၂ဝ၁၅ မေအကုန်ဇွန်နဲ့ဇူလိုင်လတွေက တိုနန့်နန့်လေးတွေ ၉(မျိုးမြင့်ချို)

၂ဝ၁၅ မေအကုန်ဇွန်နဲ့ဇူလိုင်လတွေက တိုနန့်နန့်လေးတွေ ၉(မျိုးမြင့်ချို)

(ခက်တာလိုက်လို့)

အောင်သောင်းတော့ ပြာဖြစ်သွားပြီ။ အောင်ကိုရော ဆေးရုံကဆင်းပြီလား။ ဟိုအမျိုးကောင်းသားကြီးကတော့ စာတွေဖတ်ကောင်းတုန်း။ မှော်ဝန်းသားလည်း ဘဘ ဘဘ နဲ့ အစွယ်တပြပြလုပ်နိုင်တုန်း။ အမျိုးသားရင်ကြားစေ့မန္တန်နဲ့ ဒီမိုကရေစီရွှေပေလွှာဟာ အကြောက်ကြီးသလား သဘောထားကြီးသလား သူ့ဘာသာဝေခွဲမရ။ ရွှေဇီးကွက်ကတော့ နံမည်မှားသွားတဲ့ယဉ်ကို ကိုယ်တိုင်မောင်းသတဲ့။

ဇူလိုင် ၂၇ ၂ဝ၁၅

(မတော်တဆသမ္မတဖြစ်ရင်)
ဧရာဝတီတိုင်း ကျိုက်လတ်မြို့ လူထုဟောပြောပွဲတွင် အမေစုအနေနဲ့ သမ္မတကြီးဖြစ်ရင် ဘာကို အရင်လုပ်မလဲဟု ၁၀ နှစ်သားအရွယ် ကလေးငယ်တစ်ဦး၏မေးမြန်းမှုကို အမျိုးသားပြန်လည် ရင်ကြားစေ့ရေးကို နံပါတ်(၁) အနေနဲ့ ဆောင်ရွက်သွားမှာဖြစ်ကြောင်းဖြေကြားခဲ့.... ဆိုတာဖတ်မိပြီးတွေးကြည့်တာပါ။ ကိုမင်းကိုနိုင်တော့ ရဲလုပ်မယ်လို့ ရွှတ်တွတ်တွတ်ပြောတာပဲ။ မိတ်ဆွေရဲ့သူငယ်ချင်းတယောက်ကတော့ သမ္မတတို့ဘာတို့ဆိုတာ တက်လမ်းမရှိတဲ့အလုပ်တွေမို့ စိတ်တောင် မကူးမိဘူးတဲ့။ ရွှေမန်းကတော့ သမ္မတထက်ကြီးတာတောင် လုပ်ချင်ပြန်သတဲ့။ အမေရိကန်မူကြိုကျောင်းသားလေးတယောက်ကတော့ သမ္မတအလုပ်က ပျင်းစရာကြီးတဲ့။ တချို့ကတော့ သမ္မတလုပ်တဲ့သူ President Maker လုပ်မယ်တဲ့။

ကဲ ခင်ဗျားရော...

ဇူလိုင် ၂၇ ၂ဝ၁၅

(ပြည်သူဟာ တာဝန်အကျေလွန်လှပြီ)
ရည်ရွယ်ချက်ပါပါ မဲစာရင်းအမှားလုပ်ပေးထားတာတွေကို ချက်နဲ့လက်နဲ့ထောက်ပြကန့်ကွက် ဆန့်ကျင်တာမျိုး၊ အမှန်ဖြစ်အောင်ပြင်ပေးဖို့ပြောတာမျိုး၊ ဒါမှမရရင် ရွေးကောက်ပွဲမဝင်ဘူး သပိတ်မှောက်တယ်ဆိုတာမျိုးတွေကိုရှောင်ပြီး ရပ်ကွက်အထဲထိဆင်းကာ မဲစာရင်းကူစစ်တာမျိုး၊ မဲစာရင်းမှန်ဖို့ပြည်သူတွေမှာတာဝန်ရှိတယ်ဆိုပြီး စစ်အုပ်စုကလိန်ကကျစ်ကို ပြည်သူဘက်အပြစ်ချသလိုပြောတာမျိုးတွေ ဘာ့ကြောင့်လုပ်သလဲဆိုတာ နားလည်ဖို့မခက်ပါ။ ၂ဝဝ၈ ဖွဲ့စည်းပုံပါ ဒီမိုကရေစီမကျတဲ့ ပုဒ်မတချို့ကိုတောင် ပြင်ပြင်မပြင်ပြင်ဝင်ပါရစေ ဇွတ်တင်ထားမင့်ပြီကိုး။ စစ်အုပ်စုဘက်ကတော့ မဝင်လေကြိုက်လေပဲ။ မဝင်ပဲ ဘာမှလုပ်မှာမဟုတ်တာလည်း သိထားနှင့်ပြီးသားပဲ။ စစ်အုပ်ဟာအင်မတန်ပါးနပ်ကောက်ကျစ်တယ်ဆိုတာထက် ပိုပါတယ်။

အင်န်အယ်လ်ဒီမဝင်လို့ ဘယ်နိုင်ငံကမှ အင်န်အယ်အယ်လ်ဒီကို ပစ်ထောက်ခံမှာမှမဟုတ်ပဲ။ ဖြစ်ခြင်းဖြစ် အပြစ်တောင်တင်မှာ။ တခြားမကြည့်နဲ့ ဝင်မယ်လည်းပြောရော အရင်ဆုံးကြေညာချက်ထုတ် ထောက်ခံပြတာ အန်ကယ်လ်ဆမ်ကြီး။ နောက်တချက်က မဝင်ရင် အပြင်က ပြစ်တင်တာမတင်တာ ခနထား အရင်ဆုံးပြန်ဆန့်အကျင်ခံရမှာက ကိုယ့်အတွင်းကပဲ။ကိုယ့်လက်သပ်မွေး ခေါင်းခေါက်ရွေး (ခေါင်းကောက်ရွေးမဟုတ်ပါ)တွေပဲ။ အမေသိပါတယ် ကိုယ့်အနေအထားကို။

ကဲထားတော့ ခု အဲ့ဒီမဲစာရင်းအမှားကြီးနဲ့ပဲ ဝင်ပါပြီတဲ့။ စာရင်းလိမ်တခုတည်းနဲ့တင် တချို့နေရာတွေမှာ ကျိန်သေးပေါက်ပေါ်မယ့်ပြဿနာတွေလည်း တပုံတခေါင်းကြီးပဲ။ နိုင်ရက်နဲ့ရှူံးသွားရတာမျိုး၊ မရှူံးသင့်ပဲ ရှူံးသွားရတာမျိုးတွေ ကြုံကိုကြုံရမှာပဲ။ ဒါစာရင်းလိမ်ပဲပြောတာ။ မဲခိုး၊ မဲလိမ်နဲ့ အခြား မသမာမှုတွေလည်း လာဦးမယ်တွေးမိတယ်။ အဲ့သလိုတွေဖြစ်တော့မှ မျက်ရည်ခံထိုးသလိုလို၊ စကားနာထိုးသလိုလိုလုပ်လည်း လုပ်တာပဲရှိမှာပါ။ စာထုတ်ပြီးကန့်ကွက်ရင်“စာရင်းမှားကြီးမှန်းသိသိသိနဲ့ ဝင်တုန်းကဝင်ပြီး ခုမှ ဘာလာပြောနေတာလဲ”လို့ တင်အေးက ငေါက်ငန်းမထုတ်ရင်ပဲတော်လှပြီ။ တခါတုန်းလည်း မဲပြားဖယောင်းသုတ်တာကို “ဖယောင်းသုတ်တယ်”ပြောလို့ ဒဏ်ငွေတထောင်ဆောင်ရဖူးတယ် မဟုတ်လား။ ချိန်ဆဆင်ခြင်ဖို့ပါ။ ဒီတခါတော့ ကော်မရှင်က စကားနာတောင် အထိုးခံမယ့်ကိန်း မမြင်မိဘူး။

ရွေးကောက်ပွဲရလဒ်ကို အသိအမှတ်မပြုဘူးတို့ လွှတ်တော်ထဲမဝင်ဘူးတို့စတာတွေ မပြောတော့မယ်မှန်း မလုပ်တော့မယ်မှန်းလည်း စစ်အုပ်စုကသိပါတယ်။ လုပ်လည်း အရာထင်စရာတော့ မမြင်မိသေးပါ။

အဲ့ဒီအခါကြတော့လည်း “အမတ်အရေအတွက် လိုသလောက်မရလိုက်လို့ လွှတ်တော်ထဲမှာ ဘာမှမလုပ်နိုင်တာ”ဆိုတဲ့စကားကြားရလိမ့်မယ်တွေးပါတယ်။

စာရင်းမှားကြီးမှန်းသိသိနဲ့ဝင်ပြီး အရေးမလှတော့မှ ပြည်သူတွေတာဝန်မကျေလို့ လို့ မပြောဘူးမှန်းသိပါတယ်။ ပြောလို့မရမှန်းလည်း သိထားပြီးသားနေမှာပါ။

ပြည်သူဟာ သမိုင်းခေတ်အဆက်ဆက်မှာ တာဝန်အကျေလွန်လှပြီ။

ဇူလိုင် ၂၆ ၂ဝ၁၅

(နိုင်ငံရေးလက်လီလက်ကား)

ဟိုနေ့က ပြည်တွင်းက လူငယ်တယောက်နဲ့ စကားပြောဖြစ်တယ်။ သူက လာမယ့် ရွေးကောက်ပွဲအပေါ် အားသန်သူ။ ပြီးတော့ အင်န်အယ်လ်ဒီလူငယ်။ စာလည်း ဖတ်သလောက် ဖတ်တယ်။ ဆင်လည်း ဆင်ခြင်တယ်။ တွေးလည်း တွေးတတ်တယ်။ ဖေ့စ်ဘွခ်ကမေမေ့သားတွေထဲမှာထူးခြားတာက “အမေစွဲ”ပါးသူဖြစ်တယ်။ အမြင်မတူတာတွေ အတော်ပြောတယ်၊ အပြောလည်း ခံတယ်။ သူ့အမြင် သူ့နိုင်ငံရေးရပ်ခံချက်ကိုလည်း ခိုင်ခိုင်ကြည်ကြည် တည်တည်တန့်တန့်ပြောတယ်။ အမေ့သားတွေထဲမတော့ ရှာမှရှားသူလို့ ကိုယ့်ဘာသာ အမှတ်ပေးမိတယ်။ ရွေးကောက်ပွဲနဲ့ ဘယ်သူ့ကို ဘယ်ပါတီကို ဘယ်ပုံရွေးချယ် မဲပေးကြမလဲဆိုတဲ့ဆီရောက်တော့ သူ့ဆီက ထူးထူးဆန်း နိုင်ငံရေးဝေါဟာရတခု ထွက်လာတယ်။ သူ့ကိုယ်ပိုင်လား။ အသုံးတွင်ကျယ်နေတဲ့ဟာလား။ လူသိနည်းတဲ့ စကားလားတော့ မပြောတတ်ဘူး။ ကျနော်တော့ တခါမှ မကြားဘူးတာအမှန်ပါ။

”ကျနော်ပြောတဲ့ လက်လီနိုင်ငံရေးနဲ့ လက်ကားနိုင်ငံရေးဆိုတာက ဒီလိုဦးလေးရာ.. တယောက်ချင်းတော်တဲ့သူတွေ တသီးပုဂ္ဂအနေနဲ့ဝင်ပြိုင်ကြမှာကို လူထုက ကောက်သင်းကောက်သလို လိုက်မဲပေးရွေးချယ်နေရတာကလက်လီနိုင်ငံရေး။
အဲ့ဒီလူတွေအကုန် အင်န်အယ်လ်ဒီအနေနဲ့ဝင်အရွေးခံ ပါတီတခုတည်းကလူတွေအကုန်လုံးကို ပုံအောမဲပေးရွေးချယ်တာက လက်ကားနိုင်ငံရေးပေါ့ဗျာ” တဲ့။ သူပြောတာတွေက အဲ့ဒါနဲ့စပ်လို့အများကြီးပါပဲ။ ဒီနေရာမှာ ကျနော်ပြောချင်တာနဲ့ တယ်မဆိုင်လှဘူးထင်လို့ ထားခဲ့ပါရစေ။

ကျနော်က အင်္ဂလိပ်လိုကြတော့ ဘယ်လိုပြောမလဲဗျ၊ အဲ့ဒီ လက်လီလက်ကားနိုင်ငံရေးကို”ဆိုတော့ “ကျနော်လည်းမပြောတတ်ဘူး ဦးလေးရ ဒါပေမယ့် Wholesale and Retail Politics ဆိုရင်တော့ သိတ်မမိုက်ဘူးနဲ့တူတယ်”လို့ပြောပြီး ရီနေတယ်။

ဇူလိုင် ၂၆ ၂ဝ၁၅

(မြူကျတဲ့ မင်းကျင့်)

နံနက်ခင်းပြတင်းဖွင့်တော့ ခြံနောက်တပြင်လုံး မြူ Fog တွေ ကျနေလိုက်တာမှ နေခြည်တောင် ခတ်နောက်နောက်ကြီး ဖြစ်နေတာပါပဲ။ နွေဦးတုန်းကလည်း နှင်း Snow တွေ ၁၄ လက်မလောက်အထိကျလိုကျ၊ နွေခေါင်ခေါင် မိုးကြီးလေကြီး ကျလိုကျ၊ ခုလည်းကြည့် နွေလည်ကောင်ကြီး မြူတွေဆိုင်းလိုဆိုင်းနဲ့။

မြူတွေကြည့်ရင်း မဆီမဆိုင် ကမ္ဘာပြားဆရာပြောတဲ့ ဘရာဇေးလ်ကလိပ်ပြာတောင်ပံတွေ ဘာတွေလည်း တွေးမိလိုမိ၊ မင်းတွေ မင်းကျင့်တရားအညီမအုပ်ချုပ်ရင် ရာသီဥတုတွေ ဖေါက်ပြန်တယ်ဆိုတဲ့ အိန္ဒုမြစ်ဝှမ်းသားလူလည်လူနပ်တွေစကားလည်း တွေးမိလိုမိနဲ့နေတုန်း လက်ကိုင်ဖုန်းက အသံမြည်လာတယ်။

ကြည့်လိုက်တော့ ပူလို့ဆိုပြီး ညက အပေါ်ထပ်တက်အိပ်တဲ့ဇနီးဆီက ဖြစ်နေတယ်။ အိပ်ယာမဝင်ခင်က ပြောသေးတယ် “မနက်ဖြန် တနင်္ဂနွေ ဘုရားကျောင်းလည်း သွားမနေတော့ဘူး၊ နေဖင်ထိုးတဲ့အထိအိပ်မယ်”ဆိုပြီး။ ခု ဘယ့်နှယ် နေက ဖင်မပြောနဲ့ ဘယ်မှတောင် မယ်မယ်ရရ မထိုးရသေးဘူး သူက နိုးလာပြီ။

ဖုန်းကိုင်တော့ “အပြင်ကိုကြည့်လိုက် အပြင်ကို၊ မြူတွေကျနေတယ်။ လှမှလှပဲ”ဆိုပြီး ဖုန်းချသွားတယ်။ တချို့ကတော့ ထင်လိမ့်မယ် အပေါ်ထပ်နဲ့အောက်ထပ်များ လှမ်းအော်လိုက်လည်းရတာပဲဟာ ဖုန်းခေါ်ပြောရတယ်လို့ဆိုပြီး။ တခုက ကျနော်တို့အိမ် ဖွဲ့စည်းပုံနဲ့ အခန်းတံခါးတွေတပ်ဆင်ထားပုံက ထူးတယ်။ အပေါ်ထပ်အိပ်ခန်းကနေ အောက်ထပ်အိပ်ခန်းကို အိပ်ခန်းတံခါးတွေမဖွင့်ပဲ လှမ်းအော်ပြောရင်မကြားရဘူး။ နောက်တခုက အဲ့လို ဖုန်းနဲ့လှမ်းပြောတဲ့အလေ့က အသားကျနေသလိုဖြစ်တာလည်းပါမယ်။

တခါတလေ ကျနော် အပြင်အလုပ်ရှိလို့သွား၊ အိမ်သော့ယူသွားဖို့မေ့ခဲ့၊ အိမ်ပြန်လာချိန် သူ အိမ်ထဲမှာရှိနေတာဆို အိမ်ရှေ့တံခါး တဝုန်းဝုန်းထုပြီး ဖွင့်ခိုင်းရတာထက် တံခါးရှေ့မတ်တပ်ရပ် ဖုန်းလေးလှမ်းခေါ်ပြီး ဖွင့်ဖက်ခိုင်းရတာက ပိုအဆင်ပြေတာကိုး။ တနေ့ကဆိုလည်းကြည့် ကျနော့်ကို အာဖရိကန် ရိုးရာအစားအသောက်များပွဲတော်ဖိတ်စာ အီးမေးလ်ထဲရောက်လာတယ်။

အဲ့အချိန်မှာ ကျနော်က အိပ်ခန်းထဲမှာ၊ သူက ဧည့်ခန်းထဲမှာ လက်ပ်တော့ပ် ပေါင်ပေါ်တင်လို့။ ကျနော်က “ဖိတ်စာရထားတယ် သွားကြမလားဆိုတော့ ဘယ်နေ့ဘယ်နေရာဘယ်အချိန်လဲ”တဲ့။ ဒါနဲ့ “အီးမေးလ်ထဲထည့်လိုက်မယ်၊ ဖတ်ကြည့်”ဆိုတော့ ပွဲကပြီးသွားတယ်။ ဘာမှ လှမ်းအော်နေစရာ ထသွားပြောနေစရာမလိုတော့ဘူး။ အချိန်ကုန်လူပမ်း သက်သာတာပဲ နည်းပညာများကျေးဇူးနဲ့။ ထားပါတော့ အဲ့ဒီအကြောင်းတွေ။ ပြောချင်တာချော်ထွက်သွားမှာ စိုးတယ်။ နောက် သတ်သတ်ရေးဦးပါမယ်။

ခနနေတော့ မယ်မင်းကြီးမက အောက်ဆင်းလာပြီး နောက်ဘက်ထွက်တဲ့ တံခါးကိုဖွင့်ပြီး မြူအထိသွားခံတယ်။ ပြန်ဝင်လာတော့ “အရသာရှိလိုက်တာ”လို့ပြောတယ်။ ကျနော်က “တို့ဆီမှာတော့ အဲ့သလိုမျိုးတွေဖြစ်ရင် ရာသီဥတုဖေါက်ပြန်တယ်ပြောပြီး မင်းတွေ မင်းကျင့်တရားနဲ့မညီလို့ဖြစ်တာလို့ ယုံတတ်ကြတယ်ကွ”ဆိုတော့ သူမျက်မှောင်ကြုပ်သွားတယ်။ ပြီးတော့မှ “ဘာဆိုင်လို့တုန်း”တဲ့။ ကျနော်က လူတတ်ကြီးအထာနဲ့ ဆိုင်တာပေါ့ဆိုပြီး “အစိုးရတွေ ကိုယ်ကျိုးနဲ့လောဘဇောတိုက်ပြီး သစ်တွေနင်းကန်ခုတ် တောတွေပြုန်း တောင်တွေပြို မြေဆီလွှာတွေခမ်းခြောက် မြစ်တွေထဲမြေတွေပြိုကျ မြစ်ရေတွေကြီး ဘာတွေညာတွေ တသီတတန်းကြီးလျှောက်ပြောပြီး ကိုယ့်လူတွေယုံတတ်တဲ့အယုံကို အမှန်တရား မဖြစ်ဖြစ်အောင် ဇွတ်ဖျစ်ညှစ်ပြောမိတာပေါ့။

ကျနော့်စကားလည်းဆုံးရော စပ်ဖြဲဖြဲနဲ့ “အင်း ဒါဆို မြူကျလို့ရတဲ့အရသာလေးဖျောက်ပြီး အိုဘားမားအစိုးရဆန့်ကျင်ရေးနဲ့ ဖြုတ်ချရေးလုပ်မှတော်မယ်နဲ့တူတယ်”လို့ပြောပြီး မြူတွေထဲပြန်ထွက်သွားလေရဲ့။

ဇူလိုင် ၂၅ ၂ဝ၁၅

(ကိုယ့်ဘာသာ မသနားတဲ့ကောင်)

ဘယ်လ ဘယ်အပတ်က ရေးဖြစ်တဲ့တိုနန့်နန့်လေးတွေဆိုပြီး ဟိုအကြောင်းအရာပေါ် ထုံ့ပိုင်းထုံ့ပိုင်း ဒီကိစ္စအပေါ် တို့တိတို့တိ ချချရေးဖြစ်တာလေးကို ကိုယ့်ဘာသာ ခေါင်းစဉ်ငယ်လေးတွေပေး အေဖိုး ၃ မျက်နှာစာလောက်ရရင် တခါပြန်စုစုပြီးတင်တာမျိုး မလုပ်ဖြစ်တာကြာသွားပြီ။ ဒီနေ့တော့ လုပ်မလားတွေးတာပါပဲ။

ပျင်းကလည်းပျင်း၊ စိတ်ကလည်းဖမ်းမရဆုပ်မမိ၊ လူကလည်း နည်းနည်းမအီမသာဖြစ်နဲ့ဆိုတော့ ကိုယ့်ကိုယ်ကို ပြစရာအကြောင်းနဲ့ ဆင်ခြေဆင်လက်ကရှိနေပြီးသား။ ဒီကြားထဲ လူတခုပူမှုရယ်တဲ့ ဆယ်ကုဋေဆိုတဲ့အတိုင်း အနီးဆုံးလူတွေကနေ ဟိုးကမ္ဘာ့အစွန်အဖျားကလူတွေအထိ (ဘာမှ လုပ်မပေးနိုင်ပေတဲ့) ကိုယ်နဲ့ဆိုင်တယ်လို့တွေးတတ်တာကလည်း တမှောင့်။

စာရေးတာပဲဖြစ်ဖြစ် ဘာပဲဖြစ်ဖြစ်ပေါ့လေ တခုခုကိုလုပ်နိုင်သွားတဲ့အခါ ငါကွလို့ လက်မထောင်မာန်တက်တတ်ပေမယ့် မလုပ်နိုင်တဲ့အခါ လုပ်မရတဲ့အခါ “ငါ့ခမျာ သနားစရာ”လို့ တခါမှတော့ မတွေးမိသေးဘူး။ လူတိုင်းမှာ လုပ်နိုင်စွမ်းဆိုတာကလည်း အကန့်အသတ်နဲ့ မဟုတ်လား။ ကိုယ့်လို ခြေပြတ်လက်ပြတ် မျက်လုံးတဘက်ပျက်နေတဲ့သူမှာ ပိုတောင် အကန့်အသတ်ကြီးတာကလားဆိုတာကို အမြဲနှလုံးသွင်းရတာပါပဲ။

အဲ့သလိုသွင်းနိုင်မှုအကျိုးက ကိုယ့်အကန့်အသတ်ကိုယ်သိပြီး ကိုယ့်ကိုယ်ကို “ငါ့ခမျာ သနားစရာ” အတွေးကနေလွတ်မြောက်ပြီး မလုပ်နိုင်တဲ့အခါမျိုးတွေမှာ စိတ်လက်ပေါ့ပါးစွာ နေထိုင်တတ်စေတာပဲ။

ဇူလိုင် ၂၅ ၂ဝ၁၅

(တောင်သာဆီက အောင်ဇာနည်)

ဗမာပြည်လောက် အာဇာနည်၊ အမျိုးသားနေ့နဲ့ အမျိုးသားသစ္စာဖေါက်ပေါတဲ့ပြည်များ ရှိဦးမလား။ လူမျိုးစုအားလုံးမှာ အာဇာနည်တွေ အမျိုးသားနေ့တွေ အမျိုးသားသစ္စာဖေါက်တွေ တန်းတူရည်တူကိုယ်စီကိုယ်ငှရှိကြပေမယ့် အများတကာ့အများစုကြီးသဘောဖြစ်နေတဲ့ လူများလို့ဗိုလ်ကျတဲ့သဘောပါတဲ့ အမျိုးသားသစ္စာဖောက်သတ်မှတ်ချက်ကြတော့ စစ်တပ်၊ မဘသ သင်္ကန်းခြုံအကြမ်းဖက်သမားတွေနဲ့ လူကြိုက်များနိုင်ငံရေးပါတီဝင်တချို့က လုပ်ကြပုံပဲ။

တို့တာဝန်အရေးသုံးပါးကို လက်မခံရင်လည်း အမျိုးသားသစ္စာဖောက်၊
မျိုးစောင့်ဥပဒေမထောက်ခံရင်လည်း အမျိုးသားသစ္စာဖေါက်
အောင်သောင်းအလောင်းရှုသွားတာ မကြိုက်ကြောင်းပြောလည်း အမျိုးသားသစ္စာဖောက်။

သူတို့အဖို့ရာ အောင်သောင်းဟာ သူရဲကောင်း။
တိုင်းပြည်အဖို့ရာ အောင်သောင်းဟာ ပြည်သူ့သစ္စာမထောက်သူ။

ဇူလိုင် ၂၅ ၂ဝ၁၅

(သေနတ် အပစ် ခံရသူ)

မူတူးဆေးဖိုး+မန်းငြိမ်း ခေါင်းထောင်ထလာကတည်းက ကရင့်တော်လှန်ရေးအပေါ် စိတ်မပျက်စိတ်မကွက်ပေမယ့် အဲ့ဒီ နှစ်ဦးဂိုဏ်းကိုတော့ အတော့်ကိုစက်ဆုပ်မိတာအမှန်ပါ။ ဟိုးရှေ့ပိုင်းက ဒီကေဘီအေနဲ့ ကေအင်န်ယူကွဲပြီး ကရင့်လက်နက်နဲ့ ကရင်ကရင်ခြင်း ပြန်သတ်ကြတာလည်း စိတ်ထဲ သိတ်အံ့သြတကြီးမဖြစ်သလို သိတ်လည်းမခံစားမိပါ။ လက်နက်ကိုင်တော်လှန်ရေးတချို့ရဲ့ ကျချိန်တွေမှာဖြစ်တတ်တဲ့သဘာဝလောက်လို့ပဲ မြင်ပါတယ်။ ကရင်ပြည်သူတွေ ထိခိုက်နစ်နာဆုံးရှူံးရတာတွေအတွက်တော့ စိတ် အကြီးအကျယ်ထိခိုက်မိသလို ရင်လည်းနာပါတယ်။ ခုနောက်ပိုင်း ဗိုလ်ကျော်သက် ဗိုလ်ဆန်းအောင်တို့ကို အဖွဲ့အစည်းနဲ့တပ်ထဲ ထုတ်လိုက်သွင်းလိုက် လုပ်နေတာမြင်တော့ ခေါင်းဆောင်ဆိုသူတွေကို နှလုံးပါနာလာတယ်။

လက်ထဲ သေနတ်ရှိနေသေးလို့ ကိုယ့်ကို အရေးလုပ်စကားပြောနေသေးတာ၊ လူဟာ လက်ထဲသေနတ်မရှိရင် ကြက်ငှက်ထက် ဖမ်းရလွယ်တာ၊ သေနတ်ရှိနေတုန်းတောင် ဒီ့လောက် နိုင့်ထက်စီးနင်းအလုပ်ခံနေရတာ မရှိများမရှိတော့ရင်ဆိုတဲ့သဘောတွေကို လက်နက်ကိုင်တော်လှန်ရေးအတွေ့အကြုံကြီးမားလှတဲ့ ကရင်အမျိုးသားခေါင်းဆောင်တွေ ကျနော်တို့ထက် ကရင်ပြည်သူတွေထက် ပိုသိမြင်နားလည်ပေမယ့် ခေါင်းဆောင်တချို့ရဲ့ ကိုယ်ကျိုးစီးပွားအတွက် အဖွဲ့အစည်း၊ တပ်နဲ့မိမိပြည်သူကို စတေးပစ်တာမျိုးကြ ကျနော်တို့ရော ကရင်ပြည်သူတွေကပါ လက်မခံပါ ဆန့်ကျင်ပါတယ်။

ခုနပဲ သတင်းတခုကြားရပြန်ပါတယ် “ဗိုလ်ကျော်သက်နဲ့ဗိုလ်ဆန်းအောင်ကို KNU ဗိုလ်ချုပ်ဂျော်နီနဲ့ ဗိုလ်ချုပ်ဘော့ကျော်ဟဲတို့က ပြန်လက်ခံလိုက်ပြန်”လို့ဆိုပါတယ်။ အရင်းအမြစ်က သိတ် Reliable မဖြစ်လို့ ကျိန်းသေပေါက်တော့ မပြောနိုင်သေးပါ။

ဇူလိုင် ၂၅ ၂ဝ၁၅