သပိတ်

"သပိတ်"
အမေရိကမှာ မီးရထားသပိတ်ပြန်ပေါ်လာနိုင်ပြန်ပြီ။ ဟိုတလောက တခါဖြစ်လိုက်သေးတယ်။ အလုပ်သမားတွေနဲ့ မီးရထားကုမ္ပဏီတွေကြား သဘောတူညီမှုတချို့ရပြီး အေးအေးချမ်းချမ်းပြီးသွားလို့ ဂျိုးဘိုင်ဒန်အစိုးရ အသက်ရှူချောင်သွားတယ်။ 

ရထားသပိတ် တကယ်ဖြစ်ခဲ့ရင် အမေရိကန်စီးပွားရေးက တနေ့ကို တစ်ဘီလီယံထောက် ထိခိုက်နိုင်တယ်။ ခုတခါလည်း သပိတ်ကို မီးရထားအလုပ်သမားများသမဂ္ဂက ဦးဆောင်တာပါပဲ။ အလုပ်သမားသပိတ်ဆိုပေမယ့် ကော်လာပြာဝန်ထမ်းတွေပါ အကုန်ပါပါတယ်။ ခုတချီတော့ ကွန်ဂရက်စ်ကပါ ဝင်ပြီး ညှိနှိုင်းမယ်လို့ ထင်ရတယ်။ 

အမေရိကန်မှာ အလုပ်သမားသပိတ်နဲ့ အခြားသပိတ်ကြီးတွေပေါ်တိုင်း အရင်းရှင်ကြီးတွေကိုင်ထားတဲ့ မီဒီယာတွေက အလုပ်သမားတွေ သပိတ်သမားတွေဘက်ကို ဖိဖိနှိပ်နှိပ်ပြောလေ့ ရေးလေ့ရှိတယ်။ သပိတ်တွေတော့ ပေါ်ပြန်ပြီ။ လူတွေတော့ အခက်တွေ့တော့မှာပဲ။ ကုန်ဈေးနှုန်းတွေတော့ တက်ကုန်တော့မှာပဲ ဘာညာနဲ့ပြောပြီး သပိတ်သမားတွေနဲ့ အခြားလူတွေကို တဘက်လှည့်နဲ့ရန်တိုက်ပေးသလိုလို သွေးထိုးလေ့ရှိကြတယ်။ 

ခုလည်း အဲ့သလိုပြောနေသံတွေ ကြားရပါတယ်။ အစိုးရဆိုတာ ဘယ်အစိုးရမျိုးဖြစ်ဖြစ် သူ့ကို တိုက်ရိုက်ဆန့်ကျင်တဲ့သပိတ် ဒါမှမဟုတ် သူ့ကို သွယ်ဝိုက်ထိခိုက်လာမယ့်သပိတ် ဘယ်သပိတ်မျိုးကိုမဆို မနှစ်သက်ကြဘူး။ ဒီတော့ အပေးအယူလုပ်ညှိုနှိုင်းတန်ညှိုနှိုင်း ဈေးဆစ်တန်တာဆစ်ပြီး ပြေလည်အောင် အသာတကြည်လုပ်ကြည့်တယ်။ အဲ့သလိုလုပ်နေချိန်မှာ သပိတ်သမားတွေနဲ့ ပြည်သူတွေကို သွေးကွဲအောင် အမြင်လွဲအောင် သွေးထိုးလှုံ့ဆော်တာတွေလုပ်ကြတာပဲ။ သပိတ်သမားတွေကိုလည်း အေးအေးချမ်းဆန္ဒပြတာကနေ ဆူပူလာအောင် ဖျက်လိုဖျက်ဆီးတွေလုပ်လာအောင်၊ တန်ပြန်သပိတ်တွေပေါ်လာအောင် သူ့လူကိုယ့်ဘက်သားတွေ ပဥ္စမံတပ်သားတွေသွင်းပြီး သွေးဆူအောင်လုပ်ပေးတတ်တာပဲ။ 

နောက်ဆုံး ဘယ်လိုမှ စေ့စပ်လို့မရတော့ရင် အကြမ်းနည်းသုံးပြီး မရရအောင်ဖြိုခွဲကြတာပဲ။ ပစ်တာခတ်တာ သတ်တာဖြတ်တာ ဖမ်းတာဆီးတာ ထောင်ချတာ တရားစွဲတာတွေလုပ်တော့တာပဲ။ ဒါ ဘယ်လောက်ကောင်းပါတယ်ဆိုတဲ့အစိုးရမျိုးဖြစ်ဖြစ် လုပ်လေ့ရှိတဲ့အလုပ်ပဲ။ ဒါ သူတို့ အာဏာတည်မြဲရေးနဲ့ အစိုးရတည်ငြိမ်ရေးအတွက်လုပ်တာပဲ။ 

ဗမာပြည်စစ်အုပ်စုလို အစိုးရမျိုးကြတော့ သူ့ဆန့်ကျင်တဲ့ ဘယ်လိုသပိတ်မျိုးကိုမှ ခွင့်မပြုဘူး။ သပိတ်တလုံး နည်းနည်းလေးပေါ်လိုက်တာနဲ့ ချက်ခြင်း လက်မြန်ခြေမြန်ဖြိုခွဲပစ်တာချည်းပဲ။ လက်နက်ခြေဆုံးခေါင်းဆုံးတပ်ထားတဲ့ စစ်အင်အားကြီးနဲ့ လက်နက်မဲ့ဆန္ဒပြသူတွေကို သွေးထွက်သံယို သတ်သတ်ဖြတ်ဖြတ် ဖြိုခွဲပစ်လိုက်တာချည်းပဲ။ တချိန်တည်းမှာ သူတိ့ကိုထောက်ခံတဲ့ လုပ်ကြံဆန္ဒပြပွဲတွေဖန်တီးတာ။ သူတို့ကိုင်ထားတဲ့ မီဒီယာတွေကနေ တန်ပြန်ဝါဒဖြန့်ချိတာတွေ လုပ်တော့တာပဲ။ ဒါနဲ့မှ မရရင် ပျူစောထီးလို မဘသလိုအဖွဲ့တွေဖွဲ့ လက်နက်တပ်ဆင်ပေးတာ။ လက်ရဲဇက်ရဲ ဥပဒေမဲ့သတ်ဖြတ်ခွင့်တွေပေးတော့တာပဲ။  

ခုလက်ရှိ ဗမြည်အနေအထားဟာ ဘယ်တုန်းကနဲ့မှမတူအောင် ဆိုးရွားနေတာပါ။ စစ်အုပ်စုအဆက်ဆက် စစ်အာဏာသိမ်းပြီး တိုင်းပြည်ကိုကြီးစိုးခဲ့ပေမယ့် ခု မင်းအောင်လှိုင်စစ်အုပ်စုလောက် လက်ရဲဇက်ရဲလူသတ်တဲ့ အကြမ်းဖက်တဲ့ အစိုးရမျိုးမရှိသေးဘူး။

ဒါ့ကြောင့်လည်း လုထုကမခံမရပ်နိုင်ဖြစ်ပြီး နေရာဒေသအနှံ့အပြားမှာ ပုံစံမျိုးစုံနဲ့ ခုခံအန်တုနေကြရတာပဲ။ ဒီအထဲမှာ လက်နက်နည်းနဲ့ ဆန့်ကျင်တော်လှန်မှုတွေလည်း တပြည်လုံးဖြစ်နေတာပဲ။ လက်နက်ကိုင် အုံကြွတော်လှန်ကြတယ်ဆိုတာ လက်နက်နဲ့ဖိနှိပ်မှုရှိနေလို့ပဲ။

လူထုက ရွေးကောက်ပွဲနဲ့၊ မဲနဲ့၊ ဆန္ဒပြတဲ့နည်းနဲ့ အာဏာပြဿနာကို အေးအေးချမ်းချမ်းဖြေရှင်းလိုပေမယ့် အုပ်စိုးသူက ခွင့်မပြုတော့ တိုက်ပွဲပုံစံဟာပြောင်းသွားရတာပါပဲ။ စေ့စေ့တွေးကြည့်ရင် တိုက်ပွဲပုံစံဟာ မိမိက စရွေးချယ်ရတာမဟုတ်ပဲ ရန်သူကပြဌာန်းတာသာဖြစ်နေတာပါပဲ။ ဖိနှိပ်မှုရှိသမျှတော့ ဆန့်ကျင်အုံကြွမှုတွေလည်းရှိနေမှာပါပဲ။ ချုပ်ရရင် ဒါဟာ အာဏာပြဿနာပါပဲ။
မျိုးမြင့်ချို။ နိုဝင်ဘာ ၂၂။ ၂၀၂၂