(ချီလီလှုပ်ရှားမှုထဲက အလုပ်သမားများ)

(ချီလီလှုပ်ရှားမှုထဲက အလုပ်သမားများ)
ကွန်မြူနစ်တွေယုံကြည်တဲ့ လူတန်းစားမဲ့လောကရောက်သွားချိန်မှာ အုပ်စိုးသူလူတန်းစား(အစိုးရ)ဟာ အလိုလိုညှိုးရော်ခြောက်သွေ့သွားမယ်ဆိုတာနဲ့ Anarchists တွေပြောတဲ့ အုပ်စိုးသူလူတန်းစား(အစိုးရ)မလို ဆိုတာ မတူပါ။ Anarchism ကို မင်းမဲ့ဝါဒလို့ပြန်တာဟာလည်း Negative Sense ထွက်တာမို့ ဟန်မကျပါ။ ဗမာစကားမှာ ယေဘုယျအားဖြင့် မဲ့ ဆိုရင် မကောင်းတဲ့အနက်က ပိုထင်ပါတယ်။

အမေရိက က Occupy Wall street ၊ ဥရောပက Yellow Vest အခု ချီလီအပါအဝင် နိုင်ငံတချို့မှာဖြစ်နေတဲ့လှုပ်ရှားမှုတွေမှာ Anarchists တွေရဲ့ပါဝင်မှုဟာ အားအလွန်ကြီးပါတယ်။ တစုံလုံးက လူထုအကျပ်အတည်းနဲ့ တပြည်လုံးကိစ္စဖြစ်နေလို့သာ သူတို့ ဝါဒရေးရာအရ ရှေ့တလှမ်းထပ်တိုးပြီး အလံထွက်ထောင်လို့မရတာပါ။ လှုပ်ရှားမှုကြီးထဲ လှုပ်ရှားမှုအသေးတွေတွေ(စစ်ပွဲထဲက တိုက်ပွဲတွေ)တချို့မှာ Anarchists တွေ ပေါ်ပေါ်တင်တင်ထွက်ပါတယ် အလံထောင်ပါတယ် ဆိုင်းဘုတ်တင်ပါတယ်။

သပိတ်စုံဖြစ်တဲ့အလျှောက် လူတန်းစားပေါင်းစုံ အလွှာစုံပါပါတယ်။ ဘယ်သူက အတွေးအခေါ်အရ (သဘောတရားရေးအရ)၊ နိုင်ငံရေးအရ(လမ်းစဉ်အရ)၊ စည်းရုံးရေး(အလုပ်အဖွဲ့အစည်းများ) ဦးဆောင်နေတယ်ဆို ရှင်းရှင်းလင်းလင်းမရှိသလို သဲသဲကွဲကွဲလည်း မမြင်ရပါ။

Anarchists တွေ ဆိုရှယ်လစ်တွေ အခြားလက်ဝဲအင်အားစုတွေ လစ်ဘရယ်လ်တွေ လက်ယာအစွန်းရောက်တွေ လူမျိုးရေးဝါဒီတွေ အစုံပါနေတာပါ။ လူထုကိစ္စဖြစ်တော့ အလုပ်သမားလူတန်းစားတွေ အလုပ်သမားသမဂ္ဂတွေလည်း ပါပါတယ်။ (အလုပ်သမားလူတန်းစားနဲ့ အလုပ်သမားသမဂ္ဂကို ခွဲပြောရတာက အရင်းရှင်နိုင်ငံတွေက အလုပ်သမားသမဂ္ဂဆိုတာမျိုးက အများစုအနေနဲ့တော့ အလုပ်ရှင်အလုပ်သမားကြားက ပွဲစားလောက်ရှိတာပါ။ ပွဲစားဆိုပေမယ့် လုပ်တတ်ကိုင်တတ်တော့ အလုပ်သမားတွေအတွက်တော့ တစုံတရာ အားထားလို့ရနေပါသေးတယ်။ တချို့အရင်းရှင်နိုင်ငံတွေက အလုပ်သမားသမဂ္ဂဆိုတာတွေကတော့ အလုပ်ရှင်(အရင်းရှင်)တွေရဲ့ ကိုယ်စားလှယ်အလုပ်တောင် လုပ်ပေးနေကြတာပါ။ ဒါ့ကြောင့် ခွဲပြောတာပါ)။

စက်ရုံအလုပ်ရုံတွေ ကုန်ထုတ်လုပ်ငန်းနဲ့ အစိုးရယန္တယား ရပ်ဆိုင်း သွားဖို့ဆို အလုပ်သမားလူတန်းစားပါမှဖြစ်ပါတယ်။ သူတို့မပါပဲ အစိုးရယန္တယားကြီး ရပ်ဆိုင်းသွားအောင် ဒါမှမဟုတ် တုံ့နှေးသွားအောင်လုပ်မရပါ။

ဒါပေမယ့် ခု ချီလီအပါအဝင် ကမ္ဘာ့နိုင်ငံတချို့မှာဖြစ်နေတဲ့ လူထုလှုပ်ရှားမှုတွေထဲက အလုပ်သမားလူတန်းစား(အလုပ်သမားတွေ)က အလုပ်သမားလူတန်းစားအတွေးအခေါ် သဘောတရားတပ်ဆင်ပြီးသားတွေပါလို့ သိမ်းကြုံးပြောဖို့ခက်ပါတယ်။ ပြောမယ်ဆိုလည်း မမှန်နိုင်ပါ။ အလုပ်သားလူတန်းစားအတွေးအခေါ်နဲ့သဘောတရား ပီပီပြင်ပြင် မတပ်ဆင်ရသေးတဲ့ မဆုပ်ကိုင်မိသေးတဲ့အလုပ်သမားကို တခြားလူများနည်းတူ သာမန်ဖိနှိပ်ခံအလုပ်သမားတွေလို့ပဲ ပြောလို့ရပါလိမ့်မယ်။

ကျနော်အပေါ်မှာပြောခဲ့သလို Anarchism ကပြောတဲ့အစိုးရမလိုနဲ့ ကွန်မြူနစ်တွေပြောတဲ့ အစိုးရရှိတော့မှာမဟုတ်က တူသယောင်ယောင်နဲ့ ဖီလာကျပါတယ်။

စပိန်ပြည်တွင်းစစ်မတိုင်မီ ပြည်တွင်းစစ်ကာလနဲ့ ပြည်တွင်းစစ်အပြီး စပိန်က Anarchists တွေနဲ့ သူတို့လှုပ်ရှားမှုတွေကို စူးစမ်းကြည့်ပါ။ ဆိုရှယ်လစ်ရေးလှုပ်ရှားမှုနဲ့ ပြဒါးတလမ်းသံတလမ်း ဖြစ်နေတာတွေ့ရပါလိမ့်မယ်။ အုပ်ချုပ်သူလူတန်းစား(အစိုးရ)မလိုအပ်ဘူးလို့ကြွေးကြော်တဲ့ စပိန် Anarchists တွေထဲက တချို့ဟာ အသစ်ဖြစ်ထွန်းလာတဲ့ စပိန်အစိုးရထဲမှာ နိုင်ငံရေးရာထူး ကြီးငယ်တွေ ယူခဲ့ကြ လက်ခံခဲ့ကြပါတယ်။ အလုပ်သမားမှာလည်း အတွေးအခေါ်နဲ့သဘောတရားတပ်ဆင်ထားပြီးသား အလုပ်သမားနဲ့ မတပ်ဆင်မိသေး မဆုပ်ကိုင်မိသေးတဲ့အလုပ်သမား ခြားနားပါတယ်။ လူထုလှုပ်ရှားမှုကြီးတွေမှာ အလုပ်သမားတွေ အလုပ်သမားသမဂ္ဂတွေပါတိုင်း ဒါဟာ အလုပ်သမားလူတန်းစားရဲ့ဦးဆောင်မှုလို့ ပုံသေကားချကောက်ချက်ဆွဲပြီး ပတ်တောပိတ်ပြောတာဟာ သင့်တော်တဲ့ကိစ္စမဟုတ်သလို မှန်ကန်မှုလည်းမရှိပါ။
မျိုးမြင့်ချို
ႏိုဝင္ဘာ ၁၈၊ ၂ဝ၁