(မဟာတော့ မိတ်ကြပါတယ်)

(မဟာတော့ မိတ်ကြပါတယ်)
ကြံ့ဖွံ့၊ ကိုကိုကြီးပါတီ၊ ရွှေမန်းပါတီ၊ လူမျိုးစုပါတီတချို့၊ လက်နက်ချပါတီထောင်လူမျိုးစုပါတီတချို့ ရွေးကောက်ပွဲမဟာမိတ်ဖွဲ့မလိုလို သတင်းထွက်နေပါတယ်။ ဟုတ်မဟုတ် တီးခေါက်စုံစမ်းကြည့်ကြပါခင်ဗျ။ ဒီလိုအခြေအနေမှာ ဒီလိုဖြစ်ကြတာဆိုလည်း မဆန်းသလို တကယ့်လစ်ဘရယ်လ်ဒီမိုကရေစီနိုင်ငံတွေမှာလည်း ပါတီတွေ မဟာမိတ်ဖွဲ့ကြ အားယူကြ အားပြိုင်ကြတွေရှိတာမို့ ထူးခြားတယ်လို့ ပြောမရပါ။

မဟာမိတ်ဖွဲ့ကြတာမှာ ရေရှည်ဗျူဟာမြောက်မဟာမိတ်ဖွဲ့တာရှိသလို ရွေးကောက်ပွဲအတွက်ပဲရည်ရွယ်တဲ့ ယာယီမဟာမိတ်ဖွဲ့တာရှိပါတယ်။ ဒီနှစ်ခုတော့ ကွဲပြားကြမယ်ထင်ပါတယ်။

အပေါ်မှာပြောတဲ့ "ဒီအခြေအနေ"ဆိုတာက အင်န်အယ်လ်ဒီမှာ အခြားလူမျိုးစုပါတီတွေနဲ့ ရေရှည်ဗျူဟာမြောက်မဟာမိတ်ဖွဲ့မှုရော ယာယီရွေးကောက်ပွဲမဟာမိတ်ဖွဲ့ထားမှုရော မရှိတာကိုပြောတာပါ။ ဒေါက်တာဇော်မြင့်မောင် အတိအလင်းပြောခဲ့တာနဲ့ အင်န်အယ်လ်ဒီ နောက်ဆုံးလုပ်ခဲ့တဲ့ ဗဟိုကော်မတီအစည်းအဝေးထုတ်ပြန်ချက်တွေမှာ အထင်အရှားတွေ့ရမှာပါ။ အထူးအဆန်းမဟုတ် ထူးထူးခြားမဟုတ်ဆိုတာက မဟာမိတ်ဖွဲ့တဲ့အထဲပါတဲ့ပါတီတခုချင်းစီရဲ့ အာဏာအကျိုးစီးပွားအခြေခံဖြစ်တာမို့လို့ပါ။ အာဏာအကျိုးစီးပွားအခြေခံဆိုတာက နိုင်လို့အစိုးရဖွဲ့ရင် နိုင်ငံရေးရာထူးနေရာတွေ ဝေပုံကျခွဲယူတာဖြစ်ပါတယ်။

ဒီလို မဟာမိတ်ဖွဲ့ခြင်းနဲ့ တပ်ပေါင်းစုဖွဲ့ခြင်းကို ရောထွေးလို့မရပါ။ ကွဲပြားခြားနားပါတယ်။ တပ်ပေါင်းစုဆိုတဲ့သလောက တဦးချင်းပါဝင်ခွင့်ရှိသလို တဖွဲ့ချင်းတွေလည်း ပါဝင်ကြတာဖြစ်ပြီး အလုပ် အတူတူလုပ်လို့ရမယ့်လမ်းစဉ်ချပြီး ဝိုင်းလုပ်ကြတာပါ။ မိမိတို့ လူတန်းစားအကျိုးစီးပွားတွေ တနည်းပြောရရင် ပါတီအကျိုးစီးပွားတွေကို အခြေမခံပါ။

လမ်းစဉ်ချတယ်ဆိုတာ ဘယ်သူက ရန်သူ၊ ဘယ်သူက မိတ်ဆွေ၊ ဘယ်သူက ကြားချရမယ့်သူ၊ ဘယ်သူက စည်းရုံးသိမ်းသွင်းရမယ့်သူဆိုတာကို သတ်မှတ်တာပါ။

ဆိုတော့ တပ်ပေါင်းစုကြီးမှာပါဝင်တဲ့လူတွေ အဖွဲ့တွေမှာ ဘုံရန်သူရှိပါတယ် ဘုံလုပ်ငန်းစဉ်(လမ်းစဉ်)ရှိပါတယ်။ ဘုံလုပ်ငန်းကို ဘုံကဝိုင်းလုပ်ကြတာပါ။ ဗမာပြည်အနေနဲ့ဆို ဖဆပလ အဖွဲ့ချုပ်ကြီးကိုပြရမှာဖြစ်ပါတယ်။ အင်န်အယ်လ်ဒီမှာ အဖွဲ့ချုပ်(တပ်ပေါင်းစု)လက္ခဏာဆောင်သလိုလိုထင်ရတဲ့ကာလတခု ခနဖြစ်ခဲ့ဖူးတာရှိပေမယ့် တကယ်က အင်အားကြီးပါတီကြီးတခုသဘောက အခြေခံအဖြစ်တောက်လျှောက် ရှိနေတာပါ။

ခုဖြစ်နေတာက တပ်ပေါင်းစုလိုမလို ငြင်းခုန်နေကြတာပါ။ တပ်ပေါင်းစုလိုမလိုဆိုတာက ဘုံရန်သူရှိမရှိပြဿနာပါ။ စစ်အုပ်စုဟာ ဘုံရန်သူဟုတ်မဟုတ် မသတ်မှတ်နိုင်ကြတာပါ။

ပြန်ချုပ်ရရင် ရေရှည်ဗျူဟာမြောက်မဟာမိတ်ဖွဲ့ဖွဲ့ ယာယီရွေးကောက်ပွဲမဟာမိတ်ပဲဖွဲ့ဖွဲ့ အဲ့ဒါတပ်ပေါင်းစုမဟုတ်ပါ။ အာဏာရာထူး နေရာခွဲဝေရေးအတွက် ခြေလှမ်းပြင်တာပါ။
မျိုးမြင့်ချို
နိုဝင္ဘာ ၁၄၊ ၂ဝ၁၉