အဆာမပြေတဲ့သူရဲ့ အစာမကြေမှု--

ကျနော်လည်း အခုဆို အိုးနဲ့အိမ်နဲ့။ ဝင်ထွက်သွားလာလုပ်လို့ရပြီလေ။ ဧည့်သည့်ဟာဧည့်သည်မို့ လာလည်ချင်တဲ့အခါ တံခါးမရှိဓါးမရှိပါ။ ပြန်ချင်တဲ့အခါလည်း ဖုတ်ဖက်လေးခါပြီး ပြန်ရုံပေါ့နော်။ အညစ်အကြေး ချန်ခဲ့လည်းကျန်ပါစေ။ လိမ်းခဲ့ရင်လည်းကျံပါစေ။ ရသလေးတွေ ချန်ခဲ့လည်းကျန်ပါစေ။ လိမ်းခဲ့ရင်လည်းကျံပါစေ။ ကျနော့်အလိုကတော့ဗျာ We must take things as they are ပါဘဲ။ ဘယ်သူဖြစ်ဖြစ်ပါ အချိန်တန်ရင်တော့ ပြဋ္ဌာန်းခံတွေ ဟုတ်ဟုတ်/မဟုတ်ဟုတ် ဘဝကပြဋ္ဌာန်းပေးလိုက်တဲ့အသိတွေနဲ့ဘဲ လက်ကျန်အချိန်လေးတွေကို စီးဆင်းရတာပါ။ ကျနော်လည်း မဟာလူသားမဟုတ်လေတော့ကာ လူသာမန်တယောက်လောက်ထက် ဘာမှပိုပြီး မမှားခဲ့/မမှန်ခဲ့၊၊ မကောင်းခဲ့/မဆိုးခဲ့၊ မလိမ်မာခဲ့ မမိုက်မဲခဲ့၊ မတော်ခဲ့ မညံ့ခဲ့၊ မယုတ်ညံ့ခဲ့ မစင်ကြယ်ခဲ့-------ဖူးပါဘူး။ လူတယောက်အဖြစ်နဲ့ လူစစ်စစ်လိုဖြစ်ခဲ့တာပါဘဲ။ သူတော်ကောင်းတရားစစ်စစ်တွေသာပွားများပြီး၊ သူတော်စင်စစ်စစ်တွေလိုကျင့်ကြံနေခဲ့သူဆိုတာလည်း ရှိချင်လည်းရှိမယ်။ အခုထက်ထိ ကျနော်ကတော့ လူအစစ်လိုနေရတာကိုဘဲ နှစ်သက်နေတုန်းပါ။ ရှေ့မှာ မှားစရာ/မှန်စရာ၊ ကောင်းစရာ/ဆိုးစရာ၊ တော်စရာ/ညံ့စရာ၊ လိမ်မာစရာ/မိုက်မဲစရာ၊ ယုတ်ညံ့စရာ/စင်ကြယ်စရာ၊ မုဒိတာပွားစရာ/မဈေရိယထားစရာ-----တွေ တပျော်ကြီးကျန်နေသေးရဲ့။

ကျနော်အခု ၁ မျက်နှာတည်းနဲ့ ၁ ရွက် ဖြစ်ချင်နေလို့ ဒီဘလော့ဂ်လေးလုပ်ကြည့်တာပါ။ ၂ မျက်နှာပေါင်းမှ ၁ ရွက် ဖြစ်တယ်ဆိုလည်း တခါတလေမှာ ၂ မျက်နှာရှိချင်ပါတယ်။ ၁ မျက်နှာတည်းနဲ့ ဘယ်တော့များ ၁ ရွက် အခေါ်ခံရမယ်မှန်းလည်း မမှန်းတတ်သေးပါဘူး။

တခါတလေမှာ ကိုယ့်ရဲ့ ရွေးချယ်မှု၊ တောင်းဆိုမှု၊ အလိုတူမှု ဘာတခုမှမပါဘဲရလာတဲ့ ဘဝရေစီးထဲမှာ အဆိုးတွေချည်းထပ်လာတော့ သူများတွေလုပ်ခဲ့သမျှကို ကိုယ်ကချည်းဝင်ခံပေးနေရတာများလားလို့လည်း တွေးတတ်လာမိတယ်။ ဘာပဲဖြစ်ဖြစ်ပါ အဆိုးထဲမှာတော့ အကောင်းဆိုတာရှာမရပါဘူး။ မိုးတိမ်မဲတွေရဲ့ ငွေနားကွပ်ဆိုတာ နောက်ခံနေရောင်ကြောင့်ဆိုတာ သိနေမှတော့ ကျနော့်သူငယ်ချင်း “သစ်ကောင်းအိမ်” ပြောသလို “နေဝင်တာကိုစောင့်မကြည့်ချင်ဘူး။ နေလုံးကိုဖြုတ်ချချင်တယ်.....ဆိုသလိုမျိုး”

အသက်ကလေးရလာလို့ လားမသိဘူး တခါတလေမှာ ကိုယ့်ကိုယ်ကိုယ်ရော သူတပါးကိုပါ တွေဝေနေတာလား၊ တည်ငြိမ်နေတာလား၊ ပျော့ပျောင်းတာလား၊ ပျော့ညံ့တာလား ဆိုတာလောက်တော့ ခွဲခွဲခြားခြားလေး သိချင်လာတယ်။

မျိုးမြင့်ချို