ဗကပနဲ့ကျောင်းသားသမဂ္ဂ

ဗကပနဲ့ကျောင်းသားသမဂ္ဂ
ဗကပ၏ ဇာတိဇစ်မြစ်
တကသ၊ ဗကသနဲ့ တို့ဗမာအစည်းအရုံး (သခင်ပါတီ)တုိ့အထဲမှာ ဗကပသန္ဓေတည်ပြီး ၁၉၃၉ ခုမှာ မွေးဖွားလာတာဖြစ်ပါတယ်။
ဗမာပြည်က ခေတ်ပညာတတ်တွေဟာ ၁၉၁၇ ရုရှား အောက်တိုဘာတော်လှန်ရေးအမြောက်သံကို ၁၉၂၀ မတိုင်မီကတည်းက ကြားပါတယ်။ ၁၉၂၀ လွန်တော့ ဗမာပြည်မှာ အိန္ဒိယကွန်မြူနစ်ပါတီနဲ့ တရုတ်ကွန်မြူနစ်ပါတီတို့ရဲ့လှုပ်ရှားမှုများက တဆင့်လည်း အောက်တိုဘာတော်လှန်ရေး၊ ဘော်ရှီဗစ်ပါတီ ကွန်မြူနစ်ပါတီသဘောတရားများကို လေ့လာ မှတ်သားရပါတယ်။ ဘိလပ်ပြန်များကယူလာတဲ့ မာ့က်စ် လီနင် စတာလင်တို့ရဲ့ကွန်မြူနစ်သဘောတရား စာအုပ်များကိုလည်း လေ့လာရပါတယ်။ ဒီလိုနဲ့ (တကသ၊ ဗကသ)ကျောင်းသားတွေ၊ သခင်ပါတီထဲက သခင်ပါတီဝင်တွေဟာ မာ့က်စ်ဝါဒလေ့လာရေးအစုများ ဖွဲ့ပြီး မာ့က်စ်ဝါဒလေ့လာကြပါတယ်။ စာအုပ်စာတမ်းရေးပြီး ထုတ်ဝေကြတယ်။

၁၉၃၆၊ ၁၉၃၈ ကျောင်းသားသပိတ်များနဲ့ ၁၃၀၀ ပြည့်အရေးတော်ပုံပြီးတဲ့နောက်မှာတော့ ဗမာပြည်ကွန်မြူနစ်ပါတီဖွဲ့စည်းဖို့ အခြေအနေပေးလာတယ်။ ဖွဲ့စည်းတော့ သဘာဝကျစွာပဲ လေ့လာရေးအစုခေါင်းဆောင်တွေဟာ ဗကပရဲ့ခေါင်းဆောင်တွေဖြစ်လာကြတယ်။ အစုဝင်တွေက ပါတီဝင်တွေဖြစ်လာကြတယ်။

လွတ်လပ်ရေးတိုက်ပွဲဝင်ကာလက တိုးတက်တဲ့နိုင်ငံရေးကျောင်းသားများဟာ တုိ့ဗမာအစည်းအရုံး (သခင်ပါတီ) ဝင်စမြဲပဲ။ ဒါကြောင့်ပဲ ဗကပ ရဲ့ခေါင်းဆောင်ရော၊ ပါတီဝင်တွေပါ သခင်ဘွဲ့ခံသူတွေချည်း ဖြစ်လာရတာပဲ။

ကြုံကြိုက်လို့ အဖြစ်အပျက်ကလေးတခုကို ပြောချင်တယ်။ KIO နဲ့ ဗကပ မဟာမိတ်ဖွဲ့တုန်းက ဖြစ်တာပါ။ ဗကပ က KIO ကို လက်နက်တွေကူညီခဲ့တယ်။ လက်နက်မပေးခင် KIA တပ်ဖွဲ့တွေကို ပြည်သူ့ဒီမိုကရေစီ လုပ်ငန်းစဉ်သဘောတရား သင်တန်းပေးတယ်။ သင်တန်းဆရာက “ဗကပသမိုင်း”ပြောတော့ ပါတီခေါင်းဆောင်တွေအားလုံးက သခင်ဘွဲ့ ခံသူတွေချည်းဖြစ်နေတယ်။ နားကလောလာလို့ ထင်ပါရဲ့ KIA ဗိုလ်တယောက်က ထပြီးကောတယ်။ “သခင်ယေရှုတယောက်ပဲ ကြားဖူးတယ်။ ခုတော့ ဗကပမှာ သခင်တွေများလှပါလား”လို့ ပြောဖူးတယ်။

၁၉၄၅ အလွန် ဗကပ ရဲ့ရေသောက်မြစ်

ရေသောက်မြစ်က ‘ဗကသ’ ‘အလုပ်သမားသမဂ္ဂ’ ‘တောင်သူလယ်သမားသမဂ္ဂ’ စတာတွေ ဖြစ်လာတယ်။ သခင်ပါတီက တဇာတ်သိမ်းသွားပြီ။ ဖောက်ပြန်သွားပြီ။

အဲဒီတုန်းက ဗကပ လည်း ဥပဒေတွင်း O/G ပါတီ ဖြစ်သလို ဗကသ၊ အလုပ်သမားလယ်သမား သမဂ္ဂတွေလည်း တရားဝင်တွေချည်းဖြစ်တယ်။ ဒါကြောင့် ဘာမှ လျှို့လျှို့ဝှက်ဝှက်လုပ်နေစရာ မလိုဘူး။ ဗကပရဲ့ကွန်ဖရင့်တွေ၊ အစည်းအဝေးတွေမှာ ဗကပကျောင်းသားတွေ တက်မြဲဖြစ်တယ်။ ဒါကြောင့်လည်း ဘယ်ကျောင်းသားက ကွန်မြူနစ်ပဲဆိုတာကိုအားလုံးကသိကြတာပဲ။ ဗကပရဲ့တင်းကျပ်တဲ့စည်းမျဉ်းကို မလိုက်နာနိုင်တော့လို့ ကိုသန်းထွန် (ဒေါက်တာသန်းထွန်း)က ပါတီကထွက်ပြီး ကျောင်းဆရာလုပ်တယ်။ နိုင်ငံခြားပညာတော်သင်သွားဖို့လျှောက်တော့ ပညာသင်ရွေးချယ်ရေးအဖွဲ့က လူခေါ်တွေ့တယ်။ အဖွဲ့ဥက္ကဋ္ဌဦးကျော်ငြိမ်းက သူ့ကို ကွန်မြူနစ်ယူ/ဂျီလုပ်နေတယ်လို့ သံသယဖြစ်ပြီး မေမြန်းစစ်ကြောခဲ့တာပဲ။ မေးပုံဖြေပုံကို “ငါပြောချင်သမျှ ငါ့အကြောင်း”မှာ ဖတ်ရတယ်။

၁၉၄၈ အလွန်ကာလ

ဗကပ ပါတီက တောထဲရောက်သွားပြီ။ ဗကသ က တရားဝင်အဖွဲ့အစည်းပဲ။ အာဏာပိုင်တွေက ‘ဗကသ’ကို မယုံဘူး။ ဦးနု က စပြီး ဦးကျော်ငြိမ်း၊ ဗိုလ်ခင်မောင်လေးတို့ကလည်း ဗကသကို ရန်ဘက်လို့ပဲ သဘောထားတယ်။ သူတို့က တချိန်က ဗကသခေါင်းဆောင်တွေချည်းပဲ။ ဒါပေမယ့် ဗကသကို ရန်ဘက်လို့ပဲသတ်မှတ်ကြတယ်။ ဗသကကို ဗကပ (ယူ/ဂျီ)လို့ပဲ သံသယရှိကြတယ်။

ဦးနုက ပါးစပ်နဲ့ပဲ ခြိမ်းခြောက်တယ်။ ဦးကျော်ငြိမ်းက သေနတ်နဲ့ခြိမ်းခြောက်တယ်။ ဗိုလ်ခင်မောင်လေးကတော့ သူကိုယ်တိုင်သေနတ်ဖောက်ပြီး ခြိမ်းခြောက်တယ်။ ဒါက ‘ဗကသ’ ခေါင်းဆောင်ဟောင်းတွေရဲ့ရန်လုပ်ပုံ ဖြစ်တယ်။

၁၉၆၂ အလွန်မှ အခုအထိ
စစ်အာဏာသိမ်း အစိုးရခေတ်မှာလည်း ဗကသကို ဗကပ (ယူ/ဂျီ)လို့ပဲ သံသယရှိတယ်။ သူတို့က ‘ဗကသ’မှာ တခါမှ မလုပ်ဖူးဘူး။ သံယောဇဉ် မရှိဘူး။ ဒါကြောင့် သေနတ်နဲ့ခြိမ်းခြောက်ရုံ မကဘူး သေနတ်နဲ့ပစ်တယ်။ ပစ်တာကလည်း သေအောင်ချိန်ပစ်တာ။ အစုလိုက်အပြုံလိုက် သေအောင်ပစ်တာပဲ။
ဒီလိုနဲ့ ဗကသ လည်း မြေလျှိုးရပြီ။ မြေလျှိုးရတာ နှစ် ၅၀ နီးနေပြီ။ ရှေ့မှာလည်း မြေလျှိုးနေရဦးမှာပဲ။

ရှေ့တခေါ် မျှော်ကြည့်
ဗကသနဲ့ ဗကပရပ်တည်ချက်တူနေလို့ အမြင်တူ၊ အတွေးတူ၊ အလုပ်တူခဲ့ကြတယ်။ ရှေ့တခေါ် မျှော်ကြည့်တော့ ‘၂၀၀၈ အခြေခံဥပဒေ’ နဲ့ ‘၂၀၁၀ ရွေးကောက်ပွဲ’ကိစ္စဟာ ဘီလူးစည်း-လူစည်း ခွဲမယ့်စည်းကြောင်းလို့ မြင်ပါတယ်။ တပြည်လုံးမှာ အကြီးအကျယ်ကွဲပြားမှုကြီးဖြစ်တယ်။ ပြီးရင် အကြီးအကျယ် ပြန်လည်စုစည်းမှုကြီးဖြစ်မယ်လို့ ဗကပက မြော်မြင်ပါတယ်။ ဘယ်သူတွေ ဘယ်လိုလုပ်ကြမလဲ မပြောတတ်ပါ။ သတင်းတွေကတော့ အများကြီး ကြားပါတယ်။ ‘ရွေးကောက်ပွဲဥပဒေ’ထွက်လာရင် ရှင်းလာပါလိမ့်မယ်။

ဒီတခါမှာလည်း ဗကပ နဲ့ ဗကသ အမြင်တူ၊ အတွေးတူ၊ အလုပ်တူကြလိမ့်မယ်လို့ယုံကြည်ပါတယ်။ ချီတက်ရမယ့်ခရီး ဝေးပါတယ်။ အခက်အခဲတွေ တင်းကျမ်းဖြစ်နေပါတယ်။ ဘာပဲဖြစ်ဖြစ် မိမိတို့ကသန္နိဋ္ဌာန်ခိုင်မာစွာနဲ့ချီတက်ရင် ကျော်နင်းနိုင်မယ်လို့ ယုံကြည်ပါတယ်။ ဒါဟာ ဗကပ ရဲ့ နှစ် ၇ဝ ပြည့်သဝဏ်လွှာ ဖြစ်ပါတယ်။ ဗကသ က ၇၃ နှစ်ပါ။ မကြာမီ ၇၅ နှစ် ပြည့်ပါမယ်။ ပိုမိုကောင်းမွန်တဲ့ တောက်ပတဲ့အနာဂတ်ဆီသို့ ချီတက်ကြပါစို့။ ။
ယူတာက ဒီနေရာကပါ။https://www.facebook.com/rahul.koko