Saturday, March 25, 2017

သွေး (ဘာသာပြန်သူ - မြတ်ငြိမ်း)

0 comments
သွေး (ဘာသာပြန်သူ - မြတ်ငြိမ်း)သူ ဝင်လာချိန်တွင် စကားတစ်ခွန်းမျှ မပြော။ ကျွန်တော်က ကျွန်တော်၏ သင်တုန်းဓားတွေထဲက အကောင်းဆုံး တစ်ချောင်းကို သားရေပြားပေါ်တွင် အပြန်အလှန် ခတ်နေသည်။ ဝင်လာသူသည် သူမှန်း သိလိုက်သည်နှင့် ကျွန်တော် စိတ်လှုပ်ရှားမှုကို ဖုံးကွယ်နိုင်မလား ဆိုပြီး သင်တုန်းဓားကို ဆက်ခတ်နေလိုက်၏။ ဓားသွားကို လက်မဖြင့် စမ်းကြည့်သည်။ ပြီးတော့ အလင်းရောင်ထဲတွင် ထောင်ကြည့်သည်။ ထိုအခိုက်တွင် သူက ကျည်ဆန်တွေ တန်းစီထည့်ထားပြီး သေနတ်အိတ် တွဲလောင်းကျနေသည့် ခါးပတ်ကို ချွတ်သည်။ နံရံပေါ်ရှိ ချိတ်တွင် ချိတ်သည်။ စစ်သုံး ကက်ဦးထုပ်ကို ခါးပတ်ပေါ်မှာ ထပ်ချိတ်သည်။ ထို့နောက် လည်စည်းကို ဖြေရင်း ကျွန်တော့်ဘက် လှည့်သည်။
“ပူပါ့ကွာ၊ ငရဲကျနေတာပဲ။ ကျုပ်ကို မုတ်ဆိတ် ရိတ်ပေးစမ်းဗျာ”
သူက ဆံပင်ညှပ်ခုံတွင် ဝင်ထိုင်သည်။
သူ့ မုတ်ဆိတ်တွေ လေးရက်စာလောက် ရှည်နေပြီဟု ကျွန်တော် မှန်းမိသည်။ ကျွန်တော်တို့၏ တပ်သားတွေကို နောက်ဆုံး လိုက်လံရှာဖွေ တိုက်ခိုက်ခဲ့သည့် လေးရက်။ သူ့မျက်နှာ နီစပ်စပ် ဖြစ်နေ၏။ နေလောင်သောကြောင့် ဖြစ်မည်။ ကျွန်တော် ဂရုတစိုက်ဖြင့် ဆပ်ပြာတုံးကို စကိုင်သည်။ ခပ်ပါးပါး အလွှာကလေးတွေ ရအောင် ဓားဖြင့် လှီးသည်။ ဆပ်ပြာလွှာကလေးတွေကို ခွက်တစ်ခွက်ထဲ ထည့်၊ ကြက်သိမ်းနွေး ရေအနည်းငယ် ရော၊ စုတ်တံဖြင့် မွှေ ချက်ချင်းပင် ဆပ်ပြာမြှုပ်တွေ ထလာသည်။
“ဆရာတို့ တပ်က တခြားသူတွေလည်း မုတ်ဆိတ်တွေ ဆရာ့လောက် ရှည်နေကြရောပေါ့နော်”
ကျွန်တော် ပြောရင်း ဆပ်ပြာရည်ကို ဆက်မွှေ နေလိုက်၏။
“ဒါပေမဲ့ ကျုပ်တို့ အောင်မြင်ပါတယ်။ အဓိက ကောင်တွေကို ဖြိုလိုက် နိုင်တယ်လေ။ တချို့ကို အသေဖမ်းလာတယ်။ တချို့ကတော့ အသက်ရှင်နေတုန်းပဲ။ ဒါပေမဲ့ ဒီကောင်တွေလည်း မကြာခင် ဇီဝိန် ကြွေကြရမှာပါ”
“ဘယ်နှစ်ယောက်တောင် မိခဲ့လို့လဲ ဆရာ”
“ဒီကောင်တွေကို တွေ့ဖို့ တောထဲ တော်တော် နက်အောင် လိုက်ရတာကလား။ ဒါပေမဲ့ အပင်ပန်း ခံရကျိုး နပ်အောင် လုပ်မှာပါ။ ဒီပွဲမှာ ဒီကောင်တွေ တစ်ယောက်ဆို တစ်ယောက်မှ အသက်ရှင်ရက် ထွက်မလာစေရဘူး”
ကျွန်တော့် လက်ထဲက ဆပ်ပြာရည် သုတ်ထားသည့် စုတ်တံကို တွေ့တော့ သူက ဆံပင်ညှပ်ခုံ ကျောမှီကို မှီလိုက်၏။ သူ့ကို ကိုယ်ရုံစ ခြုံပေးရဦးမည်။ အံဆွဲထဲမှ ကိုယ်ရုံစ တစ်စယူပြီး ကျွန်တော့် ဖောက်သည်တော်၏ လည်ပင်းမှာ ပတ်သည်။ သူက စကားပြော မရပ်။ ကျွန်တော့်ကို သူ့ဘက်သားဟု ထင်နေသလား မသိ။
“ဟိုနေ့က ကျုပ်တို့ လုပ်ပြလိုက်တာ မြင်ပြီး ဒီမြို့ကတော့ သင်ခန်းစာ ရသွားလောက် ပါပြီ”
“ဟုတ်ကဲ့” ဟုပြောပြီး ချွေးဖြင့် မည်းပြောင်နေသော သူ့ လည်တိုင်ကို အဝတ်စဖြင့် ချည်လိုက်၏။
“အဲဒီ ပွဲကတော့ တကယ့် ပွဲကြီးပွဲကောင်းပဲနော်”
“သိပ်ကောင်းတဲ့ ပွဲပါ” ကျွန်တော် ဖြေရင်း စုတ်တံကို လှမ်းယူသည်။ ငတိက ပင်ပန်းနွမ်းနယ် ဟန်ဖြင့် မျက်စိစုံမှိတ် ထားသည်။ သူ့အသားနှင့် အေးမြသော ဆပ်ပြာရည် ထိတွေ့ချိန်ကို ငံ့လင့်နေသည်။ ကျွန်တော်သည် ငတိနှင့် တစ်ကြိမ်တစ်ခါမျှ သည်လောက် နီးနီးကပ်ကပ် မဆုံဖူးခဲ့။ သူပုန် လေးယောက်ကို ကြိုးပေးသတ်တာ မြင်ရအောင် စာသင်ကျောင်း ဆင်ဝင်အောက်သို့ တစ်မြို့လုံး တန်းစီ ဝင်ရမည်ဟု အမိန့်ထုတ်သည့် နေ့က သူနှင့် ခဏမျှ မျက်နှာချင်းဆိုင် ဖြစ်ခဲ့သည်။ သို့ပေမဲ့ အကွပ်မျက်ခံများ၏ အလောင်းများ မြင်ကွင်းကြောင့် သည်လိုလုပ်ဖို့ စီစဉ်ညွှန်ကြားသူ၏ မျက်နှာကို မကြည့်ဖြစ်ခဲ့။ ခုတော့ သည် မျက်နှာကြီး ကျွန်တော့် လက်ခုပ်ထဲ ရောက်နေပြီ။ မျက်နှာက အရုပ်ဆိုး အကျည်းတန် မျက်နှာမျိုး မဟုတ်တာတော့ သေချာသည်။ သူ၏ ရှိရင်းစွဲ အသက်ထက် ပိုပြီး ရင့်ရော်ဟန် ပေါက်နေစေသည့် မုတ်ဆိတ်မွေးတွေကလည်း သူ့မျက်နှာပေါ်မှာ သိပ်ပြီး ပုံဆိုးပန်းဆိုးကြီး ဖြစ်မနေ။
သူ့နာမည်က တော်ရေး။ ဆရာ တော်ရေး၊ ကြံကြီးစည်ရာ စီမံတတ်သူ။ ကြည့်လေ ... ကိုယ်လုံးတီး သူပုန်များကို ကြိုးပေး ကွပ်မျက်ပြီး အလောင်းများပေါ်တွင် သတ်မှတ်ထားသည့် နေရာများကို သေနတ်ပစ် လေ့ကျင့်ဖို့ ဆိုတာမျိုးကို ဘယ်သကောင့်သားက ကြံစည် စိတ်ကူးပါမည်လဲ။ ကျွန်တော် ဆပ်ပြာရည်ဖြင့် ပထမတစ်လွှာ သုတ်လိုက်၏။ သူက မျက်စိတွေ မှိတ်ထားလျက်နှင့်ပင် ဆက်ပြောနေသည်။
“ခုနေမှာ ကျုပ် နည်းနည်းလေးမှ အားမထုတ်ရပဲ တစ်ခါတည်း တန်း အိပ်ပျော်သွား နိုင်တယ်ဗျ။ ဒါပေမဲ့ ဒီညနေ လုပ်စရာတွေ အများကြီး ရှိနေသေးတယ်လေ”
“ကွပ်မျက်ရေးတပ်ဖွဲ့ ကိစ္စလား”
ကျွန်တော်က ဆပ်ပြာရည် သုတ်လိမ်းခြင်းကို ရပ်ပြီး စိတ်ဝင်စားမှု မရှိဟန်ဖြင့် မေးလိုက်၏။
“အဲဒီလိုမျိုး ဆိုပါတော့။ ဒါပေမဲ့ ဒီ့ထက် နည်းနည်းကြာမယ်”
သူ့ မုတ်ဆိတ်ကို ဆပ်ပြာရည် ဆက်သုတ် နေလိုက်၏။ ကျွန်တော့် လက်တွေ တုန်လာပြန်ပြီ။ ငတိကတော့ ရိပ်မိမည် မဟုတ်။ သူ မရိပ်မိတော့ ကျွန်တော့်အတွက် အခွင့်သာတာပေါ့။ သို့ပေမဲ့ သူ ခုလို ဝင်မလာလျှင် ကျွန်တော် ပို စိတ်ချမ်းသာမည် ဖြစ်၏။ ကျွန်တော့်ဆိုင်ထဲ သူ ဝင်လာသည်ကို ကျွန်တော့တို့ အဖွဲ့သား တော်တော်များများက မြင်တွေ့သွားဖို့ အလားအလာ များသည်။ တစ်ဦးတစ်ယောက်၏ အမိုးအကာ အောက်မှာ ရန်သူတစ်ဦး ရောက်နေခြင်းက အကျဉ်းအကျပ်များ ဖြစ်ပေါ်စေပါသည်။ သည်လူကို ကျွန်တော်၏ အခြား အခြားသော ဖောက်သည်များ နည်းတူ မုတ်ဆိတ် ရိတ်ပေးချင်သည်။ ဂရုတစိုက် ညင်ညင်သာသာနှင့် သွေးတစ်စက်မျှ မထွက်စေရအောင် အထူး သတိဝီရိယ ထားပြီး ဆောင်ရွက် ပေးချင်သည်။ သူ့ မုတ်ဆိတ် ရှုပ်ရှုပ်ထွေးထွေးများကို ရိတ်ရင်း တစ်ချက်ကလေးမျှ ဓားချက် ချော်မသွားစေချင်။ သူ့ မေးစေ့ အောက်က အရေပြားသည် ပြောင်စင် နေရမည်။ နူးညံ့ချောမွတ် နေရမည်။ ကျွန်တော့် လက်ခုံဖြင့် ပွတ်ကြည့်၊ စမ်းကြည့်လျှင် ကြမ်းတာ ရှတာမျိုး နည်းနည်းကလေးမျှ မရှိစေချင်။
ဟုတ်ကဲ့။ ကျွန်တော်က တိတ်တိတ်ပုန်း သူပုန်တစ်ဦးပါ။ သို့ပေမဲ့ တာဝန်သိသော ဆံပင်ညှပ်သမားလည်း ဖြစ်၏။ နောက်ပြီး ကိုယ့်အလုပ်ကို တိတိကျကျ တာဝန်ကျေကျေ ဆောင်ရွက်ခြင်းကို ဂုဏ်ယူတတ်သူလည်း ဖြစ်၏။ ယခု လေးရက်စာ ရှည်နေသော မုတ်ဆိတ်မွေးကို ကျွန်တော့် လုပ်ရည်ကိုင်ရည်ကို စိန်ခေါ်နေခြင်းဖြစ်၏။
ကျွန်တော် သင်တုန်းဓားကို ယူသည်။ ဓားအိမ်ထဲမှ ဓားသွားပေါ်အောင် ထုတ်သည်။ ပြီးတော့ ပါးတစ်ဖက်ပေါ်မှ ပါးသိုင်းမွေးများကို ရိတ်ချဖြင်း လုပ်ငန်းစသည်။ သင်တုန်းဓားက ကျွန်တော့် စေစားချက်ကို တိတိကျကျ တုံ့ပြန်သည်။ သူ့ မုတ်ဆိတ်မွေးက သိပ်ရှည်လှသည် မဟုတ်။ သို့ပေမဲ့ မာပြီး ကြမ်းပြီး ထူထဲသည်။ အရေပြား နည်းနည်းချင်း ပေါ်လာသည်။ သင်တုန်းဓားက တရွှီးရွှီး မြည်သံပြုပြီး ရိတ်ချသွားသည်။ ဓားသွားပေါ်တွင် ဆပ်ပြာရည်နှင့် မုတ်ဆိတ်မွေးတွေ လုံးထွေးပြီး ကပ်နေသည်။ ဓားသွားကို သန့်စင်ပစ်ဖို့ ခဏ နားလိုက်၏။ သားရေပြားကို ဆွဲယူပြီး ဓားသွားဖြင့် ခတ်သည်။ ဘာ့ကြောင့်ဆို ကျွန်တော်က အလုပ်ကို ကျကျနန လုပ်တတ်သည့် ဆံသသမား တစ်ဦးမို့ပါ။
မျက်လုံးတွေ မှိတ်ထားသည့် ငတိက ခုမှ မျက်လုံးတွေ ဖွင့်သည်။ ခြုံထည်အောက်မှ လက်တစ်ဖက် ထုတ်သည်။ ဆပ်ပြာရည် စင်သွားသည့် နေရာကို စမ်းကြည့်ရင်း ပါးစပ်ကလည်း ပြောသည်။
“ညနေ ခြောက်နာရီကျ ကျောင်းကို လာခဲ့”
“ဟိုနေ့ကလိုပဲ လုပ်မှာလား” ဟု ကျွန်တော် အထိတ်တလန့် မေးလိုက်၏။
“အဲဒီထက် ပိုပြီး သားနားနိုင်တယ်”
“ဆရာ ဘယ်လိုလုပ်ဖို့ စီစဉ်ထားလို့လဲဟင်”
“မသိသေးဘူး၊ ဒါပေမဲ့ ကျုပ်တို့ကိုယ် ကျုပ်တို့ မြူးထူးအောင်တော့ လုပ်ရမယ်”
သူ့ မျက်လုံးတွေ မှိတ်ပြီး ကျောမှီချလိုက်ပြန်၏။ ကျွန်တော်က သင်တုန်းဓားကို အသင့်ပြင်ပြီး သူ့အနားသို့ ကပ်သည်။
“ဆရာက သူတို့အားလုံးကို ပြစ်ဒဏ် ခတ်မလို့လား”
ကျွန်တော် အားစိုက်ပြီး ကြောက်ကြောက်လန့်လန့် မေးသည်။
“အားလုံးကိုပဲ”
သူ့ မျက်နှာပေါ်မှာ ဆပ်ပြာရည် ခြောက်နေပြီ။ ကျွန်တော် လက်သွက်မှ ဖြစ်တော့မည်။ လမ်းဘက်ကို မှန်ထဲမှ လှမ်းကြည့်သည်။ ခါတိုင်းလိုပါပဲ။ ကုန်စုံဆိုင်ထဲတွင် ဝယ်သူ နှစ်ဦး သုံးဦး ရှိသည်။ ထို့နောက် တိုင်ကပ်နာရီကို ကြည့်သည်။ မွန်းလွဲ နှစ်နာရီနှင့် မိနစ်နှစ်ဆယ်။ သင်တုန်းဓားက အထက်မှ အောက်သို့ ရိတ်ချသွားသည်။ သည်တစ်ခါတော့ အခြား ပါးတစ်ဖက် ပေါ်က ပါးသိုင်းမွေးတွေ။ ထူထဲပြီး စိမ်းနေသော ပါးသိုင်းမွေးတွေ။ သည်လူ ကဗျာဆရာ တချို့ သို့မဟုတ် ဘုန်းကြီးတွေလို မုတ်ဆိတ် အရှည်ထားလျှင် ကောင်းမည်။ သူ့အတွက် အဆင်ပြေမည်။ လူ တော်တော်များများက သူ့ကို မှတ်မိမည် မဟုတ်။ သို့ဆိုလျှင် သူ့အတွက် အကျိုးရှိမည်ဟု သူ့လည်ပင်းတစ်ဝိုက်ကို ချောမွေ့အောင် ရိတ်ပေးရင်း ကျွန်တော် စဉ်းစားမိ၏။ သည်နေရာ တစ်ဝိုက်က အမွေးအမှင်တွေမှာ ပျော့ပျောင်းသော်လည်း ခွေလိမ်ရစ်ထုံးနေ သဖြင့် သင်တုန်းဓားကို ကျွမ်းကျွမ်းကျင်ကျင် ကိုင်ရတော့မည်။ မုတ်ဆိတ်မွေး ကောက်ကောက်ကွေးကွေးတွေ။ အရေပြားပေါ်ရှိ မွေးညင်းပေါက်ကလေး တစ်ခု ပွင့်သွားသည်နှင့် သွေးတွေ ဥထွက်လာလိမ့်မည်။ ဆံပင်ညှပ်သမားကောင်း အဖြစ် ကိုယ့်ကိုယ်ကိုယ် ဂုဏ်ယူတတ်သော ကျွန်တော်လို လူက ကိုယ့်ဆီ မုတ်ဆိတ် လာရိတ်သူ တစ်ဦးအား ထိုအဖြစ်မျိုး ဘယ်တော့မျှ အဖြစ်ခံလိမ့်မည် မဟုတ်။
နောက်ပြီး သည် ဧည့်သည်က ပထမတန်းစား ဧည့်သည်။ ကျွန်တော်တို့ အထဲက ဘယ်နှယောက်ကို ပစ်သတ်ဖို့ သူ အမိန့်ပေးခဲ့ပြီလဲ။ ကျွန်တော်တို့ အထဲက ဘယ်နှယောက်ကို ကြိုးပေးသတ်ဖို့ သူ အမိန့်ပေးပြီးပြီလဲ။ သည်အကြောင်း မတွေးတာ ကောင်းသည်။ ကျွန်တော်သည် သူ့ရန်သူဖြစ်ကြောင်း တော်ရေး မသိ။ သည်အကြောင်း သူ မသိသလို တခြား သူ့လူတွေလည်း မသိ။ ဤကား ကျွန်တော်တို့ လူနည်းစုကလေးသာ သိသည့် လျှို့ဝှက်ချက်။ သို့မှ မြို့ထဲမှာ တော်ရေး ဘာလုပ်နေကြောင်း၊ သူပုန်တွေကို လိုက်တိုက်ဖို့ ဘာ အစီအစဉ်တွေ လုပ်ထားကြောင်းတို့ကို တော်လှန်ရေးသမားများအား တိတိကျကျ သတင်းပေးနိုင်မည် မဟုတ်လား။ သည်တော့ တော်ရေး ဆိုသည့် ငတိ ကျွန်တော့် လက်ခုပ်ထဲ ရောက်ခဲ့ပါလျက် မုတ်ဆိတ်ကျင်စွယ် ရိတ်ပေးပြီး အသက်နှင့်ကိုယ် အိုးစား မကွဲဘဲ အေးအေးချမ်းချမ်း ပြန်သွားခွင့် ပြုလိုက်လျှင် ကျွန်တော့်အနေဖြင့် ရှင်းပြရ တော်တော် ခက်လိမ့်မည်။
ခုဆို မုတ်ဆိတ်တွေ ပြောင်တလင်း ခါသလောက် ရှိနေပြီ။ သူ့ ကြည့်ရတာ ပိုပြီး ပျိုမျစ်သွားသည်။ လက်ရှိ အသက်အရွယ်ထက် နှစ်ပေါင်းများစွာ ငယ်နုသွားသလို ရှိ၏။ ဆံပင်ညှပ်ဆိုင်သို့ လာသည့် ယောက်ျားတိုင်း သည်လို ဖြစ်သွားလေ့ ရှိပါသည်။ ကျွန်တော့် ဓားချက်များ အောက်တွင် တော်ရေးသည် ပြန်လည် နုပျိုလာသည်။ ဘာကြောင့်ဆို ကျွန်တော်က ဆံသသမားကောင်း တစ်ဦး၊ သည်မြို့မှာ အတော်ဆုံး ဆံသသမားတစ်ဦး ဖြစ်သောကြောင့်ဟု ကျွန်တော် ပြောရပါလိမ့်မည်။
သူ့ မေးစေ့ အောက်မှာ သူ့ စလုတ် ပေါ်မှာ သည် သွေးပြန်ကြောကြီး ပေါ်မှာ ဆပ်ပြာရည်ကလေး နည်းနည်းစီ ထပ်သုတ်။ အမယ်လေး ... ပူလိုက်တာနော်။ ကျွန်တော့်လိုပင် တော်ရေးလည်း ချွေးပြန် နေလိမ့်မည်။ သို့ပေမဲ့ သူက အကြောက်အရွံ့ မရှိသူ။ သွေးအေးသူ။ ညနေကျလျှင် အကျဉ်းသားများကို ဘယ်လို စီရင်မည် ဆိုတာကိုပင် မစဉ်းစားသူ။ တစ်ဖက်တွင် သင်တုန်းဓားကြီး လက်ထဲကိုင်ပြီး သူ့အရေပြားကို ခြစ်ရင်း ဆွဲရင်း မွေးညင်းပေါက်ကလေးတွေမှ သွေးတွေ ဥထွက် မလာအောင် ကြိုးပမ်းနေသည့် ကျွန်တော့်မှာတော့ ဘာကိုမျှ ရေရေရာရာ ပြတ်ပြတ်သားသား မစဉ်းစားနိုင်။ သည်လူ သည်ကို လာတာကိုက သက်သက် ဒုက္ခ လာပေးတာ။ ဘာ့ကြောင့်ဆို ကျွန်တော်က တော်လှန်ရေးသမား ဖြစ်သော်လည်း လူသတ်သမား မဟုတ်သောကြောင့်ပင်။ နောက်ပြီး သူ့ကိုသတ်ဖို့ ဘယ်လောက် လွယ်လိုက်သလဲ။ နောက်ပြီး သည်ငတိက အသတ်ခံထိုက်သူ။ ဟုတ်ရဲ့လား။ မဟုတ်သေး။ ဘာကိစ္စ သတ်ရမည်လဲ။ လူတစ်ဦး လူသတ်သမား ဖြစ်ရလောက်အောင် ဘယ်သူမျှ အသတ်မခံရသင့်။ သည်လို သတ်လိုက်လို့ သင့်မှာ ဘာ အကျိုး ရှိမည်လဲ။ ဘာမျှ အကျိုးမရှိ။ အခြား သူတွေ ... ပြီးတော့ နောက်ထပ် အခြားသူတွေ လာမည်။ ပထမလူတွေက ဒုတိယလူတွေကို သတ်၊ နောက်လူတွေက သူ့ကို ပြန်သတ်။ သည်လိုဖြင့် သံသရာ မဆုံးနိုင်ဘဲ အရာရာတိုင်းသည် သွေးပင်လယ်ကြီး ဖြစ်သွားလိမ့်မည်။
ယခု သည်လည်ပင်းကို ကျွန်တော် တိခနဲ လှီးဖြတ်ချလိုက်လို့ ရသည်။ သူ ညည်းညူချိန်ပင် ရလိုက်မည် မဟုတ်။ နောက်ပြီး သူက မျက်လုံးတွေ မှိတ်ထားတော့ အရောင် တလက်လက် တောက်နေသည့် ဓားသွားကို မြင်မည် မဟုတ်သလို အရောင် တဖျပ်ဖျပ် လက်နေသည့် ကျွန်တော့် မျက်လုံးတွေကိုလည်း တွေ့မြင်မည် မဟုတ်။ သို့ဖြစ်သည့်တိုင် ကျွန်တော်က လူသတ်မှုတကယ် ကျူးလွန်ထားသူ တစ်ဦးလို တဆတ်ဆတ် တုန်နေ၏။ သူ့လည်ချောင်းမှ သွေးတွေ ပန်းထွက်လာပြီး ကိုယ်ရုံပေါ်သို့ ကျမည်။ ကုလားထိုင်ပေါ်သို့ ကျမည်။ ကျွန်တော့် လက်တွေပေါ်သို့၊ အောက်ခင်း ကြမ်းပြင်ပေါ်သို့ ကျမည်။ ကျွန်တော် တံခါးပေါက်ကို ပိတ်ပစ်ရလိမ့်မည်။ သွေးတွေက ကြမ်းပေါ်မှာ တရွေ့ရွေ့ စီးဆင်းသွားမည်။ ပူပူနွေးနွေး သွေးတွေ။ ထိန်းမရ တားမရ လမ်းပေါ် ရောက်သည်ထိ နီစွေးသော စမ်းချောင်းကလေး တစ်စင်းလို စီးဆင်းသွားလိမ့်မည်။ ဖိအားထည့်ပြီး ခပ်နက်နက်ကလေး လှီးလိုက်လျှင် ဝေဒနာ ခံစားရမည် မဟုတ်ကြောင်း ကျွန်တော် ကျိန်းသေ သိသည်။ သူ ခံစားနေရမည် မဟုတ်တာ သေချာသည်။
သို့ဖြစ်စေကာမူ ...
သူ့ အလောင်းကြီးကို ဘယ်လို စီမံရမည်လဲ။ ဘယ်နေရာမှာ သွား ဝှက်ထားရမည်လဲ။ ကျွန်တော် ထွက်ပြေးရလိမ့်မည်။ ကိုယ့်မှာ ရှိရှိသမျှ ပိုင်ဆိုင်သမျှ အရာတွေ အားလုံး ထားပစ်ခဲ့။ ဝေးသော ... ဝေးလွန်းမက ဝေးသော အဝေး တစ်နေရာမှာ သွားပြီး ခိုလှုံနေ။ သို့သော် ကျွန်တော့်ကို ဖမ်းမိသည့်အထိ သူတို့ လိုက်လာကြလိမ့်မည်။
“ဆရာ တော်ရေးကို သတ်တဲ့ကောင်။ ဆရာ မုတ်ဆိတ်ရိတ် ခံနေတုန်း လည်ပင်းကို ဓားနဲ့ လှီးသတ်သွားတာ ...၊ သရဲဘောကြောင်တဲ့ ကောင်”
တခြား တစ်ဖက်ကတော့ကော။
“ငါတို့ အားလုံးရဲ့ ကိုယ်စား လက်စားချေ သွားတဲ့ ပုဂ္ဂိုလ်။ အမှတ်တရ ဖြစ်နေရမယ့် နာမည်ပေါ့။ (သူတို့ ကျွန်တော့် နာမည်ကို ပြောကြလိမ့်မည်။) သူဟာ တို့မြို့က ဆံပင်ညှပ်သမား။ ငါတို့ရဲ့ အရေးတော်ပုံကို သူ ကာကွယ်သွားတယ် ဆိုတာ ဘယ်သူမှ မသိလိုက်ဘူး”
သည်တော့ ဘာတွေ ဖြစ်လာမည်လဲ။ လူသတ်သမားလား။ သူရဲကောင်းလား။ ကျွန်တော့် ကံကြမ္မာသည် သည်ဓားသွားပေါ်မှာ တည်မှီနေ၏။ ကျွန်တော့်လက်ကို နည်းနည်းကလေး စောင်းလိုက်၊ သင်တုန်းဓားကို နည်းနည်းကလေး ပိုပြီး လည်ချောင်းထဲ မြုပ်ဝင်သွားအောင် လှီးလိုက်၊ အရေပြားသည် ပိုးသားလို၊ ရော်ဘာပြားလို၊ သားရေပြားလို တိခနဲ ပြတ်သွားလိမ့်မည်။ လူသား၏ အရေပြားထက် နူးညံ့တာ မရှိ။ နောက်ပြီး သည် အရေပြား အောက်မှာ သွေးတွေက အမြဲရှိသည်။ ပန်းထွက်ဖို့ အသင့်ဖြစနေသည်။ သည် ဓားသွားမျိုးက ဘယ်တော့မျှ ချွတ်ချော်တိမ်းစောင်းမှု မဖြစ်။ သည်ဓားက ကျွန်တော့် ဓားတွေထဲမှာ အထက်ဆုံး ဓား။
သို့ပေမဲ့ ကျွန်တော် လူသတ်သမား မဖြစ်ချင်။ မဖြစ်ပါရစေနဲ့ ဆရာသမားရယ်။ ခင်ဗျားက မုတ်ဆိတ်ရိတ်ဖို့ ကျွန်တော့်ဆီ လာတယ်။ ကျွန်တော်က ကိုယ့်အလုပ်ကိုယ် ဂုဏ်ရှိရှိ လုပ်တယ်။ ကျွန်တော့်လက်ကို သွေးမစွန်းချင်ပါဘူး။ ဆပ်ပြာရည်ပဲ စွန်းပါစေ။ ဒါလောက်ပါပဲ။ ခင်ဗျား အဆုံးစီရင်ရေးသမား။ ကျွန်တော်က ဆံပင်ညှပ်သမားလောက်ပါ။ လူတစ်ဦးချင်း တစ်ဦးချင်းဟာ လူ့ဘုံခန်းဝါမှာ သူ့ ကိုယ်ပိုင်နေရာနှင့်သူ ရှိပါတယ်။ ဒါအမှန်ပဲ။ သူ့ ကိုယ်ပိုင်နေရာနှင့် သူပါ။
ခုတော့ သူ့မေးစေ့သည် ရှင်းသန့်သွားအောင် ရိတ်သင်ပြီး၍ ချောမွတ်နေပြီ။ သကောင့်သားက ခါးမတ်ပြီး မှန်ထဲကို လှမ်းကြည့်သည်။ သူက သူ့လက်တွေဖြင့် သူ့ အရေပြားကို ပွတ်ကြည့်သည်။ လတ်ဆတ်သစ်လွင်ခြင်းကို ခံစားသည်။
“ကျေးဇူးပဲ”
သူ ပြောသည်။ ခါးပတ်၊ ပစ်စတိုနှင့် ကက်ဦးထုပ်ကို ယူဖို့ နံရံချိတ်ဆီသို့ သွားသည်။ ကျွန်တော့်မျက်နှာ ဖြူဖျော့နေမှာ သေချာသည်။ ကျွန်တော့် ရှပ်အင်္ကျီမှာ ချွေးတွေ ရွှဲနစ်နေ၏။ တော်ရေးက ခါးပတ်ခေါင်းကို တပ်သည်။ သေနတ်အိတ်ထဲတွင် ပစ်စတိုကို နေသားတကျ ထည့်သည်။ သူ့ ဆံပင်တွေကို လက်ဖြင့် သပ်ပြီး ကက်ဦးထုပ် ဆောင်းသည်။ ကျွန်တော့်ကို ဝန်ဆောင်ခပေးဖို့ သူ့ ဘောင်းဘီအိတ်ထဲမှ ငွေအကြွေ အတော်များများ ထုတ်ယူသည်။ ပြီးတော့ တံခါးပေါက်ဆီ လျှောက်သွားသည်။ တံခါးဝသို့ ရောက်မှ ခဏ ရပ်သည်။ ကျွန်တော့်ဘက် လှည့်ပြီး ပြောသည်။
“မောင်ရင်က ကျုပ်ကို သတ်လိမ့်မယ်လို့ သူတို့က ပြောတယ်ကွ။ အဲဒါ ဟုတ်၊ မဟုတ် သိရအောင် လာခဲ့တာပဲ။ ဒါပေမဲ့ လူသတ်တယ် ဆိုတာ လွယ်တာမှ မဟုတ်ဘဲကွာ။ မောင်ရင် ကျုပ်ပြောတာ မှတ်ထား၊ သိလား”
ပြီးတော့ လမ်းမဆီသို့ ထွက်သွားတော့၏။
(Just Lather, That's All by Fernando Tellez)
---------
မြတ်ငြိမ်း
သည်းထိတ်ရင်ဖို မဂ္ဂဇင်း၊ အောက်တိုဘာလ၊ ၂၀၀၃။
အင်္ဂလိပ် ဘာသာဖြင့်
https://www.dropbox.com/s/cyzvzv…/just_lather_thats_all.pdf…

0 comments:

Post a Comment