(ပူစီဝီလ်လို)

(ပူစီဝီလ်လို)
မနှစ်က ဧပြီလလောက်ဆီက ဇနီးက Pussy Willow ကိုင်းရင့်ရင့်လေးတွေ လမ်းမှာတွေ့သဖြင့်ကောက်လာပြီး ခြံနောက်ဖက် ရေဝပ်သည့်ပြီး Hibiscus တွေရှိသည့်နေရာ၌ ထိုးစိုက်၏။ ကျနော်က “မင့်ဟာက ရှင်ပါ့မလားကွာ ကိုင်းတွေက ခြောက်ခြောက်ကြီးတွေ။ ပြီးတော့ နေရာ ကလည်း ရေဝပ်တဲ့နေရာကြီး”ဆိုတော့ သူက ကိုင်းလေးတွေ၏အကာသားကို လက်သည်းဖြင့်ဆိတ်ပြပြီး ဒီမှာကြည့်လေ အစိုဓာတ် ရှိနေသးတယ်။ လုံးဝအစိုဆိုရင်တောင် ရုတ်ရက်ကြည့်ရင် အပင်ခြောက်လိုပဲ သူ့သဘာဝကိုက။ နောက်ပြီး သူက ရေဝပ်တဲ့ရေစိမ့်တဲ့နေရာ ကြိုက်တယ်”ဟုပြော၏။ ကျနော်လည်း ကိုယ်မသိသည့်အပင်ဆိုတော့ ဘာမှပြောမနေတော့။ တခုတော့ ပြောပြီးရယ်မိကြ၏။ Willow ကတော့ တို့ဗမာမှာ မိုးမခပင်ပဲ Pussy ကတော့ ကြောင်ပေါ့လေ။ ဒါပေမယ့် မင်းတို့အမေရိကန်မှာ ပူစီလို့ဗန်းစကားနဲ့‌ပြောတော့....” ဆိုတော့ သူက “အေးနော်”ဆိုပြီးရယ်၏။ ကျနော်တို့က လူနံမည်ကိုပင် ချစ်နိုးဖြင့် ပူစီဟုခေါ်တတ်ကြသလို သူတို့ကလည်း Kitty ဟုခေါ်တတ်ကြ၏။ ပူစီတော့ ဘယ်သူ့ဘယ်သူမှ မမှဲ့မခေါ်ကြ။ ကျနော်က pussy willow ကိုဗမာလိုပြန်မနေတော့ဘဲ ပူစီဝီလ်လိုဟုပဲခေါ်လိုက်၏။ မရှုပ်တော့။ ရှက်စရာလည်း မရှိတော့။
နောက်တော့ ကျနော်လည်း ထိုအပင်လေးတွေကို မေ့မေ့ပျောက်ပျောက်။ သေသလားရှင်သလားလည်း အမှုမဲ့အမှတ်မဲ့။ ဒီနေ့တော့ နေ့လည်ခင်း နေကလေးနည်းနည်းပွင့်သဖြင့် Hibiscus လက်တံခြောက်တွေကို ရှင်းရကောင်းနိုးနိုးဖြင့် အနားသွားကြည့်မိ၏။ လားလား ပင်ခြေမှာရေဝပ်လို့ ဟိုင်းဘစ်ကစ်တွေကြားမှာ ပူစီဝီလ်လေးတွေ ပွင့်နေပါရောလား။ အပင်လေးက ပွင့်သာပွင့်နေရသည် ခရိုခရိုင်နှင့်။ အပင်အခွံအခေါက် ပါးပါးလေးတွေကိုလည်း ဟိုတကွက် ဒီတကွက် ယုန်ခွာစားတာတွေ့ရ၏။ ဒီက ယုန်တွေက ဆောင်းတွင်းအစားအသောက်ရှားပါးချိန်ဆိုလျှင် ဝပ်ကျင်းမှထွက်ကာ ကိုက်လမ်းလေးတွေအတိုင်းလာပြီး သစ်ပင်နုများမှ အခွံအခေါက်လေးတွေ ခွာခွာစား၏။ အပင်နု တပင်ပတ်လည်လုံး အခေါက်ခွာခံရပြီဆိုလျှင်တော့ ထိုအပင်သေတော့၏။ ထိုနည်းဖြင့် ကျနော် ပန်းသီးပင် လေးငါးခြောက်ပင်ဆုံးဖူး၏။ နောက်တော့ အပင်ခြေမှ တတောင်လောက်အထိ ပလစ်စတစ်ပိုက်ပျော့လေး ပတ်အုပ်လိုက်တော့မှ နောက်ဆောင်းတွင် အကိုက်ခံရသက်သာ၏။ တပင်မှ ထပ်အဆုံးအရှုံး မရှိတော့။ ခုလည်း ပူစီဝီလ်လိုလေးတွေကို ယုန်ကိုက်ထား၏။ သို့သော် ဘယ်နေရာမှတပတ်မလည်။ ဆိုတော့ သေစရာအ‌ကြောင်းမရှိ။
ပူစီဝီလ်လိုအပွင့်လေးတွေ ဝါဂွမ်းပွင့်လေးတွေဆန်၏။ ဝါဂွမ်းလိုတော့ ဖွားဖွားလွင့်အောင် ပွင့်တာမဟုတ်။ အဖူးလေးအာပြီး အတွင်းမှ ဂွမ်းသားလိုအဆုပ်ဖြူဖြူလေး အပြင်လှှထွက် အံထွက်လာခြင်းပင်။ ရုတ်ရက်ကြည့်လျှင် သစ်ကိုင်း‌ခြောက်တချောင်းတွင် ဝါဂွမ်းအဆုပ်လေးကို ချဉ်ဖေပါင်ဖူးတွေနှင့်တွဲချည်ထားသလိုလို ဘာလိုလို။ အပွင့်လေးကိုဖြစ်ဖြစ် ပွင့်ဆုပ်ကလေးကိုဖြစ်ဖြစ် ပွင့်ခံအဖုံးလေးကိုဖြစ်ဖြစ် လက်ဖျားလေးနှင့်ထိကြည့်လျှင် အလွန်နုညံ့သည်ဟု ဇနီးကပြော၏။ ကျနော်က လက်ဖျားတွေမရှိသူဆိုတော့ လက်ခုံဖြင့် သာသာပွတ်ကြည့်၏။ ဟုတ်သားကလား။ နုညံ့လိုက်သည်မှာ ပြောစရာမရှိတော့။ ဝါဂွမ်းထိသည့် အိနေသောနုညံ့မှုမျိုးမဟုတ်။ ကတ္တီပါသားကို ပိုးဖဲကို ထိလိုက်ရသလိုမျိုး မွှတ်နေသည့်နုညံ့မှုမျိုး။ အတော် အရသာရှိ၏။ ကျနော်က ထိကောင်းကောင်းနှင့် လက်ခုံဖြင့် အပြန်ပြန် အခါခါထိတော့ ဇနီးက ကတ္တီပါမွှေးလေးတွေ ပဲ့ပါသွားပါဦးမယ်ဆိုကာ ပင်ခြေမရှိတတ်ရှိတတ်မှ ၆ ကိုင်း ၇ ကိုင်းခန့် ဖြတ်ဖြတ်ပြီး အိမ်ထဲယူလာက ပန်းအိုးထိုး၏။
ကျနော့်အိမ်တွင် ရှေးဟောင်းဆိုသော်လည်း သိတ်မဟောင်းသေး အသုံးပြု၍ရနေသေးသော ပရိဘောဂတချို့ရှိ၏။ ထိုအထဲတွင် ကိုးရီးယားလက်ရာ နှစ် ၉၀ လောက်သက်တမ်းရှိသည့် စာအုပ်ဗီရိုလေးတလုံးကို အဟောင်းအမြင်းတွေ ထုတ်တွေရောင်းသည့်အိမ်တအိမ်မှ ‌ဒေါ်လာ ၃ ဆယ်လောက်နှင့်ရခဲ့တာလည်း ပါ၏။ ထိုစာအုပ်ဗီရိုလေးကို အပေါ်ထပ်တက်သည့်လှေကားရင်း၌ ကျနော်ကနေရာခထား၏။ ထိုအထဲတွင် တကယ့်ဓါတ်ပြားကြီးများနှင့်ဖွင့်ရသည့် ဓာတ်စက်တလုံးထည့်ထား၏။ လင်မယားနှစ်ယောက် တခါတခါ ဖွင့်ဖွင့်နားထောင်ကြ၏။ ထိုစာအုပ်ဗီရိုလေးပေဂတွင် နှစ် ၁ ခန့်သက်တမ်းရှိသည့် အိန္ဒိယလက်ရာ မှန်စီရွှေချရတနာထည့်သေတ္တာလေးတလုံးရှိ၏။ ရတနာတော့ ဘာမှမရှိ။ ပြီးတော့ သွားလေသူ ကျနော့်‌ေ,ာက္ခမဘွားတော်ကြီးတို့ Identical twin sisters ငယ်တုန်းကရိုက်ထားသည့် အဖြူအမဲ ပုံလေးတပုံနှင့် Hyacinth ပန်းတအိုးလည်းရှိ၏။ ထိုပန်းလေးတွေက မကြာခင်ကမှမိတ်ဆွေတယောက် သူ့အိမ်က ဖြတ်ယူလာပြီး ပေးထားခြင်းဖြစ်၏။ နည်းနည်းတော့ အပွင့်လေးတွေ ယော်ချင်နေပြီ။ သို့သော် ရနံ့ကား မပြယ်သည့်အပြင် ပိုတောင် အနံ့သင်းနေသည့်နှယ်ထင်ရ၏။ ဗီဒိုလေးနောက်ကနံရံတွင်တော့ ကျနော့်ဇနီး အမေဘက်အဖေဘက်ကအဖွားများ။ ထိုနှစ်ယောက်အလည်တွင် ကျနော့်‌ေယာက္ခမဘိုးတော်ကြီး ၉ နှစ်သားလောက်ပုံလေးကို ထည့်ထားသည့် မှန်ပေါင်ရှိ၏။ ထို့နောက် ရှေးဟောင်းလက်ဝါးကပ်တိုင်နှင့် ‌ေဂျရုဆလင်မ်မှ စွန်ပလွံခက်များ၊ ဇနီး၏ အခြားဘေးမကြီးတယောက်၏ပုံစသည်တို့ကို ချိတ်ထား၏။
ဇနီးက ဖြတ်ယူလာသည့် ပူစီဝီလ်လိုကိုင်းလေးတွေကို ဒေါင်းဖိုဒေါင်းမကနေဟန် ပန်းချီသရုပ်ဖော်ထားသည့် တရုတ်ရှေးဟောင်း ကြွေပန်းအိုးတွင်ထိုး၏။ ဟိုင်ရေးဆန့်သ်တွေနားကပ်ချထားလိုက်၏။ ခုတော့ မြေပြင်ပေါ်မှ ပူစီဝီလ်လိုလည်း သူတို့ကြားတွင် ငွားငွားစွင့်စွင့် ကြွားကြွားဝင့်ဝင့်။
မျိုးမြင့်ချို
၅၊ မတ်၊ ၂၀၂၀