အာဏာဟာ သေနတ်ပြောင်းကထွက်တယ်

အာဏာဟာ သေနတ်ပြောင်းကထွက်တယ်

-ရဲဘော်ဖိုးသံချောင်း-

မာ့စ်ဝါဒကို ထိုးနှက်တိုက်ခိုက်သောအခါ ဆန့်ကျင်တိုက်ခိုက်သူတို့ အသုံးအများဆုံးနည်းမှာ စကားလုံးတို့ကို အဓိပ္ပါယ်တလွဲဖွင့်ဆိုပြီး သိက္ခာချသောနည်းဖြစ်သည်။ မာ့စ် ဝါဒီတို့ မပြောသော စကား၊ မပြောသော အဓိပ္ပါယ်ကို ပြောသယောင် လုပ်ပြီး၊ ထိုသို့ ပြောသည် မှာ မကောင်းဟု မတော်မတရား စွပ်စွဲ ပြောဆိုသောနည်း ဖြစ်သည်။ ထိုသို့သော သာဓက အမြောက်အများရှိသည်။ ယင်းတို့ အနက် တခု ကို ယခု ပြောချင်ပါသည်။

အာဏာဟာ သေနတ်ပြောင်းကထွက်တယ် ဆိုသော စကားကို လူတော်တော်များများ မကြိုက်ကြ။ ဆိုလိုရင်း အမှန်ကို နားမလည်ဘဲ တလွဲ အဓိပ္ပါယ်ကောက်ပြီး မကြိုက်ကြခြင်း ဖြစ်သည်။ တလွဲအဓိပ္ပါယ်ကောက်ကြခြင်းမှာလည်း တလွဲ အဓိပ္ပါယ်ဖွင့်ပြီး မဟုတ်မတရား သိက္ခာချသူတွေ ရှိခဲ့သောကြောင့်ဖြစ်သည်။

အာဏာဟာ သေနတ်ပြောင်းက ထွက်တယ်ဆိုသော စကားကို မော်စီတုန်းက အာဏာရှင်မို့ပြောသည်ဟု စွပ်စွဲကြသည်။ ပြည်သူတွေ ကို သေနတ်နှင့် အုပ်ချုပ်ရမည်၊ သေနတ်နှင့် ဖိနှိပ်ရမည်ဟု မော်စီတုန်းက ပြောသလိုလို ထင်ကြသည်။ ထိုစကား မမှန်ပါ။ ပြောင်းပြန် ဖြစ်သည်။ သမိုင်းတလျောက်တွင် ပြည်သူကို တန်ဖိုးထားခြင်း၊ ပြည်သူကို ဦးထိပ်တင်ခြင်း၊ ပြည်သူ့အာဏာ ထူထောင်ရန် ကြိုးပမ်းခြင်း အလုပ်တို့ကို ပါတီ မူဝါဒအဖြစ်နှင့် ယုံယုံကြည်ကြည် စွဲစွဲမြဲမြဲ လိုက်နာပြီး လက်တွေ့ အကောင်အထည်ဖော်ကြသူများတွင် သက်တမ်း အရှည်ကြာဆုံးပါတီများမှာ ကွန်မြူနစ်ပါတီများသာ ဖြစ်သည်။ ကမ္ဘာ့သမိုင်းတလျောက်တွင် ကွန်မြူနစ်များလောက် ဘယ်သူတွေမှ ပြည်သူ လူထုအတွက် အနစ်နာ မခံကြဖူးပါ။

စင်စစ် အာဏာဟာ သေနတ်ပြောင်းက ထွက်တယ် ဟု ဥက္ကဌမော်စီတုန်း ပြောခဲ့ခြင်းမှာ သူဖြစ်ချင်သော အရာကို ပြောခဲ့ခြင်း မဟုတ်ပါ။ အာဏာသေနတ်ပြောင်းက ထွက်ခြင်းသည် ကောင်းသည် မှန်သည် ဖြစ်ထိုက်သည်ဟု ထိုအဆိုဘက်ကနေ ရှေ့နေလိုက် ထောက်ခံပြီး ပြောဆိုခဲ့ခြင်းလည်း မဟုတ်ပါ။ သူပြောသည်မှာ ဖြစ်နေသော အရာကို ပြောခြင်းသာ ဖြစ်သည်။ အရှိတရား၊ ပကတိတရားကိုသာ ပြောနေခြင်းဖြစ်သည်။ လူမှာ ခြေနှစ်ချောင်းရှိတယ်၊ နွားမှာ ခြေလေးချောင်းရှိတယ်၊ ရေမှာ အောက်ဆီဂျင်နဲ့ ဟိုက်ဒရိုဂျင်ဓါတ်ပါတယ်၊ အနုမြူဗုံးပေါက်ကွဲရင် လူပေါင်းများစွာသေကြေစေနိုင်တယ် ဆိုသည့် စကားတို့နှင့် အလား သဏ္ဍန်တူသော အမှန်တရား တခုကို ပြောလိုက်ခြင်းသာ ဖြစ်ပါသည်။ ထိုကဲ့သို့သော အမှန်တရားမျိုးသည် ခင်ဗျားတို့ ကျွန်တော်တို့ ကြိုက်သည်ဖြစ်စေ၊ မကြိုက်သည်ဖြစ်စေ သူ့ဖာသာ မှန်နေသော အမှန်တရားမျိုးဖြစ်သည်။ လူတို့၏ ကြိုက်ခြင်း၊ မကြိုက်ခြင်း၊ လိုခြင်း၊ မလိုခြင်းဟူသော ဆန္ဒစွဲတို့နှင့် ကင်းလွတ်ပြီး သူ့ဖာသာ သီးခြား မှန်ကန်နေသော အမှန်တရား ဖြစ်သည်။ Objective Truth ဖြစ်သည်။ အနုမြူဗုံးပေါက်ကွဲရင် လူပေါင်းများစွာသေနိုင်တယ်ဟု ပြောသောသူကို အနုမြူဗုံးအသုံးပြုပြီး လူသတ်ချင်စိတ်ပေါက်နေသောသူ ဟု စွပ် စွဲလျင် မမှန်သလို၊ အာဏာဟာ သေနတ်ပြောင်းက ထွက်တယ်ဟု ပြောသောသူကို မော်စီတုန်းဟာ အာဏာရှင်မို့ ပြည်သူကို သေ နတ်နှင့် ဖိနှိပ်ချင်လို့ ပြောတာပဲဟု ကောက်ချက်ချခြင်းမှာလည်း မမှန်ကန်နိုင်ပါ။

တကယ်တော့ အာဏာဟာ သေနတ်ပြောင်းက ထွက်တယ် ဆိုသော စကားသည် အာဏာရှင်တို့၏ စကားဟု ထင်မှတ်ကောက်ယူနေ ကြသူများသည် မော်စီတုန်း၏ စာပေများကို မဖတ်ဖူးဘဲ ပြောနေကြခြင်းဖြစ်ကြောင်း အလွန်ပင် ထင်ရှားပါသည်။ မော်စီတုန်း၏ စာပေ များကို ဖတ်ရှုဖူးလျင် မော်စီတုန်းသည် ပြည်သူလူထုကို ဘယ်လောက် အားထားယုံကြည်ကြောင်း ထင်ရှားစွာသိမြင်နိုင်ပါသည်။ ပြည် သူလူထုကို စည်းရုံးပြီး တော်လှန်ရေး ဆင်နွဲနိုင်ရန် ခရီး ရှည်ချီတက်ပွဲကြီးကို ဘယ်လို စီစဉ်အကောင်အထည်ဖော်ခဲ့ကြောင်း သိနိုင်ပါ သည်။ မော်စီတုန်း၏ ပြောက်ကျားစစ် သဘောတရားများကို ဖတ်ဖူးလျင် မော်စီတုန်းသည် ပြောက်ကျားစစ် သေနင်္ဂဗျူဟာများကို ပြည်သူကို အခြေခံရေးသားခဲ့ကြောင်း သိရှိနိုင်ပါသည်။ မော်စီတုန်း၏ ပြောက်ကျားစစ် သေနင်္ဂဗျူဟာများသည် ကွန်မြူနစ် ဟုတ်ဟုတ် မဟုတ်ဟုတ် စစ်နှင့် ပတ်သက်သူတိုင်း မဖြစ်မနေ လေ့လာကြရသော စစ်ရေးသိပ္ပံကျမ်းတွေ ဖြစ်သည်ကို စစ်ပညာ လေ့လာသူတိုင်း၊ နိုင်ငံရေး လေ့လာသူတိုင်း သိရှိကြပါသည်။ ထိုစစ်ရေး သိပ္ပံကျမ်းတို့သည် စစ်တိုက်မည့်သူများအတွက်သာ အသုံးဝင်သည် မဟုတ်ဘဲ သေနင်္ဂဗျူဟာ ချမှတ်ဆောင်ရွက်ရသော ကိစ္စတိုင်းအတွက် အသုံးဝင်သော ကျမ်းများဖြစ်သည်။ အထူးသဖြင့် ပြိုင်ဘက်နှင့် ရန်သူနှင့် သူနိုင်ကိုယ်နိုင် အပြိုင်ကြဲကြရမည့် ကိစ္စများတွင် သေနင်္ဂဗျူဟာပိုင်းကို လေ့လာလိုသူတိုင်းအတွက် မဖြစ်မနေလေ့လာအပ်သော ဘာ သာရပ်များပင် ဖြစ်သည်။ သမိုင်းကို မလေ့လာလျင် အ တတ်ပါသည်။ နိုင်ငံရေး သဘောတရားများကို မလေ့လာလျင်၊ စာမဖတ်လျင် လည်း တုံးတတ်ပါသည်။ နိုင်ငံရေးကြောင်းပြောလိုလျင်၊ နိုင်ငံရေးမှာ ဝင်ရောက်ပတ်သက်လိုလျင် နိုင်ငံရေး သဘောတရားစာပေ များကို ဖတ်ရှုလေ့လာဖို့ လိုအပ်ပါသည်။ အာဏာဟာ သေနတ်ပြောင်းက ထွက်တယ် ဆိုသော စကားကို ဝေဖန်လိုလျင် သင်သည် အနိမ့်ဆုံး အဆင့်အနေဖြင့် မော်စီတုန်းရေးသားသော စစ်နှင့် သေနင်္ဂဗျူဟာ ပြဿနာ စာတမ်းကို ဖတ်ဖူးရပါလိမ့်မည်။ အဘယ်ကြောင့် ဆိုသော် အာဏာ ဟာ သေနတ်ပြောင်းက ထွက်တယ်ဆိုသော စကားကို မော်စီတုန်းက ထိုစာတမ်းတွင် ထည့်သွင်း ရေးသားခဲ့သောကြောင့် ဖြစ်ပါသည်။

ထိုစာတမ်းတွင် မော်စီတုန်းရေးခဲ့သည်မှာ “ နိုင်ငံရေး အာဏာဟာ သေနတ်ပြောင်းထဲက ထွက်လာတာဖြစ်တယ် ဆိုတဲ့ အမှန်တရား ကို ကွန်မြူနစ် ပါတီဝင်တိုင်း နားလည်ထားရမယ်။” ဟုရေးခဲ့ခြင်းဖြစ်သည်။ ပါတီဝင်တွေကို ဦးဆောင်ညွှန်ပြ သင်ကြားပေးခြင်းဖြစ်သည်။ သို့သော် ထိုဆောင်းပါးထဲမှာပင် “ကွန်မြူနစ် ပါတီဝင်များဟာ ပုဂ္ဂလိက ( အကျိုး) အတွက် စစ်အာဏာ မလုရ။ ဘယ်နည်းနဲ့မှ မလုရ။ ကျန်းကိုထောင်ကို ဘယ်တော့မှ အတုမယူရ။ ဒါပေမဲ့ ပါတီအတွက်နဲ့ ပြည်သူတို့ အတွက် စစ်အာဏာ လုရမယ်။” ဟု အတိအလင်း ရေး သားခဲ့ပါသည်။ အင်္ဂလိပ်ဘာသာပြန်မှာ They must fight for military power for the people ဟု အတိအလင်း ရေးထားပါသည်။ ထီုစာသားကို ကြည့်လျင် ဥက္ကဌမော်သည် အာဏာသည် သေနတ်ပြောင်းက ထွက်သည် ဆိုသည့် အရှိတရားကို ထောက်ပြခဲ့ပြီး ပြည်သူတွေ အတွက် သေနတ်ပြောင်းကိုလုယူရန် လိုကြောင်း ညွှန်ကြားခဲ့သည်ကို ရှင်းရှင်းလင်းလင်းမြင်နိုင်ပါသည်။

အာဏာဟာ သေနတ်ပြောင်းက ထွက်တယ်ဟု သူပြောခြင်းသည် အာဏာကို တကယ်ပိုင်ဆိုင်ထိန်းချုပ်သူမှာ သေနတ်ကိုင်ထားသူသာ ဖြစ်သင့်သည် ဟူသော အဓိပ္ပါယ်မဟုတ်ပါ။ မဟုတ်ရုံသာမက အာဏာကို ပြည်သူက ပိုင်ဆိုင်ထိန်းချုပ်နိုင်ရန်၊ အလုပ်သမား၊ လယ်သ မားလူတန်းစားက ပိုင်ဆိုင်ထိန်းချုပ်နိုင်ရန်၊ ဥက္ကဌမော်သည် သူ့ဘဝ တလျှောက်လုံး မြုပ်နှံ အလုပ်လုပ်သွားသူ ဖြစ်သည်။ သူ့လက် ရွေးစင် ကျမ်းများကို ဖတ်ကြည့်လျင် ပြည်သူ့အာဏာအတွက် အလေးအနက်ထားပြီး တောက်လျောက်စူးစိုက် ရေးသားခဲ့ကြောင်း တွေ့နိုင်ပါသည်။ သူ၏ နာမည်ကျော် ဒီမိုကရေစီသစ် ကျမ်းကို ဖတ်ကြည့်လျင်လည်း သူ့သဘောကို နားလည် နိုင်ပါသည်။ အာဏာဟာ သေနတ်ပြောင်းက ထွက်တယ်ဆိုသည်မှာ အာဏာကို သေနတ်ပြောင်းထဲမှ ထုတ်လုပ်သည် ( produce လုပ်သည်) ဟုသာ ဆိုချင် တာဖြစ်ပါသည်။ အင်္ဂလိပ်လို ဘာသာပြန်မူမှာ Political power grows out of the barrel of a gun. ဟုရေးထားသည်။ အင်္ဂလိပ် ဘာသာပြန်မူကို www.marxists.org တွင် ကြည့်နိုင်သည်။ (Selected Works, Volume II ထဲက Problems of War and Strategy) ဗမာ ဘာသာပြန်ကိုတော့ www.marxistsburma.weebly.com တွင် ဖတ်နိုင်သည်။( အတွဲ ၂ ပထမအုပ်ထဲက စစ်နဲ့ သေနင်္ဂဗျူဟာ ပြဿနာများစာတမ်း)။

အာဏာဟာ သေနတ်ပြောင်းကထွက်တယ် ဆိုသော စကားကို မကြိုက်နှစ်သက်သူတွေကို မေးချင်ပါသည်။ အာဏာသည် သေနတ် ပြောင်းက မထွက်လျင် ဘယ်ကများ ထွက်ပါသနည်း။ ဤဆောင်းပါးကို ခဏရပ်ပြီး သင်ကိုယ်တိုင် စဉ်းစားကြည့်ပါ။ ယနေ့ ကမ္ဘာပေါ် တွင် တည်ရှိနေသော နိုင်ငံရေး အာဏာတို့တွင် နောက်မှ သေနတ်နှင့် စစ်တပ်နှင့် ကျောထောက်နောက်ခံပြုပေး မထားသော အာဏာ ဘယ်မှာ ရှိပါသနည်း။ ဂျပန်တွင် အမြဲတန်း စစ်တပ် မရှိဘဲ အကြာကြီး ရပ်တည်ခဲ့သည်ဟု သင်က ဆိုချင်ဆိုပေလိမ့်မည်။ ဂျပန်တွင် နိုင်ငံရေး အာဏာကို ပြည်သူတို့ အပေါ်ကျင့်သုံးနိုင်ရန် လက်နက်ကိုင် ရဲတပ်ဖွဲ့ရှိသည်။ ဂျပန်၏ နိုင်ငံရေး အာဏာတည်မြဲအောင် ကျော ထောက် နောက်ခံပြုပေးထားသော တကယ့် သေနတ်ပြောင်းမှာ အမေရိကန် သေနတ်ပြောင်း ဖြစ်သည်။ အမေရိကန် စစ်တပ်က ဂျပန် ကို နှစ်ပေါင်းများစွာ ချုပ်ချယ်ထားသလို၊ တခြား ပြိုင်ဘက် နိုင်ငံရေး အာဏာတို့၏ အန္တရာယ်မှလည်း ကာကွယ်ထားသည်။ ယနေ့ကမ္ဘာ ပေါ်တွင်လည်းကောင်း၊ ပြီးခဲ့သော အတိတ်ကာလ ကမ္ဘာ တွင် လည်းကောင်း စစ်တပ်ဖြင့်၊ သေနတ်ဖြင့် ကျောထောက် နောက်ခံပြု မထားသော အာဏာဟူ၍ တခါမျှ မရှိခဲ့ဖူးချေ။ စကားကပ်သပ် ပြောလိုပါမူ အာဏာသည် သေနတ်ပြောင်း ထွက်လာသည် မဟုတ်ဘဲ၊ ဓါးက စီးလာသော အချိန်မျိုးရှိခဲ့ဖူးပါသည်ဟု ဆိုလျင်မူကား မှန်သည်ဟု ဆိုရပါမည်။ အနော်ရထာတို့၊ ကူဗလိုင်ခန်၊ ဂျင်ဂစ်ခန်တို့၏ အာဏာသည် ဓါးနှင့်မြားတို့ကနေ စီးထွက်လာခြင်း ဖြစ်သည်။ သို့သော် သဘောတရားမှာ အတူတူသာဖြစ်သည်။ စစ်တပ်နှင့် လက်နက် နှင့် ကျောထောက်နောက်ခံ ပြုမထားသော အာဏာဟူ၍ကား တခါမျှ မပေါ်ဖူးပါသေးချေ။

၎င်းအပြင် နိုင်ငံရေး အာဏာမရှိဘဲ၊ သို့မဟုတ် နိုင်ငံရေး အာဏာ၏ ထောက်ခံချက်မရဘဲ ကျွန်တော်တို့ ဘာမျှ ထိထိရောက်ရောက် လွတ်လွတ်လပ်လပ် လုပ်၍မရနိုင်ပါ။ ကုန်ကုန်ပြောရလျင် နိုင်ငံရေး အာဏာက သဘောမတူပါက ကျွန်တော်တို့သည် အခမဲ့ ပရဟိတ ဆေးခန်းတခန်းကိုမျှ လွတ်လွတ်လပ်လပ် တည်ထောင်၍ မရကြောင်းကို ဗမာပြည်၏ လက်တွေ့ အခြေအနေများက သင်ခန်းစာ ပေး သင်ပြခဲ့ပြီး ဖြစ်ပါသည်။ နိုင်ငံရေး အာဏာရှိလျင်၊ ပညာရေးကိုလည်း ဆောင်ရွက်နိုင်သည်၊ ကျန်းမာရေးကိုလည်း ဆောင်ရွက်နိုင်သည်၊ ယဉ်ကျေးမှုကိုလည်း တည်ဆောက်နိုင်သည်၊ စီးပွားရေးကိုလည်း တည်ဆောက်နိုင်ပါသည်။ ထို့အပြင် နိုင်ငံရေး အာဏာကို အလွဲသုံး စား ပြုပြီး သားစဉ်မြေးဆက် ချမ်းသာ ကြွယ်ဝရေးကိုပင် စစ်အာဏာရှင်တို့ လုပ်နေကြသည်ကို ကျွန်တော်တို့ မျက်ဝါးထင်ထင် တွေ့မြင် နေရပါသည်။ နိုင်ငံရေး အာဏာကို အလွဲသုံးစားပြုပြီး စစ်အာဏာရှင်တို့ကို အထောက်အကူပြုမည့် သေဖော်သေဖက် စီးပွားရေး အခွင့် ထူးခံများ မွေး ထုတ်ပေးပြီး အုပ်စု ဂိုဏ်းဂဏဖွဲ့နေသည်ကိုလည်း တွေ့မြင်ရပါသေးသည်။

ဥက္ကဌမော်က သူ့စာတမ်းထဲတွင် “ကျနော်တို့ရဲ့ မူဟာ ပါတီက သေနတ်ကို ဦးစီးဖို့ ဖြစ်တယ်။ သေနတ်က ပါတီကို ဦးစီးတာမျိုးကိုတော့ ဘယ်တော့မှ ခွင့်မပြုနိုင်ဘူး။” ဟု ရေးသားခဲ့ပါသည်။ “ဒါပေမဲ့ သေနတ်ရှိရင် ကေဒါတွေ၊ ကျောင်းတွေ၊ ယဉ်ကျေးမှုတွေ လူထုလှုပ်ရှားမှု တွေကို ဖန်တီးနိုင်သေးတယ်”ဟုလည်း သူတို့၏ ယင်အန်းအတွေ့အကြုံကို ထောက်ပြပြောဆိုခဲ့ပါသည်။ “မာ့စ်ဝါဒ နိုင်ငံတော် သဘော တရား အမြင်နဲ့ ကြည့်မယ်ဆိုရင် စစ်တပ်ဟာ နိုင်ငံတော် အာဏာထဲက အဓိက အစိတ်အပိုင်းဖြစ်တယ်” ဟုလည်း ရေးသားခဲ့ပါသည်။

စစ်ဘုရင်တွေဟာ စစ်တပ်ရှိမှ အာဏာရှိမယ်ဆိုတဲ့ မူကို ကောင်းကောင်းနားလည်ထားကြတယ်ဟုလည်း ထောက်ပြပါသည်။ ကျွန်တော်တို့နိုင်ငံတွင် တပ်မတော်အင်အားရှိမှ၊ တိုင်းပြည်အင်အားရှိမည်ဟု စစ်အာဏာရှင်တို့က ကြွေးကြော်လှုံ့ဆော်နေခြင်းသည် လည်း အာဏာ၏ သဘောကို စစ်အာဏာရှင်တို့က ကောင်းကောင်း နားလည်ထားသောကြောင့် ဖြစ်သည်။ စင်စစ် သူတို့ အာဏာ တည်မြဲ ဖို့ ဖြစ်သည်။ တကယ့် အတွင်းသဘော အနှစ်သာရမှာ တပ်မတော်အင်အားရှိမှ စစ်အာဏာရှင်တွေ အင်အားရှိမည်ဟု ဆိုလိုခြင်းသာ ဖြစ်သည်။

ကျွန်တော်တို့ ဒီမိုကရေစီ သမား အများစုမှာမူ အာဏာ၏ သဘောသဘာဝကို နားမလည်ကြ။ အာဏာဟူသည် သေနတ်ပြောင်းက ထွက်သည်ဟူသော အခြေခံ သိပ္ပံနည်းကျ အတွေးအခေါ်ကို သဘောမပေါက်ကြ။ သဘောမပေါက်ရုံသာမက ရွံစရာ၊ မုန်းစရာ၊ ကြောက်စရာ စကားဟုပင် ထင်သူက ထင်ကြသည်။ တချို့ ဒီမိုကရေစီ သမားတို့က အာဏာရှင်တွေကို စည်းရုံးသိမ်းသွင်းပြောဆိုလျင် နားလည်လာလိမ့်မည်ဟု စိတ်ကူးယဉ်ကြသည်။ အာဏာရှင်တို့လည်း တိုင်းပြည်ကို ချစ်ကြသည်၊ သူတို့ နားမလည် သဘောမပေါက်လို့ သာ မိုက်နေကြသည်ဟု ထင်နေကြသည်။ မိမိတို့ အသိဥာဏ်နုံနဲ့သည်ကို မိမိဖာသာ မရိပ်စားမိဘဲ အာဏာရှင်တွေကို ပညာပေးမှ ဖြစ်မည် ဟု စိတ်ကြီးဝင်သူက ဝင်ကြသည်။ ကျောင်းသား တပ်မတော်ကို ဖျက်ပြီး စစ်ဗိုလ်ကြီးများကို ယဉ်ပါးလာအောင် လိမ္မာလာအောင် တရား ရေအေး တိုက်ကျွေးဖို့ ကြိုးစားကြရန် တိုက်တွန်းသူက တိုက်တွန်းခဲ့ကြသည်။ ဤသို့သော အတွေးအခေါ်မှားများ၊ အာဏာ၏ သဘောတရားကို နားမလည်သော အတွေ့အ ကြုံ နုနယ်မှုများကြောင့် ဒီမိုကရေစီ အရေးတော်ပုံကြီးမှာ ကြာသင့်သည်ထက် ကြာခဲ့ရပါသည်။

တကယ်တော့ ကျွန်တော်တို့အနေနှင့် ပြည်သူ့အာဏာခေတ်ကို တည်ထောင်နိုင်ဖို့ ဆိုလျင် ပြည်သူ့ အာဏာကို ကျောထောက်နောက်ခံ ပြုပေးမည့် သေနတ်ရှိဖို့ မဖြစ်မနေလိုအပ်ပါသည်။ အာဏာဟူသည် ရှေးခေတ်ကရော ယခုခေတ်တွင်ပါ၊ သေနတ်ပြောင်းကသာ ထွက်ပါသည်။ တခြားဘယ်ကမျှ မထွက်ပါ။ ထိုအချက်ကို နားမလည်သေးသမျှမှာ လွတ်မြောက်ရေးနှင့် ဝေးနေဦးမည်သာ ဖြစ်ပါသည်။

ပြည်သူ့အာဏာ အမှတ်(၃၄)