ဒုက္ခသည်

ဒုက္ခသည်

ဘယ်သူက Refugee ကို ဒုက္ခသည်ဟု စ ဘာသာပြန်ခဲ့သလဲ မသိပါ။  မလှပသော်လည်း တွင်တော့ တွင်ကျယ်သွားသည့်စကားလုံးဖြစ်ပါသည်။ Refugees များ ခိုလှုံနေထိုင်ရာ Refugees Camps များအား ဒုက္ခသည်စခန်းဟု ခေါ်ပါသည်။ ကျွန်တော်လည်း ထိုင်း-ဗမာနယ်စပ်က ဒုက္ခသည်စခန်းတခုတွင် ကာလတခုကြာ နေခဲ့ဖူးပါသည်။ ထို့ကြောင့် ကျွန်တော်သည် ဒုက္ခသည်ဖြစ်ခဲ့ပါသည်။ တကယ်တော့ ဒုက္ခသည်စခန်းဆိုသည်မှာ ဒုက္ခများနှင့် အခါခပ်သိမ်း ပြည့်နှက်နေသည်တော့ မဟုတ်ပါ။ အတွေ့အကြုံသစ်များနှင့်အတူ ရံဖန်ရံခါ ကြည်နူးဆွတ်ပျံ့ဖွယ်ကလေးများ အထိုက်အလျှောက်ရှိပါသည်။ အောက်မေ့ချင်စရာများလည်း ရှိပါသည်။ လူတွေနေသည့်အရပ် မဟုတ်လား။ သူငယ်ချင်းကဗျာဆရာကတော့ ဆေးလိပ်လေးဖွာကာ တောင်စဉ်တောင်းတန်းကြီးများကိုငေးရင်း “ဒုက္ခသည်စခန်းဆိုတာလည်း အဝေးကြည့်တော့ လှတာပဲဗျ”ဟု ပြောခဲ့တာကို ယခုတိုင်အမှတ်ရနေပါသေးသည်။ သူ့သဘောအရဆိုလျှင် ဒုက္ခသည်စခန်းသည် အနီးကြည့်တော့ အကျည်းတန်သည်ဟုဆိုရမည်ထင်ပါသည်။

 

ကျွန်တော်တို့သာ ဒုက္ခသည်ဖြစ်ခဲ့သည်မဟုတ် သခင်ယေရှုလည်း ဒုက္ခသည်ဘဝကိုဖြတ်သန်း လွန်မြောက်ခဲ့ရပါသည်။  ခရစ်တော်၏သူငယ်ဘဝသည် တနေရာမှတနေရာ ပြေးဝင်ခိုလှုံရင်းနေခဲ့ရသည်မို့ ယေရှုခရစ်တော်သည် Refugee and Immigrant ဖြစ်ခဲ့သည်ဟု တရားဟောဆရာများက ဟောပါသည်။ သူငယ်တော်ယေရှု၏ ဒုက္ခသည်ဘဝတွင်လည်း အောက်မေ့စရာ အမှတ်ရစရာများရှိခဲ့ပါလိမ့်မည်။ ကိုယ်တော်တိုင်ရော Disciples များကပါ ပြန်မပြောပြသဖြင့် ကျွန်တော်တို့ မသိကြရပါ။

 

ရှင်မဿဲခရစ်ဝင်ကျမ်း အခန်းကြီး ၂ အခန်းငယ် ၁၃-၁၅ တွင် “ထိုသူတို့တို့ သွားကြသည်နောက် ယောသပ်သည် အိပ်မက်ကိုမြင်သည်မှာ၊ ထာဝရဘုရား၏ကောင်းကင်တမန်သည် ထင်ရှား၍၊ သင် ထလော့ မယ်တော်နှင့် သူငယ်တော်ကိုဆောင်ယူပြီးလျှင် အဲဂုတ္တပြည်သို့ပြေး၍ တဖန်ငါပြောသည့်တိုင်အောင် ထိုပြည်၌ နေလော့။ ဟေရုဒ်မင်းကြီးသည် သူငယ်တော်ကို သတ်အံ့သောငှာ ရှာလိမ့်မည်ဟုဆိုလေ၏၊ ထိုအခါ ယောသပ်သည် ထ၍ မယ်တော်နှင့်သူငယ်တော်ကို ညဉ့်အချိန်၌ဆောင်ယူပြီးလျှင် အဲဂုတ္တပြည်သို့ထွက်သွား၍ ဟေရုဒ်မင်းကြီး အနိစ္စရောက်သည့်တိုင် ထိုပြည်၌နေလေ၏။ ဤအကြောင်းအရာကား ငါ့သားကို အဲဂုတ္တပြည်မှငါခေါ်ခဲ့သည်ဟု ထာဝရဘုရားသည် ပရောဖက်ဖြင့်ထားတော်မူသောဗျာဒိတ်တော်ကို ပြည့်စုံမည့်အကြောင်းတည်း။ ဟု ဖော်ပြပါရှိ၏။

 

တခါ ရှင်မဿဲခရစ်ဝင် အခန်းကြီး ၂ အခန်းငယ် ၁၉-၂၃ တွင် “ဟေရုဒ်မင်းကြီး အနိစ္စရောက်သည်နောက် ယောသပ်သည် အဲဂုတ္တပြည်၌ အိပ်မက်ကို မြင်ပြန်သည်မှာ၊ ထာဝရဘုရား၏ကောင်းကင်တမန်သည် ထင်ရှား၍ သင် ထလော့ မယ်တော်နှင့်သူငယ်တော်ကိုဆောင်ယူပြီးလျှင် ဣသရေလတိုင်းသို့သွားလော့၊ သူငယ်တော်ကို သတ်အံ့သောငှာ ရှာသောသူတို့သည် သေကြပြီဟုဆိုလေ၏။ ထိုအခါ ယောသပ်သည် ထ၍ မယ်တော်နှင့် သူငယ်တော်ကိုဆောင်ယူပြီးလျှင် ဣသရေလတိုင်းသို့သွား၍ ရောက်သည်ရှိသော် ဟေရုဒ်မင်းကြီး၏အရာ၌ သားတော် အာခေလသည် ယုဒပြည်တွင် မင်းပြုကြောင်းကိုကြားရလျှင် ထိုပြည်သို့မသွားဝံ့၍ အိပ်မက်၌ ဗျာဒိတ်တော်ကို ရပြန်ပြီးမှ ဂါလိလဲပြည်သို့သွား၍ ခရစ်တော်ကို နာဇရက်လူဟု ခေါ်ဝေါ်ကြလတံ့ဟူသော ပရောဖက်တို့၏ နှုတ်ထွက်နှင့်အညီ နာဇရက်အမည်ရှိသောမြို့သို့ရောက်၍ အမြဲနေလေ၏။ ဟု ဖော်ပြပါရှိ၏။ ဒုက္ခသည်ဖြစ်ခဲ့သော ယေရှုသည် ယုံကြည်သူတို့အဖို့ ခိုကိုးရာဖြစ်ပါသည်။

 

ကျွန်တော်ကား ကျွန်တော့်အား ငြှိုးသူရန်ဖက်ပမာ တစိမ်းပြင်ပြင်ဆက်ဆံခဲ့သည့်ဇာတိကိုစွန့်ကာ အမေရိက၌ ပဝတ္တိသားဖြစ်နေလေပြီ။ ကျွန်တော် အမေရိကရောက်လာတော့ ကျွန်တော့်အား Former Refugee ဟု လူတချို့က ခေါ်ကြပါသည်။ ကျွန်တော် မနာပါ။ ရှက်ရွံ့သိမ်ငယ်စိတ် ခံစားမှုလည်း မဖြစ်ပါ။ အမေရိကကို ဘယ်လို ရောက်လာသလဲဟု မေးတိုင်း Refugee Status နှင့်ဟု မဆိုင်းမတွ ကျွန်တော် ပြန်ဖြေ၏။ ခု အမေရိကသည် ကျွန်တော် အမြဲနေသောအရပ်ဖြစ်သော်လည်း ခေါင်းချရမည့်နေရာ ဟုတ်မဟုတ်တော့ မသေချာသေးပါ။ လူတချို့သည် ချက်မြှုပ်ရာတွင် ခေါင်းချချင်ကြသည် မဟုတ်ပါလား။ 

မျိုးမြင့်ချို။ နိုင်ဝင်ဘာ ၂၀။ ၂၀၂၂