မျိုးမြင့်ချို: ဆေးထိုးမှားမှာ စိုးတဲ့လူ

"ဆေးထိုးမှားမှာ စိုးတဲ့လူ"
မနေ့က ဆေးခန်းသွားခဲ့ပါသည်။ ကိုယ်အလေးချိန်။ သွေးတွင်းအောက်စီဂျင်ပမာဏနှင့် သွေးပေါင်ချိန်တို့ကိုကြည့်ပြီး ဆရာဝန်က ကျေနပ်ဟန်ဖြင့် "မင်းက ကိုယ်အလေးချိန်သာ တိုးလာတာ။ သွေးပေါင်ချိန်ကတော့ အတော်ကောင်းတာပဲ"ဟုဆိုပါသည်။ "ဘယ်လောက်ရှိလဲ"ဟု ကျွန်တော်ကမေးတော့ "၁၁၀/၇၀" ဟုဖြေပါသည်။ "ဝလာတာက ဆေးလိပ်ဖြတ်လိုက်တာလည်းပါသလို အသက်အရွယ်ကြောင့်လည်း ဖြစ်နိုင်ပါတယ်၊ ကိုယ်အလေးချိန်ကို ထိန်းပါ၊ ဒီ့ထက်ပို မတက်ပါစေနဲ့၊ ဖြစ်နိုင်ရင် လျော့အောင်လုပ်ပါ"ဟုတိုက်တွန်းပါသည်။

တင်ပါးခွက်နှင့် ခြေထောက်နောက်ပိုင်းတလျှောက် အနာအကျင်လည်း အထိုက်အလျှောက် သက်သာနေသည်မို့ သည့်အတွက်ပြောစရာမရှိ၊ ခြေချောင်းလေးတွေ ထုံကျဉ်နေတာကတော့ မသက်သာ၊ ဒီတော့ သူက "ဒါ ဗိုက်တာမင်ဘီတွဲလ် Level နိမ့်နေတာကြောင့်လည်း ဖြစ်နိုင်တယ်။ လွန်ခဲ့တဲ့ ၆ လ က ဘီတွဲလဲ Level သိရဖို့ သွေးစစ်ကြည့်တဲ့ အဖြေအရ ဘီတွဲလ်လည်း ပုံမှန်ပဲ။ ခု ထပ်မစစ်ကြည့်တော့ဘူး၊ လိုရမယ်ရ ဘီတွဲလ်ထိုးဆေးတော့ ထိုးပါ။ ဆေးစာရေးပေးလိုက်မယ်၊ ဒီကိုပြန်လာပြီး ဒါမှမဟုတ်လည်း နီးစပ်ရာဆေးခန်းတခုခု ကျွမ်းကျင်သူတယောက်ယောက်နဲ့ ထိုးလိုက်ပါ။ တလတကြိမ်ထိုးပါ၊ အငံတို့ အဆီအစိမ့်တို့တို့ လျှော့စားနိုင်ရင်ကောင်းပါတယ်၊ သွေးတိုးလို ဆီးချိုလို နှလုံးလို ရောဂါတွေမရှိတာအတွက် ကိုယ့်ကိုယ်ကိုယ်ကျေးဇူးတင်ပါ"" ဟုပြောပါသည်။ Follow up အပွီုင်မင်န်လည်းဖြစ် ဘာမှလည်ပြောစရာ အထွေအထူးလည်းမရှိသဖြင့် ခနနှင့်ပြီးသွားပါသည်။

အပြန်လမ်းတွင် ဇနီးက "နင် ဒီပြန်လာ ထိုးမလား၊ ဒေါက်တာ Coats ဆေးခန်းသွားထိုးမလား၊ ဒေါက်တာကျော်သက်ဦးဆီ ဒါမှမဟုတ် နင်နဲ့သိတဲ့ အရင် ABSDF မှာ ဆေးတပ်သားလုပ်ခဲ့တဲ့လူနဲ့ ပြောကြည့်မလား"ဟု မေးပါသည်။ ကျွန်တော်က "ဆရာဝန်နဲ့မှ မဟုတ်ပါဘူး၊ ဆေးထိုးကျွမ်းတဲ့သူ ဘယ်သူနဲ့မဆို ထိုးလို့ရတယ်ပြောတာပဲ၊ ကိစ္စမရှိပါဘူး၊ ဘယ်သူနဲ့ထိုးထိုးပါ၊ နောက်ပြီး ဆေးက အကြောဆေးလည်း မဟုတ်၊ အသားဆေးဆိုတော့ ပြဿနာသိတ်မရှိပါဘူး"ဟု မရေမရာပြန်ဖြေပါသည်။ ‌

အမေရိကန်လိုနိုင်ငံတွင်နေပြီး ဆေးကို ABSDF က ဆေးတပ်သားဟောင်းနှင့်ထိုးလည်းရပါတယ်ဟု ကျွန်တော့်အတွေးမှာ အချို့လူများအဖို့ အံ့ဩစရာဖြစ်နေနိုင်ပါသည်။ ABSDF မှဆေးတပ်သားဆိုသည်များမှာ တောခိုလာသည့်ဆရာဝန်များဦးစီးကာ တောတွင်းတနေရာတွင်ဖွင့်သည့်ဆေးသင်တန်း အောင်ပြီးသူများဖြစ်သလို လက်တွေ့စစ်မြေပြင်တွင် အစမ်းသပ်ခံပြီးသူများလည်းဖြစ်ပါသည်။

ကျွန်တော် တပ်ထဲနေတုန်းကလည်း ရှေ့တန်းထွက်သည့်အခါ ခြေလျှင်တပ်များက ဆေးတပ်သားများဆေးမှူးများနှင့် ကုရသရပါသည်။ နောက်ဆုံး ကျွန်တော် ဒဏ်ရာရတော့လည်း မူဆယ်ဆေးရုံမရောက်မီ ရှေ့တန်းစခန်းကုန်း၌ ထိုဆေးတပ်သား ဆေးမှူးများကပင် ဖြတ်ရတောက်ရ ဆေးသွင်းရ ဆေးထိုးရလုပ်ရပါသည်။ သူတို့မှာ လက်တွေ့လုပ်ရဖန်များသဖြင့် ဆေးထိုး ဆေးသွင်းခြင်းနှင့် အကြမ်းထည်ဖြတ်ရတောက်ရခြင်းများတွင် ကျင်လည်ပါသည်။

ဒုက္ခသည်စခန်းမှာ နေတုန်းကလည်း တော်ရုံဖျားနာသည်များကို စခန်းဆေးရုံအထိသွားပြမနေတော့ပဲ စခန်းတွင်းရှိ ဘဝတူ ABSDF ဆေးတပ်သားဟောင်းတယောက်နှင့်ပဲ ကုခဲ့ပါသည်။ ဘာပြဿနာမှမရှိပါ။ အခြားဒုက္ခသည်များလည်း အသေးအဖွဲကိစ္စလေးများကို သူတို့နှင့်ကုပါသည်။ တခါတလေ Drip ချိတ်ဖို့လိုလျှင်လည်း သူတို့ပဲ ချိတ်ပေးပါသည်။ ထို့ကြောင့် ကျွန်တော့်အဖို့ ABSDF ဆေးတပ်သားဟောင်းများ၏ ကျင်လည်မှုအပေါ် ယုံမှားသံသယဖြစ်စရာမရှိပါ။ ထို့ကြောင့် "ဘယ်သူနဲ့ ထိုးထိုးပါ"ဟု ပြန်ဖြေခြင်းဖြစ်ပါသည်။

သို့သော် ကျွန်တော် ယခု အမေရိကတွင်နေပါသည်။ ‌တောထဲနှင့်ရှေ့တန်းလည်းမဟုတ်သလို ဒုက္ခသည်စခန်းလည်း မဟုတ်ပါ။ အမေရိကန်တွင် ဆေးကုသရေး၌ ပြဿနာအလွန်များပါသည်။ ဆတ်ဆတ်ထိမခံသည့် ကိစ္စဖြစ်ပါသည်။ တရားတဘောင်နှင့် ရုံးပြင်ကန္နားကိစ္စလည်း များပါသည်။ ဗမာပြည်ဖွားမိဘများက ဆေးကုမှား၍ သေသွားသည့်ကလေးအတွက် ဆရာဝန်နှင့်ဆေးရုံကို တရားစွဲရာ အမှုနိုင်သဖြင့် လျော်ကြေးရဖူးပါသည်။ ဆရာဝန်လည်း ဆေးကုခွင့်လိုင်စင်ပြုတ်သွားပါသည်။ ယင်းကဲ့သို့အမှုအခင်းများ အလွန်များပါသည်။ ထိုအမှုများလိုက်ပေးသည့်ရှေ့နေများ သတ်သတ်ကိုရှိပါသည်။

ယခု ကျွန်တော် ဘီတွဲလ် အသားဆေးထိုးရပါမည်။ ဆေးထိုးမှားစရာလည်း မရှိသလို အသက်အန္တရာယ်လည်းမရှိပါ။ သို့သော် ကျွန်တော် ABSDF မှဆေးတပ်သားဟောင်းနှင့် ထိုးလိုစိတ်မရှိပါ။ မယုံကြည်၍ မဟုတ်သော်လည်း မတော်တဆ တခုခုဖြစ်ခဲ့ရင်ဆိုသည့် စိုးရိမ်စိတ်ကြောင့်ဖြစ်ပါသည်။ ထိုစိုးရိမ်စိတ်မှာ ပြောရခက်ပါသည်။ မတော်တဆ တခုခုဖြစ်ခဲ့လျှင် ဝေဒနာခံရမည့်သူမှာကျွန်တော်ဖြစ်ပြီး အကျိုးဆက်ဒုက္ခခံရမည့်သူမှာ သူဖြစ်သွားပါလိမ့်မည်။ ထို့ကြောင့် ကျွန်တော် ဆေးခန်းတခုခုသွား၍ ဆေးထိုးပါမည်။

လူသည် ဘာသာတရားနှင့် အယူဝါဒများတွင်သာ အကြွင်းမဲ့ယုံကြည်တတ်သော်လည်း လူလူချင်းယုံကြည်မှု၌ အကန့်အသတ်ရှိသည်များလားဟု ကျွန်တော်တွေးနေမိပါသည်။

မျိုးမြင့်ချို။ နိုဝင်ဘာ ၃။ ၂၀၂၂