Civil Disobedience

စကားလုံးတိုင်း၏နောက်ကွယ်တွင် အနက်အဓိပွါယ်ရှိသလို အဘိဓမ္မာလည်းရှိပါသည်။ Civil Disobedience လည်း အတူတူပင်။ ဤနေရာတွင် စကားလုံး၏အဘိဓမ္မာနှင့်အနက်အဓိပ္ပါယ်ကိုပြောစရာ မလိုတော့ဟုယူဆသဖြင့် မပြောတော့ပါ။ ဘာသာစကားအရလည်း လူအများနားလည်သိမြင်ပြီး ဖြစ်သည်ဟုလည်း ယုံပါသည်။ သို့သော် ဤသို့သော်က အရေးကြီးမည်ထင်ပါသည်။ “ဘာသာစကားအရနှင့်လူအများ”ကိစ္စဖြစ်ပါသည်။ မျက်နှာဖြူလူမျိုးတွေ တွေ့တိုင်း “အင်္ဂလိပ်တွေ”ဟုပြောပြီး စပိန်နိုင်ငံကို စပလိန်နိုင်ငံဟုဆိုသည့် အခြေခံလူတန်းစားများအတွက်တော့ အနက်အဓိပ္ပါယ်နှင့် လှုပ်ရှားလုပ်ဆောင်မှုကို သိစေဦး စကားလုံးအသံထွက်ပြောရန်ခက်ပါလိမ့်မည်။ ထိုသူတို့မှာ “လူအများ”ဖြစ်နိုင်ပါသည်။ တချို့ကမူ အနက်အဓိပ္ပါယ်နှင့်လှုပ်ရှားလုပ်ဆောင်မှုကိုတောင် သိလိမ့်မည်မထင်ပါ။ လှုပ်ရှားမှုတရပ်ရပ်တွင် ပြည်သူအများ ပါဝင်လာစေရန်ဆိုလျှင် လူအများနားလည်မည့် ဝေါဟာရတွေစကားလုံးတွေ သုံးရမည်ဖြစ်ပါသည်။ ယခု လှုပ်ရှားမှုမျိုးကို တချိန်က “ဘူး”လှုပ်ရှားမှုဟုခေါခဲ့ပြီး “ဘူးအသင်းများ”လည်းရှိခဲ့ပါသည်။ အစိုးရနဲ့မဆက်ဆံဘူး ဒိုင်အာခီကိုအသိအမှတ်မပြုဘူး၊ အခွန်မဆောင်ဘူး စသဖြင့် ဘူးခံခဲ့သည့် သာဓက။ “ဘူး” လှုပ်ရှားမှုကို လူအများနားလည်ခဲ့ပါသည်။ ယခုလည်း Civil Disobedience လှုပ်ရှားမှုဖြစ်လာပါသည်။ ထိုစကားလုံး အတွက် အာဏာဖီဆန်ရေးဟု မြန်မာပြန်လည်းရှိနေပါသည်။ အလွန်တာသွားသည့်စကားလည်း ဖြစ်ပါသည်။ Civil Disobedience နှင့်စာလျှင် အာဏာဖီဆန်ရေးစကားလုံးက “လူအများ”ကြား အကျလွယ်သလို အရောက်လည်း လွယ်ပါသည်။ ထို့ကြောင့် အင်္ဂလိပ်လို Civil Disobedience ဟုပြောမည့်အစား ဗမာလို “အာဏာဖီဆန်ရေး”ဟုပြောက ပိုသင့်မည်ဟုအကြံပြုလိုပါသည်။

 

နောက်တခုက ထို အာဏာဖီဆန်ရေးကို လုပ်ဆောင်နည်းများဖြစ်ပါလိမ့်မည်။ လမ်းမတွေပေါ်တက်ပြီး လူထုဘ လှုပ်ရှားမှုတွေအပါအဝင် စစ်အာဏာသိမ်း Regime နှင့် မပတ်သက်ဘူး ခေါ်လျှင်မသွား ခိုင်းလျှင်မလုပ် အမိန့်မှန်သမျှ မနာခံ စသည်ဖြင့် အာဏာဖီဆန်မှုတွေရှိသလို ထို စစ်အာဏာသိမ်း Regime အား မကျေနပ်ကြောင်း ထိုလုပ်ရပ်ကို မနှစ်မြို့ကြောင်း အခြားသဏ္ဍန်များနှင့် ဖော်ပြချက်များလည်းရှိနိုင်ပါသည်။ ဥပမာ သံပုံးတီး တောထုတ်ခြင်း၊ ဖယောင်းတိုင်မီးထွန်းခြင်း ဆိုရှယ်မီဒီယာများမှနေ၍ လှုံ့ဆော်ဖော်ပြခြင်း စသည်တို့ဖြစ်ပါသည်။ ဤနေရာတွင် အာဏာသိမ်း အစိုးရအား Regime ဟု အင်္ဂလိပ်သုံးသည်မှာ Government နှင့် ကွဲစေရန်ဖြစ်ပါသည်။ Government ကို အစိုးရဟုပြန်ပြီး Regime ကို အာဏာရှင်အစိုးရဟု ပြန်မှဖြစ်မည်ထင်ပါသည်။ အာဏာရှင်မှာမှ “စစ်အာဏာရှင်” ဖြစ်ပါသည်။ တိုင်းပြည်ပေါ် ဓားမိုးအုပ်ချုပ်ခြင်းဖြစ်ပါသည်။ သေနတ်ခါးထိုး စိုးမိုးဗိုလ်ကျခြင်းဖြစ်ပါသည်။

 

ကျနော်အနေဖြင့်မူ စစ်အာသိမ်းသည့်လုပ်ရပ်အား မည်သည့်နည်း မည်သည့်သဏ္ဍန်ဖြင့် ဆန့်ကျင်သည်ဖြစ်စေ ဖော်ထုတ်ပြသသည်ဖြစ်စေ ဖီဆန်သည်ဖြစ်စေ လှိုက်လှိုက်လှဲလှဲထောက်ခံပါသည်။ အားပေးပါသည်။ ကျနော်လည်း တတ်နိုင်သမျှ ပါဝင်ပါသည်။ ပြည်သူလူထုတရပ်လုံး နိုးနိုးကြားကြားဖြင့်ပါဝင်ဆောင်ရွက်လာရေးကိုလည်း အလိုရှိပါသည်။

မျိုးမြင့်ချိ

ဖေဖော်ဝါရီ ၃၊ ၃၀၂၁