ကျနော်တို့ဖျက်ချင်တာက

(ကျနော်တို့ဖျက်ချင်တာက)

ဥပဒေရှုထောင့်က ဖွဲ့စည်းပုံပျက်ပြီဟု မည်မျှပြောပြော ပကတိနိုင်ငံရေး၏သဘောအရမူ ဖွဲ့စည်းပုံက မပျက်။ သူတို့လက်ထဲတွင် ဖွဲ့စည်းပုံအခြေခံဥပဒေတခု ဆုပ်ဆုပ်ကိုင်ကိုင်ရှိနေသည်မှာ ငြင်းမရ။ ထိုဖွဲ့စည်းပုံနှင့်အညီ ရွေးကောက်တင်မြှောက်ခံရသည့် အစိုးရနှင့်လွှတ်တော်ရှိခဲ့ဖူးတာလည်း မှန်၏။ အမတ် ၇၀ ကျော်ဖြင့် ကိုယ့်ဘာသာခေါ်ယူသည့်လွှတ်တော်ကလည်း ထိုဖွဲ့စည်းပုံနှင့်ပင် ကျမ်းကျိန်ထားသည်မှာလည်း မှန်၏။ ၂၀၂၀ ရွေးကောက်ပွဲရလာဒ် အကောင်အထည်ဖော်ရေးဆိုသည်မှာလည်း ထိုဖွဲ့စည်းပုံအောက်က အစိုးရနှင့်လွှတ်တော်ပေါ်ပေါက်လာရေးပင်ဖြစ်၏။ စစ်အုပ်စုက စစ်အာဏာသိမ်းသည်ကိုပင် ထိုဖွဲ့စည်းပုံနှင့်အညီဆိုကာ လက်တလုံးခြားလှည့်ပတ်ကစားသွား၏။ ရှေ့လျှောက်လည်း ထိုဖွဲ့စည်းပုံကိုင်ကာ သွားနေဦးမည်ဖြစ်၏။ ဤသည်တို့ကြောင့် ယခုအာဏာသိမ်းမှုသည် မှန်တမ်းမကျ။ အတော် အဆီအငေါ် မတည့်သည့်ကိစ္စဖြစ်နေ၏။

ဒီချုပ်၏မူမဲ့သောရင်ကြားစေ့ရေးနှင့် စစ်အုပ်စုအား အကာအကွယ်ပေးနေသည်များကို ကျနော်တို့ ဘယ်လောက် ပြင်းပြင်းထန်ထန် ဝေဖန်ခဲ့ဝေဖန်ခဲ့ တခါမှတော့ “ရန်သူပြော” မပြောခဲ့ကြ။ “ရန်သူမြင်” မမြင်ခဲ့ကြ။ လုပ်ကြည့်ပေ့စေဦး အချိန်တော့ ကိုယ်တိုင်သိနဲ့ အဖြူအမဲသဲကွဲသွားမည်ဆိုကာ တခါတလေ ဘေးမဲ့ပင်ပေးထားသေး၏။ ထိုမျှလောက်ကိုပင် မမြင်နိုင်သူတို့က ကျနော်တို့က စစ်အုပ်စုနှင့်ဒီချုပ်ကို “ပေးစား”သည်ဟု ယိုး၏။ အောင်သွယ်ရုံ နားချရုံမက တကယ့်လက်တွေ့ ဒီချုပ်နှင့်စစ်အုပ်စုကိုပေးစားသွားတာက အမေရိကန်ဖြစ်၏။ အိုဘားမားအစိုးရဖြစ်၏။ တိုးတိုးတိတ်တိတ် သံခင်းတမန်ခင်းတွေအဆုံး ဒေါ်စုကို ကိုယ်တိုင်လာတွေ့သလို ဦးသိန်းစိန်ကိုလည်း အိမ်ဖြူတော်ခေါ် ကျောသပ်ရင်သပ်လုပ်ပေးခဲ့တာ လူတိုင်းအသိပင်။ ထားတော့။

အာဏာတစိတ်တပိုင်းနှင့်မတင်းတိမ်နိုင်သောစစ်အုပ်စုက မူမမှန်သည့်အကြောင်းပြချက်တွေနှင့် ယခု အာဏာသိမ်း၏။ ထိုအကြောင်းပြချက်တွေကို ဒီချုပ်က လိုက်လိုက်လျောလျော လိုက်ဖြေရှင်းစေဦး သူတို့တွင် “နင်မဟုတ် နင့်အမေ” အကြောင်းပြချက်တွေကရှိ၏။ ဒီချုပ်ဘက်က လူထုအပ်နှင်းထားသည့်အခွင့်အာဏာကိုကိုင်၍ သူတို့ လည်မြိုအညှစ်ကိုမခံပဲ မလိုက်လျောခဲ့တာ နိုင်ငံရေးအရမှန်၏။ သမိုင်းလည်း လှ၏။ ကိုဗစ်အန္တရာယ်ကြားမှ မဲပေးခဲ့သည့် ပြည်သူလူထု၏ ဆန္ဒနှင့်လည်းကိုက်ညီ၏။ ထောက်ခံရမည်ဖြစ်၏။

အစကိုပြန်ကောက်ရလျှင် ယခုစစ်အုပ်စုသည် ဖွဲ့စည်းပုံတအုပ်နှင့် အာဏာသိမ်းသွားပြီဖြစ်၏။ ကျနော်တို့က ထိုဖွဲ့စည်းပုံကို ဖျက်ချင်သူများ။ သို့နှင့်တိုင် အာဏာမသိမ်းခင် ဗိုလ်မင်းအောင်လှိုင်က “ဖွဲ့စည်းပုံဖျက်မည်”ပြောတော့ ကျနော်တို့ ဝမ်းမသာခဲ့။ ဆန့်ပင် ဆန့်ကျင်ခဲ့ကြ၏။ ထိုဖွဲ့စည်းပုံသည် ဖျက်ရမည်မှန်သော်လည်း စစ်အာဏာသိမ်း နည်းနှင့် ဖျက်ရမှာမဟုတ်။ ထိုနည်းသည် မှန်ကန်သည့်နည်းမဟုတ်။ လူထုပါဝင်သည့် လူထုနည်းနှင့်ဖျက်ရမည်ဖြစ်၏။ သို့မှသာ နည်းမှန်လမ်းမှန်ကျ၏။

အခုထိတော့ ထိုဖွဲ့စည်းပုံကို ကျနော်တို့ မဖျက်နိုင်သေး။ ဖွဲ့စည်းပုံဖျက်ရေးဦးတည်ရည်မှန်းသော်လည်း ဖွဲ့စည်းပုံဖျက်ရေးကို အန္တိမရည်မှန်းချက်အဖြစ်တော့ မထားအပ်။ ၂၀၀၈ ဖွဲ့စည်းပုံဖျက်ရေးသည် စစ်အစိုးရ၊ စစ်အာဏာရှင်စနစ်၊ စစ်ဗျူရိုကရေစီယန္တရား အကုန်အစင်ဖျက်သိမ်းရေးအတွက် “အစချီချက်” အဖြစ် ထားရမည် ဖြစ်၏။ သူတို့လက်ထဲတွင် ဖွဲ့စည်းပုံ မပျက်မယွင်းရှိနေတာကို ကျနော်တို့ နိုင်ငံရေးပကတိအရမြင်ရန်လို၏။

မျိုးမြင့်ချို။ ဖေဖော်ဝါရီ ၅။ ၂၀၂၁