စစ်မှန်သော ဒီမိုကရေစီပြည်ထောင်စုကို ဘယ်လိုတည်ထောင်ကြမလဲ၊ ဗကပ၏တင်ပြချက်။ (ဧပြီ ၁။ ၂၀၁၂)
လွတ်လပ်ရေး ၆၅ နှစ်ပြည့်ပြီ။ အခြေခံဥပဒေလည်း ၃ ခုရှိပြီ။
လွတ်လပ်ရေးမရခင်ကတည်းက ဗမာပြည်သစ်ကို ဘယ်စနစ်နဲ့တည်ထောင်ကြမလဲဆိုတာ စဉ်းစားခဲ့ကြသည်။ အထူးသဖြင့် ပြည်ထောင်စုစနစ်လား တပြည်ထောင်စနစ်လားဆိုတာကို စဉ်းစားခဲ့သည်။ အာဏာရ ဖဆပလ ထဲတွင် တပြည်ထောင်စနစ်လိုလားသူများရှိခဲ့သည်။ သို့သော် ဗိုလ်ချုပ်အောင်ဆန်းက ‘ပင်လုံညီလာခံ’တွင် ပြည်ထောင်စုစနစ်ကို အတိအလင်းကြေညာခဲ့သဖြင့် သူတို့တတွေ မလွန်ဆန်ရဲကြ။ ငြိမ်နေခဲ့သည်။ ၁၉၄၇ အခြေခံဥပဒေကို ဖဆပလကပဲရေးဆွဲခဲ့တာဖြစ်သည်။ ထိုဥပဒေတွင် လိုရာဆွဲအဓိပ္ပာယ်ကောက်ယူနိုင်သည့် ပုဒ်မများပါနေသည်။
လွတ်လပ်ရေးရတော့ ဗိုလ်ချုပ်အောင်ဆန်းမရှိတော့။ တပြည်ထောင်စနစ်ကို လိုလားသူများကအတင့်ရဲလာသည်။ ပြည်ထောင်စုဆိုင်းဘုတ်အောက်တွင် တပြည်ထောင်စနစ်လုပ်ကြသည်။
‘စစ်အေးခေတ်’ ဖြစ်နေတာနဲ့ ‘ပြည်တွင်းစစ်’ဖြစ်နေတာကိုအကြောင်းပြုပြီး တပြည်ထောင်စနစ်သမားတွေ လက်ရဲဇက်ရဲလုပ်ဝံ့ကြသည်။
၁၀ နှစ် ၁၀ မိုးရှိလာတော့ ရှမ်းပြည်ခွဲထွက် မထွက်၊ အခြေခံဥပဒေကို ပြည်ထောင်စုစစ်စစ်ဖြစ်အောင် ပြင်မပြင် ဆိုတဲ့ကိစ္စက ရှေ့တန်းရောက်လာသည်။ အဲ့ဒီအချိန်မှာပဲ ဖဆပလ ကွဲသည်။ သန့်ရှင်းအစိုးရ အာဏာရလာသည်။ တပြည်ထောင်စနစ်လိုလားသူများ အတိုက်အခံဘဝရောက်ကြသည်။ တပြည်ထောင်စနစ်ကိုအားသန်သည့်စစ်ဗိုလ်များက သန့်ရှင်းအစိုးရကိုအကျပ်ကိုင်ပြီး နိုင်ငံတော်အာဏာကိုရယူလိုက်ကာ အိမ်စောင့်အစိုးရပေါ်လာသည်။ တပြည်ထောင်စနစ်ကို သူတို့က အတိအလင်းလုပ်ကြသည်။ ခွဲထွက်ရေးကိုတိမ်းညွှတ်သည့်စော်ဘွားတချို့နဲ့ ပြည်ထောင်စုစစ်စစ်ဖြစ်ဖို့ အခြေခခံဥပဒေပြင်ဆင်ချင်သူများကို ဒလကြမ်းနှိပ်ကွပ်သည်။
ဤသို့ဖြင့် ပြဿနာကြီးလာခဲ့သည်။ ၁၉၆၀ တွင် သန့်ရှင်းအုပ်စုက ရွေးကောက်ပွဲနိုင်လိုင်တော့ (ပထစ)အစိုးရ ပေါ်လာသည်။ ရှမ်းပြည်ပြဿနာကို ငြိမ်းငြိမ်းချမ်းချမ်းဖြေရှင်းဖို့ကြိုးစားသည်။ သို့သော် ဆုံးခန်းတိုင်မလုပ်လိုက်ရ။ ‘၁၉၆၂ စစ်အာဏာသိမ်းပွဲ’ ကြုံရသည်။ တော်လှန်ရေးကောင်စီအမည်ခံ စစ်အစိုးရ တပြည်ထောင်စနစ်ကို လွတ်လွတ်ကျွတ်ကျွတ် လက်ရဲဇက်ရဲလုပ်တော့သည်။ ‘၁၉၇၄ အခြေခံဥပဒေ’ ရေးဆွဲအတည်ပြုသည်။ ‘ပြည်ထောင်စု’ဆိုတာ နာမည်သာကျန်ရစ်သည်။ ပြည်နယ်(၇)နယ်၊ တိုင်း(၇)တိုင်းဆိုတဲ့ဖွဲ့စည်းပုံပေါ်လာသည်။
တပြည်ထောင်စုစနစ်ဖြစ်လာတဲ့ဖြစ်စဉ်ကို အခြေခံဥပဒေ(၃)ခုကပြဌာန်းတဲ့ အလံ(၃)ခုကိုကြည့်လျှင်ရှင်းသည်။
- ၁၉၄၇ အခြေခံဥပဒေကပြဌာန်းတဲ့အလံက ကြယ်ဖြူကြီးတလုံးကို အရန်ကြယ်ကလေး ၅ လုံးက ခြံရံနေသည်။
- ၁၉၇၄ အခြေခံဥပဒေရဲ့အလံကျတော့ ကြယ်ဖြူကြီးပျောက်ပြီး အရန်ကြယ်ကလေး (၁၄)လုံးဝန်းရံလာသည်။ ကြယ်ဖြူကြီးနေရာမှာ ‘မဆလ တံဆိပ်’ရောက်လာသည်။
- ၂၀၀၈ အခြေခံဥပဒေကျတော့ (၃)ရောင်ခြယ်အလံမှာ ကြယ်ဖြူကြီးတလုံးပြန်ရောက်လာသည်။ ကြယ်ရန်တွေကတော့ လုံးလုံးပျောက်သွားသည်။ ဒါက ပြည်ထောင်စုကနေ တပြည်ထောင်စနစ်သို့ ကူးပြောင်းလာတာကို အလံသင်္ကေတနဲ့ပြတာဖြစ်သည်။ ‘ပြည်ထောင်စု’ဆိုတဲ့ဆိုင်းဘုတ်ကိုတော့ မဖြုတ်ရဲကြ။ သို့သော် ‘ပြည်ထောင်စုအနှစ်သာရ’ ကိုတော့ လုံးလုံးဖျက်သိမ်းလိုက်ကြပြီ။ ‘၂၀၀၈ အခြေခံဥပဒေ’ရဲ့ အခန်း ၂ ပါ ပုဒ်မများကိုလေ့လာကြည့်ပါ။ အနှစ်သာရက တပြည်ထောင်စနစ်ဖြစ်နေသည်။
ဗမာပြည်မှာ တပြည်ထောင်စနစ်ကျင့်သုံးလို့မဖြစ်ပါ။
ဗမာပြည်က တရုတ်ပြည် အိန္ဒိယပြည်တို့နဲ့မတူပါ။
· တရုတ်ပြည်မှာ တရုတ်(ဟန်)လူမျိုးက လူဦးရေအားလုံးပေါင်းရဲ့ (၉၂) ရာခိုင်နှုန်းရှိသည်။ အမျိုးသားလူနည်းစုက လူမျိုးပေါင်း (၅၆)ပဲရှိသည်။ တရုတ်စကား(ပီကင်းစကား)ကိုတော့ အများစုကြီးကတတ်သည်။ ဒါ့ကြောင့် တပြည်ထောင်စနစ် ကျင့်သုံးနိုင်သည့်အနေအထားဖြစ်သည်။
· အိန္ဒိယကျတော့ ပြည်ထောင်စုစနစ်ဖြစ်သည်။ ဘာသာစကားပေါင်း (၁၃)ခုပြောကြသည်။ (အများစုကြီးက) ဟိန္ဒူဘာသာဝင်တွေဖြစ်သည်။ သို့သော် ရုံးသုံးဘာသာကို အမျိုးမျိုးထားရသည်။ တပြည်ထောင်စနစ်လုပ်လို့မဖြစ်။ ပြည်ထောင်စုစနစ်ပဲလုပ်ရမည်။ သူ့ပြည်နယ်တွေကကြီးသည်။ သို့သော် ပြည်နယ်အလိုက်ဘာသာစကားများကို တရားဝင်လုပ်ထားသည်။ တရုတ်ပြည်မှာလို အားလုံးက ပီကင်းစကား(မန်ဒရင်စကား)ချည်း ပြောကြတာမဟုတ်။ လွတ်လပ်ရေးရတော့လည်း နိုင်ငံ(၂)နိုင်ငံအဖြစ် အခွဲခံရသည်။ တရုတ်ပြည်မှာလိုလုပ်လို့မဖြစ်တာ သေချာသည်။ အိန္ဒိယရဲ့ပြည်ထောင်စုမျိုးကို ဗမာပြည်မှာလုပ်လို့မဖြစ်နိုင်။ ဗမာပြည်ရဲ့ သီးခြားလက္ခဏာရှိတဲ့ပြည်ထောင်စုစနစ်ကိုပဲ ထူထောင်ရလိမ့်မည်။ ကြံဆကြရလိမ့်မည်။ ဗကပ က ယေဘုယျပဲတင်ပြနိုင်သည်။
ဗမာပြည်ရဲ့သီးခြားလက္ခဏာများကို လေ့လာရဦးမည်။
· လူဦးရေဘယ်လောက်ရှိလဲ(မသိပါ။) အမျိုးမျိုးပြောကြသည်။ သန်း(၅၀) သန်း(၆၀) အမျိုးမျိုးပြောနေကြသည်။
· လူမျိုးပေါင်း ဘယ်လောက်ရှိလဲ(မသိပါ။) များတော့များသည်။
· ‘၂၀၀၈ အခြေခံဥပဒေ’မှာက တိုင်း(၇)တိုင်း၊ ပြည်နယ်(၇)ပြည်နယ်အပြင် ပြည်ထောင်စုနယ်မြေများ ဆိုတာလည်းပါသေးသည်။ ပျဉ်းမနားနေပြည်တော်အပြင် တခြားနယ်မြေများမှာလည်း သမ္မတအမိန့်နဲ့ သတ်မှတ်နိုင်တယ်လို့ဆိုထားသည်။ ဒါလည်း စောင့်ကြည့်ရဦးမည်။
· ကိုယ်ပိုင်အုပ်ချုပ်ခွင့်ရဒေသဆိုတာကလည်း (၆)ခု ရှိလာသည်။ ရှမ်းပြည်နယ်မှာချည်း(၅)ခုရှိသည်။ သူတို့ ဘယ်လိုဘယ်ပုံစခန်းသွားနေကြသလဲ(မသိပါ။) လေ့လာရဦးမည်။ (မင်းတို့က ဗမာကိုပြည်နယ်တခုဖွဲ့ဖို့တောင်းသည်။ တို့က ပြည်နယ်တခု မလုပ်ဘူး။ တိုင်း (၇)တိုင်းလုပ်ပစ်လိုက်တယ်။ မင်းတို့ကိုလည်း ရှမ်းပြည်ထဲမှာ ကိုယ်ပိုင်အုပ်ချုပ်ခွင့်ရဒေသ (၅)ခု လုပ်ပေးလိုက်မယ်)ဆိုပြီး အာဃာတနဲ့များလုပ်သလား သံသယရှိသည်။ ပြဿနာကတော့ဖြစ်နေပြီ။ ဗမာကို တိုင်း(၇)တိုင်းခွဲလို့ ဘာမှမဖြစ်နိုင်။ အများစုကြီးက ဗမာလူမျိုးတွေချည်းပဲ နေထိုင်ကြတာဖြစ်သည်။ ရှမ်းပြည်မှာက လူမျိုးတွေကွဲနေသည်။ ရန်မီးပွားစရာတွေဖြစ်သည်။ ဗမာပြည်မှာက တိုင်းပြည်ကငယ်ငယ် လူမျိုးတွေကများများ ဒွေးရောယှက်တင်နေထိုင်ကြတာလည်းဖြစ်တော့ ပြဿနာတက်နိုင်သည်။
0 comments:
Post a Comment