါ။ သိပ်မကြာခင် ရဲဘော်အောင် အသက် ၉၂ နှစ်၊ ၂၀၁၅ ခု ဧပြီလ (၈) ရက်နေ့မှာ ကွယ်လွန်ကြောင်း သတင်းကြားရတယ်။ ကျွန်တော်တို့ နောက်ဆုံးတွေ့ချိန်နဲ့ ပြန်တွက်ကြည့်တော့ ခြောက်လလောက်ပဲ ရှိသေးတယ်၊ ဘာမှ မကြာလိုက်ဘူး၊ ဆုံးသွားတာ။ အဲဒီအချိန်အထိ နိုင်ငံရေးလေ့လာဖတ်မှတ်နေဆဲဆိုတာ တွေ့လိုက်ရတယ်၊ အခုတော့ ရဲဘော်အောင် ကောင်းကောင်း အနားယူသွားပေပြီ။
ရဲဘော်အောင် (ခေါ်) ဗိုလ်မျိုးမြင့် ထာ၀စဉ် ဥဒါန်းတွင်ပါစေ။
အလေးနီ ပြုလျက်။
ဗတိုးရှိန် (မုံရွာ)
၂၆- ၅-၂၀၁၆
ဗိုလ်မျိုးမြင့်သည်ဒေါက်တာအောင်ကြီး(RIT)ဆရာကြီးဦးစန်းလွင်(ဆည်မြောင်းဘူမိဗေဒညွှန်မှူးငြိမ်း)တို့ရဲ့သူငယ်ချင်း တပ်နီလူငယ်များဖြစ်ကြောင်းဆရာကြီးမှပြောပါသည်
0 comments:
Post a Comment