လစ်ဘရယ်ဝါဒကို ဆန့်ကျင်ကြ (COMBAT LIBERALISM) ဥက္ကဋ္ဌ မော်စီတုန်း တရုတ်ပြည်ကွန်မြူနစ်ပါတီ ၁၉၃၇-စက္တင္ဘာလ-၇

လစ်ဘရယ်ဝါဒကို ဆန့်ကျင်ကြ (COMBAT LIBERALISM)

ဥက္ကဋ္ဌ မော်စီတုန်း

တရုတ်ပြည်ကွန်မြူနစ်ပါတီ

၁၉၃၇-စက္တင္ဘာလ-၇

တွေးခေါ်မှုတိုက်ပွဲကို တက်တက်ကြွကြွဆင်ဖို့ ကျွန်တော်တို့ တိုက်တွန်းတယ်။ ဘာကြောင့်လဲဆိုတော့ ဒီလိုတိုက်ပွဲဆင် တာဟာ ပါတီတွင်းနှင့် တော်လှန်ရေးအဖွဲ့အစည်းများအတွင်းမှာ စည်းလုံးညီညွတ်မှု ရှိစေပြီး ပါတီနှင့် တော်လှန်ရေးအဖွဲ့အ စည်းများရဲ့ တိုက်ခိုက်ရေးအတွက် အကျိုးရှိစေတဲ့ လက်နက်ဖြစ်စေလို့ပဲ။ ကွန်မြူနစ်ပါတီဝင်တိုင်း တော်လှန်ရေးသမား တိုင်း ဒီလက်နက်ကို ကိုင်စွဲသင့်တယ်။

ဒါပေမဲ့ လစ်ဘရယ်ဝါဒကတော့ တွေးခေါ်မှုတိုက်ပွဲကို ဖျက်သိမ်းပြီး မူမဲ့တဲ့ ငြိမ်းချမ်းမှုကို လိုလားတယ်။ ဒါကြောင့် ယုတ်ညံ့ သိမ်ဖျဉ်းတဲ့ လုပ်ဟန်တွေပေါ်လာပြီး၊ ပါတီနဲ့ တော်လှန်ရေးအဖွဲ့ထဲက အဖွဲ့အစည်းအချို့နဲ့ လူတချို့ကို နိုင်ငံရေးအရ ဆုတ် ယုတ်ပျက်စီးသွားစေတယ်။ လစ်ဘရယ်ဝါဒဟာ သဏ္ဍာန်အမျိုးအမျိုးရှိတယ်။

ကိုယ့်နဲ့သိကျွမ်းသူ၊တရွာတည်းသား၊ ကျောင်းနေဖက်၊ ရင်းနှီးတဲ့ မိတ်ဆွေ ချစ်ခင်သူ၊ လုပ်ဖေါ်ကိုင်ဖက်ဟောင်း၊ လက် အောက်ငယ်သားငယ်သားဟောင်းများဖြစ်နေလို့၊ သူတို့တတွေ မှားနေမှန်းသိရက်နဲ့ မူ အရငြင်းခုံဆွေးနွေးမှု မလုပ်ဘဲ အေး အေးချမ်းချမ်းရှိအောင်နဲ့ မိတ်မပျက်အောင်ဆိုပြီး မျက်နှာလွှဲလိုက်တယ်။ ဒါမှမဟုတ် သင့်သင့်မြတ်မြတ်ရှိအောင်ဆိုပြီး ယတိပြတ်မဖြေရှင်းဘဲ၊ သာမန်ကာလျှံကာ လောက်ပဲပြောကြတယ်။ ဒီလိုလုပ်တာဟာ အဖွဲ့အစည်းအတွက်ရော၊ လူတဦး ချင်းအတွက်ပါ အကျိုး ယုတ်စေတယ်။ ဒါဟာ ပထမအမျိုးအစားဖြစ်တယ်။

အဖွဲ့အစည်းကို တက်တက်ကြွကြွအကြံမပေးဘဲ၊ ကွယ်ရာမှာ တာဝန်မဲ့ဝေဖန်ခဲ့တယ်။ ရှေ့မှာမပြောဘဲ။ ကွယ်ရာမှာ အရမ်း လျှောက်ပြောတယ်။ အစည်းအဝေးမှာ မပြောဘဲ အစည်းအဝေးပြီးမှ လျှောက်ပြောတယ်။ စုပေါင်းနေထိုင်ရေးမူကို အရေး မထားဘဲ ကိုယ်ထင်ရာပေါက်လွှတ်ပဲစားလုပ်သည်။ ဒါဟာ ဒုတိယအမျိုးအစားဖြစ်တယ်။

ကိုယ့်နှင့်မဆိုင်တဲ့ကိစ္စဆိုပြီး ဘေးချိတ်ထားလိုက်တယ်။ မှားမှန်းသိရက်သားနဲ့ ဆိတ်ဆိတ်နေထောင် တန်ဆိုတဲ့ သဘောနဲ့ နေတယ်။ လူပါးလူနပ်လုပ်ပြီး အန္တရာယ်ကင်းကင်းနဲ့ အမှားလွတ်အောင်သာ ရှောင်ကွင်းနေတယ်။ ဒါဟာ တတိယ အမျိုး အစားဖြစ်တယ်။

အမိန့်ကိုမနာခံဘဲ ကိုယ့်ထင်မြင်ချက်ကို အဓိကထားလုပ်သည်။ အဖွဲ့အစည်းရဲ့ ပြုစုစောင့်ရှောက်မှုကို သာလိုလားပြီး၊ အဖွဲ့ အစည်းရဲ့စည်းကမ်းကိုတော့ မလိုက်နာဘူး။ ဒါဟာ စတုတ္ထအမျိုးအစားဖြစ်တယ်။

ညီညွတ်ဖို့၊ တိုးတက်ဖို့နဲ့ လုပ်ငန်းများကောင်းကောင်းလုပ်ဆောင်ဖို့အတွက် မှားတဲ့ထင်မြင်ချက်များနဲ့ တိုက်ခိုက်ငြင်းခုံမှု လုပ်ရမဲ့အစား ပုဂ္ဂိုလ်ရေးအရတိုက်တယ်၊ အရွဲ့တိုက်တယ်၊ ရန်ငြိုးနဲ့လုပ်တယ်၊ လက်စားချေဖို့ကြံတယ်။ ဒါဟာပဥ္ဓမ အမျိုး အစားဖြစ်တယ်။

မမှန်တဲ့ ပြောဆိုချက်တွေကို ကြားရပေမဲ့လဲမချေပ၊ တန်ပြန်တော်လှန်ရေးသမားများရဲ့ ပြောဆိုချက်များကို ကြားရတဲ့အခါ တောင်ဆိုင်ရာကို မတိုင်ကြားဘဲ အေးအေးဆေးဆေးမသိလိုက် မသိဖါသာနေတယ်။ ဒါဟာဆဋ္ဌမအမျိုးအစားဖြစ်တယ်။

လူထုထဲရောက်တဲ့အခါ ဝါဒမဖြန့်၊ မလှုံ့ဆော်၊ မဟောပြော၊ မစုံစမ်းမမေးမြန်း၊ လူထုရဲ့အခက်အခဲကို ဂရုမစိုက်၊ဖါသိဖါသာ နေတယ်။ ကိုယ်ဟာ ကွန်မြူနစ်ပါတီဝင်ဖြစ်တယ်ဆိုတာကို မေ့နေတယ်၊ ကွန်မြူနစ်ပါတီဝင် ဖြစ်ရက်နဲ့ သာမာန်အရပ်သား လိုနေတယ်။ ဒါဟာသတ္တမအမျိုးအစားဖြစ်တယ်။

အလုပ်လုပ်ရာတွင် မစေ့စပ်မသေချာ၊ စီမံကိန်းနဲ့ ဦးတည်ချက်အတိအကျမရှိ၊ ဖြစ်ကတတ်ဆန်းလုပ်တယ်။ တော်ရိယော်ရိ လုပ်တယ်။ ဝတ်ကျေတမ်းကျေလုပ်တယ်။ ဒါဟာ နဝမ အမျိုးအစားဖြစ် တယ်။

ကိုယ့်ကိုယ်ကို တော်လှန်ရေးအတွက် အကျိုးပြုခဲ့သူလို့ ယူဆပြီး ဝါရင့်သူကြီးအဖြစ် ဂိုက်ထုတ်တယ်။ တာဝန်ကြီးများကိုလဲ မထမ်းဆောင်နိုင်၊ တာဝန်ကလေးများကိုလဲ ထမ်းဆောင်ချင်စိတ်မရှိဘူး။ အလုပ်ကို ပေါ့ပေါ့ဆဆလုပ်တယ်။ ကြိုးကြိုးစား စားမလေ့လာဘူး။ ဒါဟာ ဒသမအမျိုးအစားဖြစ်တယ်။

ကိုယ့်မှားနေမှန်း သိရက်သားနဲ့ ပြင်ချင်စိတ်မရှိ။ ကိုယ့်အပေါ်ကိုယ်လစ်ဘရယ်ဝါဒကျင့်သုံးတယ်။ ဒါဟာ ဧကဒဿမ အမျိုး အစားဖြစ်တယ်။

ဒါတွေအပြင် အခြားအမျိုးအစားအချို့ကိုဖေါ်ပြနိူင်သေးပေမဲ့ ဒီ ၁၁ မျိုးကတော့ အဓိကပဲ။ ဒါတွေ အားလုံးဟာ လစ်ဘရယ် ဝါဒရဲ့သဏ္ဍာန်တွေဘဲ။

တော်လှန်တဲ့ စုပေါင်းအဖွဲ့အစည်းများအတွင်းမှာ လစ်ဘရယ်ဝါဒဟာ အလွန်အန္တရာယ်ကြီးတယ်။ ဒီဝါဒဟာ အတွင်းက လှိုက်စားတဲ့ အဆိပ်အတောက်တမျိုးဖြစ်လို့ စည်းလုံးမှုကို ပျက်ပြားစေတယ်။ လူချင်း အစေးမကပ်ဖြစ်စေတယ်။ အလုပ် လုပ်ရာမှာ ပေါ့ပေါ့ဆဆဖြစ်စေတယ်။ စိတ်ဝမ်းကွဲစေတယ်။ ဒီဝါဒဟာ တော်လှန်ရေးတပ်ဖွဲ့ကြီးရဲ့ တင်းကြပ်တဲ့ စည်းရုံးမှုနဲ့ စည်းကမ်းများကိုလဲပျက်ပြားစေတယ်။ ပေါ်လစီများကိုလဲ ပြည့်ပြည့်ဝဝ မကျင့်သုံးနိူင်စေဘဲ ပါတီအဖွဲ့အစည်းကိုလဲ ပါတီ ရဲ့ခေါင်းဆောင်မှုအောက်မှာရှိတဲ့ လူထုနဲ့ ကင်းကွာသွားစေတယ်။ ဒါဟာ ဆိုးဝါးတဲ့ သွေးဖီမှုတမျိုးဖြစ်တယ်။

ဓနရှင်ပေါက်စလူတန်းစားရဲ့ ကိုယ့်ကျိုးကြည့်မှုဟာ လစ်ဘရယ်ဝါဒရဲ့ ရေသောက်မြစ်ဖြစ်တယ်။ တဦးချင်းအကျိုးကို ရှေ့တန်းတင်ပြီး တော်လှန်ရေးအကျိုးကို ဒုတိယအဆင့်မှာထားလို့ တွေးခေါ်မှုအရ၊ နိုင်ငံရေးအရ၊ စည်းရုံးရေးအရ လစ်ဘ ရယ်ဝါဒ ဖြစ်ပေါ်လာတယ်။

လစ်ဘရယ်ဝါဒီတွေဟာ မာ့က်စ်ဝါဒမူတွေကို အကောင်အထည်မဲ့တဲ့ တရားသေများအဖြစ် သဘောထားကြတယ်။ မာ့က်စ် ဝါဒကို သူတို့လိုလားထောက်ခံကြပေမဲ့ ကျင့်သုံးဖို့ မရည်ရွယ်ကြ သူတို့မှာ မာ့က်စ်ဝါဒရော၊ လစ်ဘရယ်ဝါဒပါရှိကြတယ်။ သူတို့ ပါးစပ်ကပြောတော့ မာ့က်စ်ဝါဒ၊ လက်တွေ့လုပ်တော့ လစ်ဘရယ်ဝါဒကျင့်သုံးကြတယ်။ ဒါဟာလူတချို့ရဲ့ တွေး ခေါ်နည်းဖြစ်တယ်။

လစ်ဘရယ်ဝါဒဟာ အချောင်ဝါဒရဲ့ ပုံသဏ္ဍာန်တမျိုးဖြစ်ပြီး မာ့က်စ်ဝါဒနဲ့ ဖြောင့်ဖြောင့်ကြီး ဆန့်ကျင်နေတယ်။ ဒီဝါဒဟာ အဖျက်သဘောပါတဲ့အတွက် လက်တွေ့ကျတော့ ရန်သူကို အကူအညီပေးရာ ရောက်တယ်။ ဒါကြောင့် ကျွန်တော်တို့ အ တွင်းမှာ လစ်ဘရယ်ဝါဒတည်ရှိနေဖို့ ရန်သူက လိုလားတယ်။ လစ်ဘရယ်ဝါဒမှာ ဒီလိုသဘောလက္ခဏာမျိုးရှိနေတဲ့အတွက် ကြောင့် တော်လှန်ရေးတပ်ဖွဲ့ကြီးထဲမှာ သူ့ကိုနေရာမပေးသင့်ဘူး။

ကျွန်တော်တို့ဟာ အဖျက်သဘောပါတဲ့ လစ်ဘရယ်ဝါဒကို မာ့က်စ်ဝါဒရဲ့ အပြုသဘောဖြင့် ကျော်နင်းရမည်။ ကွန်မြူနစ် ပါတီဝင်ဟာ သဘောထားပွင့်လင်းရမည်။ သစ္စာရှိရမည်။ တက်တက်ကြွကြွရှိရမည်။ တော်လှန်ရေးအကျိုးကို ကိုယ့် အသက်မက အရေးထားရမည်။ ကိုယ်ကျိုးကို တော်လှန်ရေးအကျိုးရဲ့ လက်အောက်ခံအဖြစ်ထားရမည်။ ပါတီရဲ့ စုပေါင်း နေထိုင်ရေးကို ခိုင်မြဲစေဖို့၊ ပါတီနဲ့လူထုရဲ့ ဆက်သွယ်မှုကိုခိုင်မြဲစေဖို့အတွက်၊ ဘယ်အချိန်၊ ဘယ်နေရာမဆို မှန်တဲ့မူကို စွဲစွဲ မြဲမြဲဆုပ်ကိုင်ထားပြီး၊ မမှန်တဲ့ အတွေးအခေါ်နဲ့ အပြုအမူမှန်သမျှကို မငြီးငွေ့တမ်းတိုက်ပွဲဆင်ရမည်။ ကိုယ်ရေးထက် ပါတီ အရေးနဲ့ လူထုအရေးကို ပိုဂရုစိုက်ရမည်။ မိမိထက် သူများကို ပိုဂရုစိုက်ရမည်။ ဒါမှ ကွန်မြူနစ်ပါတီဝင်ပီသတယ်လို့ ဆို နိူင်မယ်။

သစ္စာရှိတဲ့၊ ပွင့်လင်းတဲ့၊ တက်ကြွတဲ့၊ ဖြောင့်မတ်တဲ့ ကွန်မြူနစ်ပါတီဝင်အားလုံး စည်းလုံးကြ၊ လူတချို့ရဲ့ လစ်ဘရယ်ဝါဒ သွေဖီမှုကို ဆန့်ကျင်ပြီး၊ သူတို့တတွေ လမ်းမှန်ရောက်လာအောင် ဆောင်ရွက်ကြ။ ဒါဟာ တွေးခေါ်မှုစစ်မျက်နှာက တာဝန် တရပ်ဖြစ်တယ်။ ။

မော်စီတုန်း လက်ရွေးစင်ကျမ်း အတွဲ ၂ ပထမအုပ်မှ လစ်ဘရယ်ဝါဒဆန့်ကျင်ကြ (COMBAT LIBERALISM) ဆောင်းပါး ဖြစ်ပါတယ်။