ပြဿဒ်က စလောင်တာလား

(ပြဿဒ်က စလောင်တာလား)

လွှတ်တော်ထဲဝင် ဆူပူသောင်းကျန်းဖျက်ဆီးကြတာကို "ထရမ့်မြှောက်ပေးလို့ ဒေါသထွက်နေသောလူအုပ်ကြီးက အတင့်ရဲရဲလုပ်လာကြတာ"လို့လောက်နဲ့တင်ပဲ သုံးသပ်ချက်ကိုရပ်မထားစေချင်ပါ။ ရပ်မသွားစေချင်ပါ။

သေချာတွေးကြည့်ရင်(လက်တွေ့အရလည်း မြင်သာထင်သာရှိလာနေတဲ့) အမေရိကန်လူ့အဖွဲ့အစည်းရဲ့အစိတ်အပိုင်းတချို့မှာအမြစ်တွယ်နေတဲ့ လက်ယာအစွန်းရောက်၊ လူဖြူကြီးစိုးရေး၊ လူမျိုးရေးဝါဒနဲ့ ဖက်ဆစ်ဆန်ဆန်ပြုမူလှုပ်ရှားမှုတွေ ခေါင်းထောင်ထလာတာကို ထင်ထင်ရှားရှားမြင်ကြရမှာပါ။ ထရမ့်ကိုယ်၌ကလည်း အဲ့သလိုအတွေးအခေါ်တွေရှိသူဆိုတော့ ဒီလူမျိုးရေးဘာသာရေးလှိုင်းစီးပြီး လူတွေကိုမြှောက်ထိုးပင့်ကော်လုပ်တာ သွေးထိုးလှုံ့ဆော်ပေးတာတွေလုပ်ပါတယ်။

ဒီလိုနဲ့ သူတက်လာပြီးနောက်ပိုင်းမှာ လူမျိုးရေးအစွန်းရောက်လှုပ်ရှားမှုတွေ တင်းကြမ်းဖြစ်လာတာပါ။ ဒီကြားထဲဖွဲ့စည်းပုံအခြေခံအရကို လူတိုင်းလက်နက်ကိုင်ဆောင်ခွင့်ကရှိထားလေတော့ လက်နက်ကိုင်ပစ်ခတ်သတ်ဖြတ်မှုတွေ ခြိမ်းခြောက်မှုတွေလည်း သူ့လက်ထက်မှာ မနိုင်ရင်ကာဖြစ်နေတာတွေ့ရမှာပါ။ လူဖြူလူမည်းပြဿနာလို့ အတင်းကာရောမပြောချင်ပေမယ့် လူမည်းတွေအပေါ်ရဲတပ်ဖွဲ့က မတရားဖြင့်လုပ်တဲ့လုပ်ရပ်တွေလည်း မကြားချင့်အဆုံးဖြစ်နေတာပါ။ ဒါ့ကြောင့်ပဲ Black Lives Matter လိုလှုပ်ရှားမှုတွေ ပေါ်လာတာဖြစ်ပါတယ်။

သူ့လက်ထက်မှာ အရင်ကတည်းက အမေရိကန်နိုင်ငံရေးအပေါ် ဩဇာကြီးတဲ့ NRA ခေါ် အမျိုးသားရိုင်ဖယ်လ်အသင်းကြီးရဲ့အရှိန်အဝါက ပိုကြီးထွားလာပါတယ်။ ဒီလောက် ပစ်မှုခတ်မှုတွေဖြစ်နေလည်း လက်နက်ကိုင်ဆောင်ခွင့်တင်းကျပ်ရေးကိုမလုပ်ခဲ့ပါဘူး။ ဒီသက်ရောက်မှတွေကိုထင်ဟပ်နေတာက အလံတွေပါ။ မနေ့ကဖြစ်ခဲ့တဲ့ပွဲမှာ ထောင်ခဲ့တဲ့အလံတွေကိုကြည့်ပါ။ အဲ့ဒီအထဲမှာ တောင်ပိုင်းကွန်ဖက်ဒရိတ်အလံတွေ၊ Hate Groups ခေါ်တဲ့အစွန်းရောက်အုပ်စုတွေရဲ့အလံတွေ(အဲ့ဒီအထဲမှာ Proud Boys အဖွဲ့လည်းပါပါတယ်)တွေ့ရမှာဖြစ်သလို The God, Guns and Trump ဆိုတဲ့အလံတွေလည်း တွေ့ရပါတယ်။ တကယ်က ဒီအလံတွေကို ထရမ့်တက်လာပြီးနောက်ပိုင်း အမေရိကန်နေရာတကာမှာတွေ့လာနေရတာပါ။ အလံဆိုတာက ကြွေးကြော်သံ သဘောထားနဲ့ရပ်တည်ချက်တွေကို ဖော်ပြပါတယ်။

တကယ်တော့ မနေ့ကဖြစ်ခဲ့အဖြစ်အပျက်ကိုကြည့်ရရင် အာဏာရှင်ဆန်ဆန်အုပ်ချုပ်ရေးကိုလိုလားတဲ့ အစိတ်အပိုင်းတွေရဲ့ ဟန်ချက်ညီ ထကြွလှုပ်ရှားလာမှုပါ။ ထရမ့်က အခါတော်ပေးတာနဲ့ အချိန်းအချက်လုပ်ပေးတာပါ။ အချိန်းအချက်ပေးနိုင်ရတာက ဖြစ်လာနိုင်​ခြေဆိုတဲ့အချက်အလက်ရှိနေလို့ပါ။ အချက်အလက်မရှိရင် အချိန်းအချက်ပေးလည်း အလကားပါပဲ။ ကျနော်တို့ ရှစ်ဆယ့်ရှစ်ဒီမိုကရေစီရေးအုံကြွမှုကြီးနဲ့ ချိန်ထိုးကြည့်ပါ။ ရှစ်လေးလုံးနေ့မှာ တပြည်လုံး လမ်းပေါ်ထွက်လာတာဟာ ဘီဘီစီအပါအဝင် ပြည်မီဒီယာတွေက လှုံ့ဆော်ပေးလို့မဟုတ်ပါ။ လူတွေ လမ်းပေါ်ထွက်လာမယ့် အခြေအနေ(အချက်အလက်)ရှိနေတာကြောင့် သူက ရက်ချိန်းပြောရတဲ့သဘောပါ။ ခုလည်း ထရမ့်က အချက်ပြပြီး အခါတော်ပေးရုံလောက်ပဲလုပ်ရတာပါ။ တကယ့်ဇစ်မြစ်က အမေရိကန်လူ့အဖွဲ့အစည်းအတွင်းက တချို့သောအစိပ်အပိုင်းတွေမှာ တည်နေတာဖြစ်ပါတယ်။

အမေရိကန်မှာလည်းနေ အမေရိကန်နိုင်ငံသားလည်းဖြစ်နေကြတဲ့ ကျနော်တို့ဟာ အဲ့ဒီအစိပ်အပိုင်းတွေရဲ့ လှုပ်ရှားမှုတွေကိုမျက်ခြေမပြတ် သတိဝိရိထားပြီးစောင့်ကြည့်ရင်း လူမျိုးရေး ဘာသာရေး လက်ယာအစွန်းရောက်ဖက်ဆစ်ဝါဒတွေကို ရတဲ့နည်း ဖြစ်နိုင်တဲ့နည်းမှန်သမျှနဲ့ ဆန့်ကျင်ဖော်ထုတ်ရှုတ်ချသွားရမှာဖြစ်ပါတယ်။ ဒီလိုလုပ်တာဟာ အမေရိကန်တနိုင်ငံတည်း အမေရိကလူ့အဖွဲ့အစည်းတခုတည်းရဲ့အကျိုးစီးပွားအတွက်လို့ပြောရင် မှားပါလိမ့်မယ်။ ဒီမီးဟာ ကူးစက်ပါတယ်။ ကမ္ဘာ့ဘယ်နေရာမှာ ဒါမျိုးဖြစ်ဖြစ် ကျနော်တို့ ဆန့်ကျင်ရမှာပါ။ တိုးတက်တဲ့ဒီမိုကရေစီအင်အားစုတွေနဲ့ လက်တွဲရမှာပါ။ အမေရိကန်က စလောင်ရင် လစ်ဘရယ်လ်ဒီမိုကရေစီပြဿဒ်ကြီးက စလောင်တဲ့မီးဖြစ်သွားမှာပါ။ ဒါ့ကြောင့် ဒီ လက်ယာစွန်း အမျိုးသားရေးအစွန်းရောက်ဝါဒကိုဆန့်ကျင်တိုက်ဖျက်ဖို့ရာ ဒီမိုကရေစီလိုလားသူတိုင်းရဲ့ဝတ္တရားဖြစ်ပါတယ်။

မျိုးမြင့်ချို

ဇန်နဝါရီ ၇၊ ၂၀၂၁