Tuesday, November 8, 2016

ကလေးတွေပျော်မှ အစိုးရ (မျိုးမြင့်ချို)

0 comments
ဖို့တ်ဝိန်းရဲ့ ရာထူးသက်တော်ရှည်မြို့တော်ဝန် တွမ်ဟင်နရီ နှလုံးခွဲစိတ်ကုသမှု အောင်မြင်တယ်လို့ဆိုတယ်။ မြို့တော်ဝန်ဆိုတာ ဒီမှာတော့ မြို့အစိုးရအဖွဲ့ခေါင်းဆောင်ပါ။ ဘားမားနိုက်ဆိုပြီး ဘီအေစီက မမင်းမင်းထွေးငယ်တို့ဦးစီးပြီးလုပ်တဲ့ အခမ်းအနားမှာ ဘရိတ်ခ်ချိန်ပေးတုန်း အပေါ့အပါးသွားတော့ အိမ်သာခန်းမှာ သူရယ် ကျနော်ရယ် ဗမာပြည်သားကလေး သုံးလေးယောက်ရယ်ဆုံကြတယ်။ အဖွင့်မိန့်ခွန်းသူပြောတာကိုသိတဲ့ ဗမာကလေးငယ်က “မင်းက ဘာလဲ“လို့မေးတော့ သူက လက်ဆေးနေရင်း “ငါက မြို့တော်ဝန်ပါ“လို့ဖြေတယ်။ ကလေးက “မြို့တော်ဝန်ဆိုတာ ဘာလဲ“တဲ့။ သူက “မြို့တော်ဝန်ဆိုတာ အစိုးရပေါ့ကွာ“တဲ့။ ကလေးက “အစိုးရဆိုတာ ဘာလုပ်ရလဲ“လို့ ဆက်မေးတော့ သူက ခါးကိုင်းပြီး “အစိုးရဆိုတာ ကလေးတွေကိုပျော်အောင်လုပ်ပေးပြီး လူကြီးတွေကို စိတ်ချမ်းသာအောင် လုပ်ပေးရတယ်“လို့ ဖြေတော့ ကလေးအားလုံး သူ့အနားလာပြီး “ဟေး“ လိုပြိုင်တူအော်ကြတယ်။ ကျနော် အဲ့ဒီအကြောင်းလေး လွန်ခဲ့တဲ့ ၂ နှစ်ကျော်လောက်က ရေးဖူးပါတယ်။
သူ့ကို ရာထူးသက်တော်ရှည်လို့ဆိုရတာက ၂ဝဝ၈ ဇန်နဝါရီ ၁ ရက် နေ့ကစပြီး ခုချိန်ထိ ပြန်ပြန်အရွေးခံရလို့ ဖြစ်ပါတယ်။ သူ့မှ နှလုံးပြဿနာရှိ/မရှိ အရင်က ဘယ်သူမှမသိကြပေမယ့် သူ့နှမအပြောအရတော့ သူဟာ ကျန်းမာရေးလိုက်စားသူဖြစ်ပြီး နေ့တိုင်း ကိုယ်လက်လှုပ်ရှား လေ့ကျင့်ခန်းများလုပ်သူပါတဲ့။ ဘာပဲဖြစ်ဖြစ် ခွဲစိတ်မှု ချောချောမောမောဖြစ်သွားတာ ဝမ်းသာစရာပါ။
သူဟာ နိုင်ငံတကာကရောက်လာတဲ့ ဒုက္ခသည်မှန်သမျှအပေါ် တကယ့်ကို
လှိုက်လှိုက်လှဲလှဲ ကြည်ကြည်ဖြူဖြူ ရင်းရင်းနှီးနှီး နွေးနွေးထွေးထွေးရှိသူပါ။
ယဉ်ကျေးမှုဆိုင်ရာဖြစ်ဖြစ်၊ နိုင်ငံရေးနဲ့ပတ်သက်လို့ဖြစ်ဖြစ်၊ လူမှုရေးအခမ်းအနား
ရှိလို့ဖြစ်ဖြစ် ဖိတ်လိုက်ရင် မဆိုင်းမတွလက်ခံပြီး မပျက်မကွက်
တက်ရောက်လာသူပါ။ လူချစ်လူခင် အလွန်များသူပါ။ အင်ဒီယားနားပြည်နယ်
အုပ်ချုပ်ရေးမှူးမိုက်ခ်ပန့်စ်(အခု ဒေါ်နယ်လ်ထရမ့်နိုင်ရင် ဒုသမ္မတလုပ်မယ်ဆိုသူ)နဲ့တော့ တခြားစီပါ။ မိုက်ခ်ပန့်စ်ကို အင်မီးဂရန့်တွေ၊ ဒုက္ခသည်တွေအပြင်
မက္ကဆီကန်တွေကပါ သိတ်မနှစ်မြို့ကြပါဘူး။ လူမုန်းများတဲ့ ပြည်သူ့ချဉ်ဖတ်ကြီးလို ဖြစ်နေသူပါ။
ခု သူ ကျန်းကျန်းမာမာနဲ့ မြို့အစိုးရတာဝန်တွေယူပြီး ကလေးတွေပျော်အောင်
လူကြီးတွေစိတ်ချမ်းသာအောင် ဆက်လုပ်နေနိုင်ပါစေ။

နိုဝင်ဘာ ၈၊ ၂ဝ၁၆

0 comments:

Post a Comment