တွေးမိရာရာ

ကျနော်တို့ခေတ်တုန်းကတော့ ရှင်းတယ်။ ဖမ်းလိုက်ပြီဆို ထောင်ချဖို့ပဲ။ အဲ့ဒီအထဲမှာမှ သူတို့သုံးလို့ရမယ့်လူ ပြန်လွှတ်ပေးပြီး မွေးတာတို့၊ လက်နက်ချခိုင်းပြီး ပြန်လွှတ်ပေးတာတို့၊ ကိုင်းဖျားကိုင်းနားသိတ်ကျလွန်းသူတွေကို ခံဝန်ထိုးပြီးလွှတ်တာတို့ စတာတွေရှိတယ်။ ပြောရရင် များပါတယ်။ အများတကာအများစုကြီးကတော့ ထောင်ကျကြတာပါပဲ။ ခုလည်း ဖမ်းထားပြီ။ ခုဖမ်းတာက ကျနော်တို့တုန်းကလို နိုင်ငံရေးသမားသက်သက်မဟုတ်တော့ဘူး။ Activists တွေသက်သက်မဟုတ်တော့ဘူး။ အစိုးရအဖွဲ့ဝင်ဆိုတာတွေဖြစ်လာပြီ။ ဒေါ်စုတောင် ဟိုတုန်းကဒေါ်စုမှမဟုတ်တော့တာ။ ဒီလူတွေကို ဘာလုပ်မလဲဆိုတာကတွေးစရာရှိတယ်။ ခုတကြိမ် စစ်အုပ်စုရဲ့ဦးတည်ပစ်မှတ်က ဒီချုပ်ဖြစ်တယ်။ ဘေးပန်းကနေပါသွားသူလည်း နည်းနည်းပါးပါး ပါသွားနိုင်တယ်။ ပစ်မှတ်က ဒီချုပ်ဆိုတာတောင် ပါတီလိုင်းနဲ့အစိုးရလိုင်း ခွဲကိုင်တဲ့သဘောရှိနေတယ်။ ခု ပြန်လွှတ်တဲ့လူ လွှတ်ပေးနေတာတွေလည်း ကြားနေရတယ်။ နောက်ထပ်လည်း ကောက်သင်းကောက် ဖမ်းနိုင်တာတွေရှိလိမ့်မယ်ထင်တယ်။ ဒီကာလမှ လူထုလှုပ်ရှားမှုအကြီးကြီးတွေမပြောနဲ့ သေးသေးမွှားမွှားလေးတွေကိုတောင် နာလန်မထူအောင်နှိပ်ကွပ်ပစ်မှာပဲ။ အဲ့လိုပြောလို့ ကြောက်ဖို့မဟုတ်ဘူး။ ဖြစ်စရာရှိတာကိုပြောတာပါ။ တွေးစရာက ထောင်တွေထဲမှာ လက်ရှိနိုင်ငံရေးအကျဉ်းသားတွေရှိနေတယ်။ သူတို့ကို ဘယ်လိုသဘောထားမလဲ။ လွတ်ငြိမ်းသက်သာ တခုခုပေးပြီးပြန်လွှတ်မလား မလွှတ်ပဲဆက်ဖမ်းထားမလားက မရေရာဘူး။ တကယ်တော့ ဒီလူတွေဟာ အစိုးရ(ဟောင်း)ရဲ့ တရားစီရင်မှုယန္တရားဟောင်းက ဖမ်းဆီးချုပ်နှောင် ထောင်ချထားသူတွေပဲ။ သူတို့ကိုလွှတ်ရင် ဝီရသူတို့ ဘူးလက်လှဆွေတို့ မိုက်ကယ်ကျော်မြင့်တို့လည်း လွတ်လာမှာပဲ။ မလွှတ်ရင်ရော ဘာဖြစ်မလဲ။ အသစ်ဖမ်းလိုက်တဲ့လူတွေကိုရော ဘာလုပ်မှာလဲ။ ထောင်ချမှာလား။ ချရင်ရော စစ်ခုံရုံးတို့ အထူးတရားရုံးနဲ့ချမှာလား။ ဘာမှမချပဲနဲ့ ဆွေးနွေးပြီး လွှတ်ပေးပြီး ကြိုးရှည်ရှည်နဲ့လှန်ထားရင်ရော မဖြစ်နိုင်ဘူးလား။ တွေးစရာတွေကများပါတယ်။ တခါ ဒီချုပ်ကိုရော ဘယ်လိုသဘောထားမလဲ။ ပါတီတည်ရှိခွင့် လွတ်လွတ်ကျွတ်ကျွတ်ပေးမလား။ ခေါင်းဖြတ်ပြီး ကိုယ်လုံးချည်းချန်တဲ့နည်း သုံးမလား။ ဒါမှမဟုတ် "ကိုင်"လို့ရမယ်လူတွေလက်ထဲ ဒီချုပ်ကိုအပ်ပြီး မသေမရှင်လုပ်ထားမလား။ ဦးအောင်ရွှေတို့လက် အပ်ထားချိန်ကလိုပေါ့။ ဒီချုပ်ဘက်ကရော ပါတီဖျက်မယ်ဆို အခြိမ်းခြောက်ခံရရင် ဘာလုပ်မလဲ။ ဘာပဲလုပ်ရလုပ်ရ လိုက်လျောရလျောရ ပါတီမပျက်ဖို့အဓိကဆိုတဲ့မူနဲ့ စေ့စပ်ပြီး ပါတီအသက်ဆက်ရေးလုပ်မလား။ စတာတွေကလည်းတွေးစရာတွေပါ။ ၂၀၂၀ ရွေးကောက်ပွဲရလာဒ်ကိုဖျက်ပစ်လိုက်ပြီဆိုတဲ့ သေချာတာတခုကလွဲလို့ စစ်အုပ်စုခြေလှမ်း မခန့်မှန်းနိုင်သေးခင်မှာ စဉ်းစားစရာတွေကများကြမှာပါပဲ။

မျိုးမြင့်ချို

ဖေဖော်ဝါရီ ၁၊ ၂၀၂၁