Thursday, February 13, 2014

၂ဝ၁၄ ဖေဖော်ဝါရီလဆန်းက တိုနန့်နန့်လေးတွေ-၂-(မျိုးမြင့်ချို)

0 comments
၂ဝ၁၄ ဖေဖော်ဝါရီအဆန်းပိုင်းက တိုနန့်နန့်လေးတွေ -၂-(မျိုးမြင့်ချို)
(ဦးအေးမောင်နဲ့အပေါင်းအပါတွေအပါတွေ မလေးမှာဖြစ်ခဲ့တဲ့ကိစ္စနဲ့စပ်လို့ တိုတိုတုတ်တုတ်) အကြမ်းဖက်မှုနဲ့ နိုင်ငံရေးလုပ်ကြံမှုဟာ သီးခြားစီဖြစ်တယ်။ ဗိုလ်ချုပ်အောင်ဆန်းတို့ အသတ်ခံရတာ နိုင်ငံရေးလုပ်ကြံမှုပဲ။ အာဏာရှိနေချိန်(လို့ပဲထားပါ)မို့ နိုင်ငံတော် လုပ်ကြံမှုခေါင်းစဉ်တပ်ပြီး လူထုချစ်မြတ်နိုးတဲ့ တိုင်းပြည်ခေါင်းဆောင်မို့ အာဇာနည်စာရင်းသွင်း ကမ္ဗည်းတင်ရတာပဲ။ အမှန်က နိုင်ငံရေးအရလုပ်ကြံမှုသာပဲ။ ဒေါ်စု ဒီပဲယင်းမှာတိုက်ခိုက်ခံရတာ နိုင်ငံရေးလုပ်ကြံမှုပဲ။ ခု ဦးအေးမောင်တို့အုပ်စု အသက်ရန်ရှာခံရတာ(တကယ်အစစ်အမှန် အသက်ရန်ရှာ ခံရတာဖြစ်စေဦး) နိုင်ငံရေးအရလုပ်ကြံမှု ဒါမှမဟုတ် နိုင်ငံရေးသုတ်သင်သတ်ဖြတ်မှုသာပဲ။ တခုတော့ရှိတယ် လုပ်ကြံမှုဟာ လံကြုပ်ဇာတ်လမ်းလိုဖြစ်ခဲ့တာဆိုရင် ဒါလည်း လုပ်ကြံမှုလို့ပြောရလိမ့်မယ်။ အကြမ်းဖက်မှုလို့ပြောလို့မရဘူး။ ဒီလုပ်ကြံမှု အထမြောက်သည်ဖြစ်စေ မမြောက်သည်ဖြစ်စေ (မူမှန်မှန်/မမှန်မှန်)လက်သည်ကို ရအောင်စုံစမ်းဖော်ထုတ်ပြီး သက်ဆိုင်ရာနိုင်ငံကပြဌာန်းထားတဲ့ ဥပဒေကြောင်းအရ စီရင်အပြစ်ပေးရမှာပဲ။ ပြစ်တင်ရှုတ်ချချင်သပဆိုလည်း ဘက်သဘောအရလုပ်လို့ဖြစ် တာပါပဲ။ တခြားနိုင်ငံရောက်နေတဲ့ ကိုယ့်နိုင်ငံသားမှန်သမျှကို သံတမန်နည်းအရ၊ နှစ်နိုင်ငံဆက်ဆံရေးအရ၊ ဥပဒေကြောင်းအရအကာကွယ်ပေးရမှာ အစိုးရတိုင်းတာဝန်ပဲ။ ဘယ်သူ့ကျမှ အကာအကွယ်ပေးဖို့ပြောလို့ မရသလို ထိုယ့်လာထိ(တယ်ပဲထားပါ)မှ လူ့အခွင့်ချိုးဖေါက်တယ် ဘာညာပြောလို့မရဘူး။ လူ့အခွင့်အရေးဆိုတာ လူလိုသူလိုတွေးတတ်လုပ်တတ် တွေးချင်လုပ်ချင်တဲ့ကမ္ဘာသူကမ္ဘာသား အားလုံးကိစ္စ။ သူတပါးကိုလုပ်တုန်းကတော့ ”လူ့အခွင့်အရေးလာမပြောနဲ့ အမျိုးသားရေး၊ နိုင်ငံတော် လုံခြုံရေး”ဆိုကာ အသံကောင်းဟစ်ခဲ့တာလည်း မမေ့ဖို့လိုတယ်။ လုပ်ကြံသတ်ဖြတ်မှုဟာ ဘာအရေး (စီးပွားရေး၊ လူဆိုးဂိုဏ်းဗိုလ်လု။ မယားလုစတာမျိုး)ပေါ်အခြေခံခံ ဥပဒေရေးရာကိစ္စမျှသာပဲ။ အကြမ်းဖက်မှုကျတော့ သက်ဆိုင်ရာနိုင်ငံ တနိုင်ငံငံတည်းနဲ့သက်ဆိုင်တဲ့အရေးမျှ မဟုတ်တော့ဘူး။ ဥပဒေရေးရာထက်လွန်သွားတယ်။ လူ့ကျင့်ဝတ်နဲ့ဆိုင်တယ်။ ကမ္ဘာ့လူသားထုနဲ့ဆိုင်တယ်။ အလုပ်ကြံ (တကယ်ခံရတယ်ပဲထား) လူ့အခွင့်အရေးချိုးဖေါက်ခံရတယ်လို့ပြောလို့မရဘူး။ လုပ်ကြံသတ်ဖြတ်မှုမျှသာပဲ။ လူသတ်မှုမျှသာပဲ။ ရာဇဝတ်မှုမျှသာပဲ။ လက်သည်ဖော်ပြီးရာဇဝတ်မှုနဲ့တရားစွဲ ရာဇသတ်ကြီးပုဒ်မနဲ့ အရေးယူ။ ဒါပဲ ဒီ့ထက်ပိုစရာ ဘာအကြောင်းမှ မမြင်မိဘူး။ အကြမ်းဖက်မှုဘာလဲကတော့ သိကြပြီးသားမို့ပြောစရာမလိုဘူးမှတ်တာပဲ။ (လုပ်ကြံမှုနဲ့လူ့အခွင့်အရေး)

လူ့ဘောင်သစ်ဒီမိုကရက်တစ်ပါတီပြန်ထူထောင်လာခြင်းဟာ ဒီမိုကရေစီအရေခြုံစစ်အာဏာရှင်စနစ် အတွက် မရဏမောင်းဖြစ်ပြီး၊ အင်န်အယ်လ်ဒီ၊ ၈၈-ငြိမ်း/ပွင့် အပါအဝင် ဒီမိုကရေစီအင်အားစုတွေ အတွက် အောင်စည်ဖြစ်တယ်ဆိုဘယ့်လောက်ကောင်းလိုက်မလဲ။ ဘယ်အထိ အတိုင်းမသိ ပီတိဖြစ်ရမလဲ။ ဘယ်မျှ နိုင်ငံရေး သာဓုအနုမောဒနာခေါ်စရာလဲ။ နိုင်ငံရေးသဘောအရဖြစ်ကြတာကတော့ နိုင်ငံရေးမို့ နားလည်သိမြင်လို့ရပါရဲ့။ (လူ့ဘောင်ကိစ္စ)

ရှစ်ဆယ့်ရှစ်-ငြိမ်း/ပွင့်ခေါင်သူကြီးတချို့နဲ့ ဒေါ်စုတွေ့တယ်။ တချို့ပါမသွားဘူး။ ကျန်ခဲ့သလား/ချန်နေ သလားက သူတို့ကိစ္စ။ နောက်တချက်က တွေ့တဲ့နေရာ။ နေရာဆိုတာက "နယ်"ကိုပြောတာ။ ကိုယ့်နယ်ဟုတ်ရဲ့လားလို့တွေးကြည့်တာပါ။ တွေ့တဲ့နယ်က ဘယ်လောက်လုံခြုံစိတ်ချမှုရှိမလဲနဲ့ ဘယ်လောက်ပေါက်ကြားစေနိုင်မယ့် အနေအထားရှိသလဲဆိုတာလည်း တွေးစရာပါ။ ဘာလို့ ဒီနယ်မှာ ဒီလိုပုံ စီစဉ်တွေ့ကြသလဲပေါ့။ တွေ့စရာအခြားနယ်ဆို ဘာများဖြစ်လို့လဲတွေးမိပါတယ်။ ဘာပဲဖြစ်ဖြစ် တွေ့တာကောင်းပါတယ်။ မတွေ့တာထက်စာရင်တော့။ ခြေမခွဲပြီးလို့ လမ်းကြုံတာနဲ့ လူနာသတင်းဝင်မေးတာမှ မဟုတ်ပဲ။ ဒီ့အရင်(လွတ်လာကာစတွေတုန်းက) ပထမအကြိမ် ခုလို ဆုံတော့ ဒေါ်စုက သူတို့ကိုမှာတဲ့အထဲမယ် အိမ်ထောင်ပြုကြဖို့လည်းပါတာ မှတ်မိနေတယ်။ မပြုရသေးသူတွေ ပြုမယ်ဆိုလည်းကောင်းတာပါပဲ။ ဦးလေးဟိုတွေမှ မဟုတ်ကြတာ။ တွေ့တာနဲ့ စပ်လို့ပြောကြတဲ့ထဲမှာ "နှစ်ဘက်သဘောတူညီချက်" ထုတ်ပြန်မယ်ဆိုတာပါတယ်။ ဒီမှာ သုံးထားတဲ့ "နှစ်ဘက်"ဆိုတာအတော်တာသွားသလို အတွေးပွားစရာစကားလုံး မှတ်တယ်။
နှစ်ဘက်လို့ပြောတဲ့အတွက် တဘက်တည်းမဟုတ်ဘူးလို့ဆိုသလား ဒါမှမဟုတ် ဘက်တဘက်တည်းမှာရှိနေတဲ့ နှစ်ဘက်လို့ပြောသလား။ ဒါမှမဟုတ် ဘက်ကိုက နှစ်ဘက်ဖြစ်သွားတယ်လို့ဆိုသလားကတော့ နှစ်ဘက်သဘောတူညီမှုထုတ်ပြန်မှ တပ်အပ်ပြောနိုင်မယ်ထင်ပါတယ်။ ဆွေးနွေးတာတွေထဲမယ် ဖွဲ့စည်းပုံကိစ္စထိပ်ရောက်မှာမှန်ပေမယ့် လက်တွေ့နိုင်ငံရေးအခင်းအကျင်းထဲက အခြားကိစ္စတွေလည်း ပါမှာပါပဲ။ ထောင်ထဲကို လူ့အခွင့်အရေး ကိုယ်စားလှယ်လာတုန်းက စားပွဲအောက်မှာ အသံဖမ်းစက်ခိုးတပ်တာမိလို့ စစ်အစိုးရမျက်နှာပြောင်တိုက်ရ ဖူးတဲ့သာဓကလက်တွေ့ရှိတော့ ဒီတွေ့ပွဲမှာရော အသံခိုးမဖမ်းထားဘူးလို့ ဘယ်သူပြောနိုင်မလဲ။ အဲ့သလိုလုပ်ရင် လုပ်သူကိုပြစ်တင်ရှူတ်ချရမှာမှန်ပေမယ့် (သူတို့သိစေချင်သလောက်) ပေါက်ကြားပေး လိုက်မယ့်အရေး၊ အထုတ်ဖြည်ပြမယ့်အရေးတွေးမိတာကြောင့် လူထုသိခွင့်သာမယ်လို့ ထင်တယ်။ ရှေ့မှာ တွေ့ခဲ့သမျှတွေ(ဒေါ်စု-သိန်းစိန်)အပါအဝင် ဘယ်တုန်းကမှ အတိအလင်းမထုတ်ပြန်ပဲ တိုင်းပြည်ကို "နှစ်ဘက်သဘောတူ မလိမ့်တပတ်"လုပ်ခဲ့တာချည်းပဲ။ ပွင့်လင်းမြင်သာမှုစကားလုံးကို
ဆီမန်း မန်းသလို တတွတ်တွတ်ရွတ်နေပေမယ့် နိုင်ငံရေးအမှောင်ချမှုကိုလက်တွေ့ကျင့်သုံးကြတော့ လူတွေအကြား သို့လောသို့လောတွေနဲ့ သံသသယတိုးလို့သာပွားတယ်။ ဒီတစ်ကြိမ် ဘာတွေထုတ်ပြန်မလဲ။ အကန့်အသတ်ဘယ်လောက်နဲ့ထုတ်ပြန်ထုတ်ပြန် အတိအလင်းတော့ပြောကြရတော့မှာပဲ။ ထုတ်ပြန်မှုမှာ လုပ်စရာရှိတာများလုပ်နေပါသည်.. အကောင်းဆုံးကိုရွေးကာ နှစ်ဘက်ပူးပေါင်းဆောင်ရွက်သွားမည် ဆိုတာမျိုးလောက်ဆို တွေ့ကြတာမြင်ပြီး အားတက်မျှော်လင့်နေကြသူတွေအတွက် စိတ်အပျက်ကြီး ပျက်ကာ "မျှော်သာမျှော်သည်မယုံကြည်"တို့ "ခဲလေသမျှသဲရေကျ"တို့ "ထင်သာထင်မဝင်ပါ့လား ကိုယ်တော်"ဇာတ်လမ်းတို့ တစ်ကြော့ပြန်ရစ်ရမလိုမဖြစ်စေချင်။ ကျနော်ကတော့ "နှစ်ဘက်"ကို အတော်စိတ်ဝင်စားမိပါကြောင်း။ (အပူးတွေနဲ့ဒေါ်စုတွေ့တဲ့ကိစ္စ)

သမ္မတကြီးကိုယုံတယ်တို့၊ ဗိုလ်ချုပ်ကြီးတွေကို သဘောကျတယ်တို့၊ လွှတ်တော်ကြီးက ထင်တာထက်တောင် ဒီမိုကရေစီကျသေးတို့၊ ဥပဒေချိုးဖေါက်ရင်အရေးယူဖို့ ကျွန်မကိုယ်တိုင်ပြောထားတယ်တို့ဆိုတဲ့ အစိုးရကို/လွှတ်တော်ကို ကိုယ်စားပြုသယောင် မှတ်ထင်စရာစကားတွေရဲ့သက်ရောက်မှု ဘယ်လောက်ရှိမှန်း ခုဆိုပြက်ပြက်ထင်ထင်ရှိကြပြီ။ ဖွဲ့စည်းပုံပြင်ချင်သလား တကူးတကန့်သွားမေးရမယ့်လူထုမဟုတ်မှန်းက ”မပြင်ပေးရင်ဘာလုပ် မလဲ”မေးခွန်းကြည့်ရုံနဲ့ မြင်သာပြီ။ ပြင်ချင်သလားမေးတာရပ်ပြီး ပြင်မပေးရင်ဘာလုပ်မယ်ကို တိကျရှင်းလင်းတဲ့အဖြေနဲ့ အုပ်အုပ်စည်းစည်းကျစ်ကျစ်လစ်လစ် ကျယ်ကျယ်ပြန့်ပြန့် ပြင်ဆင်ဖို့လိုမှန်းလည်း သိမြင်ကြပြီ။ (မပြင်ပေးရင်ဘာလုပ်မလဲကိစ္စ)

တွေးစရာပေါ်လာလို့ဗျာ။ တခြားကိစ္စတွေခနထားပါဦး သတင်းသမားဆိုသူတွေအနေနဲ့ ရခိုင်ပြည်နယ်က ရိုဟင်ဂျာအမျိုးသားတွေကိစ္စနဲ့စပ်ပြီးမေးစရာရှိရင် သမ္မတဗိုလ်ဦးသိန်းစိန်၊ တရားဥပဒေစိုးမိုးရေးကော် မတီဥက္ကဌဒေါ်စု စတဲ့သူတွေကိုပဲ တမေးထဲမေးမေးနေပြီး ဗိုလ်ရွှေမန်းကျဘာလို့မမေးကြတာ တုန်းဗျာ။ မေးရင် သူလည်းဖြေမယ်ထင်ရဲ့။ သူလည်း ဟိုတလောက အင်န်အယ်လ်ဒီကပြော တဲ့ လေးဦးလေးဖလှယ်ဆိုတဲ့ ထိပ်သီးထဲပါတယ်ဆို။ ဗိုလ်မင်းအောင်လှိုင်ကတော့ထားပါတော့၊ မမေးကြတာ စစ်သားမို့လို့ ဘာလို့ညာလို့ဆိုပြီး။ (ရွှေမန်းကိုမမေးတဲ့ကိစ္စ)

ကြိုတင်စကားပလ္လင်ခံပါရစေ။ မိတ်ဆွေဖြစ်ကမ်းလှမ်းချက်ပို့မယ်ဆို မပို့ခင်အရင် ကျနော့်ပေ့ဂ်ျကို ဝင်ဖတ်စေလိုပါတယ်။ ပါ့ဘလစ်က်လုပ်ထားတာပါ။ ဖတ်ကြည့်ပြီးလက်ခံနိုင်မှ ပို့စေချင်တယ်ဗျာ။ ကျနော့်ဘက်ကလက်ခံလိုက်ပြီးကာမှ မိတ်ဆွေဘက်က မှန်းချက်နှမ်းထွက်မကိုက်လို့ ကျနော့်ကို ပြန်ဖယ်ထုတ်ရတော့ မိတ်ဆွေမှာအလုပ်ပိုတယ်မဟုတ်လား။ ကျနော်လည်း မိတ်ဆွေဖြစ်ကမ်းလှမ်းလာရင် သူ့ပေ့ဂ်ျကိုဝင်ကြည့်ပါတယ်။ လက်ခံဖို့အဆင်ပြေတယ်ဆို လက်ခံပါတယ်။ လက်ခံပြီးကာမှ အဆင်မပြေဖြစ်တဲ့အခါလည်း ပြန်ဖယ်ထုတ်ရပါတယ်။ သိတ်တော့လည်း ရေးကြီးခွင်ကျယ်ပြောနေရမယ့်ကိစ္စမဟုတ်ဘူးပဲ မှတ်ပါတယ်။ ဒါပေမယ့် အလုပ်တော့ရှုပ်တာပေါ့လေ။ သူ့ပေ့ဂ်ျကိုယ့်ပေ့ဂ်ျဝင်ဖတ်ပြီး ကမ်းလှမ်း/လက်ခံလုပ်တာတောင် တခါတရံအဆင်မပြေဖြစ်တော့ စလယ်ဝင်ဖင်မမည်းခင် ကွဲရသေးတာမဟုတ်လား။ မဖတ်ပဲကမ်းလှမ်း/လက်ခံရင်ပိုဆိုးတော့မပေါ့။ နှစ်ဦးနှစ်ဖက် အလုပ်မပိုဖို့ဆို ကြိုသိအောင်လုပ်ကြတာ ပိုမကောင်းလားဗျာ။ (မိတ်ဆွေဖြစ်တဲ့ကိစ္စ)

ကမ္ဘာပေါ်မှာ မြေဘယ်နှမျိုးရှိလဲ ကျနော်လည်းသေချာမသိဘူး။ ရွှေပြည်ကြီးမှာတော့ အစိုးရပိုင်၊ နိုင်ငံတော်ပိုင်၊ တပ်ပိုင်နဲ့ ဦးပိုင်ဆိုတဲ့မြေမှန်သမျှဟာ မောင်ပိုင်အစီးခံအမည်ပေါက် တခုတည်းအောက် သွင်းရင် လူကြားမကောင်းဖြစ်မစိုးလို့ ခေါင်းစဉ်ခွဲ သွင်းထားရတဲ့သဘောပါ။ ပန်းအိုးထဲမြေတောင် မပိုင်နိုင်ရှာသူတွေ ဒုနဲ့ဒေးဖြစ်နေချိန်မှာ မြို့အငယ်စားတစ်ခုစာမြေပိုင်နေတဲ့စစ်ဗိုလ်တွေနဲ့ စစ်ခရိုနီတွေလည်း ရိုက်သတ်လို့မကုန်အောင်ပါ။ နောက်ဆို မြိ့ကြီးတမြို့စာ ပြည်နယ်အသေးစား တစ်ခုစာလောက်ပိုင်လာမယ့် မြေပိုင်ရှင်ကြီးတွေ နယ်စားပယ်စားကြီးတွေလည်း ဖြစ်ထွန်းလာဦးမှာပါ။ ဒါနဲ့စပ်လို့ ငယ်ငယ်ကလူကြီးတွေပြောပြလို့သိခဲ့တဲ့အဖြစ်တခု ပြန်ပြောပြချင်တယ်။ ဂျပန်အပြေး အင်္ဂလိပ်ပြန်အဝင်မှာ ဂုတ်သွေးကိုဥပဒေနဲ့စနစ်တကျစုပ်ရာမှာအံခွနေတဲ့ဗြိတိသျှအစိုးရဟာ ဗမာပြည်ကိုအရပ်ဘက်နဲ့စစ်အာဏာ ၂ မျိုး ရောသမမွှေပြီး ကက်စ်ဘီလို့ခေါ်တဲ့ ယာယီစစ်အုပ်ချုပ်ရေး လုပ်ခဲ့တာရှိပါတယ်။ ကက်စ်ဘီအုပ်ချုပ်ရေး အစိုးရဗျူရိုကရက်အရာကြီးများဟာ တိုင်းပြည်ပြန်လည် ထူထောင်ရေးတို့ ငြိမ်ဝပ်ပိပြားရေးတို့ဆိုတဲ့ခေါင်းစဉ်ခွဲအမျိုးမျိုးနဲ့ လူထုပိုင်မြေယာနဲ့ဓနဥစ္စာတွေအပေါ် အသိမ်းဘယ်လောက်ကြမ်းသလဲဆို အငြိမ့်တစ်ခုမှာ ပြောင်ယူပြက်ယူရတဲ့အထိ နံမည်ကြီးခဲ့ဘူးပါတယ်။ မင်းသမီးကိ လူရွှင်တော်တွေ အပြိုင်ကြိုက်အပြိုင်ပိုးရင်း မင်းသမီးကတခြားတဘက်ပါသွားလုလု ဖြစ်နေ ချိန်မှာ ကျန်ရစ်ဖြစ်ရရှာတော့မယ့်လူရွှင်တော်က ခတ်တည်တည်နဲ့ ကက်စ်ဘီလို့ အင်္ဂလိပ်စာလုံး နဲ့ရေးထားတဲ့ဆိုင်းဘုတ်လေး မင်းသမီးလည်မှာဆွဲချလိုက်တော့ ဟိုလူရွှင်တော်လက်မှိုင်ချသွား၊ မင်းသီးကမျက်နှာလေးငယ်၊ မောင်ကျန်ရစ်က လက်မတထောင်ထောင်လုပ်တော့ ပရိသတ်လည်း လက်ခုပ်တဖြောင်းဖြောင်းဖြစ် ပတ်တုတ်မရအောင် ပွဲကျသွားတယ်လို့ဆို။ ခု စစ်ဗျူရိုကရက် အရင်းရှင်တွေမြေအသိမ်းကြမ်းပုံက ဘာအရေးမှတောင်ပြောမနေပဲ သိမ်းတယ်ကွာဘာဖြစ်လဲဆိုကာ လုယက်ယူငင်လေတော့ ကက်စ်ခေတ်လောက်ကတော့ ပျင်းသေးလို့ပြောရမလိုပါ။ ပုံရတာက ကိုစောမောင် ကိုဖြိုးဆီကပါခင်ဗျား။ (ကက်စ်ဘီနဲ့စစ်ဗိုလ်မြေလုကိစ္စ)

0 comments:

Post a Comment