၂၀၀၈ ဖွဲ့စည်းပုံကို လက်မခံဘူး ဆန့်ကျင်ပါတယ်။ ၂၀၀၈ ဖွဲ့စည်းပုံအောက်ကအစိုးရ ဘာအစိုးရလဲဆိုတာကိုလည်း သိပါတယ်။ ဒါပေမဲ့ဒီအစိုးရဟာ လူထုကရွေးကောက်ထားတဲ့အစိုးရဖြစ်တယ်။ ဒါကိုဆန့်ကျင်ပြီး စစ်တပ်အာဏာသိမ်းတဲ့အတွက် ပြတ်ပြတ်သားသား ဆန့်ကျင်ကန့်ကွက်ပါတယ်။ စစ်အာဏာသိမ်းမှုဟာ ဘယ်အခြေအနေမှာဖြစ်ဖြစ် တိုင်းပြည်လူထုကို ကောင်းကျိုးမပေးပါ။ စစ်အာဏာသိမ်းမှုကိုဆန့်ကျင်သလို ကိုယ့်အချင်းချင်းလည်း အားပေးနှစ်သိမ့်ရင်း "ရဲတင်း"စကားဆိုပါတယ်။ စာနာစိတ်နဲ့ ကိုယ်ချင်းစာတရားလည်း ထားပါတယ်။ အားပေးတဲ့နေရာမှာ တလွဲတွေ၊ မစားရဝခမန်းတွေ၊ မဖြစ်နိုင်တဲ့မျှော်လင့်ချက်စကားတွေ မပါးမိဖို့ သတိထားပါတယ်။ နိုင်ငံတကာဆိုတာလည်း ကိုယ့်ပြဿနာနဲ့ကိုယ် လုံးချာလိုက်နေတာပါ။ နိုင်ငံကြီးတွေမှာလည်း ကိုယ်စီပြဿနာတွေရှိပါတယ်။ ဗမာပြည်ထက်နိုင်ငံရေးဆူ စစ်လည်းပူတဲ့ တိုင်းပြည်တွေ ဒေသတွေလည်း အများသားပါ။ ကိုယ့်တယောက်တည်းကို လာကွက်ကူဖို့ဆိုတာ စိတ်ကူးယဉ်မှုထက်မပိုပါ။ သူတို့ဆီက စာနာမှု ထောက်ထားမှလောက်ရတယ်ဆိုရင်ပဲ တော်လှပါပြီ။ ကိုယ့်ကိစ္စ ကိုယ်ရှင်းရတာပါ။ ပြည်ပဆိုတာက အရန်သဘောထက်မပိုပါ။ အကျိုးစီးပွားဆိုင်ရာကိစ္စကတော့ ဖန်တရာထေနေသမို့ မပြောတော့ပါ။ ခုပဲ အရေးယူပိတ်ဆို့မှုတွေလုပ်တော့မယောင်ယောင် ခုပဲ ဝင်ဖမ်းတော့မယောင်ယောင် ခုပဲ တပ်ကြီးနဲ့ဝင်ချလာတော့မယောင်ယောင်အပြောတွေလည်း သတိထားဆင်ခြင်ကြပါ။ ကျနော်တို့ အတွေ့အကြုံရှိလှပါပြီ။ ပြောရင် ခက်ထယော်ရှိပေမယ့် ဗမာပြည်လို နိုင်ငံရေး ရေခံမြေခံကြမ်းတဲ့နိုင်ငံမှာ ဒီနေ့အကျဉ်းသားဟာ နောက်နေ့သမ္မတဖြစ်နိုင်သလို ဒီနေ့သမ္မတဟာ နောက်နေ့အကျဉ်းသားဖြစ်သွားနိုင်ပါတယ်။ လူဟာ လက်နက်မရှိရင် ကြက်ငှက်ထက်ဖမ်းရလွယ်ပါတယ်။ ဒီလိုပြောတော့ လက်နက်အားကိုးသမားလို့မြင်စရာရှိမှာပါ။ နိုင်ငံရေး အာဏာဆိုတာ လက်နက်ကိုအမိန့်ပေးနိုင်မှ အာဏာပီပီမြည်တာပါ။ စစ်တပ်၊ ရဲတပ်၊ တရားရုံး၊ အချုပ်ထောင်နဲ့ အစိုးရယန္တရားကြီးတခုလုံး ကိုယ့်ဟာဖြစ်ပါမှ အမိန့်ပေးနိုင်ပါမှ အာဏာတကယ်ရတယ်ခေါ်တာပါ။ ဒီချုပ်မှာ အဲ့လိုအခြေအနေနဲ့အခွင့်အာဏာမရှိကြောင်းပေါ်လွင်စေချင်တာပါ။ အဲ့သလို အခွင့်အာဏာမရှိတဲ့ ဒီချုပ်အစိုးရကို နိုင့်ထက်စီးနင်းလုပ် စစ်အာဏာသိမ်းတာ မြေနိမ့်ရာကိုလှံထပ်စိုက်တဲ့သဘောပါ။ ကျနော်တို့မှာ ကိုယ်လုပ်နိုင်တာ သူ မလုပ်နိုင်၊ သူလုပ်နိုင်တာ ကိုယ်မလုပ်နိုင်တွေရှိတာမှန်ပေမယ့် သူရောကိုယ်ပါလုပ်လို့ရနိုင်တာတွေလည်း တပုံကြီးပါ။ စစ်အာဏာရှင်စနစ် စစ်အစိုးရ စစ်ဗျူရိုကရေစီယန္တရား စတာတွေကို ဘုံဆန့်ကျင်ဖို့ အလုပ်တူပါတယ်။ ဘုံရန်သူဆိုတဲ့စကားကို ကျနော်တို့လည်းပြောရပါမယ်။
မျိုးမြင့်ချို ဖေဖော်ဝါရီ ၁။ ၂၀၂၁။
0 comments:
Post a Comment