Monday, July 27, 2015

၂ဝ၁၅ မေအကုန်ဇွန်နဲ့ဇူလိုင်လတွေက တိုနန့်နန့်လေးတွေ ၇(မျိုးမြင့်ချို)

0 comments
၂ဝ၁၅ မေအကုန်ဇွန်နဲ့ဇူလိုင်လတွေက တိုနန့်နန့်လေးတွေ ၇(မျိုးမြင့်ချို)
(မဖတ်တတ်ရင် ကျမ်း)
ထောင်ထဲကနေ အပြင်။ အပြင်ကနေ ထိုင်း၊ ထိုင်းကနေ အမေရိကန်အထိ ကိုယ်နဲ့မကွာဆောင်လာတဲ့ ဗမာစာအုပ်တွေထဲမှာ ဓမ္မဟောင်းဓမ္မသစ်လည်းပါတယ်။ ဘုရားစာအနေနဲ့ ကျမ်းစာအနေနဲ့မှတ်တာမဟုတ်ပဲ စာအနေနဲ့ဖတ်တာပဲ။ ရသအနေနြ့ဖတ်တာပဲ။ ဒဿနအနေနဲ့ ဖတ်တာပဲ။
မနေ့ကနဲ့တနေ့က ၂ ရက်လုံးလုံး စာဖတ်မယ်ဆိုထုတ်ကြည့်မိတာ အဲ့ဒါဖြစ်နေတယ်။ ကောင်းတယ်။ စာဟာ စာပဲ။ စာကို စာလိုဖတ်ပြီး စိတ်မှာအတွေးနယ်ဖြန့်ကျက်ဖို့ပဲ။ အယုံစိတ်နဲ့ဖတ်မိရင် စာဟာ ကျမ်း ဖြစ်သွားတတ်တာကို သတိပြမိဖို့ပဲ။
ပိဋကတ်သုံးပုံပဲဖြစ်ဖြစ်၊ ကိုရ်အန်ပဲဖြစ်ဖြစ်၊ ဓမ္မဟောင်းဓမ္မသစ်ပဲဖြစ်ဖြစ်၊ ဝါလ်မီကီးနဲ့ တူလ်ဆီဒါးသ်အပြင် စာဏကျပဲဖြစ်ဖြစ်ဖြစ်၊ ဂျူဒါအစ်ဇင်မ်းပဲဖြစ်ဖြစ် အခြားအခြားသော ဘုရားဖွဲ့တွေဖြစ်ဖြစ် စာကို စာလိုဖတ်ဖြစ်နေဖို့ပဲ။
စာကို ကျမ်းအဖြစ် သဒ္ဒါသစိတ်နဲ့ရွတ်ရင် လွတ်မြောက်ရာလမ်းလို့ ထင်တတ်ကြတာမဟုတ်လား။
ဇူလိုင် ၁၃ ၂ဝ၁၅

(ဒီမိုကရေစီလေး တဖဲ့လောက်တော့ကျွေးကြပါ)
မနေ့ညက သောက်ကြမယ်ကောင်းကောင်းဆိုပြီး ဘီယာနည်းနည်းဝယ်ခဲ့ကြတယ်။ အိမ်ရောက်တော့ တောက်တိုမယ်ရတွေလုပ်ကြ၊ ရှေ့နောက် နှစ်ယောက်နင်းစက်ဘီးကို ခြေသုံးချောင်းနဲ့ ၈ မိုင်လောက်နင်းကြ၊ ပြန်ရောက်တော့ ကြက်သွန်ဖြူ/နီတွေရှင်းကြ၊ မြက်ရိပ်ကြနဲ့ အတော်လေး ခြေကုန်လက်ပမ်းကျသွားတယ်။ ဒါနဲ့ သောက်မဟဲ့ဆိုကာ ဝယ်ထားတဲ့ဘီယာလည်း လျှာဖျားနဲ့တောင် မတို့နိုင်ကြ။ စောစောအိပ်ယာဝင်ကြ။ ထုံးစံအတိုင်း လင်းကြက်မတွန်မီ အိပ်ယာထကြ။ လင်အားကြီးမှာ ရေခဲသေတ္တာဖွင့်တော့ အမေ့ခံဘီယာတွေခမျာလည်း မခဲရုံတမယ် သွေးခဲအေးစက်လို့။ သနားချင်စရာ။
ဒါနဲ့ အလုပ်သွားတော့မယ့်ဇနီးကို "ဒီနေ့ ငါ အပြင်ထွက် အလုပ် လုပ်စရာမရှိဘူး၊ ငွေရမယ့်အပေါက်လမ်းလည်း မမြင်ဘူး၊ တနေကုန် အိမ်မှာတယောက်တည်း ပျင်းစရာနေရော့မယ်"လို့ပြောတော့ "စာရေးစာဖတ်နေပေါ့။ ခွေးလေးတွေလည်း ရှိသားပဲ၊ ကြက်တွေလည်းကြည့်ပေါ့၊ ကြက်သွန်ဖြူကြက်သွန်နီတွေကို လှန်လှန်ပေး။ ဘီယာတွေလည်း ရှိတယ်လေ"တဲ့။ အင်း ဟုတ်သားပဲ။ သူပြောမှ သွေးခဲဘီယာတွေဆီ စိတ်ရောက်တယ်။
ဒါနဲ့ ခွေးလေးတွေ ဗိုက်ဖြည့်၊ ကြက်တွေ အစာကျွေး၊ ကြက်သွန်နီ/ဖြူတွေ အထက်အောက်လှန်ပြီးနောက် ဗျစ်ရည်နည်းနည်းအာဆွတ်ရင်း ဘာနဲ့မြည်းရကောင်းပ တွေးနေတုန်း မယ်မင်းကြီးမဆီက ဖုန်းလာတယ် "ဟဲ့ ဘေ့စ်မင်န့်ထဲမှာ ဆိတ်နို့ချိစ်အဆိမ့်တွေရှိတယ်။ ငါမေ့နေလို့။ မငံတော့ ဘီယာနဲ့လိုက်မယ်ထင်တယ်"တဲ့။
ဒါနဲ့ပဲ အဲ့ဒါတွေ နည်းနည်းဖဲ့ပြီး ဘီယာနဲ့မြုံ့ကြည့်တော့ အဟုတ်သား။ အနံ့ကြောင့်ထင်တယ် ခွေးလေး ၂ ကောင်က အနားလာအမြီးနံ့တယ်။ အရက်ဘီယာဆို ဒီ ၂ကောင် အနံ့တောင်မခံဘူး။ အရက်မသောက်တိုင်း သူတော်ကောင်းကြေးဆို ဒီ ၂ ကောင်ဟာ ခွေး သူတော်ကောင်းလေးတွေ။ ချိစ်လေးတွေ နည်းနည်းစီဖဲ့ဖဲ့ကျွေးတော့ အငမ်းမရစားလိုက်ကြတာ။ ကိုယ့်ဟာလေးကုန်သွား ခက်ရချည်သေးအတွေးနဲ့ "မင်းတို့က အရက်ဘီယာကြတော့ မသောက်ဘူး။ အမြည်းကြတော့ တယ်စားချင်တယ်။ မသောက်ပဲ အမြည်းစားတာကြတော့ မဟုတ်သေးဘူးနဲ့တူတယ်ကွ၊"လို့ အသံမာမာနဲ့ပြောတော့ မျက်နှာလေးတွေငယ်လို့။
သနားတာနဲ့ ဘာမှဆက်မပြောတော့ပဲ တိုရည်ရှားရည်လေး ဖဲ့ဖဲ့ကျွေးနေမိတယ်။ သူတို့ခမျာလည်း အဲ့ဒီ မသဒ္ဓါရေစာလေးကိုပဲ အမြီးတနံ့နံ့နဲ့စားကြတယ်။ သွားရည်လေးတွေလည်း တမြားမြားနဲ့။ စိတ်က အဲ့ဒီမှာတင်ရပ်ရင် ကိစ္စမရှိဘူး။
ခုက စစ်ဒီမိုကရေစီလေး ဖဲ့ဖဲ့ကျွေးတာကို နိုင်ငံရေးသမားဆိုသူတွေက သွားရည် တမြားမြားဖြစ်နေကြတာများလားလို့ မဆီမဆိုင်လျှောက်တွေးမိတာပဲ။ စိတ်များ ပြောပါတယ်။
ဇူလိုင် ၁၃ ၂ဝ၁၅

(ကြက်မတဝပ်စာ ရွေးကောက်ပွဲ)
မနက်က ထုံးစံအတိုင်း ၆ ချက် မတီးခင် ကြက်အိမ်တံခါးဖွင့် အစာထည့်ရေလဲလုပ်ပေးခဲ့တယ်။ စက်ရှေ့ထိုင် တောရေးတောင်ရေးတွေရေးနေရင်း ကြက်မတွေ တင်းရှာသံညံလှချည်လား ဘာများဖြစ်ပါလိမ့်လို့ထင်ပြီး ကြက်ခြံတံခါးလေးဖွင့် ဝင်လိုက်တယ်ဆိုရင်ပဲ ကြက်မကြီးတကောင်က ဝုန်းကနဲပြေးချလာပြီး ကျနော့်ကို ခွပ်တော့မလိုလုပ်တယ်။ ရှူးရှူးလုပ်တာတောင် နောက်မဆုပ်ပဲ ခြေသလုံးကို ဆုပ်ပစ်တော့တာ။ ကြက်မဆုပ်ပစ်ခွပ်တယ်ဆိုတာ ဒါနေမယ်။
ဒါနဲ့ သူ့ကို အသာဖယ်ပြီး ကြက်အိမ်ထဲဝင်ကြည့်တော့မှ လားလား ဥတင်းနေရာတွေမှာ ရံကာထားတဲ့ ပလပ်စတစ်ဇကာကျဲကို မနက်ကတည်းက ဖွင့်ထားပေးဖို့မေ့ခဲ့တာကိုး။ ဒါနဲ့ ဖွင့်ပေးလိုက်တော့ သုံးလေးကောင် ကမူးရှူးတိုးအပြေးအလွှား ဝပ်တင်းထဲဝင်ပြီး ဥကြတော့တာပဲ။ ခမျာများ ဝပ်တင်းကလွဲလို့ တခြားနေရာတွေမှာ မဥတတ်ကြတော့ဘူး။
သားသည်မိခင် သားမြတ်မှာ နို့ရည်တင်းပြီး မခံနိုင်တဲ့အခါနာကျင်သလို သူတို့လည်း ဥချိန်တန်ရက်နဲ့ တင်းခံထားရလို့ ဝေဒနာပြင်းပြင်းခံနေရတာပဲလို့ထင်တယ်။ စိတ်ထဲက ဆောရီးလို့ပြောမိရင်း ၂ဝ၁၅ ရွေးကောက်ပွဲဝင်ဖို့ အင်န်အယ်လ်ဒီဖြစ်နေတာ ငါ့ကြက်မကြီးတွေနဲ့များ တူနေမလားမသိဘူးလို့တွေးမိပြန်တယ်။
စိတ်များပြောပါတယ်။
ဇူလိုင် ၁၃ ၂ဝ၁၅

(နိုင်ငံနဲ့ချက်မြုပ်)
ဗမာပြည်အလွမ်းဖျောက်ရင်း "သင်္ကြန်စိတ်"အဆာဖြေရင်း ဖို့တ်ဝိန်း ဇေတဝန်ကျောင်းက (ဖြူဖြူကျော်သိန်း အသံဟန်တို့ဖြင့်ဖတ်ပါ) ဝေါ်ထောပါထီကို ရောက်ပါတယ်။ ကျနော်က ဘုန်းတော်ကြီးကျောင်းမှာ ဗမာလုပ်တဲ့ဂျပန်ဆူရှီးကို သင်္ကြန်စာအဖြစ်အားပေးရင်း စားခဲ့ပါတယ်။ ဇနီးက ဗမာတို့ဟူးသုတ်စားရင်း အိမ်မှာ တခါလောက် လုပ်စားရအောင်လို့ပြောတယ်။ သူ အခု မုန့်ဟင်းခါးမှာ လက်သုတ်မှာ ငံပြာရည်မပါရင် ပုဇွန်ခြောက်နိုင်းချင်းမဖြစ်ရင် ပဲမှုန့်မနိုင်ရင် ဆီချက်မရွှဲရင် ချဉ်ငံစပ်မဟုတ်ရင် ဗမာစာမဟုတ်မှန်းသိနေပါပြီ။
တခါတလေ ကျနော်က ငါတို့တိုင်းပြည်မှာ.....လို့ အစချီချိပြီး တခုခုပြောတတ်လေ့ပါတယ်။ အဲ့နေ့ကလည်း သူစားနေတဲ့တို့ဟူးသုတ်ကို တဇွန်းကော်မြည်းရင်း တခုခုလိုနေသလိုဖြစ်တာနဲ့ "မင်းအကြိုက်သုတ်ပေးလိုက်တာနေမယ်။ ငါတို့တိုင်းပြည်မှာဆို တို့ဟူးသုတ်က......" ပဲရှိသေးတယ် "ဒါရော နင်တို့တိုင်းပြည်မဟုတ်လို့လား၊ ဟိုဟာက နင်တို့ ချက်မြုပ်မြေ Native Land လေ။ ခု နင်တို့က ဒီနိုင်ငံသားဆိုတော့ ဒါ နင့်တို့တိုင်းပြည် Your Country မဟုတ်လို့ ဘာလဲ"လို့ဆိုတယ်။ ဟုတ်သား သူပြောမှ နောက်ဆို အပြောအဆိုဆင်ခြင်မှ။
ဇူလိုင် ၁၃ ၂ဝ၁၅

(မြွေမသေတုတ်မကျိုး)
ကြံ့ဖွံ့ထဲမှာဖြစ်နေတာက တစ်လ ငွေဆယ်သိန်းအတွက် အမတ်နေရာလုနေကြတာမဟုတ်။ လူ လုနေကြတာ လူစုနေကြတာသာဖြစ်တယ်။ ဆယ်သိန်းဟာ သူတို့အတွက် ကလေးမုန့်ဖိုးတောင် ရှိပါ့မလားမသိဘူး။
ဘယ်လောက် တသွေးတသံတမိန့်နဲ့ ထက်အောက် နာခံရသည်ဖြစ်စေ မင်းလည်းသေနတ်မရှိ ငါလည်းတပ်မရှိဆိုတော့ နည်းနည်းပါးပါး ကလန်ကဆန်တော့ လုပ်လို့ဖြစ်တာပါပဲ။ ကတောက်ကဆလေးတွေလည်း ဖြစ်ကြမှာပါပဲ။ အရပ်ဝတ်နဲ့ ပါတီအထောင်ပြ ထားတာလည်းဖြစ်တော့ ပါတီဆန်ဆန် လူမွေးတာ လူစုတာ အုပ်စုဖွဲ့တာတွေလည်းရှိမှာပဲ။
နောက်တချက်က မဆလလို တပါတီပုံစံမဟုတ်တော့ ခု အတွေ့အကြုံက သူတို့အတွက် အသစ်ပဲ။ အလားတူပဲ ကျနော်တို့အတွက်လည်း အစစ်မဟုတ်ပေမယ့် အသစ်တော့အသစ်ပဲ။
အင်န်အယ်လ်ဒီမှာတော့ ခုချိန်ထိ ဒေါ်စုပြီး ပြီးတဲ့သဘော မီးသေတုန်းဆိုပေမယ့် နည်းနည်းတော့ လျော့တိလျော့ရဲဖြစ်လာတဲ့ သဘောလေးတွေတွေ့လာရတယ်။ သူတို့မှာလည်း ပါတီခေါင်းဆောင်မှုပိုင်းမှာ အထိအခတ်လေးတွေ အငြိအပြုလေးတွေရှိနေတယ်။
ရွှေမန်းတို့ သိန်းစိန်တို့ပါတီအကိုင်ကျင်လည်တာမှာ နိုင်ငံရေးအဝါးဝတာမှာ မီဒီယာနဲ့ပြောတတ်ဆိုတတ်တာမှာ ဌေးဦးခြေဖျားတောင် မမီဘူး။ စီနီယာဖြစ်လို့သာ ဥက္ကဌလုပ်ကြတာ။ တကယ်တမ်း ပါတီကိုကိုင်ထားတာက ဌေးဦးပဲ။
နောက်ပြီး ၂ဝဝ၈ နဲ့အထိုင်ကြနေသရွေ့ ဘယ်သူ ဘာပြီး ဘာလုပ်ဆိုတဲ့နေရာချထားမှုနဲ့ မျိုးဆက်မွေးထားတာလည်း အခိုင်အမာရှိတယ်။ အင်န်အယ်လ်ဒီကြတော့ ဒေါ်စုကွယ်လွန်ရင် ဘာဖြစ်မလဲတွေးကြည့်တော့ ရင်ခံစရာနဲ့ ရင်လေးစရာကြီးလိုဖြစ်နေတယ်။
စစ်တပ်ထဲက ရွှေမန်းကို သိတ်မကြိုက်ကြဘူးဆိုတဲ့အသံ ထုတ်ပေးထားလည်း ရည်ရွယ်ချက်ပါတယ်လို့မြင်တယ်။ တကယ်က ရွှေမန်းကိုကြိုက်တယ်မကြိုက်ဘူး စစ်တပ်ကပြောရအောင် စစ်တပ်နဲ့ရွှေမန်းဆိုတာ စစ်အုပ်စုဒင်္ဂါးတပြားတည်း မဟုတ်တာကြနေတာပဲ။ လူထုအမြင်မှာ စစ်တပ်(မင်းအောင်လှိုင်)က သတ်သတ်
အစိုးရ( သိန်းစိန်)က သတ်သတ်၊ လွှတ်တော်(ရွှေမန်း)က သတ်သတ်ပုံမျိုးဖော်ထားတာ ပိုပီပြင်အောင် အလှုပ်ပြပေးတာပါ။
တခုတော့ရှိတယ် ရွှေမန်းသားအဖတွေ စားခွက်အလုကြမ်းတာကတော့ စစ်အုပ်ထဲမှာတောင် ပြောစမှတ်တွင်တယ်။ စီးပွားရေးအင်ပါယာကြီးလိုဖြစ်လာလို့ ကျန်စစ်ဗိုလ်ဟောင်းသစ်တွေတောင် မလိုတမာဖြစ်လာတာလည်းရှိတယ်။ နောက်ပြီး ဒေါ်စုနဲ့ ပလူးကောင်းတဲ့အချိန်က ဒေါ်စုမျက်နှာနဲ့ရလိုက်တဲ့ အခွင့်အလမ်းတချို့လည်းရှိတယ်။ ဒါ့ကြောင့် သန်းရွှေကပါ “ကိုရွှေမန်း စီးပွားရေးက မင်းတို့သားအဖတွေချည်းလုပ်နေတာ မဟုတ်ဘူး”ဆိုပြီး ခေါ် ဘရိတ်အုပ်ရတဲ့အထိဖြစ်တယ်။ ဒေါ်စုကလည်း သိန်းစိန်နဲ့ပျားရည်ဆမ်းပြယ်ချိန် ရွှေမန်းနဲ့ပလီချိန်မှာ အတင်းလိုက်လုံးတာ များသွားတယ်။ ဗိုလ်သန်းရွှေ ခေါ်မာန်မှ ရွှေမန်း နည်းနည်းကိုယ်ရှိန်သတ်သွားတာ။
ဖွဲ့စည်းပုံပြင်ကိစ္စလွှတ်တော်ထဲမှာ မဖြစ်သွားတာက အဲ့ဒါနဲ့တော့မဆိုင်ဘူး။ ပလူးတာပလူးတာပဲ။ သားအဖစီးပွားရေးအင်ပါယာကြီးအတွက် မျက်နှာရူးထတာ ထတာပဲ။ မူလအခြေခံကတော့ ၂ဝဝ၈ ဖွဲ့စည်းပုံကို ကာကွယ်ရေးပဲ။ ကြားရသလောက်ပြောရင်တော့ ရွှေမန်းပါတီပြန်ရမယ့်ကိန်းပဲ။ သမ္မတမျှော်ဖို့မလွယ်ဘူး။ ပါတီပြန်ရင် ဌေးဦးနဲ့ ပါတီတွင်းတိုက်ပွဲ Inner Struggle လေးတွေ ကြားရမယ်ထင်တယ်။
သိန်းစိန်သမ္မတနေရာထားပြီး ဆက်သွားဖို့ နည်းနည်းပါးပါး မျက်နှာပျက်စရာရှိပေမယ့် နောက်သက်တမ်းမှာ သိန်းစိန်ပဲအသင့်ဆုံးလူဖြစ်နေတယ်။ တပြိုင်တည်းမှာ “စစ်တပ်ထဲက သိန်းစိန်ကို ကြိုက်တယ်”ဆိုတဲ့အသံလည်း ထုတ်ထုတ်ပေးတယ်။ ကြားတဲ့အချက်အလက်လေးတွေပေါ်အခြေခံပြီး တွေးမိတွေးရာတွေးကြည့်တာပါ။
ဇူလိုင် ၁၂ ၂ဝ၁၅

(အမေရိကန် ယူနီယံ)
အမေရိကန်ကအလုပ်သမားသမဂ္ဂဆိုတာတွေက ရှင်းတယ်ဗျာ။ အလုပ်သမားဘက် နည်းနည်းအလိုက်ပြတဲ့ အလုပ်ရှင်အလုပ်သမားကြားက ပွဲစားတွေပါ။ မရှိရင် ပိုကောင်းမကောင်းမပြောတတ်ပေမယ့် ရှိနေလို့ နည်းနည်းကောင်းနေတာလေးတွေတော့ ရှိပါတယ်။ ပွဲစားထုံးစံအတိုင်း ပွဲညွန့်ပွဲခ နှစ်ဖက်ခွအပြင် ဘာကြေးညာကြေး သဒ္ဒါကြေးလေးနဲ့များနဲ့ဆိုတော့ သမဂ္ဂခေါင်းဆောင်တွေ အူစိုပါတယ်။ တချို့များ သူဌေးပေါက်စလေးတွေတောင်ဖြစ်လို့။ ပွဲစားဆိုတာ ပွဲရှိမှ စားရတာမဟုတ်လား။ ဘယ့်နှယ်လို့ ပွဲပျက်အောင်လုပ်ပါ့မလဲ။ ပွဲစားဆိုတာ ပွဲပျက်မှာအကြောက်ဆုံးပါ။
ဇူလိုင် ၁၂ ၂ဝ၁၅

(ကိုကိုကြီး ရွှေ့ဇယား)
ထောင်စကားနဲ့ပြောရရင် ကလေးကစားကွင်းကိစ္စဟာ အသေအချာချိန်ပြီး “ဇယားရွှေ့”ကြည့်ကြတာပါ။ ကိုကိုကြီးဟာ “ဇယား သမား”ပါ။ ထောင်စကားနဲ့ပဲပြောရရင် ဇယားသမားဆိုတာ“ဇယားညပ်”တတ်ပါတယ်။ ကလေးကစားကွင်းကိစ္စဟာ ဇယားရွှေ့တာပါ။ ကလေးကလားမဟုတ်သလို ကလေးကစားတာလည်း မဟုတ်ပါ။ စစ်အုပ်စုဟာ ကလေးကွက်နဲ့ မ ပလေးပါ။ ပွဲပြီးမဟုတ်တောင် မီးမသေမချင်း ကစားပါတယ်။ အာမခံမယူ အယူခံမဝင်လှန့်လုံးဟာ ပွဲမဆူပါ။ လူမစည်ပါ။ ၂ဝ၁၅ ရွေးကောက်ပွဲ(ဖြစ်မယ်ဆို)နီးပါပြီ။ ထောင်ကျဆိုတာ အမတ် ဝင်အရွေးခံမရပါ။
ဇူလိုင် ၁၁ ၂ဝ၁၅

(ပွဲပြီးတဲ့အထိ မီးသေစေ့ချင်)
ဒေါ်စုပြောထားတာတွေရှိပါတယ် “ပြည်သူကိုကိုယ်စားပြုတဲ့ပါတီမို့ တိုင်းရင်းသားအားလုံးကို ကိုယ်စားပြုတဲ့ပါတီမို့ အင်န်အယ်လ်ဒီပါတီဝင်ဖြစ်ဖြစ် မဖြစ်ဖြစ် ပါတီကိုကိုယ်စားပြုပြီး ဝင်ပြိုင်မယ်ဆိုလည်းဖြစ်တယ်”ဆိုတဲ့သဘော။ ဒီနေရာမှာတွေးစရာက အင်န်အယ်လ်ဒီတဖြစ်လဲ သန်းငြိမ်းတို့ ခင်မောင်ဆွေတို့ဆီက မြတ်ညာဏစိုးတွေ ဘယ်လောက်များ ပါလာမလဲပေါ့ဗျာ။ နောက်တချက်က အင်န်အယ်လ်ဒီမှာ အင်န်အယ်လ်ဒီအဖြစ်နဲ့ တဘဝလုံးစွန့်ပြီး “အန်တီ့”နောက်လိုက်ဖြစ်ခဲ့သူတွေထက် ရွှေကြာပင် “မေမေ့”သားတွေ ဘယ်မျှ အရေးပါနေပြီလဲပေါ့ဗျာ။
ခက်တာက နိုင်ခြေရှိတဲ့ပါတီကနေ အထက်ကြေးနဲ့ဝင်ပြိုင် ဆယ်သိန်းစားဖြစ်ပြီးမှ ကာလပေါက်ဈေးနဲ့ ဝယ်ရောင်းဖြစ်ပြီး ကူးကြပြောင်းကြမှာတွေကလည်း တည့်တွက်ရမှာပါ။ မဲဆန္ဒရှင် တစ်ရာခိုင်နှုန်းနဲ့ဖြုတ်ချလို့ရတယ်ဆိုပေမယ့် မဲဆန္ဒရှင်တွေရဲ့ဆန္ဒက ကော်မရှင်က “ကောက်ကြည့်စေ”ဆိုမှ ရမှာပါ။ ကူးသွားတဲ့အခါ ၅ နှစ်စာခံဒဏ်ရပြီး “သာကူးတွေ”လို့ အောင့်သီးအောင့်သက် စကားနာထိုးရုံမှတပါးအခြားမရှိပြီဆို ကျောချမ်းစရာပါ။
ဘာပဲဖြစ်ဖြစ်ပါ တဘဝစာအင်န်အယ်လ်ဒီတွေဖြစ်ဖြစ် ရွှေကြာပင်မေမေ့သားတွေဖြစ်ဖြစ် မြတ်ညာဏစိုးတွေဖြစ်ဖြစ် အမတ်ဖြစ်သွားပြီဆိုရင် လွှတ်တော်ထဲရောက်သွားပြီဆိုရင် “ဒေါ်စုလူ”လို့ပြောဖို့ခက်သွားမှာပါ။ ခုရှိနေတဲ့ အမတ်လက်တဆုပ်စာကိုတောင် ပုဂ္ဂိုလ်ရေးသြဇာနဲ့ တချက်တချက် မီးမသေချင်တာတွေလည်း တွေ့နေရပါပြီ။ နိုင်ငံရေးအိုရင် ကြောင်အိုထက် ဆိုးပါတယ်။ ရွေးကောက်ပြီးသွားလို့ လွှတ်တော်ထဲရောက်သွားတဲ့အခါ “လွှတ်တော်ထဲက ဒေါ်စုလူ”ဆိုပြီး သြဖာညောင်းလိမ့်မယ်လို့ အပိုင်တွက်လို့မရနိုင်ပါ။
ကိုယ့်ဆိုင်းဘုတ် လည်ပင်းချိတ်ဝင်မယ့် ဆယ်သိန်းတန်အမတ်တွေဟာ ကိုယ့်လူတွေဖြစ်မယ်လို့ ဘယ်သူမှ အာမ မခံပါ။ ပါတီဝင်အစစ်တွေတောင် ထိန်းဖို့ခက်မှဆို ဟိုလူ့လူတွေနဲ့ သွားရမယ့်နှစ်ပါးက မိုးရောလင်းပါ့မလားလည်း တွေးစရာပါ။
ကျနော်ကတော့ ၂ဝ၁၅ ရွေးပွဲကို ထွက်ပေါက်လို့ မျှော်လင့်ချက်လို့မမြင်ပါ။ ဆန့်ပါ ဆန့်ကျင်သူပါ။
ဒါပေမယ့် ခင်ဗျားတို့ “အမေ”ကို သမ္မတထက်ကြီးတာရှိတောင်ဖြစ်စေ့ချင်သူပါ။
ဇူလိုင် ၁၁ ၂ဝ၁၅


0 comments:

Post a Comment