Wednesday, August 21, 2013

ဗမာ့မိုးကောင်းကင်မှာထာဝစဉ်ထွန်းတောက်နေမယ့်တာရာကြီး (ယာတောကသာဗြော)

0 comments
ဗမာ့မိုးကောင်းကင်မှာ ထာဝစဉ် ထွန်းတောက်နေမယ့်တာရာကြီး (ယာတောက သာဗြော)၂၀၁၃ခုနှစ်၊ သြဂုတ် ၂၁ရက်။
ကိုဟိုဒင်းရေ-
ဆရာဒဂုန်တာရာဆုံးသွားပြီ ဆိုတော့ ခေတ်သစ်ဗမာပြည်သမိုင်းမှာ ၁၃၀၀ပြည့်အရေးတော်ပုံမျိုးဆက်က မီးရှူးတန်ဆောင်ကြီးတွေ တယောက်ပြီးတယောက်ချုပ်ငြိမ်းသွားကြတာ ကုန်သလောက်တောင်ရှိပါပေါ့လားလို့ စဉ်းစားနေမိတယ်။ ဒီမီးရှူးတန်ဆောင်ကြီးဟာ မီးဇာကုန်ဆီခမ်းလို့ ချုပ်ငြိမ်းခဲ့တာဖြစ်ပေမယ့် သူထွန်းညှိခဲ့တဲ့၊ သူလျှောက်လှမ်းခဲ့တဲ့ စာပေလမ်းကြောင်း၊ ငြိမ်းချမ်းရေးလမ်းကြောင်း တို့ကတော့ ဗမာပြည်ပြည်သူတွေအကြားမှာ ထိန်ထိန်ငြီးလျက်ကျန်ရှိတယ် လို့ဆိုချင်ပါတယ်ဗျာ။
ဆရာ့ရဲ့ထူးခြားချက်တခုက (ဒါဟာကိုလိုနီနိုင်ငံနဲ့ ကျွန်တော်တို့နိုင်ငံလို ပြည်သူတွေမလွတ်မြောက်သေးတဲ့နိုင်ငံတွေက ထူးခြားချက် ထင်ပါရဲ့) စာပေအနုပညာသမားပေမယ့် ပြည်သူ့လှုပ်ရှားမှုတွေ၊ တိုက်ပွဲတွေနဲ့ခွဲခွာလို့မရတာ၊ အဲဒါတွေမှာပါဝင်ခဲ့တာ၊ နောက်ပြီး အဲဒါတွေအတွက် သူကိုယ်တိုင်လည်းအဖမ်းခံရ၊ အဖိနှိပ်ခံရတာပဲဗျ။
သူလိုပုဂ္ဂိုလ်တွေလျော့သွားတော့ ကျွန်တော်တို့နိုင်ငံရဲ့သမိုင်းဖြစ်ရပ်မှန်တွေကို ဖော်ထုတ်ရေးမှာလည်း အားလျော့သွားတာအမှန်ပဲဗျ။ ကျွန်တော်တို့နိုင်ငံမှာက မနေ့တနေ့ကသမိုင်းလေးကိုပဲ အကြီးအကျယ်ငြင်းခုံနေကြရတယ်မဟုတ်လား။ အရင်တုန်းက ကျွန်တော်တို့ ကြားဖူးတာက “သတင်းစာများသည်သမိုင်းကိုပြောနေကြသည်တဲ့”။ အခုတော့ “စစ် ဗိုလ်ချုပ်များသည်သမိုင်းကိုပြောနေကြသည်” ဆိုတာမျိုးလုပ်နေကြတာကိုး။ ပုဂံရာဇ၀င်ကိုတုတ်ထမ်းပြီးငြင်းကြရတယ်လို့ဆိုပေမယ့် ဒီနေ့စစ်အာဏာရှင်တွေလက်ထက်မှာကျတော့ တုတ်ကလေးတချောင်းတောင်ထမ်းခွင့်မရှိတဲ့ ပြည်သူတွေ၊ သမိုင်းဆရာတွေဟာ ခြေဆုံးခေါင်းဆုံးလက်နက်တပ်ထားသူတွေနဲ့ ပြိုင် ငြင်းရသလိုဖြစ်နေတယ်လေ။ ဒီလိုအခြေအနေမျိုးမှာ ဆရာဒဂုန်တာရာရဲ့ ကျွန်တော်တို့နိုင်ငံအပေါ် ကောင်းမှုပြုချက်တွေထဲမှာ စာပေဘက်ကသာမကပဲ သူရေးတဲ့ဆောင်းပါးတွေ၊ ရုပ်ပုံလွှာတွေ၊ ၀တ္ထုတွေနဲ့သမိုင်းဖြစ်ရပ်မှန်တွေကို မှတ်တမ်းတင်သွားတာတွေဟာ တန်ဘိုးရှိလှတယ်လို့ ပြောချင်ပါတယ်။ သူလိုလူနဲ့တော့ ဘယ် စစ်ဗိုလ်မှပြိုင်မငြင်းရဲဘူးမဟုတ်လား။ သူကကိုယ်တိုင်ကြုံတွေ့ ဖြတ်သန်းလာတာ၊ သူများတွေလို တဆင့်ကြားတွေနဲ့ တတ်ယောင်ကားလုပ်တာ မဟုတ်ဘူးဗျ။
အလားတူပဲ ဆရာဒဂုန်တာရာကို အမှတ်မပေးမဖြစ်ပေးရမှာကတော့ သူ့ရဲ့စာပေနယ်ကဆောင်ရွက်ချက်များနဲ့ အောင်မြင်မှုများပေါ့ဗျာ။ ဒီနေရာ၊ ဒီစာတိုလေးမှာ ဆရာ့ရဲ့စာပေဂုဏ်ပုဒ်တွေအားလုံးကို တချီထဲရေးဖို့ဆိုတာမဖြစ်နိုင်သလို၊ ကျွန်တော်လည်း မကြိုးပမ်းပါဘူး။ ကျွန်တော့်အတွေ့အကြုံထဲက ပြောသင့်တယ်ထင်တာလေးတွေပဲ နည်းနည်းပါးပါရေးပါ့မယ်။ ကျွန်တော်တို့လူငယ်ဘ၀တုန်းက ကိုယ်စေတနာထားသူကို ကိုယ်ဖတ်စေချင်တဲ့စာပေမျိုး ပေးဖတ်မယ်ဆိုရင်၊ ဒါမှမဟုတ် စာကောင်းပေကောင်း ပေးဖတ်ခိုင်းတယ်ဆိုရင်၊ ကိုယ်ချစ်တဲ့လူကို စာအုပ်ပေးဖတ်မယ်ဆိုရင် ဆရာဗန်းမော်တင်အောင်ရဲ့စာအုပ်တွေနဲ့ ဆရာဒဂုန်တာရာရဲ့စာအုပ်တွေထဲကပဲ အများဆုံး ဖြစ်ခဲ့တာ ခင်ဗျားလည်းမှတ်မိမှာပါ (ခင်ဗျားလည်းပေးဖူးမှာပါ)။ အဲဒီတော့ အဲဒီခေတ်တုန်းကရော၊ အခုခေတ်မှာရော ဘယ်စာရေးဆရာရဲ့ စာအုပ်တွေကိုများ အဲဒီလိုသီးသီးသန့်သန့်၊ သတ်သတ်မှတ်မှတ်နဲ့ စာပေလက်ဆောင်အဖြစ် များများစားစားအပေးခံရတာရှိလို့လဲလို့ မေးချင်ပါတယ်။ ကျွန်တော်ပြောတာ လုံးဝမရှိဘူးပြောတာမဟုတ်ဘူးနော်။ နောက်ပြီး ဆရာမင်းသုဝဏ်တို့ ဆရာဇော်ဂျီတို့လို ဆရာကြီးများရဲ့စာပေများကိုလည်း မဆိုလိုဘူးနော်။ “မေ”ကိုလက်ဆောင်ပေးဖူးသူတွေ၊ “အလင်္ကာ(ကဗျာပေါင်းချုပ်)”ကို လက်ဆောင်ပေးသူတွေ အများကြီးရှိခဲ့တယ်မဟုတ်လား။
ဆရာဟာ စာပေမှာ အကြောင်းအရာနဲ့အနုပညာကိုပေါင်းစပ်ရာမှာ စံတင်ရတဲ့ပုဂ္ဂိုလ်တယောက်လို့ဆိုရင် မမှားဘူးထင်ပါတယ်။ စာပေဟာ ကြွေးကြော်သံမဆန်ရဘူး၊ ၀ါဒဖြန့်စာတမ်းမဆန်ရဘူးဆိုတဲ့ မူပေါ်လစီကို တိတိကျကျနဲ့ ပြောင်ပြောင်မြောက်မြောက် အကောင်အထည် ဖော်သွားသူလို့ဆိုချင်ပါတယ်။ သူလိုလူတွေရဲ့ရေးသားချက်တွေကြောင့် ဗမာပြည်က ပညာတတ်တွေအကြားမှာ နယ်ချဲ့ဆန့်ကျင်ရေး၊ ဖက်ဆစ်ဆန့်ကျင်ရေး၊ ငြိမ်းချမ်းရေးနဲ့တိုးတက်တဲ့အယူအဆတွေပျံ့နှံ့ခဲ့တယ်လို့ဆိုတင်လည်း မမှားပါဘူးကိုဟိုဒင်းရယ်။
နောက်တခုပြောစရာရှိသေးတာက ပဒေသရာဇ်ခေတ်နောက်ပိုင်း ဗမာစာပေလောကမှာ စကားပြေအရေးကောင်းတဲ့စာရေးဆရာတွေ များမှများပါ။ လေးစားသင့်၊ အတုယူသင့်တဲ့ဆရာကြီးတွေ၊ ဆရာမကြီးတွေအပုံကြီးရှိပါတယ်။ ဒါပေမယ့် ကိုဟိုဒင်းရယ် ဆရာဒဂုန်တာရာရဲ့စကားပြေအရေးအသားလို လူငယ်တွေကပြောင်တမျိုး၊ တိတ်တိတ်ကြိတ်လို့တဖုံ အတုခိုးခံရတဲ့ စကားပြေမျိုးကတော့ နည်းတယ်လို့ထင်ပါတယ်။ ကျွန်တော်က သူ့ရေးဟန်ကိုကောင်းတယ်၊ မကောင်းဘူး ဘာမှမပြောဘူးနော်၊ လူငယ်တွေ၊ ကလောင်သွေးချင်သူတွေအပေါ် သြဇာညောင်းတာကိုပြောတာ။ သူ့ဟန်ကိုတုရင်း နာမည်ကြီးစာရေးဆရာဖြစ်သွားသူတွေလည်း မနည်းပါဘူး။
ကဗျာမှာရောဗျာ-။ သူနဲ့ခေတ်ပြိုင်တွေထဲမှာ သူ့ကဗျာတွေလောက် လူကြိုက်များခဲ့တာမရှိခဲ့ဘူးလို့ ကျွန်တော်ရဲရဲပြောဝံ့ပါတယ်။ သူ့သြဇာတွေညောင်းခဲ့ပါတယ်လို့ ပွင့်ပွင့်လင်းလင်းပြောဆိုဝန်ခံခဲ့တဲ့ ကဗျာဆရာတွေတောင် မနည်းဘူးမဟုတ်လား။ ဒီနေရာမှာ အချင်းချင်းမို့ လက်တို့ပြောလိုက်ပါဦးမယ်။ ကဗျာဆရာဖြစ်မလာတဲ့ကျွန်တော်လည်းပဲ သူ့ရဲ့ တဟီတီသွားရအောင်တို့၊ ငွေလှေပေါ်ကအနမ်းတို့လို ကဗျာတွေကို အတုခိုးပြီးရေးစပ်ခဲ့တာ မနည်းဘူးဗျ။ ပါရမီထင်ပါရဲ့ဗျာ။ ဆရာနုပျိုစဉ်က စကားလုံးအသစ်တွေ တီထွင်တာကို အတိုက်အခိုက်ခံရတာတွေလည်း ခင်ဗျားမှတ်မိတယ်မဟုတ်လား။ '၀တ်လစ်စလစ် လမ်းမကြီး'တို့၊ 'ဝေါ့ဒစ္စနေအပြာ'တို့ ဆိုတာတွေလေ။ အဲဒီခေတ် အဲဒီအခါတုန်းကတော့ စာပေတိုက်ပွဲကြီးတွေတမျှပေါ့။ ကျွန်တော်ထင်တာတော့ သူ့ကိုတိုက်သူတွေဟာ ဆရာ့ရဲ့နိုင်ငံရေးရပ်တည်ချက်ကြောင့် အပြစ်ရှာကြံတိုက်ခိုက်ကြတာပဲဗျ။ သူ့ရဲ့စာပေသစ်ကြွေးကြော်သံနဲ့ စာပေသစ်လှုပ်ရှားမှုကို “ဝဲ”စော်နံတယ်ဆိုပြီး အာဃာတနဲ့တိုက်ကြတာ။ နောက်ဆုံးကျတော့- တနည်း သမိုင်းဘီးလည်ပတ်လာတော့ ဆရာ့ရဲ့တီထွင်ချက်၊ စမ်းသပ်ချက်တွေဟာ လမ်းဖုံဖုံဖြစ်လာတာပဲမဟုတ်လားဗျ။ အဲဒီတုန်းကတော့ စစ်အေးစစ်ပွဲအစကိုး။
စစ်အေးစစ်ပွဲဆိုလို့ ဆရာ့ရဲ့ဘ၀မှာ စစ်အေးစစ်ပွဲရဲ့ဂယက်တွေရိုက်ခံရတာလည်း မနည်းဘူးဗျ။ ဗမာပြည်မှာ ဖဆပလအစိုးရဟာ ပြည်တွင်းစစ်ပေါ်ပေါက်အောင် လုပ်လိုက်ပြီးတဲ့နောက်မှာ အမေရိကန်က မက္ကာသီဝါဒကိုအတုခိုးပြီး “ဝဲ”လို့ သူတို့ယူဆသူမှန်သမျှကို စုံထောက်ဖိုင်တွေဖွင့်၊ မပြတ်စောင့်ကြည့်တာတွေ လုပ်တော့တာပဲ။ ဒီအခါမှာ ဆရာတာရာလည်း ဘယ်လွတ်လိမ့်မတုံးဗျာ။ သူလည်းပဲ ထောက်လှမ်းရေးရဲ့ အမည်းရောင်(အနီရောင်ခေါ်မလားပဲ)စာရင်းထဲ ပါတော့တာပေါ့။ အဆိုးဆုံးကတော့ ဗိုလ်နေ၀င်းခေတ်ပေါ့။ အင်္ဂလိပ်ကိုလိုနီနယ်ချဲံ၊ ဂျပန်ဖက်ဆစ်နယ်ချဲ့နဲ့ ဖဆပလရဲ့ပြည်တွင်းစစ်ဝါဒတို့ကို တက်တက်ကြွကြွ၊ ရွတ်ရွတ်ချွံချွံတိုက်ခဲ့တဲ့ ဆရာဒဂုန်တာရာဟာ စစ်အာဏာရှင်တွေလက်ထက်ကျမှ ထောင်ထဲရောက်ရတော့တယ်။ လူတွေကိုဖိနှိပ်ချုပ်ချယ်ရာမှာ အာဏာရှင်စနစ်၊ အထူးသဖြင့်ပြည်တွင်းကအာဏာရှင်စနစ်ဟာ လက်သံအပြောင်ဆုံး၊ အရက်စက်ဆုံးလို့ပြောနိုင်တာပေါ့ဗျာ။          
တကယ်က ဆရာတာရာဟာ ဆရာကြီးသခင်ကိုယ်တော်မှိုင်းရဲ့ တပည့်နောက်လိုက်ပီပီ၊ သမိုင်းခေတ်အဆက်ဆက်မှာ ဘယ်တုန်းကမှ ရပ်တည်ချက် မမှားခဲ့တဲ့သူပါ။ သူဟာနိုင်ငံရေးမလုပ်ဘူးလို့ စိတ်ဒုံးဒုံးချပေမယ့် ခေတ်နဲ့စနစ်တို့ရဲ့တွန်းပို့မှု၊ တောင်းဆိုချက်တို့အရ သူဟာနယ်ချဲ့ဆန့်ကျင်ရေး၊ ဖက်ဆစ်ဆန့်ကျင်ရေး၊ စစ်ဖန်တီးမှုဆန့်ကျင်ရေးစကားတွေကို ပြောရ၊ ရေးရတဲ့အဖြစ်ကို ရောက်ခဲ့ရပါတယ်။ ဒါဟာ ဖိနှိပ်သူနဲ့အဖိနှိပ်ခံတွေ ပြက်ပြက်ထင်ထင်ကွဲပြားပြီး ပြင်းပြင်းထန်ထန်ပဋိပက္ခဖြစ်နေတဲ့နိုင်ငံတခုမှာ လူတွေဟာ နိုင်ငံရေးနဲ့ကင်းချင်လို့မရဘူး၊ တဘက်ဘက်မှာ မရပ်လို့မရဘူးဆိုတဲ့သာဓက တခုပါပဲ။
ကဲ၊ ဒီစာကို နိဂုံးချုပ်ရင်တော့ ထုံးစံအတိုင်းပဲ “သူတို့ကတော့တာဝန်ကျေသွားကြပြီ”ဆိုတဲ့ ၀ါကျကိုလည်း မပါမဖြစ်ရေးရမှာပါပဲ။ သဘောတရားအရဆိုရင် သူရဲကောင်းတွေ၊ အာဇာနည်တွေကို နောင်လူထုအရေးတော်ပုံကြီးတွေက မွေးထုတ်ပေးဦးမှာပါ။ ဒါပေမယ့် ဆရာဒဂုန်တာရာလို စာပေအနုပညာရော၊ နိုင်ငံရေးမှာပါ ဂုဏ်တင်ရမယ့်သမိုင်းဝင်ပုဂ္ဂိုလ်မျိုးကတော့ လွယ်လွယ်နဲ့ထပ်ပေါ်ပါ့မလားဗျာ။
တောင့်တခြင်းမှလွဲ၍ ဘာမှမတတ်နိုင်တဲ့ ကျွန်တော့်ကိုခွင့်လွှတ်နိုင်ပါစေလို့မျှော်လင့်ပါတယ်။
ဘယာဘေး ကွာဝေးကြပါစေ။
ယာတောကသာဗြော

0 comments:

Post a Comment