အငြင်းပယ်ခံရခြင်း

အငြင်းပယ်ခံရခြင်း

ကျနော် ထောင်ထဲဝင်သွားတုန်းက သုံးခေါက်ချိုးမှတ်ပုံတင်နဲ့ပါ။ ကျွန်တော် ထောင်က နောက်ဆုံးအကြိမ် ထွက်လာတော့ လူတွေမှာနိုင်ငံသားစိစစ်ရေးကဒ်တွေနဲ့ပါ။ ဒါနဲ့ ကျွန်တော်လည်း မှတ်ပုံတင်အသစ်ပြန်လဲရမယ်ဆိုပြီး မြို့နယ်လဝကရုံးကိုသွားပါတယ်။ ရပ်ကွက်အတွင်းနေထိုင်သူဖြစ်ကြောင်း ရပ်ကွက်ထောက်ခံစာလည်း ပါပါတယ်။

ရုံးရောက်တော့ ကျွန်တော့်ကြည့်ပြီး ဘယ်ကဘယ်လိုသိတယ်မသိ စာရေးမက ခနနော်ဆိုပြီး မြို့နယ်မှူးရုံးခန်းထဲ ဝင်သွားပါတယ်။ ခနနေတော့ ပြန်ထွက်လာပြီး မြို့နယ်မှူးက တွေ့ချင်လို့ပါတဲ့ သူ့အခန်းထဲသွားလိုက်ပါဆိုပြီး လမ်းဖယ်ပေးပါတယ်။

ဒါနဲ့ ကျွန်တော်လည်း မြို့နယ်မှူးအခန်းထဲ ဝင်လာပါတယ်။ တွေ့တော့ မြို့နယ်မှူးက ခင်ဗျားကို နိုင်ငံသား စိစစ်ရေးကဒ်တော့ လုပ်ပေးချင်ပါတယ်၊ လုပ်လည်း လုပ်ပေးရမှာပါ၊ ဒါပေမဲ့ ကျွန်တော်တို့မှာ အထက်က ညွှန်ကြားချက်ရှိနေလို့ စောင့်ရပါမယ်လို့ပြောပါတယ်။ ကျွန်တော်က အထက်ညွှန်ကြားချက်ဆိုတာ ဘာလဲဗျ လို့မေးပါတယ်။ သူက အစိုးရဆန့်ကျင်လို့ နိုင်ငံရေးမှုတွေနဲ့ထောင်ကျပြီး ပြန်လွတ်လာသူတွေကို ခွင့်ပြုချက်ရမှ မှတ်ပုံတင်လုပ်ပေးရမယ်လို့ ဆိုထားတာပါ လို့ဖြေပါတယ်။

အထက်ကဆိုတာ ဘယ်သူတွေလဲဗျ၊ နောက်ပြီး ကျွန်တော် နိုင်ငံရေးမှုနဲ့ထောင်ကျပြီး ထောင်ကလွတ်လာတာကိုရော ခင်ဗျားက ဘယ်လိုသိနေတာလဲဗျလို့ မေးကြည့်ပါတယ်။ သူက ဟိုလိုလို ဒီလိုလို မအီမလည်လုပ်နေပြီး အထက်က ပြောထားလို့ပါဗျဆိုပြီး ပြောပြန်ပါတယ်။ ကျွန်တော်လည်း သူ ဖြေရကျပ်နေပုံရတယ်ဆိုပြီး ဆက်မေးမနေတော့ပဲ ထွက်လာပါတယ်။

နောက်တော့ နယ်မြေထောက်လှမ်းရေးတပ်ကြပ်နဲ့ သွားတွေ့ပါတယ်။ ကျွန်တော့်ကို ဘာလို့ မှတ်ပုံတင်လုပ်ပေးဖို့ ငြင်းတာလဲဆိုပြီး မေးပါတယ်။ သူက ကျုပ်တို့က တားမြစ်ထားတာမရှိပါဘူး။ လဝက မှာ အကြောင်းရှိလို့ နေပါလိမ့်မယ်။ ခင်ဗျားက ကုလားဆိုတော့ ဆိုပြီးပြောပါတယ်။ ဘာဆိုင်လဲဗျ ကျုပ်လည်း နိုင်ငံသားပဲ ကျုပ်မိဘ နှစ်းပါးရော ကျုပ်ညီအကိုမောင်နှမတွေရော နိုင်ငံသားတွေပဲလို့ပြောတော့ သူက ကျွန်တော် အထက်ကို မေးကြည့်ပေးပါ့မယ်ဆိုပြီး စကားဖြတ်ပါတယ်။ ကျွန်တော်လည်း စိတ်တိုတိုနဲ့ လှည့်ထွက်လာခဲ့ပါတယ်။ ဒီအကြောင်းကို အိမ်မှာ ဘယ်သူ့ကိုမှ ပြန်မပြောပြဖြစ်ပါ။

ကျွန်တော်ဟာ အစ္စလာမ်ဘာသာဝင်မိဘနှစ်ပါးက ဖွားမြင်ခဲ့သူပါ။ မိဘတွေလည်း ဗမာပြည်ဖွား ဗမာပြည်သားတွေပါ။ ကျွန်တော် စစ်တပ်ထဲလည်း အမှုထမ်းခဲ့သူပါ။ ခု သူတို့ကိုဆန့်ကျင်ပြီး ထောင်ကျ၊ ထောင်ကလွတ်လာတော့ နိုင်ငံသား ပြန်ဖြစ်ခွင့်ကို တားမြစ်နေတဲ့သဘောပါပဲ။ ဒါနဲ့ နောက်တနည်းကြိုးစားကြည့်မယ်ဆိုပြီး လဝကမှာ ဒုဦးစီးမှူးခေါ်မလား လုပ်နေတဲ့ အမတယောက်ကိုချဉ်းကပ်ပြီး တိုင်ပင်ကြည့်ပါတယ်။ သူက တရက်နှစ်ရက်စောင့်ဆိုပြီး ပြောပါတယ်။

နှစ်ရက်ကြတော့ သူ့ကို သူ့အိမ်မှာ နောက်တကြိမ်သွားတွေ့ပါတယ်။ တွေ့တော့ သူက မင်းကို နိုင်ငံသားစိစစ်ရေးကဒ်အတွက် လျှောက်လွှာပုံစံဖြည့်ပေးမယ်လေ။ ရတာ မရတာကတော့ အမလည်း မပြောတတ်ဘူးလို့ဆိုပါတယ်။ ဒါဆိုလည်း လျှောက်လွှာပုံစံဖြည့်ကြည့်ရမှာပေါ့လို့ပြောတော့ ဖောင်ဖြည့်ဖို့အတွက် ၃ ထောင်ပေးရမယ်လို့ပြောပါတယ်။ ကျွန်တော်လည်း စိတ်ထဲ ဆတ်ကနဲဖြစ်သွားပြီး ဘာလို့ ပိုက်ဆံပေးရမှာလဲဗျ၊ အဲ့ဒါ အမတို့အလုပ်မဟုတ်လား လို့ပြောတော့ သူက အမတို့အလုပ်တော့ အမတို့အလုပ်ပေါ့၊ ဒါပေမဲ့ ဒါက ဒီလိုပဲ ပေးရပါတယ်လို့ဖြေပါတယ်။ ဒါဆိုလည်း ပေးမယ်လေ၊ ဒါပေမယ့် အမ ကျွန်တော့်ဆီက ငွေ ၃ ထောင်ယူကြောင်း သက်သေတခုခုတော့ ပေးရမယ်။ အမလည်း လက်မှတ်ထိုး၊ ကျွန်တော်လည်း လက်မှတ်ထိုးမယ်လေလို့ ခတ်ဆတ်ဆတ်ပဲပြောလိုက်ပါတယ်။ ဒီတော့သူက ဒါဆိုလည်း ငါ့မောင်ရယ် ရုံးမှာပဲ သွားလုပ်ပါဆိုပြီး ထွက်သွားပါတယ်။ ကျွန်တော်လည်း ကြောင်တောင်တောင်နဲ့ ပြန်ထွက်လာခဲ့ပါတယ်။ အဲ့အကြောင်းကိုလည်း အိမ်မှာ ပြန်မပြောဖြစ်ပါဘူး။

နောက်တော့ ကျွန်တော်ဆုံးဖြတ်ချက် ချလိုက်တယ်။ နိုင်ငံသားစိစစ်ရေးကဒ်အတွက် ဘယ်ကောင့်မှ အောက်ကျ မခံတော့ဘူး၊ ငါ့မှာ တပ်ထွက်လက်မှတ်ရှိတယ်၊ အဲ့ဒါနဲ့နေမယ်လို့ဆိုပြီး နေလည်းနေပါတယ်။ အဲ့အချိန်က နိုင်ငံရေးထောင်ကျတွေလွတ်လာရင် နယ်မြေခံထောက်လှမ်းရေးက မျက်စေ့ဒေါက်ထောက်ပြီး ကြည့်ပါတယ်။ အိမ်ကိုလည်း မကြာမကြာ လာပါတယ်။ သန်းကောင်စာရင်းလည်း ခနခနစစ်ပါတယ်။ နေရထိုင်ရ ကျပ်ပါတယ်။ အိမ်သားတွေ စိတ်ညစ်ရပါတယ်။ အဲ့သလိုလုပ်ရင်း အိမ်လာတဲ့အခါ သူတို့ဘက်ကလည်း နိုင်ငံသားစိစစ်ရေးကဒ် အကြောင်း စကားမဟတော့ပါ။ ကျွန်တော်လည်း မပြောတော့ပါ။

ကျွန်တော့်အဖြစ်က နိုင်ငံသားမိဘ နှစ်ပါးကလည်းမွေးလာ။ ကိုယ်တိုင်လည်း နိုင်ငံသားဖြစ်ရုံမက စစ်မှုထမ်းဟောင်းပါ ဖြစ်ရဲ့သားနဲ့ သူတို့ကိုဆန့်ကျင်လို့ နိုင်ငံသားဖြစ်ခွင့် ငြင်းပယ်ခံရသူပါ။ ကျွန်တော် စိတ်ထိခိုက်ပါတယ်။ ကျွန်တော် ဒုတိယတန်းစားနိုင်ငံသားတယောက်လို ခံစားရပါတယ်။ သူတို့ကို ပိုဆန့်ကျင်လိုစိတ် ပိုမုန်းတီးစိတ်တွေဖြစ်ခဲ့ပါတယ်။ ကျွန်တော် နိုင်ငံရေးလုပ်လို့ သူတို့ကိုဆန့်ကျင်လို့ အစ္စလမ်ဘာသာဝင်မိဘတွေကမွေးခဲ့လို့ ကျွန်တော့်အပေါ် ငြှိုးသူရန်ဘက်သဖွယ် တစိမ်းပြင်ပြင်လိုသဘောထားခဲ့ကြ ရန်သူသဖွယ်သတ်မှတ်ခဲ့ကြသူတွေကို ကျွန်တော် ကြုံရတွေ့ရတာပါ။ စိတ်ထဲတော့ တနုံ့နုံ့ခံစားရပါတယ်။ ကျွန်တော် တတိယနိုင်ငံထွက်ဖြစ်ဖို့ဖန်လာတဲ့အကြောင်းအရာထဲမှာ ဒါလည်း တချက်ပါပါတယ်။

မျိုးမြင့်ချို။ နိုဝင်ဘာ ၂၁။ ၂၀၂၂