ပိုက်လုံးကြီး

"ပိုက်လုံးကြီး"

ကျွန်တော်တို့အိမ်နောက်ကလမ်းတွင် ဂျိုးဖြူပိုက်လုံးကြီးရှိပါသည်။ မှော်ဘီနှင့်တိုက်ကြီး အကြားရှိ ဂျိုးဖြူကန်ကြီးမှရေကို ရန်ကုန်မြို့သို ပို့ပေးသော ဧရာမပိုက်လုံးကြီးဖြစ်ပါသည်။

ထိုပိုက်လုံးကြီးအား အင်္ဂလိပ်ခေတ်ကဆောက်ခဲ့သည်ဟု ဆိုပါသည်။ ဤအတိုင်းဆိုလျှင် ပိုက်လုံးကြီးမှာ ရှေးဟောင်းပစ္စည်းအစစ်ဖြစ်သကဲသို့ ကိုလိုနီ့လက်ရာတခုလည်း ဖြစ်ပါသည်။

ပိုက်လုံးကြီး၏ အတိုင်းအတာအတိအကျကို ကျွန်တော်မသိသော်လည်း လူလေးငါးခြောက်ဖက်ခန့်ရှိမည်ဟု မှန်းရပါသည်။ အမြင့်မှာ အရပ်မြင့်မြင့်လူတယောက်၏ လက်တဖောင်ခန့်ရှိမည်ထင်ပါသည်။ ပိုက်လုံးကြီး၏ အတွင်းတွင် ကွန်ကရစ်တထပ်ခံထားပြီး အပြင်တွင် သံအထု တလက်မခွဲခန့်ရှိမည်ထင်ပါသည်။

ပိုက်လုံးကြီးနှင့်ကပ်လျှက်တွင် ထရော်လီလမ်း ဖောက်ထားပါသည်။ တချို့နေရာများတွင် ပိုက်လုံးအဆစ်ပိုင်းများတင်ထားသည့် ထရော်လီပျက်များ မြင်ရပါသည်။ အင်္ဂလိပ်ခေတ်ကတော့ ထိုထရော်လီလမ်းပေါ်တွင် ပိုက်လုံးစစ်ဆေးရေးတာဝန်ရှိသူများ စီးခဲ့ကြပါလိမ့်မည်။ ထရော်လီတွန်းသမားများမှာ ဆင်းရဲသား အိန္ဒိယတိုက်ဖွားများဖြစ်မည်ထင်ပါသည်။ ထိုထရော်လီများနှင့်ပင် ပိုက်လုံးကြီး၏အဆက်များကို သယ်ယူ၍ ပိုက်လုံးကြီးကိုဆောက်ခဲ့ခြင်းဖြစ်ပါသည်။

ပိုက်လုံးကြီးပေါ်တွင် လူတယောက်ကောင်းကောင်းလျှောက်နိုင်ပြီး လူနှစ်ယောက်ရှောင်လို့လည်းရပါသည်။ ကျွန်တော်တို့ ငယ်ငယ်က ပိုက်လုံးကြီးပေါ်တွင် ဂွေလှိမ့်ဖူးသလို ခြေတပေါင်ကျိုးလည်း ခုန်ခဲ့ဖူးပါသည်။ လူစွမ်းကောင်းကာလသားများက စက်ဘီးပင် တက်စီးပြတာတွေ့ဖူးပါသည်။

ပိုက်လုံးကြီးသည် တခါတလေ တရွာနှင့်တရွာ၊ တရပ်ကွက်နှင့်တရပ်ကွက် ဖြတ်လမ်းမှသွယ်ထားသော လမ်းကဲ့သို့ဖြစ်နေပါသည်။ ရပ်ကွက်တွေအတွင်းမှ ပတ်သွားနေရလျှင် ကွေ့ကောက်၍ ခရီးရှည်သည့်နေရာများတွင် ပိုက်လုံးကြီးသည် ဖြတ်လမ်းဖြစ်ပါသည်။

လူတွေ နေ့စဉ် ပိုက်လုံးကြီးပေါ်မှလျှောက်ကြ၍ ပိုက်လုံးကြီးအပေါ်၌ပင် လူသွားလမ်းရာထင်နေပြီး သံရောင်ပြောင်နေပါသည်။ အဲ့လောက်ကြီးသည့်ပိုက်လုံးကြီးပေါ်သို့ လူတွေ ဘယ်လိုတက်သလဲဆိုပါက ပိုက်လုံးကြီးတွင် ပေတရာခန့်ရှိတိုင်း အဆက်တဆက်ရှိပါသည်။ ထိုအဆက်နှစ်ခုကို အတွင်းတွင်ဂဟေဆော်ထားပြီး အပြင်ကထပ်ချုပ်သည့်သဘော သံခါးပတ်ကြီး ပတ်ထားပါသည်။ ထိုသံခါးပတ်ကြီးတိုင်းတွင် တခုခုနှင့်တခု တပေခန့်ခြားပြီး မူလီတွေအရှည်ကြီးတွေ စုပ်ထားပါသည်။ ထိုမူလီကြီးများအား လက်ဖြင့်ကိုင် ခြေဖြင့်နင်းကာ ပိုက်လုံးကြီးပေါ်သို့တက်ရပါသည်။ မူလီများမှာ လှေကားသဖွယ်ဖြစ်နေပါသည်။

တနေ့တနေ့ ရေဂါလန်မည်မျှရန်ကုန်သို့ပို့နေမှန်း ကျွန်တော်တို့ မသိကြပါ။ သို့သော် ထိုပိုက်လုံးကြီးသွယ်တန်းထားရာတလျှောက် နေရာတချို့တွင် သူ့သတ်မှတ်ချက်နှင့်သူ ရေသွယ်ရန်နေရာများ ဆင်ပေးထားပါသည်။ ထိုနေရာများကို ကျွန်တော်တို့က ရေစက်ဟုခေါ်ကြပါသည်။ ထိုရေစက်နေရာများမှဖောက်၍ အိမ်များသို့ရေသွယ်ယူရပါသည်။ ထိုရေသည် အိမ်တအိမ်အတွက် သုံးရေသောက်ရေဖြစ်ပါသည်။ ပိုက်လုံးကြီးနှင့် နီးသည့်ရပ်ကွက်များတွင် ပိုက်လုံးကြီးမှ သွယ်ယူလာဟောရေများကို ရေတိုင်ပြုလုပ်၍ ရပ်ကွက်နေသူများထဲ ရေဖြန့်ပေးပါသည်။ ကျွန်တော်တို့က ထိုရေတိုင်များကို ဘုံပိုင်ဟုခေါ်ပါသည်။ တကယ်လည်း ဘုံပိုင်ဖြစ်ပါသည်။

ပိုက်လုံးကြီး၏အတွင်းပိုင်းကို တနှစ်ဘယ်နှကြိမ် သို့မဟုတ် ဘယ်နှနှစ်တကြိမ်ဆေးသလဲတော့ မသိပါ။ ဆေးတော့ဆေးပါသည်။ ပိုက်ဆေးမည် ဘယ်နှရက်ကြာမည်စသည်တို့ကို လူတွေကိုကြိုပြောသလို လူတွေကလည်း ရေ ကြိုစုကြရပါသည်။ ထိုရက်များတွင်သာ ရေပြတ်ပါသည်။ ဂျိုးဖြူကန်ကိုလည်း သန့်ရှင်းရေးလုပ်ပါသည်။ ရေ အရည်အသွေးကို ပုံမှန်စစ်ဆေးသည်ဟုဆိုပါသည်။

ကျွန်တော်သည် မိမိမွေးရာဇာတိမြေကို သတိရသည့်အခါတိုင်း ထို ဂျိုးဖြူပိုက်လုံးကြီးလည်း အောက်မေ့တတ်ပါသည်။ တခါများ ထိုပိုက်လုံးကြီးအား အိပ်မက်ပင်မက်ပါသည်။ အိပ်မက်ထဲတွင် ကျွန်တော်က ဘောင်းဘီတိုဖြင့် ပိုက်လုံးကြီးပေါ်တွင် ဂွေလှိမ့်နေပါသည်။ ပြောရလျှင် ပိုက်လုံးကြီးသည် ရေအတွက်သက်သက်သာမဟုတ် ကျွန်တော့်တို့ ငယ်ဘဝ၏အစိပ်အပိုင်းတရပ်လည်းဖြစ်သည်ဟုဆိုပါ လွန်အံ့မည်မထင်ပါ။

ဟိုတနေ့က ထောက်ကြန့်မှမိတ်ဆွေတယောက်နှင့် စကားပြောရင်း ပိုက်လုံးကြီးဆီရောက်သွားတော့ သူက "ပိုက်လုံးကြီးကတော့ အရင်အတိုင်းပဲဗျ။ ဒါပေမယ့် ရေကမသန့်တော့ဘူး။ ရေဆိုးသာသာဖြစ်နေပြီ၊ နံလည်းနံတယ်၊ အနည်တွေလည်းပါတယ်၊ ဂျိုးဖြူကန်ကြီးလည်း သန့်ရှင့်ရေး မလုပ်တော့သလို ပိုက်လုံးကြီးကိုလည်း မဆေးကြတော့ဘူးနဲ့တူတယ်၊ လာတဲ့ရေက မသန့်တော့ဘူး၊ သောက်ရေလုပ်ဖို့နေနေသာသာ သုံးရေလုပ်ရတာတောင် စိတ်မသန့်ဘူး၊ ဒီတော့ အိမ်တိုင်းလိုလို ရေတွင်းတူးရင်တူး၊ မတူးရင် အဝီစိတွင်းတွေ တူးကြရတာပဲ"ဟု ပြောပြပါသည်။

ကျွန်တော်က "မြေအောက်ရေတွေ အဲ့သလောက်ထုတ်ယူနေကြရင် ကြာရင် မြေအောက်ရေအရင်းအမြစ်ခမ်းခြောက်သွားမှာ မြေပြိုမှာတွေ ဖြစ်လာမှာပဲ"ဟုပြောတော့ သူက "ဖြစ်ကာမှဖြစ်ရောပဲ သူငယ်ချင်း၊ လောလောဆယ် ရေကလိုနေတာကိုး၊ နောင်ခါလာ နောင်ဈေးပဲ"ဟုပြောပါသည်။

လူ့မျိုးဆက်တို့သည် အနာဂတ်သို့မျှော်မှန်းကာ လက်ငင်းဘဝများကို ပေးကြရသူများဖြစ်ပါသည်။ လောလောဆယ်အဆင်ပြေပြီး နောင်တော့ရောက်လျားပဲဆိုသည်မှာ မတွေးကောင်း မတွေးအပ်ရာဟု ဆိုကြပါသည်။ သို့သော် ရေမသန့်တော့ခြင်း ဂျိုးဖြူကန် ပိုက်လုံးကြီးနှင့် အဝီစိတွင်းတူးခြင်းများအား ထို မတွေးကောင်းမတွေးအပ်ရာစာရင်းသွင်းလျှင် ရေသန့်လိုနေသူများ၏ မျက်နှာကိုကြည့်ရမည် ကျွန်တော်ထင်ပါသည်။

မျိုးမြင့်ချို။ နိုဝင်ဘာ ၁၃။ ၂၀၂၂