(ပြည်သူတွေက သွေးခွဲသတဲ့လား)
ဗမာပြည်မပြောနဲ့ လစ်ဘရယ်လ်ဒီမိုကရေစီ အသားကျနေပါပြီဆိုတဲ့ပြည်ကြီးတွေမှာတောင် ရွေးကောက်ပွဲနီးရင် အတိုက်အခံတွေ ဆော်ကြနှက်ကြ ကလော်ကြတုတ်ကြ ငယ်ကျိုးငယ်နာဖော်ကြ အောက်လုံးထိုးကြတွေရှိပါတယ်။ လုပ်တဲ့နေရာမှာ သမာတဲ့နည်းရော မသမာတဲ့နည်းရော သတင်းမှားရော သတင်းမှန်ရော နည်းမျိုးစုံသုံးပြီး ဗြောင်ရော မသိမသာရော၊ ကျယ်ကျယ်လောင်လောင်ရော တိုးတိုးတိတ်တိတ်ရောကို လုပ်တာပါ။ ဒီအထဲမှာ သူ့ဘက်ကိုယ့်ဘက် သူ့ပါတီကိုယ့်ပါတီ သူ့လိုလားရာ ကိုယ့်လိုလားရာ ပြည်သူတွေလည်း တဇောင်းစေးနဲ့မျက်ချေးသဖွယ် တူးတူးခါးခါး ဝိုင်းပြီး လှော်ကြ သမကြပါတယ်။ ဒါပေမယ့် တပါတီက တပါတီကို အမနာပပြောလို့ နိုင်ငံရေးသမားတယောက်က နိုင်ငံရေးသမားတယောက်ကို အပုတ်ချလို့ ထိုးနှက်တိုက်ခိုက်လို့ ဘယ်သူ့ဘယ်သူမှ "ဒါဟာ တပါတီနဲ့တပါတီကြား သွေးကွဲအောင်လုပ်နေတာတို့။ သွေးခွဲနေတာတို့။ အထင်အမြင်လွဲတောင်လုပ်နေတာတို့"ဆိုပြီး ပြောမနေကြပါဘူး။ ကိုယ်လုပ်စရာရှိတာလုပ် ကိုယ်ဆွယ်စရာရှိတာဆွယ် ကိုယ်ဝါဒဖြန့်စရာရှိတာ ဖြန့်နေကြတာပါ။ ပွဲပြီးသွားမှ အနိုင်ရတဲ့သူက တရားမျှတတဲ့ရွေးကောက်ပွဲလို့ပြော၊ ရှူံးတဲ့သူက မတရားဘူးမမျှတဘူးထင်ရင် မတရားကြောင်းမမျှတကြောင်းပြောပြီး ဥပဒေကြောင်းအရ ဆက်ရင်ဆိုင်ကြတာပါ။ လွတ်လပ်ပြီး တရားမျှတတယ်လို့ နှစ်ဖက်စလုံးကထင်ရင်တောာ့ ရွေးကောက်ပွဲပြီးပါတယ်။ ဒါပေမယ့် အနိုင်ရပြီး အစိုးရဖွဲ့တဲ့သူက မပြီးသေးပါဘူး။ ရွေးကောက်ပွဲကြောင့် အထိုက်အလျှောက် စိတ်ဝမ်းကွဲသွားတဲ့လူထုကိုရော မိမိရဲ့အတိုက်အခံတွေကိုရော ပြန်ပြီး စည်းစည်းလုံးလုံးရှိဖို့ "စည်းရုံးရေး"လုပ်ရပါတယ်။ အဲ့သလိုလုပ်တဲ့နေရာမှာ နိုင်ငံရေးရာထူးကြီးငယ်တွေမှာ ကိုယ့်လူတွေတင်မက သူ့လူတွေနဲ့ အတိုက်အခံတွေကို ထိုက်သလောက်နေရာပေးခြင်းလည်းပါ ပါတယ်။
ပြောချင်တာက ရွေကောက်ပွဲမဲဆွယ်ရာမှာ ဘယ်လောက်ပဲ တက်ထောင်မောင်းနင်းတွေ နင်ပဲငဆတွေ အပုတ်ချတာတွေ ထင်ယောင်ထင်မှားဖြစ်အောင်လုပ်တာတွေ အောက်လုံးထိုးတာတွေ ငယ်ကျိုးငယ်နာဖော်တာတွေ ငါ့မခေါ် ငါ့အိုးပုပ်ပြန်ပေးလုပ်တာတွေ ဘယ်လောက်လုပ်ကြလုပ်ကြ တယောက်ကိုတယောက် တပါတီကတပါတီကိုသာ အပြစ်ဖို့ရင်ဖို့မယ် ယိုးစွပ်ရင်ယိုးစွပ်မယ် လက်ညှိုးထိုးရင်ထိုးမယ် မှားနေရင် ပြန်ဖြေရှင်းရင်ရှင်မယ် တန်ပြန်တိုက်ခိုက်ရင်ခိုက်မယ်၊ ကိုယ့်ဘက်သူ့ဘက် ဝင်လုပ်ပေးတဲ့ပြည်သူတွေကိုတော့ "ပါတီအချင်းသွေးကွဲအောင် သွေးထိုးတယ်"ဆိုတဲ့စကားမျိုးနဲ့ အပြစ်ဖို့တာ ယိုးစွပ်တာ လက်ညှိုးထိုးတာ ရမယ်ရှာတာတော့ မလုပ်ကြဘူး။ ဗမာပြည်မှာကြတော့ သူ့ဘက်ကိုယ့်ဘက်၊ သူ့ပါတီကိုယ့်ပါတီ၊ သူ့နိုင်ငံရေးသမား ကိုယ့်နိုင်ငံရေးသမား၊ သူ့အမတ်ကိုယ့်အမတ် လုကြရင်း အပြန်အလှန်ထိုးနှက်ကြတာကို "ပါတီတွေ နိုင်ငံရေးသမားတွေ အမတ်တွေအချင်းချင်း သွေးကွဲအောင် ပြည်သူတွေကလုပ်နေကြတယ်" ဆိုတဲ့သဘောနဲ့ပြောနေသံကြားရပါတယ်။
တကယ်က ဒါဟာ မဲဆွယ်နေတာပါ။ ဘယ်သူနိုင်နိုင်ရှုံးရှုံး သွားနေတဲ့စနစ်က ဒီစနစ်ပါပဲ။ စစ်လက်ဝါးကြီးအုပ် ဓနရှင်ဗြူရိုကရေစီစနစ်ကြီး မယိုင်လဲဖို့ပါပဲ။ ၂၀၀၈ ဖွဲ့စည်းပုံကို ကာကွယ်စောင့်ရှောက်ဖို့ပါပဲ။ ဒီလိုအနေအထားအောက်မှာ မစို့မပို့အာဏာလေးအတွက် တယောက်နဲ့တယောက် တပါတီနဲ့တပါတီ ရာထူးနေရာလုကြရင်း ပြည်သူကို ညှိုးသူရန်ဘက်သဖွယ်လုပ်ပြီး "ပါတီချင်း နိုင်ငံရေးသမားချင်း သွေးမခွဲနဲ့"လုပ်နေတာတော့ မဟုတ်သေးဘူးနဲ့တူပါတယ်။
မျိုးမြင့်ချို
၂၀ ဇူလိုင် ၂၀၂၀
0 comments:
Post a Comment