အမေရိကန်ရဲ့ ဒေါ်လာလက်နက်(အပိုင်း၃)

အမေရိကန်ရဲ့ ဒေါ်လာလက်နက်(အပိုင်း၃)

ဒေါ်လာရှားပါးလာပြီး ဗိုလီဗာငွေတန်ဖိုးကျလာတာကြောင့် ဒေါ်လာနဲ့ဝယ်သွင်းရတဲ့ကုန်စည်တွေ ဈေးကြီးလာတယ်။ များများလည်း မသွင်းနိုင်လို့ ကုန်ပစ္စည်းတွေဈေးကြီးရုံမက ရှားပါးပြတ်လပ်တာတွေဖြစ်တယ်။ အခြေခံစားကုန်သောက်ကုန်တွေ ဆေးဝါးတွေ ပြတ်လပ်ကုန်တယ်။ စက်ရုံအလုပ်ရုံတွေလည်းလိုအပ်တဲ့ကုန်ကြမ်းတွေ၊ စက်ပစ္စည်းစတာတွေ မတင်သွင်းနိုင်တော့လို့ လုပ်ငန်းချုံ့ပစ်တာ ဒါမှမဟုတ် ပိတ်ပစ်ရတာတွေဖြစ်လာတယ်။ အလုပ်လက်မဲ့တွေများလာတယ်။ တိုင်းပြည်စီးပွားရေးလည်း ကမောက်ကမတွေဖြစ်လာတယ်။ ကျပ်တည်းမှုဒဏ်မခံနိုင်တော့လို့ အိမ်နီးခြင်းနိုင်ငံထွက်ခွာသူတွေ သန်းနဲ့ချီရှိလာတယ်။

တိုင်းပြည်ငွေတန်ဖိုးထိုးကျပြီး မတည်မငြိမ်ဖြစ်နေပေမယ့် နိုင်ငံတကာငွေကြေးရန်ပုံငွေအဖွဲ့ IMF ဆီက ဗင်နီဇွဲလားဟာ ငွေချေးလို့မရပါဘူး။ ဒီအဖွဲ IMF ဟာ နိုင်ငံတနိုင်ငံငံ စီးပွားရေးအကျပ်အတည်းဖြစ်ရင် ငွေချေးငှားကူညီဖို့ဖွဲ့ထားတာလို့ဆိုတယ်။ ဒါပေမယ့် ဒီအဖွဲ့မှာ အမေရိကန်နဲ့ သူ့မဟာမိတ် ဥရောပနိုင်ငံတွေက မဲအများစုကိုချုပ်ကိုင်ထားတာမို့ အမေရိကန်သဘောမတူတာမှန်သမျှ ဒီအဖွဲ့ကမလုပ်ပါဘူး။ အမေရိကန်နဲ့အလွမ်းသင့်တဲ့ အာဂျင်တီးနားနိုင်ငံကတော့ မကြာသေးခင်ကပဲ ဒီအဖွဲ့ကြီးဆီက စံချိန်တင်ချေးငွေဒေါ်ဘာ ဘီလီယံ ၅၀ ရခဲ့တာဖြစ်ပါတယ်။

အဲ့ဒီလို တဘက်မှာ ဗင်နီဇွဲလားအစိုးရကို အကျပ်ဆိုက်အောင်လုပ်ပေးပြီး တဘက်မှာတော့ သူတို့လူ အတိုက်အခံခေါင်းဆောင်ဆိုတဲ့ ဂွိုင်ဒို ကို ငွေကြေးအကူအညီတွေပေးတယ်။ နောက်ပြီး မီဒီယာတွေကလည်း ဗင်နီဇွဲလားအစိုးရ စီမံခန့်ခွဲမှုမကောင်းလို့၊ ခြစားလိုံ အခုလို တိုင်းပြည်ကျမောက်ကမဖြစ်ရတာလို့ ဝါဒဖြန့်တယ်။ ဒါ့အပြင် အမေရိကန်အစိုးရအနေနဲ့ စစ်ရေးနည်းလမ်းကိုလည်း ပစ်ပယ်မထားဘူးဆိုပြီး ခြိမ်းခြော က်ပါတယ်။ ဗင်နီဇွဲလားစစ်တပ်ကိုလည်း အစိုးရကိုသစ္စာမခံပဲ အတိုက်အခံဘက်ကူးပြောင်းဖို့ ဗြောင်ရော ခိုးကြောင်ခိုးဝှက်ပါ လုပ်ပါတယ်။ ဒါပေမဲ့ အခုချိန်ထိ ဗင်နီဇွဲလားသမ္မတ မာဒူရိုဟာ ကြံ့ကြံ့ခံရပ်တည်နေတုန်းဖြစ်ပါတယ်။

ဒါဟာ ကမ္ဘာ့အင်အားကြီးနိုင်ငံအမေရိကန်က နိုင်ငံငယ်လေးတနိုင်ငံကို ဒေါ်လာလက်နက်သုံးပြီး ဘယ်လိုအနိုင်ကျင့် ဗိုလ်ကျစိုးမိုးဖို့ ကြိုးစားနေသလဲဆိုတာကို ဖော်ပြလိုက်တာပါ။ အမေရိကန်ဟာ သူ့ရဲ့ အခုလို ကမ္ဘာကြီးငကို ဗိုလ်ကျစိုးမိုးနေနိုင်တဲ့အနေအထားကို ဆက်လက်ထိန်းသိမ်းထဖားလိုတယ်။ တနည်းအားဖြင့် ဝန်ရိုးတခုတည်းကမ္ဘာစနစ်ကို ထူထောင်ချင်တယ်။ ဒါပေမဲ့ ဒါကို သူ့နောက်လိုက်နိုင်ငံတချို့ကလွဲလို့ ကမ္ဘာ့နိုင်ငံအများစုကလက်မခံကြပါဘူး။ ဝန်ရိုးအများရှိတဲ့ကမ္ဘာစနစ်ကိုသာ လိုလာားကြပါတယ်။

အမေရိကန်တနိုင်ငံတည်းက ဗိုလ်ကျစိုးမိုးမယ့် ဝန်ရိုးတခုကမ္ဘာစနစ်ကို မိမိတို့အနေဖြင့်လည်း မလိုလားပါ။ ဝန်ရိုးတခုကမ္ဘာစနစ်ကို ကမ္ဘာ့ပြည်သူအားလုံး သွေးစည်းညီညွတ်စွာဖြင့် ဆန့်ကျင်တိုက်ပွဲဝင်ကြပါစို့ဟု တိုက်တွန်းနှိုးဆော်လိုက်ပါတယ်။
(စက်တင်ဘာ ၁၅ ၂၀၁၉ ထုတ် ပြည်သူ့အာဏာဂျာနယ်မှဆောင်းပါးဖြစ်ပါသည်)