ဒါ့အပြင် အလဲဗင်းမီဒီယာသတင်းမှာ စက်တင်ဘာလ ၆ ရက်နေ့က ရွေးကောက်ပွဲကော်မရှင်ဥက္ကဋ္ဌနဲ့ ဒီချုပ်ပါတီဥက္ကဋ္ဌတို့ ရန်ကုန်မြို့မှာ တွေ့ဆုံခဲ့ကြပြီး ရွေးကောက်ပွဲကိစ္စ၊ နိုင်ငံတိုးတက်ရေးကိစ္စတွေပြောဆိုခဲ့ကြတယ်လို့ ဖော်ပြထားတယ်။
ပထမဦးစွာ ဒီဖြစ်ရပ်က “နိုင်ငံရေးပါတီတွေနဲ့ရွေးကောက်ပွဲတွေ”ဟာ ဗိုလ်တင်အေးလက်ခုပ်ထဲက ရေပါလား။ ဗိုလ်တင်အေးစိတ်ကြိုက် သွန်လိုသွန်၊ မှောက်လိုမှောက် ထင်ရာလုပ်နိုင်တယ်ဆိုတဲ့အချက်ကို ဖော်ပြနေတယ်။
ဒုတိယအချက် ဗိုလ်တင်အေးက “ကြားဖြတ်ရွေးကောက်ပွဲ မကျင်းပတော့ဘူး ၊ ဖျက်သိမ်းလိုက်ပြီ”ဆိုတဲ့အပေါ် အတိုက်အခံနိုင်ငံရေး ပါတီတွေက “သဘောတူတယ်”ဆိုပြီး ငြိမ်ခံနေကြတာ၊ မှိန်းနေကြတာတွေကတော့ မကောင်းလှဘူး။ ရုံးတစ်ရုံး၊ ဓါးတစ်စင်း အာဏာပိုင်သူများရဲ့ပဗိုလ်ကျမှု၊ ငါတကော ကောမှုတွေကို အတိုက်အခံပါတီတွေက ဝေဖန်ဖွင့်ချမှု မပြုဝံ့ဘဲ၊ ခံချည်းနေရတဲ့ မိမိတို့ရဲ့ အတိုက်အခံမပီသမှုကို ထုတ်ဖော်ဝန်ခံ အသိအမှတ်ပြုနေသလိုပဲ။ အခုတော့ “အတိုက်အခံပါတီ”ဆိုတာရဲ့အဓိပ္ပါယ်က “တိုက်လာသမျှ ငုံ့ခံနေရတဲ့ပါတီ”ဆိုတဲ့ အဓိပ္ပါယ်အဖြစ်ပြောင်းလဲသွားခဲ့ပြီ။ ဒါလည်း “ရွေ့နေတယ်”၊ “ပြောင်းလဲနေတယ်”လို့ ပြောနေဆိုနေတာတွေထဲက “အရွေ့တစ်ခု”၊ “ အပြောင်းအလဲတစ်ခု”ပဲ ဖြစ်လိမ့်မယ် ထင်ပါရဲ့။
တကယ်တော့ လွန်ခဲ့သော ဇူလိုင်လဆန်းပိုင်းမှာထုတ်ပြန်ခဲ့တဲ့“ဗိုလ်တင်အေးကော်မရှင်ရဲ့ညွန်ကြားချက်အမှတ် (၁/၂ဝ၁၄)” ဆိုတာ ဒီချုပ်ပါတီဥက္ကဋ္ဌရဲ့ နိုင်ငံရေး၊ ပုဂ္ဂိုလ်ရေးသြဇာရှိမှုအပေါ် အဓိကပစ်မှတ်ထားတဲ့ကန့်သတ်တားမြစ်ချက် ဖြစ်ပါတယ်။ အခုတော့ “ကြားဖြတ်ရွေးကောက်ပွဲ”ကျင်းပပေးလိုက်ရင် ရရှိလာမယ့်ရလဒ်နဲ့အကျိုးဆက်တွေက ကြံ့ဖွံ့ပါတီအတွက် ဘယ်လိုမှ ကောင်းနိုင်စရာ အကြောင်း လုံးဝမမြင်လေတော့လို့ “ကြားဖြတ်ရွေးကောက်ပွဲ”ကို မကျင်းပတော့ဘူးဆိုပြီး ဖျက်သိမ်းလိုက်တာပဲဖြစ်မယ်။
ကြံ့ဖွံ့ပါတီဘက်ကကြည့်ရင် ပထမအကြိမ်ကြားဖြတ်ရွေးကောက်ပွဲ(၂ဝ၁၂)မှာ အပြတ်အသတ် ရှုံးခဲ့ပြီးပြီ။ ယခုတစ်ခါ ဒုတိယအကြိမ် ကြားဖြတ်ရွေးကောက်ပွဲ(၂ဝ၁၄)မှာလည်း တစ်ခါထပ်ပြီး ရှုံးပြန်ဦးမယ်ဆိုရင်(ရှုံးဖို့ကသေချာသလောက်ပဲ) အရပ်ရပ်နေပြည်တော် မြင်လို့ ကြားလို့ မတော်ဘူးဖြစ်မယ်။ နှစ်ကြိမ်နှစ်ကြိမ်ခါ ဝက်ဝက်ကွဲရှုံးရရင် ကြံ့ဖွံ့ပါတီကြီးအဖို့ သိပ်ရှက်ဖို့ကောင်းပြီ။ မနိုင် နိုင်အောင်ညစ်ရမယ် ဆိုရင်လည်း ဗိုလ်တင်အေးကော်မရှင်အဖို့ ပြည်တွင်းပြည်ပဝေဖန်မှုတွေ ပိုပြီးသည်းသန်လာအောင် ဖိတ်ခေါ်သလိုရှိတော့မယ်။ ညစ်ပြီး အနိုင်လည်းမရ၊ နာမည်လည်းပျက်မယ်ဆိုတဲ့လမ်းကို ကြံ့ဖွံ့ပါတီနဲ့ဗိုလ်တင်အေးကော်မရှင်တို့ အသေအချာတွက်ချက်မိခဲ့ကြပုံပေါ်ပါတယ်။ ကြားဖြတ်ရွေးကောက်ပွဲလောက်မှာ ညစ်ရတာ သိပ်မတန်ဘူးလို့တွက်ပုံလည်းရတယ်။ ဒီတော့ မဟန်နိုင်တဲ့ ဒီပွဲကို ဖျက်လိုက်တာသာ အကောင်းဆုံးဖြစ်တယ်ဆိုပြီး ဒီလမ်းကိုရွေးချယ်ခဲ့ကြဟန်တူပါတယ်။
ဒါ့အပြင် သူတို့ဖော်ထုတ်မပြောတဲ့ အခြားအချက်တစ်ခုကလည်း ဒီချုပ်ပါတီက ၂ နှစ်အတွင်း ကြားဖြတ်ရွေးကောက်ပွဲ ၂ ကြိမ်မှာ ၂ ကြိမ် စလုံး သူတို့အပေါ်အနိုင်ယူသွားတယ်ဆိုတဲ့အချက်ကို ပြည်တွင်းပြည်ပက ရှင်းရှင်းလင်းလင်းတွေ့မြင်၊ ကြားသိသွားစေချင်ပုံ မရဘူး။ ဒီအချက်က နိုင်ငံရေးအရကြည့်ရင် အရေးပါတယ်။ ဒီတော့ ရွေးကောက်ပွဲစနစ်တွေ၊ ရွေးကောက်ပွဲနည်းဥပဒေတွေ ရေပက်မဝင်အောင် စိတ်ကြိုက်ပြင်ဆင်ပြဋ္ဌာန်းပြီး ၂ဝ၁၅ မှာ ပွဲကြီးပွဲကောင်းနွှဲနိုင်ဖို့ သူတို့နောက်တစ်လှမ်းဆုတ်လိုက်ကြတဲ့ပုံပါပဲ။ အဲဒီအချက်ကို ဗိုလ်တင်အေးရဲ့စက်တင်ဘာလ ၇ ရက် ရှင်းလင်း ချက်၊ “အချက်အမှတ် ၆” ကို ဖတ်ကြည့်ရင် အရှင်းသားတွေ့ရပါလိမ့်မယ်။ (ရှင်းလင်းချက်ကို ပူးတွဲတင်ပေးထားပါသည်)
မကြာခင်မှာ “အချိုးကျကိုယ်စားလှယ်စနစ်”(PR) အပါအဝင် ရွေးကောက်ပွဲနဲ့သက်ဆိုင်တဲ့ ဖက်ပေါင်းစုံဖိနှိပ်ကန့်သတ်ရေးဥပဒေတွေ၊ နည်းဥပဒေတွေ ထုတ်ပြန်လာလိမ့်မယ်။ အဲဒီတာဝန်တွေကို ဗိုလ်ရွှေမန်းနဲ့ဗိုလ်ခင်အောင်မြင့်တို့က သူတို့အပိုင်စားရာလွှတ်တော်တွေထဲမှာ ဖန်တီးလုပ်ဆောင်ကြလိမ့်မယ်။ ရွေးကောက်ပွဲကော်မရှင်အဆင့်ဆင့်မှာလည်း စစ်ဗိုလ်လူထွက်တွေတိုးချဲ့ခန့်ထားရမယ်။ ဒါ့အပြင် အခြားတစ်ဖက်မှာလည်း အခြေအနေမဟန်တဲ့အခါ ရွေးကောက်ပွဲဖျက်သိမ်းနိုင်ဖို့ “ဘယ်ကလာမှန်းမသိတဲ့လူအုပ်တွေ”ကို လေ့ကျင့် သင်တန်းပေးရဦးမယ်။ သွေးထိုးရန်တိုက်ပေးရဦးမယ်။ ဒါမျိုးတွေဖြစ်လာမှ ဗိုလ်တင်အေးပါဝါတွေစိတ်ကြိုက်ပြပြီး ကန့်သတ်တားမြစ်နိုင်မှာ မဟုတ်လား။
ဒီလိုတားမြစ်နိုင်ဖို့ “၂ဝဝ၈ အခြေခံဥပဒေ” ၊ ရွေးကောက်ပွဲနည်းဥပဒေနဲ့ အခြားတည်ဆဲဥပဒေတွေနဲ့ လိုအပ်ရင်လိုအပ်သလို ထုတ်ပြန် ညွန်ကြား၊ ပိတ်ပင်၊ တားမြစ်၊ ကန့်သတ်နိုင်တဲ့အခွင့်အာဏာတွေ”နဲ့ ဗိုလ်တင်အေးစိတ်ကြိုက် ထင်ရာစိုင်းနိုင်ဖို့ ပေးထားပြီးသားဖြစ်တယ်။
“၂ဝဝ၈ အခြေခံဥပဒေ” ပုဒ်မ ၃၉၉ နဲ့ ပုဒ်မ ၄ဝ၂ တို့ဆိုတာဟာ ဗိုလ်တင်အေးအတွက် စိတ်ကြိုက်ထင်ရာစိုင်းနိုင်တဲ့ တချက်လွှတ် အာဏာတွေဖြစ်တယ် မဟုတ်ပါလား။
အခုလို “၂ဝဝ၈ အခြေခံဥပဒေ၊ ရွေးကောက်တင်မြှောက်ခြင်းဆိုင်ရာဥပဒေ၊ နည်းဥပဒေ၊ နိုင်ငံရေးပါတီများမှတ်ပုံတင်ခြင်းဆိုင်ရာ ဥပဒေ၊ နည်းဥပဒေ၊ ညွန်ကြားချက်၊ အခြားတည်ဆဲဥပဒေများ”စတဲ့ မတရားတဲ့ဥပဒေတွေ အတင်းအဓမ္မလွှမ်းမိုး၊ စိုးမိုးထားတဲ့အခြေအနေအောက်မှာ ဒီချုပ်ပါတီဥက္ကဋ္ဌကြီးပါးစပ်မှ “တရားဥပဒေစိုးမိုးရေး”ဆိုတဲ့စကားကို တွင်တွင်ကြီး ပြောနေ၊ ဆိုနေတာကိုတော့ ဘယ်လိုမှ နားမလည်နိုင်အောင်ပဲဖြစ်နေရပါတယ်။
“၂ဝဝ၈ အခြေခံဥပဒေ”နဲ့ အခြားဖိနှိပ်ကန့်သတ်ထားတဲ့ “တည်ဆဲဥပဒေ”ဆိုတာတွေ တည်ရှိနေသမျှကာလပတ်လုံး ဗိုလ်တင်အေးကို ဖယ်ရှားပစ်လိုက်ရုံ၊ နိုင်ငံရေးပါတီများမှတ်ပုံတင်ခြင်းဆိုင်ရာဥပဒေ၊ နည်းဥပဒေ၊ ရွေးကောက်ပွဲတင်မြှောက်ခြင်းဆိုင်ရာဥပဒေ၊ နည်းဥပဒေတွေကို ပြင်ဆင်ပြောင်းလဲရုံမျှနဲ့ လွတ်လပ်ပြီးတရားမျှတတဲ့ရွေးကောက်ပွဲတွေ ဘယ်လိုမှ ဖြစ်မလာနိုင်ပါဘူး။
စစ်အုပ်စုမှာ “၁၉၉ဝ ရွေးကောက်ပွဲရလဒ်” အသိအမှတ်မပြုဘဲ၊ ဖျက်သိမ်းပစ်တဲ့အတွေ့အကြုံ၊ “ကြိုတင်မဲ”တွေနဲ့ အနိုင်ယူထားဖူးတဲ့ “၂ဝ၁ဝရွေးကောက်ပွဲ”အတွေ့အကြုံ၊ ယခုတဖန် သူတို့ရှုံးမှာသေချာနေတဲ့ “ရွေးကောက်ပွဲ”ကို ဖျက်သိမ်းပစ်တဲ့ အတွေ့အကြုံတွေ ရှိထားပြီးပြီဖြစ်ပါတယ်။
မနိုင်/နိုင်အောင် ညစ်နည်မျိုးစုံနဲ့အနိုင်ပိုင်းတတ်ပြီး၊ သူတို့နိုင်ဖို့ မသေချာတဲ့အခါ ပွဲဖျက်တတ်တဲ့ ပတ်မကြီးထိုးဖောက်ဖို့ ဘယ်တော့မှ လက်မရွံတဲ့ ဗိုလ်သိန်းစိန်၊ ဗိုလ်ရွှေမန်း၊ ဗိုလ်ခင်အောင်မြင့်၊ ဗိုလ်တင်အေး၊ ဗိုလ်မင်းအောင်လှိုင်တို့ စစ်အုပ်စုနဲ့ “၂ဝဝ၈ အခြေခံဥပဒေနဲ့ အခြားတည်ဆဲဥပဒေ” ဆိုတာတွေကို ပြတ်ပြတ်သားသားဆန့်ကျင်ကြရလိမ့်မယ်။
(တူမောင်ညို)
(၂ဝ၁၄ ခုနှစ်၊ စက်တင်ဘာလ ၉ ရက်)
0 comments:
Post a Comment