(အမျိုးသားညီညွတ်ရေးတဲ့လား)
အမေရိကန်မှာက ရွေးကောက်ပွဲပြီးလို့ သမ္မတအသစ်တက်လာရင် သူက အမျိုးသားညီညွတ်ရေးကိစ္စကို ဦးစွာပထမပြောရ လုပ်ရပါတယ်။ ပြောရတာက မိန့်ခွန်းထဲမှာဖြစ်ပြီး လုပ်ရတာက ရွေးကောက်ပွဲကြောင့် အထိုက်အလျှောက် စိတ်ဝမ်းကွဲကြတဲ့ပြည်သူတွေကို ဘယ်သူ့မှသာစေနာစေသဘောမထားပဲ အားလုံးရသင့်ရထိုက်တဲ့ အခွင့်အရေးတွေ ရပိုင်ခွင့်တွေရအောင် အာမခံပေးလက်တွေ့လုပ်ပေးရတာပါ။ တခါတလေဆို ရွေးကောက်ပွဲမှာရှုံးသွားတဲ့ဘက်က လူတွေကိုတောင် အစိုးရရာထူး(နိုင်ငံရေးရာထူး)တွေမှာ ပြန်ခန့်ပေးတာမျိုးရှိပါတယ်။ ဒါကို အမျိုးသားစည်းလုံးရေး ဒါမှမဟုတ် အမျိုးသားညီညွတ်ရေးလုပ်တယ်လို့ သုံးပါတယ်။ အမျိုးသားညီညွတ်ရေးအစိုးရတို့ အမျိုးသားညီညွတ်ရေးအစိုးရဖွဲ့တယ်တို့ စသည်ဖြင့်တော့ မသုံးကြပါ။
ခု ဗမာပြည်မှာက ရွေးကောက်ပွဲအနိုင်ရပါတီ NLD က အမျိုးသားညီညွတ်ရေးအစိုးရဖွဲ့မယ်လို့ အတိအလင်းပြောထားတာရှိပါတယ်။ ပြီးတော့ အထူးဆက်သား ၃ ယောက်ကိုရွေးချယ်ပြီး လူမျိုးစုဒေသတွေသွားခိုင်း လူမျိုးစုတွေပြောတာကို သွားနားထောင်ခိုင်းထားပါတယ်။
ဒီနေရာမှာ စဉ်းစားစရာရှိတာက ဗမာပြည်မှာ အမျိုးသားညီညွတ်ရေးဟာ တကယ်ပဲပြိုကွဲနေသလား။ ကွဲနေတယ်ဆိုရင် ဘယ်အချိန်ကစပြီး ဘယ်သူတွေနဲ့ဘယ်သူတွေကွဲခဲ့ကြတာလဲ ဘာ့ကြောင့်ကွဲတာလဲ ဘယ်အခြေခံတွေပေါ်မှာကွဲတာလဲ ကွဲတော့ ဘာတွေဖြစ်ခဲ့သလဲ စတာတွေဖြစ်ပါလိမ့်မယ်။ ဒါကို ကျနော်လည်း ကျနော်တွေးမိ ဖတ်မိ မှတ်မိ လေ့လာမိသမျှနဲ့ ရေးခဲ့တာတွေလည်းရှိသလို သူများတွေရေးတာတွေကိုလည်း လက်လှမ်းမီသမျှ ဖတ်ရှုလေ့လာဆွေးနွေးပါတယ်။
အမျိုးသားညီညွတ်ရေး ဘယ်သူ့ကြောင့်ပြိုကွဲ ဘာ့ကြောင့်ပြိုကွဲ ဘယ်အခြေခံပေါ်မှာပြိုကွဲစတာတွေကတော့ ဘက်အသီးသီးက အမြင်အသီးသီး ရှုထောင့်အသီးသီး ရပ်ခံချက်အသီးသီးနဲ့ တင်ပြနေကြတာမို့ ဘယ်ဟာတခုတည်းအမှန်လို့ ယတိပြတ်ပြောရတာခက်မှာပါ။ သေချာတာကတော့ အမျိုးသားညီညွတ်ရေးပြိုကွဲခဲ့ရတာဟာ ဒီမိုကရေစီနဲ့တန်းတူမှုမရှိခဲ့လို့ဆိုတာကတော့ ကောက်ချက်ဆွဲလို့ရပါတယ်။ ဒီမိုကရေစီတို့တန်းတူရှိမှုတို့ဆိုတာ နိုင်ငံရေးပြဿနာတွေပါ။ နိုင်ငံရေးပြဿနာတွေကို နိုင်ငံရေးနည်းနဲ့ ဖြေရှင်းခွင့်မရတဲ့အခါ လက်နက်စွဲကိုင်တိုက်ခိုက်ကြရပါတယ်။ ဒီလိုနဲ့ ပြည်တွင်းစစ်ဖြစ်ပြီး ဖြစ်နေတဲ့ဘက်အသီးသီးမှာ သူသေကိုယ်ရှင် အတောမသတ်တိုက်လာခဲ့ကြရတာကတော့ မျက်မှောက်ကာလအထိပါပဲ။ ကမ္ဘာ့ဖိုးသက်ရှည်ပြည်တွင်းစစ်မီးကလည်း တောက်နေဆဲပါပဲ။ NLD ကို အာဏာရအစိုးရလို့ ဘယ်လိုပဲပြောပြော စစ်အာဏာရှင်စနစ်ကလည်း သက်ဇိုးရှည်နေဆဲ၊ စစ်ဗျူရိုကရေစီယန္တယားကြီးကလည်း အခိုင်အဖြီးရှိနေဆဲပါပဲ။
အဲ့သလိုအခြေအနေအောက်မှာ ပေါ်ပေါက်လာမယ့် အမျိုးသားညီညွတ်ရေးအစိုးရဆိုတာ ဘယ်လိုအစိုးရမျိုးဖြစ်မလဲ၊ ဘယ်သူတွေနဲ့ပါဝင်ဖွဲ့စည်းထားမလဲ၊ တကယ်ရော အမျိုးသားညီညွတ်ရေး ပြည်တွင်းစစ်ရပ်စဲရေး ပြည်တွင်းငြိမ်းချမ်းရေးတွေကို အကောင်အထည်ဖော်ခွင့်ရမယ့်အစိုးရမျိုး ဖြစ်လာမလား၊ ဘယ်ပုံ ရှေ့ခရီးဆက်မလဲဆိုတာတွေက တွေးဆစရာတွေပါ။
ဗမာပြည်ရဲ့ လက်ရှိ အဓိကပဋိပက္ခက ဒီမိုကရေစီလိုလားသူဘက်နဲ့ ဒီမိုကရေစီဆန့်ကျင်သူဘက်ကြားမှာရှိနေပါတယ်။ ဒါကိုရှင်းအောင်ပြောရရင် ဒီမိုကရေစီရေးနဲ့တန်းတူခွင့်ကိုဆန့်ကျင်တဲ့စစ်အုပ်စုကတဘက် ဒီမိုကရေစီနဲ့တန်းတူခွင့်ကိုလိုလားတဲ့လူမျိုးစုံပြည်သူတွေကတဘက်ဖြစ်နေတဲ့ ပဋိပက္ခပါ။ စစ်မှန်တဲ့အမျိုးသားညီညွတ်ရေးကို လိုလားတဲ့ဘက်နဲ့ မလိုလားတဲ့ဘက်ကြားကပြဿနာပါ။ ပြည်တွင်းစစ်ကိုလိုလားတဲ့ဘက်နဲ့ စစ်ဆန့်ကျင်တဲ့ဘက်မှာဖြစ်နေတဲ့ပြဿနာပါ။
လောလောဆယ်အနေအထားမှာတော့ စစ်အုပ်စုဟာ ၂၀၀၈ ဖွဲ့စည်းပုံနဲ့အထိုင်ကျနေပါပြီ။ ဘယ်တုန်းကမှမရခဲ့ဖူးတဲ့ အာဏာအထိုင်တခုကို ကျကျနန ကိုင်ထားနိုင်ပါပြီ။ သေချာတာတခုကတော့ ၂၀၀၈ ဖွဲ့စည်းပုံကို အထိုက်အလျှောက်ပြင်ခွင့်ရဦးတောင်(ကုန်ကုန်ပြောရရင် ဖျက်သိမ်းနိုင်ခဲ့ဦးတောင်) စစ်အာဏာရှင်ဇာစ်မြစ်ကိုအပြီးတိုင်မဖြတ်နိုင်သမျှ စစ်ဗျူရိုကရေစီယန္တယားကြီးကို အကုန်အစင်မဖျက်သိမ်းနိုင်သမျှ ဒီမိုကရေစီနဲ့တန်းတူရေးအပြည့်ရှိတဲ့အမျိုးသားညီညွတ်ရေးတည်ဆောက်ဖို့က လေထဲတိုက်ဆောက်သလိုပဲဖြစ်နေမှာပါ။ တချိန်မဟုတ် တချိန်ချိန်မှာ သေနတ်ခါးထိုးပြီး စစ်အာဏာသိမ်းပွဲမျိုးတွေဖြစ်လာဦးမှာပါ။။
မျိုးမြင့်ချို
ဇန်နဝါရီ ၁၉၊ ၂၀၂၁
0 comments:
Post a Comment