Wednesday, March 16, 2016

ဦးထင်ကျော့်ကိစ္စ(မျိုးမြင့်ချိ)

0 comments
ဦးထင်ကျော် ဘယ်လိုနေမယ် ကျနော်လည်း မပြောတတ်သေးဘူး။ လူပုံပန်းကြည့်ရတာတော့ ရိုးဂုဏ်ပေါ်တယ်၊ နှိမ့်ချတတ်မယ်လို့လည်း ခန့်မှန်းလို့ရတယ်။ နိုင်ငံရေးအရ ဘယ်လောက် ထက်မြက်မယ် တွေးခေါ်စဉ်းစားနိုင်မယ် ဆုံးဖြတ်ချက်တွေကို ဘယ်မျှပြတ်ပြတ်သားသားချနိုင်မယ်တော့ မပြောတတ်သေးဘူး။ နောက်ဆုံးနဲ့အရေးအကြီးဆုံးအချက်က သူဟာ ထက်ထက်မြက်မြက်ရှိဦးတောင် ကိုယ်စွမ်းကိုယ်စ ဘယ်မျှပြခွင့်ရမလဲက ရှိသေးတယ်။

ဒါပေမယ့် သူ့မှာ အုပ်ချုပ်ရေးအတွေ့အကြုံမရှိဘူးတို့ ဘာတို့ ပြောနေကြတဲ့ စစ်အလိုတော်ရိတွေနဲ့ စစ်အာဏာရှင်ကောင်တွေသိဖို့တော့ ပြောမယ်။ မင်းတို့ကရော တိုင်းပြည်ကို အုပ်ချုပ်ဖူးလို့လား။ စစ်တပ်ကိုင်ပြီး လူထုကို တိုင်းပြည်ကို လက်နက်နဲ့ဖိနှိပ်စိုးမိုးဗိုလ်ကျတာဟာ တိုင်းပြည်အုပ်ချုပ်တာ မဟုတ်ဘူး။ တိုင်းပြည်အုပ်ချုပ်တာ နိုင်ငံရေးသမားအလုပ်ဖြစ်တယ်။ ပညာရှင်အလုပ်ဖြစ်တယ်။ အတွေးအခေါ်သမားအလုပ်ဖြစ်တယ်။ စစ်တပ်အလုပ်၊ စစ်ဗိုလ်စစ်သားအလုပ်မဟုတ်ဘူး။
စစ်တပ်အလုပ်ဘာလဲ မင်းတို့သိတယ်။

မင်းတို့ ကိုယ့်အလုပ်ကိုယ်မလုပ်ပဲ ဓနလောဘဇောတိုက် အာဏာရမက်ငန်းဖမ်းပြီး
နိုင်ငံရေးထဲဝင်စွက်လို့ ဗမာပြည်မှာ ဒီလောက် ပြဿပေါင်းသောင်းခြောက်ထောင်ဖြစ်နေတာ။
ပြည်တွင်းစစ်ကို မင်းတို့ပဲဖန်တီး၊ မင်းတို့ပဲမွေးမြူ ၊ မင်းတို့ပဲကိုယ်ပိုင်ပစ္စည်းလုပ်ပြီး ပြည်တွင်းစစ်တော့ လာမထိနဲ့ မီးပွင့်သွားမယ်လုပ်နေတာ။ စစ်မီး မင်းတို့မွှေးတာ၊ စစ်မီး မင်းတို့ လောင်ခိုင်းထားတာ။ စစ်မီး မင်းတို့ မွေးထားတာ။ မင်းတို့ စစ်နဲ့လုပ်စားနေတာ။

နိုင်ငံရေးသမားက စစ်မီးငြှိမ်းဖို့ စစ်မီးသတ်ဖို့၊ တိုင်းပြည်အေးချမ်း တရားဥပဒေစိုးမိုးဖို့၊ လူ့အခွင့်အရေး နိုင်ငံသားအခွင့်အရေးတွေရဖို့၊ မှန်ကန်မျှတကောင်းမွန်တဲ့တရားစီရင်ရေးနဲ့ ခွင့်တူညီမျှနိုင်ငံဖြစ်ဖို့ လုပ်နေတာ။ အဲ့ဒါ အုပ်ချုပ်ရေးပဲ။ အဲ့ဒါ တိုင်းပြည်အုပ်ချုပ်ရေးပဲ။ အတတ်ပညာပိုင်း ကိုယ်ကျင့်တရားပိုင်း စိတ်ဓာတ်ရေးရာကြံ့ခိုင်မှုအပိုင်း ဦးဆောင်နိုင်မှုအပိုင်းစတာတွေမှာ အားနည်းရင်နည်းနေဦးတောင် နိုင်ငံရေးသမားအစစ်ဆိုတာ ကိုယ်ကျိုးမရှာဘူး၊ တိုင်းပြည်ကို အနိုင်မကျင့်ဘူး၊ လူထုကိုဗိုလ်ကျပြီး တိုင်းပြည်သယံဇာတရောင်းစား စီးပွားရေးမှန်သမျှလက်ဝါးကြီးအုပ်တာတော့ မလုပ်ဘူး။ လက်နက်နဲ့ဗိုလ်ကျစိုးမိုးရေးလုပ်ဖို့ ပိုတောင်ဝေးသေးတယ်။

မှတ်ထား ထပ်ပြောလိုက်မယ် အညံ့ဆုံးနိုင်ငံရေးအစစ်သမားတောင် မင်းတို့ထဲက အကောက်ကျစ်ဆုံး အရက်စက်ဆုံး အယုတ်ညံ့ဆုံး ကိုယ်ကျိုးအရှာဆုံး အာဏာရမက် ငမ်းအဖမ်းဆုံး နေဝင်းလို သန်းရွှေလို ခင်ညွန့်လို မင်းအောင်လှိုင်လိုလူတွေထက် တိုင်းပြည်အုပ်ချုပ်ရေးကိုနားလည်တယ်။ မင်းတို့လို ဗိုလ်ကျစိုးရေးကို ယောင်လို့တောင် စိတ်မကူးဘူး။ တိုင်းပြည်နဲ့လူထုအပေါ် ကောင်းတဲ့စေတနာထားတယ်။

နိုင်ငံရေးသမားမပြောနဲ့ ထောင်ထဲမှာတွေ့ခဲ့တဲ့ ရန်ကုန်ဆင်ခြေဖုံးဆင်းရဲသားရပ်ကွက်က အတန်းပညာအများကြီးမသင်ဖူးတဲ့ စိတ်အခြေအနေလည်း သိတ်ပုံမှန်မဟုတ်တဲ့ လက်လုပ်လက်စားတယောက် စစ်အာဏာရှင်စနစ်အလိုမရှိဆိုင်းဘုတ် လည်ပင်းဆွဲပြီး တကိုယ်တော်ဆန္ဒပြလို့ အဖမ်းခံရတယ်။ စစ်ရုပ်သေးတရားရုံးတရားသူကြီးက ထောင်မချခင် မင်းဘာလို့ အဲ့သလိုလုပ်ရသလဲလို့မေးတော့ "ကျနော်လည်း ဆင်းရဲတယ်။ ကျနော်တို့တရပ်ကွက်လုံးလည်း ဆင်းရဲတယ်။ အလုပ်တွေလည်း လုပ်နေကြရက်သားနဲ့ ထမင်းဟင်းကောင်းကောင်းလေးတောင် မစားရဘူး။ တခါလာလည်း ငါးပိရည်တို့စရာ တခါလာလည်းငါးပိရည်တို့စရာပဲ။ ကျနော်လည်း ထမင်းဟင်းကောင်းကောင်းလေးစားချင်တယ် ကျနော်တို့ရပ်ကွက်ထဲကလူတွေလည်း ဟင်းလေးဘာလေးနဲ့ နေ့တိုင်းထမင်းစားစေချင်တယ်။ စစ်တပ်အုပ်စိုးနေသမျှ ကျနော်တို့ ငါးပိရည်တို့စရာပဲစားနေရမှာ၊ ဒါ့ကြောင့် လုပ်တာ"လို့ပြန်ပြောခဲ့တယ်။

တွေးကြည့် ခေါင်းမကောင်းတဲ့လူတောင် အနည်းဆုံး သူ့ရပ်ထဲကဆင်းရဲသားတွေကို ဟင်းနဲ့ထမင်းစားစေချင်စိတ်လေးတော့ ရှိတယ်။

မင်းတို့မှာ အဲ့လောက် လူစိတ်လေးတောင်မရှိလို့ပြောနေတာ။
ထပ်ပြောမယ် တိုင်းပြည်အုပ်ချုပ်တာနဲ့ ဗိုလ်ကျစိုးမိုးတာ မတူဘူး။

(ဦးထင်ကျော်ဆိုပြီးပြောနေလို့ ပြောတာမဟုတ်။။ သူတို့ပြောနေတာက အရပ်သားမှန်သမျှကိုပြောနေတာဖြစ်လို့ ပြောရခြင်းဖြစ်ပါတယ်)
မျိုးမြင့်ချို မတ် ၁၆၊ ၂ဝ၁၆

0 comments:

Post a Comment