(နိုင်ငံသားတယောက်အကြောင်း)

(နိုင်ငံသားတယောက်အကြောင်း)
အမေရိကန်သည် ကျနော်နေသည့်နိုင်ငံဖြစ်ပြီး ကျနော်လည်း အမေရိကန်နိုင်ငံသားဖြစ်သဖြင့် အမေရိကန်ကို ကျနော့်နိုင်ငံဟုခေါ်ပါသည်။ ထို့အတူ အမေရိကန်ကိုကာကွယ်ရန် ကျနော့်တွင်တာဝန်ရှိပြီး အခြား တနိုင်ငံငံနှင့် သို့မဟုတ် ကမ္ဘာနှင့်စစ်ဖြစ်လျှင် ကျနော်အမေရိကန်ဘက်မှ ဝင်တိုက်ရမည့်သူဖြစ်ပါသည်။ သို့သော် (ဤသို့သော်သည် အရေးကြီးပါသည်) ထိုအခြေအနေတွင် စစ်ထဲမလိုက်လို့ စစ်ဝင်မတိုက်လို့လည်းရပါသည်။ လက်ဝှေ့ချန်ပီယံမိုဟာမက်အလီတို့လိုအရေးယူခံကာ ထောင်ထဲသွားနေလို့လည်းရပါသည်။ ထိုအရာသည် အမေရိကန်ဆန်ခြင်း သို့မဟုတ် အမေရိကန်ဆန်ဆန် တသီးပုဂ္ဂလအခွင့်အရေးကို ကာကွယ်ခြင်းဖြစ်ပါသည်။ တပြိုင်တည်းတွင် လူ၏ရွေးချယ်ခွင့်လည်းဖြစ်ပါသည်။ ထို့ကြောင့် မိုဟာမက်အလီမှာ စစ်ပွဲတွင်မသေပဲ သက်တမ်းအတိုင်းအပြည့်နေ၍ သေသွားပါသည်။ မျိုးချစ်စိတ်ဟုန်းဟုန်းတောက်ကာ ဗီယက်နမ်စစ်မြေပြင်သွား နယ်ချဲ့ကျူးကျော်ခဲ့ကြသော သူ့သူငယ်ချင်းတချို့ စစ်ပွဲ၌သေသူသေ ခြေလက်ပြတ်သူပြတ် လက်နက်ချသူချနှင့် နောက်ဆုံးစစ်ရှုံး၍ တိုင်းပြည်သို့မျက်နှာအောက်ချပြန်လာသူ ပြန်ကြရပါသည်။ မိုဟာမက်အလီကား ဗီယက်နမ်စစ်ဆန့်ကျင်ရေးသမားအဖြစ် ငြိမ်းချမ်းရေးသမားအဖြစ် ယခုထက်တိုင် လူသူလေးစားကြသော်လည်း ဗီယက်နမ်ကျောင်းဆင်း (စစ်ရှုံး၍ပြန်လာသော အမေရိကန်စစ်ဗိုလ်များကို Vietnum School ဟု အမေရိကန်စစ်တပ်တွင် ခပ်နှိမ်နှိမ်ခေါ်ပါသည်)များမှာ တနှစ်တခါ လူကြားသူကြားပွဲထုတ်ပေးရုံမှတပါး ဘယ်သူမှ သိတ်အရာမသွင်းချင်ကြပါ။ သို့သော် သူတို့ထဲမှ တချို့သည် ဗီယက်နမ်ကျူးကျော်စစ်ကို ယခုထက်တိုင် မှန်သည့်စစ် ကောင်းသည့်စစ် တရားသည့်စစ်အဖြစ် မြင်ကြပါသည်။ နောက်မျိုးဆက်များက မည်မျှအထင်ကြီးကြီးမကြီးကြီး၊ ဂုဏ်ပြုပြု မပြုပြု၊ အမွှမ်းတင်တင်မတင်တင် သူတို့သည် သူတို့နိုင်ငံအတွက် မျိုးချစ်စိတ်ဖြင့် တကယ်ပဲ စစ်ထွက်ခဲ့ကြသည်ဟုထင်နေဆဲဖြစ်ပါသည်။ 

သူတို့အထဲတွင် မွေးရာပါအမေရိကန်နိုင်ငံသားတွေပါသလို ကျနော့်လို နိုင်ငံသားပြုခွင့်ဖြင့် နိုင်ငံသားဖြစ်လာသူ Nutuaralization တွေလည်း အလွန်များပါသည်။ ကျနော်သည် အမေရိကန်နိုင်ငံသားဖြစ်သွားပြီးကတည်းက ဗမာပြည်ကို ကျနော့်နိုင်ငံ My country ဟုမသုံးတော့ပါ။ လိုအပ်လို့သုံးရမည်ဆိုလျှင် ဇာတိမြေ My native land ဟုသာသုံးပါသည်။ တကယ်လည်း အမေရိကန်အတွက်တော့ ကျနော်သည် ပဝတ္တိသားမှန်သည်မဟုတ်ပါလား။ ကျနော် အမေရိကန်ကို ငါ့နိုင်ငံဟုသုံးသဖြင့် တချို့နှာခေါင်းရှုံံကြပါသည်။ ထိုသူများထဲတွင်လည်း အမေရိကန်နိုင်ငံသားဖြစ်ပြီးသူတွေရှိပါသည်။ ကျနော့်စိတ်တွင် ထိုသူများအား အမေရိကန်ကို ငါ့နိုင်ငံဟုမသုံးရကောင်းလားဟု ငြိုငြင်စိတ် တစိုးတစေ့မှမဖြစ်သော်လည်း ဗမာပြည်ကို အမိမြေတို့ အဖနိုင်ငံတို့လုပ်နေသည်ကိုတော့ နားအလွန်ကလောပါသည်။ ထိုသူအများစုမှာ အမျိုးဘာသာ သာသနာ (မဘသ)တွေဖြစ်နေတာများသောကြောင့် မြင်ပြင်းကပ်တာလည်းဖြစ်နိုင်ပါသည်။ 

ထိုသူတို့တွင် အတွင်းစိတ်ပဋိပက္ခလည်းကြီးပါသည်။ ဗမာပြည်ကို အမိမြေတွေ အဖနိုင်ငံတော်တွေလုပ်နေသော်လည်း အမေရိကန်ထိလျှင် မချိအောင်နာတတ်ကြခြင်းကိုဆိုလိုပါသည်။ ကျနော်က အမေရိကန်နေ အမေရိကန်နိုင်ငံသားဖြစ်နေပြီး အမေရိကန်ကိုဝေဘန်လျှင် အပြစ်ဆိုလျှင် သူတို့မကြိုက်ကြပါ။ အစိုးရကိုဝေဘန်လျှင် ကျေးဇူးကန်းသည်ဟု ထင်ကြသူများလည်းဖြစ်ပါသည်။ ကျနော့်အား သားရေပေါ်အိပ် သားရေနားစားသည်ဟုအထိပင် ယိုးစွပ်တတ်ပါသည်။ တကယ်က သူတို့သည် အမေရိကန်ဆန်ခြင်းသဘောနှင့် အနှစ်သာရကိုနားမလည်ကြတာဖြစ်ဖို့များပါသည်။ အမေရိကန်တွင် တသီးပုဂ္ဂလအခွင့်အရေး Indivitual Rights များ အာမခံထားသလို Civil Rights များလည်း ဥပဒေနှင့်အညီ ခံစားနေရပါသည်။ အမေရိကန်ဒီမိုကရေစီလည်း အပြည့်အဝရှိပါသည်။ အခွန်လည်း အတိအကျထမ်းရပါသည်။ 

ထိုအခွင့်အရေးများ ရပိုင်ခွင့်များသုံးကာ မည်သူမဆို အစိုးရ၏ လုပ်ရပ်များကိူ ဝေဘန်လို့ ပြစ်တင်လို့ ရှုတ်ချလို့ လှောင်ပြောင်လို့ သရော်လို့ရပါသည်။ မိမိဘက်က မှန်နေဖို့တော့လိုပါသည်။ ကျနော်က အမေရိကန်အစိုးရ၏ ထိုချွတ်ချော်ချက်များကို ဝေဘန်ပြစ်တင် လှောင်ပြောင်သရော်လျှင် ထို အမေရိကန်−မြန်မာမဘသများ အလွန်အသည်းနာတတ်ကြပါသည်။ သူတို့သည် မသိစိတ်မှနေ၍ အမေရိကန်ကို ကျိုးနွံခယပျတ်ဝပ်နေကြသူများနှယ် ဖြစ်နေပါသည်။ အငုံ့စိတ်အခံဖြင့် သိမ်ငယ်နေကြသူများလိုလိုလည်း ဖြစ်နေကြပါသည်။ မင်းစိုးရာဇာကို အရှင်သခင်ထင်နေတတ်ကြသောကြောင့်လည်းဖြစ်နိုင်ပါသည်။ အမေရိကန်ဒီမိုကရေစီနှင့် လူ့အခွင့်အရေး နိုင်ငံသားအခွင့်အရေးများကိုနားမလည်ခြင်းသက်သက်ကြောင့်မဟုတ်မူပဲ ဦးချိုးခံထားရသည့် စေသည့်ကျွန် ထွန်သည့်နွားစိတ်ကြောင့်လည်းဖြစ်နိုင်ပါသည်။ ကျနော်ကထိုလူတွေကို အမေရိကန်အစိုးရ အချွတ်အချော်အတိမ်းအစောင်းများအကြောင်း ပယ်ပယ်နယ်နယ်ပြောစေ့ချင်သည်။ သူတို့ကမပြော။ ထောက်ပြစေချင်သည်။ သူတို့က မထောက်ပြ။ အမေရိကန်ဆန်စေချင်သည်။ သူတို့ကမဆန်။ ထို့အတွက် စိတ်ထဲ ယားကျိကျိဖြစ်သော်လည်း သိတ်ကြီးတော့ အပြစ်မမြင်မိ။ သူတို့၏ "မဘသ" စိတ်အခံကိုတော့ မသတီမိတာအမှန်။

ပြန်ကောက်ရလျှင် ကျနော်သည် အမေရိကန်ဖြစ်၏။ အမေရိကန်သည် ကျနော့်နိုင်ငံဖြစ်၏။ ကျနော့်နိုင်ငံကို ကောင်းစေချင်၏။ နိုင်ငံကောင်းလျှင် ကျနော်လည်း ကောင်း၏။ ကျနော်လည်း နိုင်ငံအတွက် ကောင်းဖို့လို၏။ ကျနော့်နိုင်ငံအတွက် ကျနော့်တွင်တာဝန်ရှိ၏။ တာဝန်ဆိုတိုင်း ထမ်းမည့်သူတော့မဟုတ်။ အမှားအမှန် တရားမတရားကို ပိုင်းခြားစိတ်ဖြာပြီး ငြင်းဆန်ရမည့်ကိစ္စကို ငြင်းဆန်မည်။ အစိုးရလုပ်နေပြောနေတာတွေကို နိုင်ငံသားပီသစွာ ချီးမွမ်းမည် ကဲ့ရဲ့မည်။ ထောက်ခံမည် ဆန့်ကျင်မည်ဖြစ်၏။ ကျနော့်နိုင်ငံအတွက် ကျနော်လုပ်နိုင်သည်မှာ လောလောဆယ်တွင်ဒါပဲဖြစ်၏။
မျိုးမြင့်ချို
၆၊ ဧပြီ၊ ၂၀၂၀