အာဏာရှင်တွေသယ်လာတဲ့ မကူးစက်နိုင်တဲ့ရောဂါ (ရဲဘော်ဖိုးသံချောင်း)

အာဏာရှင်တွေသယ်လာတဲ့ မကူးစက်နိုင်တဲ့ရောဂါ (ရဲဘော်ဖိုးသံချောင်း)

မကူးစက်နိုင်တဲ့ရောဂါတွေကြောင့် ဒီနေ့ကမ္ဘာမှာ လူတွေအများဆုံးသေဆုံးနေရတယ်လို့ဆိုလိုက်ရင် အမှတ်တမဲ့ နားမလည်နိုင်ဘဲဖြစ်သွားမယ်လို့ ထင်ပါတယ်။ မှန်ပါတယ်။ ဒီအကြောင်းတွေနဲ့ အဆက်ပြတ်နေသူ၊ ဒါမှမဟုတ် စိမ်းနေသူ တယောက်အဖို့ နှစ်စဉ်လူ ၃၆ သန်းကျော်သေ ဆုံးနေရတဲ့အကြောင်းရင်းလို့ကြားလိုက်ရရင် တကယ့်ကိုအံ့သြစရာ ဖြစ်သွားမှာပါ။ တကယ်တော့ ဒါဟာ ဒဗလျူအိပ်ခ်ျအိုခေါ် နိုင်ငံတကာကျန်းမာရေးအဖွဲ့အစည်းကြီးကထုတ်ပြန်တဲ့ကိန်းဂဏန်း ဖြစ်ပါတယ်။ ကမ္ဘာ့နှစ်စဉ်သေဆုံးမှုရဲ့ ၆၀% ဖြစ်တယ်လို့လည်းဆိုပါတယ်။

ဒီနေ့ ကမ္ဘာ့ကျန်းမာရေးလောကမှာ လူတွေအထူးအာရုံစိုက်စရာဖြစ်လာတဲ့ဒီပြဿနာကို အင်္ဂလိပ်လို NCD- Non Communicable Diseases လို့ ခေါ်ပါတယ်။ ဒီ အင်န်စီဒီ ခေါ် မကူးစက်နိုင်တဲ့ရောဂါစာရင်းထဲ မှာ နှလုံးရောဂါ၊ လေဖြတ်ခြင်း၊ ပန်းနာ၊ ကင်ဆာ အမျိုးအစားအများအပြား၊ ဆီးချို၊ နာတာရှည်ကျောက်ကပ်ရောဂါ၊ အယ်လ်ဇိုင်းမားခေါ် လူအိုထုံန’တဲ့ရောဂါ၊ မျက်စိတိမ်ကျခြင်း၊ အရိုးတွေကျွပ်ဆတ်လာခြင်း စတာတွေပါပါတယ် (တခြားအများကြီးရှိပါသေးတယ်)။

ဒီရောဂါနဲ့ ဒီပြဿနာကိုအလေးထားလာကြတဲ့ နောက်အကြောင်းရင်းတခုကတော့ ဒီရောဂါကြောင့်သေဆုံးသူတွေထဲမှာ နှစ်စဉ်လူ ၂၉ သန်း၊ တနည်း- သေဆုံးသူအားလုံးရဲ့ ၈၀% ဟာ ၀င်ငွေနည်းပါးတဲ့၊ အလယ်အလတ်တန်းဝင်ငွေသာရှိတဲ့နိုင်ငံတွေမှာ တွေ့နေရတာကြောင့်ပါပဲ။ ဒီအထဲမှာ နှလုံးသွေးကြောပြဿနာဦးရေက (နှစ်စဉ်) ၁၇.၃ သန်းနဲ့ ထိပ်ဆုံးမှာရှိပြီး ကင်ဆာက ၇.၆သန်း၊ အသက်ရှူလမ်းကြောင်းပြဿနာက ၄.၂ သန်းနဲ့ ဆီးချိုက ၁.၃ သန်းဆိုပြီး စာရင်းထဲမှာပေါ်လာပါတယ်။ ဒီလေးမျိုးကပဲ အင်န်စီဒီ ရောဂါတွေကြောင့်သေဆုံးသူအားလုံးရဲ့ ၈၀% လောက် ရှိပါတယ်။

ခုလို လူသေစေနိုင်တဲ့ရောဂါတွေ ဖြစ်ပေါ်ရတဲ့အကြောင်းရင်းတွေထဲမှာ အသိသာဆုံးက ဆေးလိပ်သောက်ခြင်း၊ လှုပ်ရှားမှုနည်းပါးခြင်း၊ အရက်အလွန်အကျွံသောက်ခြင်းနဲ့ ကျန်းမာရေးနဲ့မသင့်တော်တဲ့အစားအစာတွေစားတာများခြင်းလို့ ဆိုပါတယ်။

ဒါတွေနဲ့တဆက်ထဲမှာ ကမ္ဘာ့ကျန်းမာရေးအဖွဲ့ကြီးထုတ်ပြန်ခဲ့တဲ့ ဒီစာရင်းဇယားတခုကိုတော့ ဗမာပြည်သားတွေ စိတ်ဝင်စား၊ အာရုံစိုက်သင့်တယ်ထင်ပါတယ်။ အဲဒါကတော့ ၂၀၁၀ ခုနှစ်အတွင်းက ဗမာပြည်မှာ လူသေဆုံးမှု ၄၀% ကျော်ဟာ ဒီ အင်န်စီဒီ ခေါ် မကူးစက်နိုင်တဲ့ရောဂါတွေနဲ့သေဆုံးခြင်း ဖြစ်တယ်ဆိုတာပါပဲ။ ၁၉၉၀ ခုနှစ်နဲ့ ၂၀၁၀ ခုနှစ် အကြားမှာ လေဖြတ်တာကြောင့်သေဆုံးရတဲ့နှုန်းဟာ သေဆုံးမှုအားလုံးရဲ့ ၂.၉% ကနေ ၆.၉% အထိ မြင့်တက်လာတယ်လို့ဆိုပါတယ်။ နောက်ပြီး နှလုံးရောဂါ၊ ဆီးချိုရောဂါ၊ ကျောက်ကပ်ရောဂါတို့ကြောင့် သေဆုံးရသူနှုန်းဟာလည်း ဒီကာလအတွင်း နှစ်ဆလောက်ဖြစ်လာတယ်လို့ သိရပါတယ်။
ဒီကိန်းဂဏန်းတွေကို သာမန်ကြည့်လိုက်ရင်ပဲ ဒါဟာ ပုံမှန်ပြောင်းလဲတိုးတက်လာတဲ့ရောဂါဖြစ်မှုနှုန်း၊ လူသေမှုနှုန်းမဟုတ်ဘူးဆိုတာ သိသာလှပါတယ်။ ဒီအပြောင်းအလဲတွေရဲ့နောက်ကွယ်မှာ ဘာအကြောင်းရင်းတွေရှိတယ်ဆိုတာကို တာဝန်ရှိသူတွေ အလေးထားဆန်းစစ်ကြ၊ တားဆီးကြ၊ ပြုပြင်ကြဖို့လိုပါပြီ။

ကျွန်တော်တို့သိထားကြဖို့လိုတာက ဗမာပြည်ဟာ အရှေ့အာရှနဲ့ပစ္စိဖိတ်ဒေသမှာ လူသားတိုးတက်မှုနှုန်း ဒုတိယအနိမ့်ဆုံးဖြစ်တယ်၊ ငါးနှစ်အောက်ကလေးသူငယ်သေဆုံးမှုနှုန်းဟာ ဒီဒေသနဲ့တကမ္ဘာလုံးက ပျမ်းမျှနှုန်းထက်ပိုမြင့်တယ်၊ နောက်ပြီး တီဘီရောဂါဖြစ်ပွားမှုနှုန်းဟာဆိုရင် ဒီဒေသထဲက ပျမ်းမျှနှုန်းရဲ့ နှစ်ဆရှိပြီး တကမ္ဘာလုံးပျမ်းမျှနှုန်းထက် သုံးဆတောင်ရှိပါတယ်။

ကမ္ဘာ့ကျန်းမာရေးဆိုင်ရာအဖွဲ့အစည်းတွေက ဗမာပြည်ရဲ့ ဒီ “အပြောင်းအလဲ”တွေအကြောင်းကို စူးစမ်းဆန်းစစ်ကြတော့ သူတို့တွေ့လာတဲ့အကြောင်းရင်းက နအဖ-န၀တနဲ့ လက်ရှိအစိုးရလက်ထက်မှာ ဒီနိုင်ငံအတွင်းကို ဒလဟောဝင်ရောက်လာတဲ့ အရက်သေစာ၊ ဆေးလိပ်နဲ့အချိုရည်လုပ်ငန်းကြီးတွေ ထွန်းကားတိုးပွားလာခြင်းဖြစ်နေပါတယ်။ ဖွံ့ဖြိုးပြီးနိုင်ငံတွေမှာ ဒေ၀ါလီခံရလုနီးပါး စီးပွားတွေကျဆင်းနေတဲ့ ဒီလုပ်ငန်းတွေ၊ ကုမ္ပဏီတွေဟာ မဖွံ့ဖြိုးသေးတဲ့နိုင်ငံတွေကိုပစ်မှတ်ထားပြီး ရင်းနှီးမှုတွေတင်ပို့နေတာ ကာလအတန်ကြာခဲ့ပါပြီ။ ဒီအခါမှာ ဗမာပြည်က ခေတ်ပျက်သူဋ္ဌေးဗိုလ်ချုပ်တွေ၊ ခရိုနီတွေနဲ့ အဲဒီကုမ္ပဏီတွေလည်ချင်းယှက်ကြတာ ဖြစ်လာခဲ့ပါတယ်။ ဒီနိုင်ငံမှာက စက်ရုံတွေ၊ စားသောက်ကုန်တွေကိုစိစစ်တဲ့၊ စောင့်ကြပ်ကြည့်ရှုတဲ့ဥပဒေရော အဖွဲ့အစည်းတွေပါနည်းတဲ့အပြင် အကပ်ကောင်းရရင် ဘာလုပ်လုပ်-လုပ်လို့ရသလိုဖြစ်နေတော့ ဒီကုမ္ပဏီတွေအဖို့ အချိုရှာသကာတွေဖြစ်တာ မဆန်းပါဘူး။ ဒီလိုနဲ့ ဒီစစ်အာဏာရှင်လက်ထက်မှာပဲ သပြေခက်နဲ့ငွေဖလားသင်္ကြန်ဟာ ဘီယာနဲ့စီးကရက်သင်္ကြန်ဖြစ်သွားရတာ၊ တနိုင်ငံလုံးမှာ အရက်နဲ့စီးကရက်ကြော်ငြာတွေကို ရှောင်မရဘဲဖြစ်နေတာ စတာတွေဟာ ဒီအချက်ကိုဖော်ပြနေတဲ့ အထင်ရှားဆုံးအမှတ်လက္ခဏာတွေလို့ဆိုရင် မမှားပါဘူး။ “အပြောင်းအလဲ”တခုကြောင့် “အပြောင်းအလဲ” တခုဖြစ်ရတဲ့သဘောပါ။

စာရင်းဇယားတွေအရဆိုရင် ဗမာပြည်က ရင်နှီးမြှုပ်နှံရေးကော်မရှင်ဟာ ၂၀၁၂ ခုနှစ် အလယ်ပိုင်းကနေစပြီး ကနေ့အထိ ကားလ်စဘာ့ဂ် အပါ (Heineken and Carlsberg) အရက်လုပ်ငန်းအသစ် ၆ ခု ကို တည်ထောင်ခွင့်ပြုခဲ့ပါတယ်။ ဒီအထဲမှာ ဇန်န၀ါရီလအတွင်းခွင့်ပြုခဲ့တဲ့ ဖက်စပ်ကုမ္ပဏီ ၄ ခုလည်း ပါပါတယ်။ ၂၀၁၁ – ၁၂ ဘဏ္ဍာနှစ်အတွင်း ဗမာနိုင်ငံမှာ အခွန်အဆောင်ရဆုံးလုပ်ငန်းဟာ မြန်မာဘီယာလီမိတက် (Myanmar Brewery Limited) ဖြစ်တယ် ဆိုတဲ့အချက်ကိုကြည့်ရင်ပဲ အခြေအနေဟာ ဘယ့်ကလောက်ရင်လေးစရာကောင်းတယ်ဆိုတာ သိမြင်နိုင်ပါတယ်။

နောက်ဇာတ်လမ်းတခုကတော့ ဧရာမဆေးလိပ်ကုမ္ပဏီကြီးတခုနဲ့ ဗိုလ်ချုပ်တွေပလူးနေတဲ့ကိစ္စပါ။ အဲဒါကတော့ ကမ္ဘာပေါ်မှာ ဒုတိယအကြီးဆုံးဆေးလိပ်ထုတ်လုပ်ငန်းကြီးဖြစ်တဲ့ ဗြိတိသျှအမေရိကန် တိုဘက်ကိုးဟာ ပြီးခဲ့တဲ့ဇူလိုင်လအတွင်းက ဗမာပြည်မှာ ဒေါ်လာသန်း ၅၀ တန်ရင်းနှီးမြှုပ်နှံမှုတွေလုပ်ပြီး သူတို့ရဲ့စီးကရက်တွေထုတ်လုပ်၊ ဖြန့်ချိဖို့စီစဉ်ခဲ့ပါတယ်။ သူတို့ရဲ့စက်ရုံကို ရန်ကုန်မြို့အပြင်နားမှာ ဆောက်မယ်လို့ဆိုပါတယ်။ ကမ္ဘာမှာ တတိယအကြီးဆုံးဖြစ်တဲ့ ဂျပန်တိုးဘက်ကိုးကုမ္ပဏီကြီးကတော့ ၂၀၁၂ ခုနှစ်အတွင်းမှာ ဖက်စပ်လုပ်ကိုင်ဖို့စာချုပ်ချုပ်ဆိုထားပြီး တရုတ်ပြည်ကအကြီးဆုံးစီးကရက်လုပ်ငန်းကလည်း ဒေါ်လာသန်းပေါင်းများစွာတန်တဲ့ ဖက်စပ်လုပ်ငန်းတခု စီစဉ်နေပါတယ်။

ကိုကာကိုလာနဲ့ ဖက်စပ်လုပ်ငန်းထူထောင်လိုက်တော့ တချို့က ဗမာပြည်ခေတ်မီလာပြီလို့ ကြွေးကြော်ချင်ကြတာတွေ့ရပါတယ်။ ဒါပေမယ့် ဒါကို ကမ္ဘာ့ကျန်းမာရေးလောကက စိတ်မသက်မသာဖြစ်ကြပါတယ်။ ဗမာပြည်မှာက ဒီလိုလာပြီး ရင်းနှီးမြှုပ်နှံတယ်ဆိုရင် ပထမငါးနှစ်မှာ အခွန်သက်သာခွင့်တွေပေးထားတော့ ကုမ္ပဏီတွေက သူတို့ရဲ့အထွက်ပစ္စည်းတွေကို ဈေးနည်းနည်းနဲ့ရောင်းချ၊ ပြည်သူတွေက ပိုမိုသုံးစွဲ၊ ရောဂါတွေပိုဖြစ် ဒီတတိယကမ္ဘာရဲ့သံသရာဆိုးထဲ တန်းဝင်သွားပါတော့တယ်။

တကယ်က အခုမှ ပြည်ပရင်းနှီးမြှုပ်နှံမှုတွေကို တံခါးပိုဖွင့်ပေးတဲ့ အစိုးရတရပ်အနေနဲ့ နိုင်ငံတကာကအတွေ့ အကြုံတွေ၊ သင်ခန်းစာတွေယူမယ်ဆိုရင်ယူနိုင်ပါတယ်။ ဒါပေမယ့် ကိုယ်ကျိုးမှတပါး ဘာမှမရှိပြီလို့ ထုတ်မပြောရုံတမယ်ဖြစ်တဲ့ အာဏာရှင်ဗိုလ်ချုပ်တွေနဲ့ သူတို့ရဲ့ပုလင်းတူဗူးဆို့ခရိုနီတွေဟာ အဲဒီ အဆိပ်လုပ်ငန်းကြီးတွေဝင်လာတာကို အဝေးကြီးကနေ မီးစိမ်းပြ၊ လက်မထောင်ပြနေကြပါတယ်။

သေချာနေတာကတော့ ဒင်းတို့တတွေချမ်းသာရေးနဲ့ ငါတို့တတွေကျန်းမာရေးဟာ ထိပ်တိုက်ပဋိပက္ခဖြစ်နေတယ် ဆိုတာပါပဲ။ တခြားနိုင်ငံတွေမှာ ဒီလိုအဆိပ်ပင်ရေလောင်းနေတာတွေကို တားဆီး-ထိန်းချုပ်ဖို့ လူမှုအဖွဲ့အစည်းတွေအမြောက်အမြားပေါ်ပေါက်ခဲ့၊ တည်ရှိနေပေမယ့် ဗမာပြည်မှာ အခုအထိပေါ်မလာသေးတာဟာ စဉ်းစားစရာဖြစ်နေပါတယ်။ ဒါ့အပြင် အဲဒီလိုအဖွဲ့အစည်းတွေကို ဖွဲ့စည်းလှုပ်ရှားခွင့် ပေးပါ့မလားဆိုတာလည်း စဉ်းစားစရာပါ။ အခုတော့ ဒင်းတို့က “အပြောင်အလဲ” ဆိုပြီး ဗလောင်းဗလဲလုပ်လေလေ ပြည်သူတွေအဖို့ ဆင်းရဲတွင်းသာမက သေတွင်းကိုပါတူးရသလို ဖြစ်နေပါတယ်။

ရဲဘော်ဖိုးသံချောင်း