(ဗုံလုံတလှည့် ငါးပျံတလှည့်)

(ဗုံလုံတလှည့် ငါးပျံတလှည့်)
ဒေါ်စုက ဒီမိုကရေစီတို့ လူ့အခွင့်အရေးတို့ အသားကုန်အော်ပြီး အာဏာရည်မှန်းချက်ထားတဲ့အချိန်မှာ စစ်အုပ်စုက တဘက်ကနေ အမျိုးသားရေးလိုင်းတင်ပြီး ဘာသာရေး လူမျိုးရေးပြဿနာတွေ ပိုပြင်းပြင်းထန်ထန်ဖန်တီးတယ်။ မဘသ မွေးပြီး ဘုန်းကြီးတွေနဲ့ လှည့်တိုက်တယ်။ နောက်တဘက်ကတော့ ၅၉ (စ)ဘဲပြင်ပေးမှာလိုလို ထိုးဇာတ်လေးဖန်တီးပြီး ရိုဟင်ဂျာအရေးမှာ ကြံဖော်ကြံဘက်ဖြစ်ရုံမက ကမ္ဘာလှည့်ပြီးပါ စစ်အုပ်စုကို အရူးအမူးကာကွယ်တဲ့ဘဝရောက်တဲ့အထိ ကျုံးသွင်းယူတယ်။ ဒေါ်စုကလည်း သမ္မတဖြစ်နိုးနိုးနဲ့ ယူအင်န်အပါအဝင် ဒီမိုကရေစီ လူ့အခွင့်အရေးဇောင်းပေးတဲ့ နိုင်ငံကြီးတွေရဲ့ တံတွေးခွက်ပက်လက်မျောပြီး အဖယ်အကျဉ်ခံဘဝ ရောက်တဲ့အထိ မိုက်တွင်းဆက်တူးတယ်။

ဇာတ်က အဲ့လိုမြောနေတုန်း ဗြုန်းဆို AA ကို ချေမှုန်းခိုင်းတဲ့ကိစ္စကြီး ဖေါက်အချခံလိုက်ရတယ်။ ရှေ့ထွက်ပြီး လူကြမ်းမင်းသမီးလုပ်ပေးနေတုန်း နောက်ကနေ ထမိန်စဆောင့်အနင်းခံလိုက်တော့ မွှန်ထွန်ပြီး ဖွဲ့စည်းပုံပြင်မယ်ဘာညာနဲ့ သွေးရူးသွေးတမ်းထဖြစ်တယ်။ ဟိုကောင်တွေက လွှတ်တော်ထဲမှာ အစိတ်သားအမတ်တွေကိုကိုင်ပြီး လွှတ်တော်နည်းနဲ့ ဘယ်လိုမှပြင်မရတဲ့ဥပဒေဖြစ်နေသည့်တိုင် အဆင့်တိုင်းအဆင့်တိုင်းမှာပါ ကန့်လန့်တိုက်ပြတယ်။ ဒီလိုတိုက်ပြရင် လူပိုမုန်းမယ်ဆိုတာ မသိလို့မဟုတ်ပါ။ ပြချင်တာက “အင်န်အယ်လ်ဒီလုပ်တာမှာ ကောင်းတာလေးတော့ ပါပါသေးတယ်လေ“ဆိုတဲ့အမြင်မျိုး တပ်ထဲမှာ လုံးဝအဖြစ်မခံနိုင်တာကြောင့်ပါ။ ဒီလိုနဲ့ ၂ ဘက်လုံးက အသံကောင်းဟစ်ပြီး အပြန်အလှန်လည်း လှည့်ဖျား လူထုကိုလည်း လှည့်စားတဲ့ “ရင်ကြားစေ့ရေး“ဆိုတာကြီးက ပွင့်ကျသွားတယ်။ ၂ ဘက်လုံး ကိုယ်ရှိန်သတ်သွားတယ်။ စစ်အုပ်စုက ဖွဲ့စည်းပုံမပြင်ရေးအကြောင်းအချက်ကိုင်ပြီး မဘသအုပ်ကိုပွဲပြန်ထုတ်တယ်။ ဘာသာရေးလူမျိုးရေး ပွဲနည်းနည်းပြန်ဆူအောင် တပ်လှန့်ပြလိုက်တယ်။ လွှတ်တော်နည်းဖွဲ့စည်းပုံပြင်ရေး အာဘောင်အာရင်းသန်သူတွေကို ဖမ်းပြလိုက်တယ်။ ပြင်ရေးထောက်ခံပွဲတွေ အသံတိုးသွားတယ်။

ဒီလိုနဲ့ နိုင်ငံတကာအလယ်မှာ သိုးမဲအသင်းအပင်းဝင်ဖြစ်သွားတဲ့ ဒေါ်စုက ဥရောပသမဂ္ဂမှာ ဘာမှအရေးမပါ အရာလည်းမရောက်တဲ့အပြင် ဒေသတွင်းနဲ့ကမ္ဘာမှာလည်း ဘာနိုင်ငံရေး စီးပွားရေး သံတမန်ရေးသြဇာမှလည်းမရှိတဲ့ ဟန်ဂေရီတို့ ချက်တို့လိုနိုင်ငံတွေကို ပြေးကပ်တယ်။ အဲ့ဒီအစိုးရတွေက Popular Politics “ကြိုက်လုံးပစ်နိုင်ငံရေး“ အခြေခံထားတဲ့ လက်ယာအစွန်းရောက်တွေ။ အဲ့သလို အင်မီးဂရန့်နဲ့အစ္စလာမ်ဆန့်ကျင်ရေးသမားတွေနဲ့လုံးထွေးပြပြီး NLD ဦးဆောင်တဲ့ မဘသဗားရှင်းအသစ်နဲ့ ပွဲထွက်ဖို့ ခြေလှမ်းပြင်တယ်။ ဗမာပြည်အနာဂတ်မှာ အသစ်ပေါ်လာမယ့် ဘာသာရေးလူမျိုးရေးပြဿနာတွေဟာ မဘသဦးဆောင်မှာ မဟုတ်တော့ဘဲ အင်န်အယ်လ်ဒီဦးဆောင်မှာလားက တွေးစရာဖြစ်လာတယ်။

ဒေါ်စု သွားတွေ့တဲ့ ချက် ဝန်ကြီးချုပ် ဘားဘစ်ဟာ အကျင့်ပျက်ခြစားမှုတွေ အာဏာအလွဲသုံးစားမှုတွေအပြင် လူမျိုးရေးဘာသာရေး သပ်လျှိုသွေးခွဲ့လှုံ့ဆော်မှုတွေကြောင့်လည်း အကြီးအကျယ်နံမည်ပျက်နေသူဖြစ်တယ်။ ခု သူ ရာထူးကနှုတ်ထွက်ဖို့ ချက်ပြည်သူတွေ လမ်းပေါ်ထွက်လာကြပြီ။ ဒီဆန္ဒပြပွဲဟာ ကွန်မြူနစ်ဆန့်ကျင်ရေးနဲ့ ချက်နဲ့စလိုဗက်အကွွဲအခြေခံ ကတ္တီပါတော်လှန်ရေးနောက်ပိုင်း အင်အားအကြီးဆုံးလို့ နိုင်ငံတကာသတင်းတွေမှာ ဖော်ပြကြတယ်။ ဒေါ်စုဟာ ဒီလူတွေနဲ့တွဲပြီး အစ္စလာမ်ဆန့်ကျင်ရေး ခြေကုပ်ယူဖို့လုပ်လာတယ်လို့ ပြောကြတယ်။

ဟန်ဂေရီအစိုးရကြည့်ပြန်တော့လည်း မွတ်စလင်မ်ဆန့်ကျင်ရေး ရွှေ့ပြောင်းဝင်ရောက်လာသူများဆန့်ကျင်ရေး ဖိနှိပ်ဖမ်းဆီးမှုတွေ လူ့အခွင့်အရေးချိုးဖေါက်မှုတွေအတွက် ဥရောပတလွှားမှာ အဖတ်ဆည်မရအောင်နံမည်ပျက်နေတဲ့ လက်ယာစွန်းတွေဖြစ်တယ်။ တနည်းပြောရရင် ဟန်ဂေရီမဘသအစိုးပါ။ ဆိုတော့ ဒေါ်စုက ခု အဲ့ဒီအစွန်းရောက်အစိုးရတွေနဲ့ ရွှေလမ်းငွေလမ်းပြန်ဖေါက်ပြီး အစ္စလာမ်လူဦးရေကိစ္စနဲ့ ရွှေ့ပြောင်းဝင်ရောက်လာသူများပြဿနာဆွေးနွေးတယ်ဆိုတဲ့ ခေါင်းစဉ်အောက်ကနေ ရိုဟင်ဂျာအရေးကိုကပ်ထည့်ပြီး သေဖော်ညှိကြတယ်။ ဟိုဘက်ကလည်း ဂျင်ပဲ့ချင်းပေါက်တာဆိုတော့ ရိုဟင်ဂျာကိစ္စမှာ ဒေါ်စုအလိုကျ အိန္ဒြေမရကို ဟုတ်ပါ့ဟုတ်ပါ့ လုပ်ကြတယ်။ ဒါကို ဥရောပနိုင်ငံကြီးတွေက စက်ဆုပ်ရွံရှာတဲ့အကြည့်နဲ့ကြည့်တယ်။ ဒီ သူတော်ချင်းချင်း သတင်းလွေ့လွေ့ပေါင်းဖက်တွေ့ ဒေါ်စုခရီးစဉ်ကိုလည်း မီဒီယာတွေမှာ ခပ်မဆိတ်နေပြခြင်းနည်းနဲ့ မနှစ်မြိ့ုကြောင်းဖော်ပြကြတယ်။ အီးယူထဲပါနေလို့ မလွှဲမကင်းသာဆက်ဆံနေရပေမယ့် နိုင်ငံကြီးတွေက ဒီနိုင်ငံတွေနဲ့ သိတ်ဖက်လှဲတကင်းမလုပ်ဘူး။ ဖြစ်နိုင်တဲ့အခါမျိုးတွေဆို သံခင်းတမန်ခင်းအရ ဆေးဖော်ကြောဘက် မလုပ်တဲ့အထိပါရှိတယ်။

ဒေါ်စု ဒီအစိုးရတွေနဲ့ သွားပလူးတော့ နိုင်ငံတကာအမြင်မှာ ပိုပြီး အဖယ်အကျဉ်ခံရစရာဖြစ်လာတယ်။ ရိုဟင်ဂျာအရေးကြောင့် နိုင်ငံကြီးတွေအလည်မှာ ဇီးရိုးဖြစ်သွားတဲ့ သူ့ပုံရိပ်ဟာ မိုင်းနပ်စ်အထိပါပြလာတယ်။ ဒီလိုဖြစ်လာချိန်မှာ စစ်အုပ်စုက ဘာလုပ်လဲ။

စစ်အုပ်စုက တောင်ဒဂုံကိစ္စပြပြီး လူ မဘသတွေကို ဖမ်းဝရမ်းထုတ်လိုက်တယ်၊ ဘုန်းကြီး မဘသ ဝီရသူတို့ကိုဖမ်းဝရမ်းအထုတ်ပြလိုက်တယ်။ အလင်္ကာကြယ်(ဦးသောဘိတ)ကို အမှုကနေ လွှတ်ပေးလိုက်တယ်။ ပြည်တွင်းမှာ စစ်အုပ်စုအပေါ် “ဒါတော့ မဆိုးပါဘူး“ဆိုတဲ့အမြင်တွေ လူထုကြားဖြစ်လာတယ်။ ဝီရသူကို မဟန ကနေပဲ သံဃာ့သြဝါဒပေးတော့မှာလိုလို၊ ပြီးတာနဲ့ သင်္ကန်းဆွဲချွတ်ပြီး ထောင်ထဲဘဲ ထည့်တော့မှာလိုလို ဟန်ရေးပြပေးလိုက်တယ်။ နောက်ကွယ်က တကယ့်အနက်က ဝီရသူ့နောက်လိုက်တွေ ဂိုဏ်းဝင်တွေကို “အေးဆေး ခန နေကြဦး“လို့ ပြောတာပါ။ ဝီရသူကို ဖမ်းဝရမ်းထုတ်ပြတာ၊ ဇော်ဌေးရှေ့ထွက်ပြောလာတာ၊ ဖြိုးမင်းသိမ်း အသံဝင်ထုတ်တာတွေဟာ စစ်အုပ်စု မီးစိမ်းပြလို့သာဖြစ်လာတာပါ။ ဒီတော့ စစ်အုပ်စုကို ဘယ်လိုမှအယုံအကြည်မရှိတဲ့နိုင်ငံကြီးတွေကပါ“စစ်အုပ်စုရဲ့ ဒီလုပ်ရပ်ကို ဆုံးတဲ့အထိတော့ စောင့်ကြည့်ရမယ်“ ဆိုပြီး နည်းနည်းသတိထားလာရတယ်။ ဇော်ဌေးဆို ကြံ့ဖွံ့ကိုပါ မန်မဲပြတဲ့အထိလုပ်ပြီး လူထုဆီကလက်ခုပ်သံချူတယ်။ ဒီမိုကရေစီဘက်လိုလို မျက်ရိပ်ပြတယ်။

ဘာဘဲဖြစ်ဖြစ် ဒီလောက်လေးလုပ်ပြတာနဲ့တင် ပြည်တွင်းမှာ သြဘာအပေးခံရပြီး ပြည်ပကနေ Wait and See အလုပ်ခံလိုက်ရတာနဲ့တင် နိုင်ငံရေးအမြတ်က စစ်အုပ်စုအတွက် ထွက်လှပါပြီ။ တပြိုင်တည်းမှာ လက်ယာအစွန်းရောက်တွေနဲ့သွားပြီး ပရောပယီလုပ်နေတဲ့ ဒေါ်စုလည်း “အစ္စလာမ်ဆန့်ကျင်ရေးသမား“ဆိုတဲ့သဏ္ဍန်ကို ဖော်ပြီးသားဖြစ်သွားပါတယ်။ “စစ်အုပ်စုက ဘာသာရေးလူမျိုးရေး အစွန်းရောက်သမားတွေကို သတိကြီးကြီးထားပြီး ပြတ်ပြတ်သားသား စကိုင်တွယ်နေချိန်မှာ ဒေါ်စုက ဘာသာရေးလူမျိုး လက်ယာအစွန်းရောက်တွေနဲ့ ပုလင်းတူဗူးဆို့လုပ်နေပါလား“ ဆိုတဲ့အမြင်တွေ ခေါင်းပြူလာနိုင်ပါတယ်။

အကြမ်းဖက် လုယက်သတ်ဖြတ် အမုန်းတရားဖြန့်ချိ သွေးထိုးလှုံ့ဆော်တဲ့ ဝိရသူ့ဂိုဏ်း သီတဂူ့ဂိုဏ်းနဲ့ လူမသဘတွေကို တိုင်းပြည်လူထု အများတကာ့အများစုကြီးက လက်မခံပါ။ ဒါပေမယ့် ဒီလူမျိုးရေး ဘာသာရေးအကြမ်းဖက်မှုတွေဟာ စစ်အုပ်စုရှိသရွေ့ရှိနေမယ့်အပြင် လက်ယာစွန်း အကြမ်းဖက် ခွဲခြားဖိနှိပ်တဲ့နိုင်ငံရေးအတွေးအခေါ်တွေ မလျော့ပါးသရွေ့လည်း အားကောင်းနေဦးမှာပါ။ ကျနော်တို့က နိုင်ငံတကာ လူမျိုးစုံ ဘာသာစုံချစ်ကြည်ရင်းနှီးရေးစိတ်ဓာတ်နဲ့ အတွေးအခေါ်တွေကို ဖြန့်ဖြူးရင်း ဘာသာရေး လူမျိုးရေးအစွန်းရောက်မှုတွေကို ဆန့်ကျင်တိုက်ဖျက်သွားရမှာပါ။

လောလောဆယ်မှာ ကျနော်တို့အနေနဲ့ စစ်အုပ်စုရော ဒေါ်စုပါ နိုင်ငံရေးလုပ်နေကြတာဆိုတာရယ်၊ အာဏာနဲ့ဓန အဝေမတည့်ခင်လေး ခနတဖြုတ် ရန်စောင်နေကြတာရယ်ဆိုတာရယ်ကို မေ့မထားမိကြဖို့ပါ။ ကျနော်တို့ သတိထားကြဖို့ပါ။
မျိုးမြင့်ချို
ဇွန် ၆၊ ၂ဝ၁၉