ငုံ့ခံရေးအတွေးအခေါ်ကို ဆန့်ကျင်ကြ

ငုံ့ခံရေးအတွေးအခေါ်ကို ဆန့်ကျင်ကြ

မောင်သန်းမြရွှေ

ဗမာပြည်နိုင်ငံရေး အချိုးအကွေ့တရပ်ကို ရောက်နေပြီ။ လူထုမဲနဲ့ ရွေးကောက်ခံသမ္မတ၊ အတိုင်ပင်ခံပုဂ္ဂိုလ်၊ အစိုးရအဖွဲ့နဲ့ ဒီချုပ်ခေါင်းဆောင်အချို့ကို မင်းအောင်လှိုင်စစ်တပ်က အလွယ်တကူ အာဏာသိမ်းပြီး ကြက်ကလေး ငှက်ကလေးလို ဖမ်းဆီးထိန်းသိမ်းလိုက်ပါတယ်။ ၂၀၂၀ ရွေးကောက်ပွဲရလဒ်ကို စစ်တပ်က အသိအမှတ်မပြု၊ လွှတ်တော်ခေါ်ခွင့်မပေးလို့ ဒီချုပ်အမတ်များ နေပြည်တော်စည်ပင် ဧည့်ရိပ်သာမှာ အချုပ်ကျခဲ့ရပါတယ်။

ဒါလောက် ဖြစ်ပျက်နေတာကို - လာဖမ်းမှာကို အိမ်ကစောင့်နေတယ်၊ လမ်းပေါ်မထွက်ကြနဲ့၊ ထိန်းထိန်းသိမ်းသိမ်းနေကြပါ၊ ထောင်ချောက်ထဲမဝင်ကြပါနဲ့၊ ကျန်းမာစွာရှိပါတယ်၊ ထိန်းထားစဉ်ကကာလ ကောင်းကောင်းမွန်မွန်ကျွေးလို့ ကျေးဇူးတင်ပါတယ်၊ သွေးမြေမကျ အကြမ်းမဖက်တော်လှန်ရေး တဲ့။ ဘယ်လိုနားလည်ရမှာပါလဲ။ အာဏာသိမ်း ၃ ရက်မြောက်နေ့မှာမှ (၃ ဖေဖော်ဝါရီ ၂၀၂၁) ဒီချုပ်လွှတ်တော်ကိုယ်စားလှယ်များက ဗဟိုအလုပ်အမှုဆောင်အဖွဲ့ အနေနဲ့ ဆန့်ကျင်ကန့်ကွက်ကြောင်း ကြေညာချက်ထွက်ပါတယ်။ မည်သို့ပင်ဖြစ်စေ ဒီကြေညာချက်ကို ကြိုဆိုပါတယ်။ တိုးချဲ့စေချင်ပါတယ်။

ယခုလုပ်နေတဲ့ အာဏာဖီဆန်ရေးလှုပ်ရှားမှု Civil Disobedience ကိုလည်း အားပေးပါတယ်။ ဒါလောက်နဲ့ ရပ်မနေဖို့၊ အာဏာယန္တရားကို ကာယကံမြောက်ထိခိုက်စေတဲ့ လှုပ်ရှားမှုများ အနှံ့အပြား ဖြစ်လာစေဖို့နဲ့ နိုင်ငံရေးသပိတ် လူထုတိုက်ပွဲသို့ တက်လှမ်းဖို့လိုပါတယ်။ ပြည်တွင်းပြည်ပ စာနာထောက်ခံမှုရဖို့ ကူသူများဖို့လည်း တရားဝင်မှုကိုဆုပ်ကိုင်ပြီး ရှေ့ထွက်ရပ်ပြဖို့ လိုပါတယ်။

စစ်အုပ်စုက သူတို့ရေးခဲ့တဲ့ ၂၀၀၈ ခြေဥကိုတောင် မလိုက်နာနိုင်ဘဲ အာဏာသိမ်းခဲ့ပြီးနောက် ဘာကိုများ မျှော်လင့်နေပါသေးသလဲ။ အာဏာသိမ်းစစ်ဗိုလ်ချုပ်တွေက အမိန့်တွေ ကြေညာချက်တွေ ဆက်တိုက်ထုတ်ပြီး သူတို့အာဏာခိုင်အောင် ဖြုတ်ထုတ်ရှင်းတွေ လုပ်နေပါတယ်။ သမ္မတနဲ့ အတိုင်ပင်ခံပုဂ္ဂိုလ်ကို ဖမ်းဆီးတာ ရုံးတင်တရားစွဲတာ၊ Facebook ယာယီပိတ်တာ၊ ခရီးသွားလာမှု ကန့်သတ်တာ စတာတွေ ဆက်တိုက်လုပ်နေပါတယ်။

ပြည်တွင်းဖြစ် စစ်ဖက်ဆစ် စစ်အာဏာရှင်အစိုးရက အာဏာအတွက်ဆိုရင် ဘာမဆိုလုပ်မှာပါ။ ပုဒ်မ ၁၄၄ မာရှယ်လော၊ စစ်အုပ်ချုပ်ရေး၊ စစ်ခုံရုံး စတာတွေ လာပါလိမ့်ဦးမယ်။ ပစ်ရင်မိုးပေါ်ထောင်မဖောက်ဘူး ဆိုတာတွေ လာပါလိမ့်ဦးမယ်။ သက်ညှာမှုကို စိတ်ကူးယဉ်မျှော်လင့် နေလို့ မဖြစ်ပါဘူး။ စစ်အုပ်စုဟာ ဖောက်ပြန်ရေးပရိယာယ် ကြွယ်ပါတယ်။

သမိုင်းမှာ မခုခံရအမိန့်ထုတ်ခဲ့တဲ့ သီပေါမင်းရဲ့ ပါတော်မူသင်ခန်းစာရှိခဲ့ပါတယ်။ ၂၀၀၃ ဒီပဲယင်းအရေးအခင်း သင်ခန်းစာလည်း အတိတ်ကိုမမေ့သေးသူများအဖို့ ပူပူနွေးနွေးပဲ ရှိပါသေးတယ်။ မခုခံရအမိန့်ကြောင့် ဒီပဲယင်းအရေးအခင်းပြီး နောက် ၄ နှစ်ကြာမှ ရွှေဝါရောင်အရေးအခင်း (၂၀၀၇) ပေါ်ပေါက်ပါတယ်။ ၉၀ ရလဒ်ကတော့ ကိုယ့်ဖာသာကိုယ် ဖျက်သလိုဖြစ်ခဲ့တာပါ။

၄ ဖေဖော်ဝါရီ ဒီချုပ်လွှတ်တော်ကိုယ်စားလှယ်များရဲ့ တရားဝင်အခွင့်အဏာ ထုတ်ဖော်တဲ့ ထုတ်ပြန်ကြေညာချက်နဲ့ ၅ ဖေဖော်ဝါရီ ပြည်ထောင်စုလွှတ်တော် ကိုယ်စားပြုကော်မတီဖွဲ့စည်းခြင်းကို ထောက်ခံပါတယ်။ ပြည်တွင်းပြည်ပ ထောက်ခံမှုကိုတိုးချဲ့၊ လွှတ်တော်ဥက္ကဋ္ဌဟောင်းများ ထောက်ခံကြောင်းယူ၊ ပဲရစ်ဘုံအဖွဲ့ကာလက တင်းနစ်ကွင်းလွှတ်တော်ပုံစံမျိုး (သို့) နေသူရိန်အစည်းအဝေး ပုံစံမျိုး လွှတ်တော်ထပ်လုပ်၊ လူထုအကာအကွယ်ယူရမှာပါ။

စစ်အစိုးရက တရစပ်ဖိနှိပ်နေတဲ့ကာလမှာ အချိန်နဲ့လက်ဦးမှုဟာ သိတ်အရေးကြီးပါတယ်။ ဒီအချိန်မှာ လွတ်လပ်ရေးတိုက်ပွဲကာလနဲ့ ၈လေးလုံးကာလက ကိုင်စွဲခဲ့တဲ့ "ရရင်ရ မရရင်ချ" ဆိုတဲ့ ကြွေးကြော်သံနဲ့ ပိုင်းဖြတ်ချက်ရှိတဲ့စိတ်ဓာတ် နဲ့သာ စစ်အုပ်စုရဲ့ ဗိုလ်ကျရမ်းကားမှုကို ဆန့်ကျင်တိုက်ဖျက်နိုင်ပြီး ၂၁ရာစု ဗမာပြည်သမိုင်းသစ်ကို ဖန်တီးနိုင်မှာဖြစ်ပါတယ်။

ဗမာပြည်လူထုကြီးဟာ နိုင်ငံရေးအတွေ့အကြုံ ရင့်ပါတယ်။ လက်တွေ့ကျပါတယ်။ ဘယ်တုန်းကမှ ငုံ့မခံခဲ့ပါဘူး။

(၄ ဖေဖော်ဝါရီ ၂၀၂၀)